Kabwarabwaraana

Te uaia ni mwakuri, kaaro ao taan kairiiri ni buokiia ataei ao te roronrikirake ni kanakoraoan rairakiia, bwa a aonga n tau n riki bwa ana reirei te Uea Iesu Kristo, ao n riki bwa mwaane ao aine aika a etieti rinanon:

• Kamatebwaian te euangkerio are e na kaunga te motinnano i bon iroum.

• Mwakuri n Ibuobuoki ao waaki ni kakukurei ake a kaitiaka te rabwata ao te tamnei.

• Rikirakem i bon iroum are ngaia kaotakin te rikirake ae bwanin.

Reirei ni kairi ao tibwanga aika kabuta ake a kaotaki n te boki ae uarereke aei a kona ni karaoaki. Tiaki tii teuana te kawai ae eti aron karaoakiia. Tabeua iango ao katooto a tauraoi n te aonraain n ChildrenandYouth.ChurchofJesusChrist.org. Ukoukora te wirikiriki bwa ko na ataa te kabanea n tamaroa ibukiia aomata nako (taraa “Nikoana ao Karaoana”).

Te Roro Ae Tabe n Rikirake

“Te kantaninga are e a tia ni karekea te Ekaretia n te tai ae maan bon buokakiia membwa ni kabane ni karikirakea aia onimaki iroun ara Uea Iesu Kristo ao Ana Mwakuri ni Kamaiu [ao] ni buokiia ni karaoan ao kawakinan aia berita ma te Atua.”

Beretitenti Russell M. Nelson, “Taeka ni Kaukuuki,” Ensign ke Riaona, Nobembwa. 2018, 7

Burabeti a tia n taekinna bwa te roro aei irouia ataei ao te roronrikirake bon te kabanea n tamaroa are e a tia ni karuoa te Uea nako aon te aba (taraa Russell M. Nelson, “Hope of Israel,” bootaki n taromauri ibukiia te roronrikirake n te aonaaba, Tuun 3, 2018, 16). Iai irouia te konabwai ni karekea te bitaki ae korakora iaon te aonaaba. A tia ni kaoaki bwa a na buoka ikotakiia tibun Iteraera n iteran te rabuna aika uoua. Te waaki ae rietata riki, man mimitong e kainnanoaki ibukin te tararua ao te ibuobuoki nakoia. Te waaki aei e na buokiia ataei ao te roronrikirake:

• Ataakin kinakiia ae akea tokina ao bukin rokoia.

• Kakaawakin rairakiia nakon Iesu Kristo, karekean Ana euangkerio inanoia ao kaungakiia n rineia bwa a na Iriiria.

• Kakoroa bukin am beku n te Nakoanibonga ae te Aaron.

• Ikotaki ni waaki inanon te mwakuri ni kamaiu.

• Karikirakea aroia n aia boutoka kaaro ao n aia ibuobuoki taan kairiiri n aron are e kainnanoaki.

• A na riai n tau n nakon te tembora ao ni karekea te kimwareirei n teimatoa iaon kawain te berita.

Ngkai ataei ao te roronrikirake a karekea te kaotioti ibukin maiuia, katea aia reitaki ae boboto iaon te euangkerio, ao ni kabonganai inaomataia ngkai a tabe n rikirake, a na bon tokanikai ni kakoroan bukin aia kantaninga.

Kataia Iriira te Tia Kamaiu

N rikirakena, Iesu e kainnanoia bwa e na reiakina kinaakina ao ana mition, n ai aroia natin te Atua n tatabemaniia ake a riai ni karaoi. E “riki rake Iesu n rabakau ma n ikawai, ma n akoaki iroun te Atua ma aomata” (Ruka 2:52). E rikirake n te aro ae baeranti, ao ai aroia ni kabane ataei ao te roronrikirake.

Buokiia ataei ao te roronrikirake ni uota te Tia Kamaiu inanon waakin nako maiuia—tiaki tii n te Tabati. Ngkai a kataia ni kabotoa maiuia iaon Iesu Kristo, E berita bwa e na kanakoa te Tamnei ae Raoiroi bwa e na riki bwa aia tia karaunano ao aia tia kairiiri.

Riki, iriirakin te Tia Kamaiu e moanaki man te mweenga. Taan kairiiri n te ekaretia a katauraoi boutoka aika a kakaawaki ibukiia aomata nako ao utu.

“Ao E riki rake Iesu n rabakau ma n ikawai, ma n akoaki iroun te Atua ma aomata.”

