« ’Ōmuara’a », Te mau tamari’i ’e te feiā ’āpī o te ’Ēkālesia a Iesu Mesia i te Feiā Mo’a i te mau Mahana Hope’a nei : Hō’ē arata’i ’ōmuara’a nā te mau metua ’e te feiā fa’atere (2019)
« ’Ōmuara’a »
’Ōmuara’a
E ’ohipa ’āmui, te mau metua ’e te feiā fa’atere nō te tauturu i te mau tamari’i ’e te feiā ’āpī ’ia fa’ahōhonu i tō rātou fa’afāriura’a, ’ia riro ’ei mau pipi ti’amā nā te Fatu ra o Iesu Mesia, ’e ’ia riro mai ’ei mau tāne ’e ’ei mau vahine parau-ti’a nā roto i te :
-
’Apora’a mai i te ’evanelia ’o te fa’auru i te fafaura’a o te ta’ata iho.
-
Tāvinira’a ’e te mau fa’a’oa’oara’a ’o te ha’amaita’i i te tino ’e te vārua.
-
Fa’ahotura’a i te ta’ata iho ’o te fa’atupu i te tupura’a rahi ruperupe.
Te mau parau tumu arata’i ’e te mau ti’ara’a rahi i vauvauhia i roto i teie buka iti e mea fa’aauhia ïa. ’Aita hō’ē rāve’a maita’i nō te fa’a’ohipa i te reira. E roa’a te tahi mau mana’o ’e mau hi’ora’a i ni’a i te natira’a i te ChildrenandYouth.ChurchofJesusChrist.org. ’Imi i te fa’aurura’a nō te ’ite mai e aha te mea maita’i a’e nō te ta’ata tāta’itahi (hi’o « Fa’atano ’e fa’aau »).
Te u’i e ti’a mai nei
’Ua parau te mau peropheta ē, teie u’i o te mau tamari’i ’e te feiā ’āpī ’o rātou te mea maita’i a’e tā te Fatu i tono mai i ni’a i te fenua nei (hi’o Russell M. Nelson, « Ti’aturira’a nō ’Īsera’ela », purera’a nā te feiā ’āpī nā te ao ato’a nei, 3 nō Tiunu 2018, 16). E maita’i rahi tō rātou nō te fa’atupu i te hō’ē fa’aurura’a rahi i ni’a i te ao nei. ’Ua ani-manihini-hia rātou ’ia tauturu i te ha’aputuputura’a ia ’Īsera’ela i nā pae e piti o te pāruru. Tītauhia te hō’ē ravera’a teitei a’e ’e te mo’a a’e nō te utuutu ’e nō te aupuru ia rātou. E tauturu teie ravera’a i te mau tamari’i ’e i te feiā ’āpī :
-
’Ia ’ite i tō rātou ihota’ata mure ’ore ’e te ’ōpuara’a
-
’Ia fa’ahōhonu i tō rātou fa’afāriura’a ia Iesu Mesia, ma te tu’u i tāna ’evanelia i roto i tō rātou ’ā’au ’e ’ia fa’auruhia rātou ’ia mā’iti i te pe’e iāna.
-
’Ia fa’aoti i te mau tītaura’a o te autahu’ara’a a Aarona.
-
’Ia ’āmui tā’āto’a i roto i te ’ohipa nō te fa’aorara’a.
-
’Ia fa’ahotu i te ta’ata iho, ma te pāturuhia e te mau metua ’e ma te tauturuhia e te feiā fa’atere, ’ia hina’arohia.
-
’Ia ti’amā rātou nō te haere i te hiero ’e ’ia ’oa’oa maoro i ni’a i te ’ē’a o te fafaura’a.
’A fāri’i ai te mau tamari’i ’e te feiā ’āpī i te heheura’a nō tō rātou orara’a, ’a patu ai rātou i te mau aura’a fa’atumuhia i ni’a i te ’evanelia, ’e ’a fa’a’ohipa ai i te ti’amāra’a ’a tupu ai rātou i te rahi, e manuia rātou i te fa’aotira’a i teie mau ’ōpuara’a.
