“Taian Tabe,” Ataei ao te Roronrikirake n Ana Ekaretia Iesu Kristo ibukiia Aika Itiaki ni Boong aika Kaitira: Kabwarabwaraan Aron te Kairi ibukiia Kaaro ao Taan Kairiiri (2019)
“Taian Tabe”
Taian Tabe
Mweenga ao Kaaro
Tera tabeu?
Riiki bwa banna aika tamaroa nakoia natimi. Reireiniia aroia bwa a na kanga n rikirake n aroaroia ni kabane inanon maiuia. Kakaai kawai ni buokiia bwa a na reiakina te kimwareirei ni kawakinan berita aika a tabu, karekei tarena aika a boou, ao ni karaoi bwaai aika matoatoa. Buokiia am utu bwa a na rikirake ni kaan riki nakon Tamara arei Karawa ao Iesu Kristo ao ni maiuakina te euangkerio inanon maiuia n te bong koraki.
Tera ae N na karaoia?
Kaotia nakoia natim bwa a na ataia mwaitira am tangira nakoia. Karekerekeko ma maiuia. Tataro mwaaka bwa ko na atai kainnanoia n tatabemaniia ao bairea kamatebwaian te euangkerio ao waaki ni kakukurei ake e kaineti ma kainanoia. Tibwaua am koaua nakoia n tainako. Marooro ma taan kairiiri bwa a na kanga ni kona n ibuobuoki ni boutokaia natim.
N na waaki mai ia?
Reitanako te mamarooro ao ongora irouia natim. Tataro bwa ko na kanga ni buotokaia. Buokiia bwa a na kunea ao ni moana aia waaki iaon bwaai ake a nano iai. Waaki ke reitinako n tataro n utu, kamatebwaia te euangkerio, anga n ibuobuoki, ao waaki ni kakukurei ni buokiia natim bwa a na rikirake.
Taan Kairiiri ao Taan reirei n te Moanrinan
Tera tabeu?
Tangiriia ao kakorakoraia nati. Buokiia kaaro ni buokiia natiia n namakina ana tangira Tamara arei Karawa ibukiia, ao a na ataia bwa ana euangkerio Iesu Kristo, namakinna ao kinaa ana wirikiriki te Tamnei ae Raoiroi, ao katauraoi ao karaoi ao kawakin berita aika a tabu.
Tera ae N na karaoia?
Kakoaua bwa kiraati n te Moanrinan ao te tai n anene a buokiia ataei n namakina te Tamnei, karikirakeia inanon te onimaki, ao n namakina te kimwareirei n ana euangkerio Iesu Kristo inanon maiuia. Ma itera ake a na katamaroaki n Ruka 2:52 bwa te kairi, babaire aika kaunga ao anganano n ibuobuoki ma kakukurei are a na karikirakea te koaua, ni kakorakoraia utu, ao tararuan te katiteuanaaki ao rikirakem i bon iroum.
N na waaki mai ia?
Karekea kinakiia ataei ma aia utu, ao ibuobuoki ni kainnanoia. Ngkai beretitentii n te Moanrinan, tataro mwaaka bubuti bwa e kanga aron buokaia am tia reirei, taan kairiiri n te katangitang, ao taan kairiiri ni waaki ni kakukurei ni buokiia ataei n iriira te Tia Kamaiu.
Taan kairiiri irouia Ataeinnaine
Tera tabeu?
Buokiia kaaro ao kain te bitiobiriki ni kairiia ao ni kaungaia kairake n ataeinnaine bwa a na ataa kinakiia bwa nati aine iroun te Atua, a na katauraoi ibukin berita aika a tabu n te tembora, ao ni kakoroi bukin tibwangaia mai karawa. Kairiia kain te beretitentii n te kiraati ngkai a kairiiri, ibuobuoki nakoia, ao ni beku ibukiia kain aia kiraati.
Tera ae N na karaoia?
Katea te banna ni katooto n riki bwa ana reirei Iesu Kristo. Kairiia kain te beretitentii n te kiraati ngkai a tataro mwaaka ni baire ao ni buokiia n anga reirei man Nakomai, Iriirai—Ibukiia Kairake n Ataeinnaine. Kaungaia bwa a na kairiiri inanon babaire ao karaoan mwakuri n ibuobuoki ao waaki ni kakukurei ake a na buokiia ataeinnaine n rikirake inanon waakin nako maiuia. Anga reitan te boutoka nakoia ataeinnaine ake a kainnanoia.
N na waaki mai ia?
Karekea kinakiia ataeinnaine n tatabemaniia. Marooro ma ataeinnaine, aia karo, ao te bitiobiriki iaon arom ni kona n anga te boutoka ibukin rikirakeia ataeinnaine. Tataro bwa ko na ataa arom ni kona ni buokiia beretitentii n am kiraati n tokanikai iaon aia mwakuri.
Taan Kairiri n te Nakoanibonga ae te Aaron
Tera tabeu?