Ruka 2:52

Boboto-n te Mweenga

“Ai tain ngkai te Ekaretia ae boboto n te mweenga, ni boutokaaki ni bwaai ake a karaoaki inanon ara mwaanga, ara uoote, ao n autin te titeiki.”

Beretitenti Russell M. Nelson, “Taeka ni Kaukuuki,” Ensign ke Riaona, Nobembwa 2018, 7

Kaaro a bairea aia taneiai n te utu ao marooro n reirei taekan ana euangkerio Iesu Kristo ao ni karekei kainnano aika a onoti ibukiia natiia n tatabemaniia. E riki aei ngkai utu a mwakuri ao a takakaro n ikotaki n aro ake a tau n reireiniia konabwai aika tau, kakorakora anuaia, ao katauraoi tibwanga are a na rikirake iai.

Kaunga te Rikirake

• Tataro ibukin te kairiri. Tamara are i Karawa e kinaia natina ao e na buokiia n reireiniia.

• Buokiia natimi bwa a na ukoukora ao ni kinaa ana wirikiriki te Tamnei ae Raoiroi.

• Kaota te tangira n tainako ao kamoamoaia natimi n aia kekeiaki ae tamaroa ao aia konabwai ni karaoa ae raoiroi ni katootonga Kristo ake ko nooria irouia.

• Taratarai anga ni buokiia tabeman n te utu.

Katauraoi Kairiiri

• Buokiia ataei bwa a na nooria bwa a na kanga ni karaoa nanon te euangkerio inanon mauia n aro nako.

• Kairiia natim ao kaungaia bwa a na katei aia kouru ao aia babaire.

• Buokiia bwa a na bon karekei katokan aia kaangaanga i bon irouia.

• Anga te boutoka, ibuobuoki, ao te kaunganano inanon aia waaki.

Marooro ma Taan Kairiiri

Reitaki ma taan reirei ao taan kairiiri ni baireia bwa a na kona n ataa aroia ae tamaroa are a kona iai ni boutokaia am ataei. Taratara raoi n aki urua inaomataia am ataei ke are a na maama iai.

Karekei bwaai n ibuobuoki n ChildrenandYouth.ChurchofJesusChrist.org.

Boutokaaki-n te Ekaretia

Boboto-n te Mweenga (Utu)

Boutokaaki-n te Ekaretia (Taan Kairiiri)

Tibwangan te Ekaretia e raonaki n reiakinan ana euangkerio Iesu Kristo, katauraoan otenanti ao boutokaan te mweenga. Taan kairiiri ao taan reirei a boutokaia kaaro man karaoan te reitaki ae matoatoa, ao tobwaakin aia reitaki ma ataei ao te roronrikirake are a beku ibukiia.

Marooro ma Kaaro

• Reitaki ma kaaro ni karekea aron boutokakiia natiia. Tibwai korakora ake ko noori.

• Titirakinia bwa tera n aia kantaninga are a na rinanona natiia ao n reiakinaki n te kooram n te Nakoanibonga, n aia kiraati Ataeinaine, ao ni waaki ni kakukurei.

Ngkana kaaro bon membwa aika aki rangi ni kakaonimaki n te Ekaretia:

• Kabwarabwara nakoia kaaro bwa te mwakuri aei bon boutokaakiia ataei ao te roronrikirake, ao titiraki bwa e kanga aron are a tangiria iai natiia bwa a na irekereke iai.

• Titirakiniia ataei ke te roronrikirake bwa aekakira te boutoka are a tangiria.

• Marooro ma te kauntira n te uoote iaon aron kairakiia kaaro bwa mwaitira are a kona.

Boutokaia Ataei ao te Roronrikirake

• Buokiia ataei ao te roronrikirake bwa a na kinaa ana wirikiriki te Tamnei ae Raoiroi.

• Titirakiniia bwa tera ae a tangiria n reiakinna ao n rinanona n te kooram ao n taian kiraati ao ni waaki ni kakukurei.

• Kaungaia bwa a na rimoa ni babaire ao ni kairii waaki ni kakukurei.

• Boutokaia kaain te Nakoanibonga ae te Aaron ni kakoroan nanon mwiokoaia n te kooram.

Karekei bwaai n ibuobuoki n ChildrenandYouth.ChurchofJesusChrist.org.