E tūtava i te pe’e i te Fa’aora
I roto i tōna ’āpīra’a, e ti’a ia Iesu ’ia ha’api’i mai i tōna ihota’ata hanahana ’e tāna misiōni, mai tei tītauhia i te tamari’i tāta’itahi a te Atua ’ia nā reira. « Tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a »(Luke 2:52). ’Ua pa’ari ’oia i roto i te hō’ē huru au maita’i, mai te reira ato’a te mau tamari’i ’e te feiā ’āpī ato’a.
Tauturu i te mau tamari’i ’e te feiā ’āpī ’ia fa’aō mai i te Fa’aora i roto i te mau tuha’a ato’a o tō rātou orara’a—’eiaha i te sābati noa. ’A tūtava ai rātou ’ia fa’ariro ia Iesu Mesia ’ei pū nō tō rātou orara’a, ’ua fafau mai ’oia e tono mai i te Vārua Maita’i ’ei tāmāhanahana ’e ’ei arata’i nō rātou.
Te mea maita’i roa, e ha’amata te pe’era’a i te Fa’aora i roto i te ’utuāfare. E nehenehe te feiā fa’atere o te ’Ēkālesia e hōro’a i te pāturura’a maita’i roa nō te ta’ata hō’ē ’e te mau ’utuāfare.
Fa’atumuhia i ni’a i te ’utuāfare
E fa’aineine te mau metua i te mau ’itera’a ’e te mau ’āparaura’a ’utuāfare nō te ha’api’i i te ’evanelia a Iesu Mesia ’e nō te pāhono i te mau hina’aro hō’ē roa o te tamari’i tāta’itahi. E tupu te reira ’a ’ohipa ’e ’a ha’uti ’āmui ai te mau ’utuāfare ma te ha’api’i i te mau ’aravihi faufa’a roa, ma te ha’apūai i te huru ta’ata, ’e ma te hōro’a i te mau rāve’a nō te tupu i te rahi.
Fa’aitoito i te tupura’a i te rahi
-
Pure ’ia arata’ihia. ’Ua ’ite te Metua i te ao ra i tā ’outou mau tamari’i ’e e tauturu ’oia ia ’outou ’ia ha’api’i ia rātou.
-
E tauturu i tā ’outou mau tamari’i ’ia ’imi ’e ’ia ’ite i te fa’aurura’a a te Vārua Maita’i.
-
E fa’a’ite i te here ’e e ha’apōpou pinepine i tā ’outou mau tamari’i i roto i tā rātou mau tauto’ora’a nō te rave maita’i ’e nō te mau maita’i o te Mesia tā ’outou i ’ite i roto ia rātou.
-
’Imi i te mau rāve’a nō te tāvini ia vetahi ’ē ’ei ’utuāfare.
Hōro’a i te arata’ira’a
-
Tauturu i tā ’outou mau tamari’i ’ia ’ite nāhea e ti’a ai ia rātou ’ia fa’a’ohipa i te ’evanelia i roto i te mau tuha’a ato’a o tō rātou orara’a.
-
Arata’i i tā ’outou mau tamari’i ’e e fa’aitoito ia rātou ’ia ha’amau i tā rātou iho mau ’ōpuara’a ’e mau fa’anahora’a.
-
Tauturu ia rātou ’ia ’imi i tā rātou iho mau rāve’a nō te tātara i te mau fifi.
-
Hōro’a i te pāturu, te tauturu ’e te fa’aitoitora’a i ni’a i te roara’a o te ’ē’a.
Paraparau i te feiā fa’atere
E paraparau i te mau ’orometua ’e te feiā fa’atere nō te fa’ata’a nāhea e ti’a ai ia rātou ’ia pāturu maita’i a’e i tā ’outou mau tamari’i. E ha’apa’o maita’i ’eiaha e fa’a’ite i te mau parau ’ōmo’e a tā ’outou mau tamari’i ’e ’aore rā, ’eiaha e fa’aha’amā ia rātou.