Buokiia kaaro ao kain te bitiobiriki ni katauraoia ataeinimwaane ibukin kamatoakiia nakon te nakoanibonga, berita aika a tabu n te tembora, mition, ao tibwangaia mai karawa. Kaungaia bwa a na ataa aia kouru ao kinakiia bwa natin te Atua aika mwaane. Kairiia beretitentii n te kooram ngkai ngaia taan kairiiri, ao ni beku ibukiia kaain aia kooram ao ngkai a karaoi mwakuri ibukin te otenanti n te toa.
Tera ae N na karaoia?
Katea te banna ni katooto n riki bwa ana reirei Iesu Kristo. Kairiia beretitentii n te kooram ngkai a kamwakuri aia king, a karaoi mwakuri ibukin te otenanti n te toa, ao babaire ma te tataromwaaka ao ibuobuoki n anga reirei man Nakomai, Iriirai—Ibukiia Ataeinimwaane. Buokiia bwa a na kairiiri ao ni karaoi mwakuri n ibuobuoki ao waaki ni kakukurei ake a na buokiia ataeinimwaane n rikirake n anga nako inanon maiuia. Anganiia bwa a na kairiiri. Anga reitan te boutoka nakoia ataeinimwaane nakoia ake a kainnanoia.
N na waaki mai ia?
Kabanea am tai ma ataeinimwaane. Karekea kinakiia ao tangiriia n tatabemaniia. Marooro ma te bitiobiriki, ataeinimwaane, ao aia karo ni kataia bwa ko na kanga ni kona ni boutokaiia ngkai a rikirake n riki n ai aron te Tia Kamaiu. Tataro bwa ko na ataa arom ni kona ni buokiia beretitentii n am kooram ni kabonganai aia king ao n tokanikai iaon aia mwakuri.
Taan reirei n te Reirei n Tabati
Tera tabeu?
Kataia ni buokiia te roronrikirake bwa a na nakon Kristo man reiakin ao n iriiri Ana reirei. Reireiniia te roronrikirake bwa a na ota, a tibwatibwa, ao ni maiuakina ana euangkerio Iesu Kristo.
Tera ae N na karaoia?
Katea te banna ni katooto n riki bwa ana reirei Iesu Kristo, ao buoka te roronrikirake ni katea aia onimaki. Kaungaiia bwa a na kamatebwai koroboki aika a tabu n te mweenga—n tatabemaniia ma aia utu. Buokiia ni katauraoia ao n reireiniia reirein te koaua. Kaoia bwa a na karaoi bwaai ake a reiakini ibukin rikirakeia i bon irouia.
N na waaki mai ia?
Kataia n reirei n aron are e karaoia te Tia Kamaiu. Kataia bwa ko na kinaia te roronrikirake n tatabemaniia. Tataro bwa ko na ataia bwa kona kanga ni buokiia n aron rikirakeia n riki n aron te Tia Kamaiu. Kakorakoraia kain te kiraati ao aia karo n aia kekeiaki n reiakin ao n reirei te euangkerio n te taromauri ao ni mweengaia.
Bitiobiriki ao te Kooram ao Beretitentii ni Kiraati
Tera tibwangaia?
Te bitiobiriki bon te beretitentii n te Nakoanibonga ae te Aaron n te uoote ao e tabe ibukiia ataeinnaine ao ataeinimwaane. Beretitentii n te Kooram n te Nakoanibonga ae te Aaron a mwakuri man king ake a anganaki beretitenti n te kooram ngke a kamatoaaki. Beretitentii n te kiraati n te Bootaki n Ataeinnaine a mwakuri iaan te kariaia n te nakoanibonga imwiin kamatoakiia mairoun te membwa n te bitiobiriki.
Tera ae a karaoia?
Beretitentii a riai ni kataia n riki bwa ana reirei ni koaua Iesu Kristo ngkai a buokiia membwa nako n te kooram ke n te kiraati n namakina te tangiraki ao ni karekea te kimwareirei ni maiuakinan te Euangkerio. Iaan ana kairiiri te bitiobiriki, beretientii n te kooram a kairiia kaain te nakoanibonga ae te Aaron ngkai a karaoi mwakuri n te otenanti n te toa. Beretitentii n te kooram ao n te kiraati a kairiiri n ikotakia Iteraera iaon iteran te roki aika uoua ao n tabeakinia naake a rootaki n te kainnano.
A na waaki mai ia?
Beretitentii a reiakina tabeia mairoun te Uea ao mai irouia aia taan kairiiri. A tataro ibukin te kooram ke kain te kiraati ao ni kataia n atai kainnanoia. A boutokaia n riki bwa ana reirei Iesu Kristo. A ikotaki ni marooro iaon reirei, waaki ni kakukurei, ao mwakuri n ibuoboki e na kakabwaiaia ao ni kakorakoraia te roronrikirake ao ni uota te katiteuanaaki nakoia aia kooram ke aia kiraati.