Reiakinan te Euangkerio

N te Mweenga

Kamatebwaian koroboki aika tabu i bon iroum ao n te utu ao te tataro e na buokiia ataei ao te roronrikirake n namakinna ao ni kinaa ana wirikiriki te Tamnei are Raoiroi ao n reiakinna n tangira te Tia Kamaiu. Aomata n tatabemaniia ao utu a kaungaaki bwa a na kabongana Nakomai, Iriirai—Ibukiia n Tatabemaniia ao Utu ao aia taeka burabeti aika a maiu ni kamatebwaia ana euangkerio Iesu Kristo.

N te Ekaretia

Ataei ao te roronrikirake a ikotaki bwa a na reiakina ana euankerio Iesu Kristo. Ataei a reiakina te euangkerio rinanon kaetieti n te kirati ao n tain te anene n te Moanrinan. Te roronrikirake a reiakina te reirei inanon taian kiraati ao kooram. Ataei ao te roronrikirake a kaoaki bwa a na tibwa te bwai are a reiakinna n te mweenga ao ni maiuakina te euangkerio inanon maiuia.

Boboto-n te Mweenga

• Tataro

• Kamatebwaian booki aika a tabu

• Kainutu n te tairiki

• Bongin te Tabati

• Rongorongon ngkoa te utu

Boutokaaki-n te Ekaretia

• Kaetieti n te Tabati

• Tieminari

Karekei bwaai n ibuobuoki n ComeFollowMe.ChurchofJesusChrist.org.

Mwakuri n Ibuobuoki ao Waaki ni Kakukurei

N te mweenga

Mwakuri n ibuobuoki ao waaki ni kakukurei a kariki anua aika a raraoi ni katoa bong, a katea te reitaki n te utu, a reireia te konabwai n te maiu, a karikirakei anuan Kristo, ao a buokiia ataei ao te roronrikirake bwa a na rikirake. Mwakuri n ibuobuoki n te utu ao waaki ni kakukurei a kona ni boboto iaon kainnanon temanna ma temanna ao te utu ao a karekei tibwanga ni karaoi reirein te euangkerio inanon taneiai ni katoa bong.

N te Ekaretia

Mwakuri n Ibuobuoki—n ikotaki ma kaain te Nakoanibonga ae te Aaron ni karaoi otenanti n te toa—ao waaki ni kakukurei ae taneiai te aba iai a katauraoi taai ni bootaki, n reiakin konabwa aika boou, ni katiai mwakuri aika a kaangaanga, ao ni kamatoai reitaki aika a boboto iaon te euangkerio ma rooro nako ao taan kairiiri. Taai aikai a buokiia ataei ao te roronrikirake n rikirake n te maiu n tamnei, ni boibuako, n rabwata, ao n te wanawana ao n anga te ibuobuoki ae kakaawaki nakoia tabeman. TiiBeeku (JustServe.org) bon te bwai n ibuobuoki ae kakaawaki ibukiia komiunitii.

Waaki ni kakukurei ni katoabong ibukiia te roronrikirake e kairaki Ibukin Kakorakorakiia Kairake (FSY) n aia maungatabu, aia maungatabu te roronrikirake, kaembwa, ao bobotaki tabeua. Waaki ni kakukurei aikai a kona ni buokiia te roronrikirake ni kakorakora riki nanoia ni kan iriira te Tia Kamaiu, ni kararoaia man aia mwakuri ake a kakaraoi, ao ni buokiia n noora aia itera n te kurubu ae bubura irouia te roronrikirake ake a uaia n tibwa te kouru ae raoiroi ma ngaiia.

Boboto-n te Mweenga

• Kainutu n te tairiki

• Ibuobuoki n te Utu

• Waaki ni kakukurei n te Utu

• Reirei

Boutokaaki-n te Ekaretia

• Otenanti n te Toa

• Iango ibukin mwakuri n ibuobuoki ao waaki ni kakukurei

• TiiBeeku

• Waaki ni kakukurei ni katoabong

• Katabeaki ni mwakuri n ibuobuoki

Rikirakem I bon Iroum

N te Mweenga

Ataei ao te roronrikirake a rinei bwaai ake a kona ni karaoi n rikirake ao n reiakinna n iriira te Tia Kamaiu. Kaaro a kona ni buokiia n ataa aroia are a tia n rikirake inanona ao n taabo ake a riai ni karikirakeia iai. Waaki ni kakukurei ni kabane, n raonaki ma te taromauri, reirei, iraorao, takakaro, te korotamnei, mwakuri, ao bwaai ake a nano iai n tatabemaniia a kona ni buokiia ataei ao te roronrikirake n iriira Iesu Kristo.