Pāturuhia e te ’Ēkālesia
Fa’atumuhia i ni’a i te ’utuāfare
Pāturuhia e te ’Ēkālesia (feiā fa’atere)
Te ti’ara’a o te ’Ēkālesia tei roto i te ha’api’ira’a i te ’evanelia a Iesu Mesia, te ravera’a i te mau ’ōro’a ’e te pāturura’a i te ’utuāfare. E pāturu te feiā fa’atere ’e te mau ’orometua i te mau metua nā roto i te ha’amaura’a i te mau aura’a pa’ari ’e te fa’afana’o i te mau tamari’i ’e te feiā ’āpī tā rātou e tāvini ra.
Paraparau i te mau metua
-
E paraparau i te mau metua nō te ’ite nāhea ’ia pāturu i tā rātou mau tamari’i. Fa’a’ite i te mau pūai tā ’outou i ’ite.
-
Ani e aha tā rātou e ti’aturi nei ’ia ’ite tā rātou mau tamari’i ’e e ’apo mai i roto i te mau pupu autahu’ara’a a Aarona, i roto i te mau piha ha’api’ira’a a te feiā ’āpī tamāhine, ’e i te mau fa’a’oa’oara’a.
E ’ere ana’e te mau metua i te mau melo itoito o te ’Ēkālesia :
-
Fa’ata’a i te mau metua i teie tauto’ora’a nō te pāturu i te mau tamari’i ’e te feiā ’āpī, ’e e ani ē, e aha tā rātou e hina’aro nō tā rātou mau tamari’i ’ia fa’a’āmui mai.
-
Ani i te mau tamari’i ’aore rā, i te feiā ’āpī e aha te huru pāturura’a tā rātou e hina’aro.
-
Paraparau i te ’āpo’ora’a pāroita e nāhea ’ia fa’aō mai i te mau metua ma te maita’i roa.
Pāturu i te mau tamari’i ’e i te feiā ’āpī
-
Tauturu i te mau tamari’i ’e i te feiā ’āpī ’ia ’ite i te fa’aurura’a a te Vārua Maita’i.
-
Ani ia rātou e aha tā rātou e hina’aro ’ia ’apo mai ’e ’ia ’ite i roto i te mau pupu ’e te mau piha ha’api’ira’a ’e i te mau fa’a’oa’oara’a.
-
Fa’aitoito ia rātou ’ia fa’atere i te fa’aineinera’a ’e te arata’ira’a i te mau fa’a’oa’oara’a.
-
Paturu i te feiā e mau nei i te autahu’ara’a a Aarona i roto i te fa’aotira’a i tā rātou mau hōpoi’a.
’Apora’a mai i te ’evanelia
I te fare
E tauturu te tuatāpapara’a pāpa’ira’a mo’a ’e te pure a te ta’ata iho ’e a te ’utuāfare i te mau tamari’i ’e te feiā ’āpī ’ia fāri’i ’e ’ia ’ite i te fa’aurura’a a te Vārua Maita’i ’e ’ia ha’api’i mai i te here i te Fa’aora. Tē fa’aitoitohia nei te ta’ata hō’ē ’e te mau ’utuāfare ’ia fa’a’ohipa i te Mai, pe’e mai—nō te ta’ata iho ’e te ’utuāfare ’e te mau parau a te mau peropheta ora nō te tuatāpapa i te ’evanelia a Iesu Mesia.
I te fare purera’a
E putuputu ’āmui te mau tamari’i ’e te feiā ’āpī nō te ha’api’i mai i te ’evanelia a Iesu Mesia. E ’apo mai te mau tamari’i i te ’evanelia i roto i te piha ha’api’ira’a ’e i te taime hīmenera’a a te Paraimere. E ’apo mai te feiā ’āpī i te ha’api’ira’a tumu i roto i te mau piha ha’api’ira’a ’e te mau pupu. E anihia i te mau tamari’i ’e i te feiā ’āpī ’ia fa’a’ite mai i te mau mea tā rātou i ’apo mai i te fare ’e ’ia fa’a’ohipa i te ’evanelia i roto i tō rātou orara’a.
