Rongorongo man te Moan Beretitentii

Tarira ao Mwaanera aika a tangiraki,

Ataei ao te roronrikirake n Ana Ekaretia Iesu Kristo ibukiia Aika Itiaki ni Boong aika Kaitira bon natin te Atua mwaane ao aine aika a tangiraki. Iai aia konabwai ni karaoa te bitaki ae korakora iaon te aonaaba.

Reirei ake a reiakinaki n te mwakuri aei ibukiia ataei ao te roronrikirake a kaota ae rietata riki, te kawai ae mimitong ni kaunga te roro ae tabe n rikirake bwa a na iriira Iesu Kristo ao ni maiuakina Ana euangkerio n tabo nako inanon maiuiia. Kakaawakin te mwakuri korakora aei e na raonaki n reiakinan te euangkerio, te tibwanga n ibuobuoki, rikirakem i bon iroum, ao waaki ni kakukurei aika a kaunga. Te mwakuri aei e waaki man te mweenga. Kaaro iai tibwangaia ae tabu n reireiniia natiia inanon te ota ao te koaua. Taan kairiiri n te Ekaretia a anga aia boutoka aika a rangi ni kakaawaki ao kairi nakoia ataei, te roronrikirake, ao aia utu.

Ti tangirii ngkami. Ti onimakini ngkami. Ti berita bwa Tamara are i Karawa e na reitinako ni kakabwaiai ao ni kamatoai ngkami ngkai kam kairiia ao ni kaetiia Natina inanon te onimaki.

Te Moan Beretitentii ao te Kooram n Abotoro n te Tengaun ma Uoman

Mii ni Burabeti

Kakorakora aia onimaki te roro ae tabe n rikirake inanon Iesu Kristo, ao buokiia ataei, te roronrikirake, ao aia utu ni waaki nako iaon kawain te berita ngkai a kaitibo ma kaangaangan te maiu.