N te Ekaretia

Taan kairiiri a tangiriia ao a karekei kainnanoia ataei nako ao te roronrikirake ao ni kona riki n atai kainnanoia. Rinanon te reitaki n tangira, taan kairiiri a kona ni karekei bitaki aika onoti ao ma ni korakora ni boutokaia ao ni kaungaia ataei ao te roronrikirake n aia ibuobuoki n tatabemaniia ao n rikirake.

Boboto-n te Mweenga

• Kouru i bon iroum

• Kouru n te utu

• Te Kairiiri

• Kaunganano

• Te Tangira

Boutokaaki-n te Ekaretia

• Te Kairiiri

• Kaunganano

• Iango ibukin te kouru

• Bwaai n ibuobuoki n te uoote

Karekei bwaai n ibuobuoki ibukin waaki ni kakukurei ao kouru n ChildrenandYouth.ChurchofJesusChrist.org.

Bitia ao Kataneiako

“Te rongorongo n ana euangkerio Iesu Kristo are e kaokaki bwa ti kona ao n riai ni kantaningaia bwa ti na kona n tamaroa riki ni manra ni maiu.”

Beretitenti Henry B. Eyring, “Ara Banna ni Katooto aika Kororaoi,” Ensign ke Riaona, Nobembwa. 2009, 70

Aomata n tatabemaniia, utu, ao bootaki n taromauri a onoti. Tera ae nakoraoi iroun temanna e na kona n aki nakoraoi iroun are temanna. Karaoa te mwakuri ibukiia am utu, kiraati, kooram, ke am uoote. Marooroakina tibwangam ao am tabeaianga, ao ukoukori kaotioti bwa ko na kanga n karaoi mwakuri aikai ni buokiia ataei n tatabemaniia ao te roronrikirake ni karekea aia konabwai mai karawa.

Te katooto, ataei ao te roronrikirake a kakaokoro n aroia n rikirake i bon irouia: aekakiia, mwaitiia, ao aekakin nako kouru, ai aron naba mwaitin te boutoka are a kainnanoia, a riai ni baireaki ibukin temanna ma temanna. Kiraati nako ao kooram a bibitaki naba ibukin karekean kainnanoia. N reitaki ma anne, aekakin ao kakaokoron waaki ni kakukurei a kona ni bibitaki ni kaineti ma aron te tabo.

• Ukoukora te kaotioti

• Karekei kainnanoia n tatabemaniia

• Karaoa are e mwakuri

• Kabebetea

Kauarerekean kawakinana. Karaoa are e mwakuri.

Karekei bwaai n ibuobuoki n ChildrenandYouth.ChurchofJesusChrist.org.

Kaunganano ao te Kinaaki

“Ti karekea te koaua ao n reitinako ni kimwareirei ngkai ti atai riki ao ni karaoi koaua ni kinaakira bwa antai ngaira.”

Beretitenti Dallin H. Oaks, “Truth and the Plan,” Ensign ke Riaona, Nob. 2018, 25

Kaunganano

Ataei ao te roronrikirake a bon kaungaaki ngkai bwa a na namakina te tangiraki, te rikirake, ao n namakina te Tamnei ae Raoiroi inanon maiuia. Ngkana te bitaki ao te rikirake a moanna ni kaangaanga irouia, kaungaia bwa a na taratarai kawai ake a na tokanikai iai iaon kaangaanga ke ni karaoi bitaki n aia baire. Reitaki aika a korakora man onimakinaki iai kaaro, taan kairiiri, ao rooro e kona n anganiia te korakora n teimatoa ni kataia.

Te Kinaaki

Ngkai a rikirake ataei ao te roronrikirake, kamoamoaia n aia konabwai ao kaungaiia. Anganiia aia tai n tibwa te bwai are a reiakinna, ao ni bukamarua rikirakeia. N reitaki ma anne, ataei ni kabane ao te roronrikirake a kona ni karekei bwaai n aron te mwamwa ke te metera ni kauringiia bwa ngaiia mwakoron te kurubu n te aonaaba ae a na kataia n iriira Iesu Kristo. Ngkai ataei ao te roronrikirake a kakoroa bukin maiuia n tamnei, te boibuako, te maiu n rabwata, ao n aia kouru ni karekean te wanawana, a kona ni karekei rakan kanikina.

• Kakauongo

• Kamoamoai konabwai

• Katekeraoa te rikirake

• Reirei man kabwakam

Karekei bwaai n ibuobuoki n te ChildrenandYouth.ChurchofJesusChrist.org.