Te tāvinira’a ’e te mau fa’a’oa’oara’a
I te fare
E fa’atupu te tāvinira’a ’e te mau fa’a’oa’oara’a i te mau peu maita’i i te mahana ato’a, e patu i te mau aura’a ’utuāfare, e ha’api’i i te mau ’aravihi o te orara’a, e fa’ahotu i te mau huru mai tō te Mesia, ’e e tauturu i te mau tamari’i ’e i te feiā ’āpī ’ia tupu i te rahi. E nehenehe te tāvinira’a ’e te mau fa’a’oa’oara’a a te ’utuāfare e fa’atumu i ni’a i te mau hina’aro o te ta’ata hō’ē ’e o te ’utuāfare ’e e hōro’a i te mau rāve’a nō te fa’a’ohipa i te mau parau tumu o te ’evanelia i roto i te mau ’ohipa i te mau mahana ato’a.
I te fare purera’a
Te tāvinira’a—tei roto te feiā e mau nei i te autahu’ara’a a Aarona e fa’atere nei i te ’ōro’a nō te ’ōro’a mo’a—’e e hōro’a mai te mau fa’a’oa’oara’a tāmau i te mau rāve’a nō te ’āmuira’a mai, nō te ha’api’ira’a mai i te mau ’aravihi ’āpī, te fa’aotira’a i te mau ’ohipa fifi ’e te patura’a i te mau aura’a fa’atumuhia i ni’a i te ’evanelia ’e te mau hoa ’e te feiā fa’atere. E tauturu teie mau rāve’a i te mau tamari’i ’e te feiā ’āpī ’ia tupu i te rahi i te pae vārua, i te pae tōtiare, i te pae tino ’e i te pae ferurira’a ’e e hōro’a i te tāvinira’a faufa’a ia vetahi ’ē. JustServe (JustServe.org), te hō’ē teie rāve’a tauturu faufa’a roa nō te mau rāve’a tāvinira’a i roto i te ’oire.
I roto i te mau fa’a’oa’oara’a nō te mau mahana e rave rahi nō te feiā ’āpī, tei roto te mau ’āmuira’a Nō te pūai o te feiā ’āpī (JSF), te mau ’āmuira’a nā te feiā ’āpī, te mau pūhapara’a, ’e te tahi atu mau huru ha’aputuputura’a. E nehenehe teie mau fa’a’oa’oara’a e tauturu i te feiā ’āpī ’ia fa’ahōhonu i tō rātou hina’aro ’ia pe’e i te Fa’aora, ’ia huti mai ia rātou i rāpae i te mau mea i mātarohia e rātou, ’e ’ia tauturu ia rātou ’ia hi’o ē, e tuha’a rātou nō te hō’ē pupu rahi a’e o te feiā ’āpī o tē fa’a’ite nei te tahi i te tahi i te mau ’ōpuara’a ti’a.
Fa’ahotura’a i te ta’ata iho
I te fare
E mā’iti te mau tamari’i ’e te feiā ’āpī i te mea tā rātou e nehenehe e rave nō te tupu i te rahi ’e nō te ha’api’i mai i te pe’e i te Fa’aora. E nehenehe te mau metua e tauturu ia rātou ’ia ’ite i tō rātou huru tupura’a i teie taime ’e e aha te vāhi e tītauhia ia rātou ’ia ha’amaita’i. E nehenehe te mau fa’a’oa’oara’a ato’a, tei roto te ’ēkālesia, te fare ha’api’ira’a, te auhoara’a, te tū’aro, te ano’ite, te ’ohipa ’e te tahi atu mau mea e auhia e te ta’ata hō’ē, e tauturu i te mau tamari’i ’e te feiā ’āpī ’ia pe’e ia Iesu Mesia.
I te fare purera’a
E here ’e e tāvini te feiā fa’atere i te tamari’i ’e i te feiā ’āpī tāta’itahi ’e ’ia ara i tō rātou mau hina’aro ’e te mau mea e auhia e rātou. Nā roto i te mau aura’a maita’i, e nehenehe te feiā fa’atere e hōro’a i te fa’aurura’a ta’a ’ē ’e te pūai nō te pāturu ’e nō te fa’aitoito i te mau tamari’i ’e te feiā ’āpī i roto i tō rātou tupura’a i te rahi tāta’itahi.
Fa’atano ’e fa’aau
E mea ta’a ’ē te ta’ata hō’ē, te ’utuāfare, ’e te ’āmuira’a. Te hō’ē mea e tano maita’i a’e nō te hō’ē, e nehenehe e’ita e tano nō te tahi. Rave i te mea e tano nō tō ’outou ’utuāfare, nō te piha ha’api’ira’a, nō te pupu, ’aore rā, nō te pāroita. Paraparau nō ni’a i tā ’outou mau rāve’a ’e te mau māna’ona’ora’a, ’e e ’imi i te fa’aurura’a nō te ’ite nāhea ’ia fa’atano i teie mana’o nō te tauturu i te tamari’i ’e te feiā ’āpī tāta’itahi ’ia tae’ahia ia rātou tō rātou pūai hanahana.
’Ei hi’ora’a, e mea ta’a ’ē tā te mau tamari’i ’e tā te feiā ’āpī huru hi’ora’a i te tupura’a i te rahi o te ta’ata iho : te huru, te rahira’a, ’e te pinepinera’a o te ’ōpuara’a, ’e tae noa atu i te rahira’a pāturura’a tā rātou e hina’aro, e fa’ata’ahia te reira nō te ta’ata hō’ē. E fa’atano ato’a te mau piha ha’api’ira’a ’e te mau pupu nō te pāhono i te mau hina’aro. Hau atu i te reira, e nehenehe te huru ’e te pinepinera’a o te mau fa’a’oa’oara’a e tāuiui, tei te huru o te terera’a ’ohipa o te fenua iho.
’Ia vai ’ōhie noa te reira. Rave i te mea e tano.
Fa’aitoitora’a ’e ha’amāuruurura’a
Fa’aitoitora’a
E itoito ’ōhie noa te mau tamari’i ’e te feiā ’āpī ’ia ’ite ana’e rātou i te here, te tupura’a i te rahi, te ha’amaita’ira’a, ’e ’ia fāri’i ana’e rātou i te Vārua Maita’i i roto i tō rātou orara’a. ’Ia riro ana’e te tauira’a ’e te tupura’a i te rahi ’ei ’ohipa fifi nō rātou, e fa’aitoito ia rātou ’ia ’imi i te mau rāve’a nō te upo’oti’a i ni’a i te mau tītaura’a ’aore rā, e fa’aau fa’ahou i tā rātou mau fa’anahora’a. E nehenehe te mau aura’a pa’ari ’e te ti’aturihia ’e te mau metua, te feiā fa’atere, ’e te mau hoa e hōro’a ia rātou i te pūai nō te tāmata tāmau noa.
Ha’amāuruurura’a
’A haere ai te mau tamari’i ’e te feiā ’āpī i mua, e ha’apōpou i tā rātou mau tauto’ora’a ’e e fa’aitoito ia rātou. E hōro’a i te mau rāve’a ia rātou nō te fa’a’ite i te mau mea tā rātou e ’apo mai, ’e e fa’ahanahana i tō rātou tupura’a i te rahi. Hau atu i te reira, e ti’a i te mau tamari’i ’e te feiā ’āpī ato’a ’ia fāri’i i te mau mea mai te hō’ē tāpe’a rima ’aore rā, te hō’ē feti’a nō te fa’aha’amana’o ia rātou ē, e tuha’a rātou nō te hō’ē pupu nā te ao nei ’o tē rohi nei nō te pe’e ia Iesu Mesia. ’Ia fa’aoti ana’e te mau tamari’i ’e te feiā ’āpī i te mau ’ōpuara’a pae vārua, pae tōtiare, pae tino ’e nō te pae ferurira’a, e ti’a ia rātou ’ia fāri’i i te tahi atu ā mau tāpa’o.