« Mau ti’ara’a », Te mau tamari’i ’e te feiā ’āpī o te ’Ēkālesia a Iesu Mesia i te Feiā Mo’a i te mau Mahana Hope’a nei : Hō’ē arata’i ’ōmuara’a nā te mau metua ’e te feiā fa’atere (2019)
« Mau ti’ara’a »
Mau ti’ara’a
Te fare ’e te mau metua
E aha tō’u ti’ara’a ?
’Ia riro ’ei hi’ora’a maita’i nō tā ’outou mau tamari’i. Ha’api’i ia rātou nāhea ’ia tupu i te rahi i roto i te mau tuha’a ato’a o tō rātou orara’a. ’Imi i te mau rāve’a nō te tauturu ia rātou ’ia ha’api’i mai i te ’oa’oa nō te ha’apa’ora’a i te mau fafaura’a, te ’itera’a mai i te mau tāreni ’āpī, ’e te ravera’a i te mau mea teimaha. Tauturu i tō ’outou ’utuāfare ’ia tupu i te rahi i pīha’i iho i te Metua i te ao ra ’e ia Iesu Mesia ’e ’ia ora i te ’evanelia i te mau mahana ato’a o te orara’a.
E aha tā’u e rave ?
Vaiiho i tā ’outou mau tamari’i ’ia ’ite i tō ’outou here rahi ia rātou. Fa’aō atu i roto i tō rātou orara’a. ’Imi nā roto i te pure i tō rātou tāta’itahi mau hina’aro ’e ’a fa’anaho i te tuatāpapara’a i te ’evanelia ’e te mau fa’a’oa’oara’a nō te pāhono i te reira mau hina’aro. Fa’a’ite tāmau noa ia rātou i tō ’outou ’itera’a pāpū. Paraparau i te feiā fa’atere e nāhea e ti’a ai ia rātou ’ia tauturu i te pāturura’a i tā ’outou mau tamari’i.
I hea vau e ha’amata ai ?
Tāmau noa i te paraparau ’e i te fa’aro’o i tā ’outou mau tamari’i. Pure e nāhea e ti’a ia ’outou ’ia pāturu ia rātou. Tauturu ia rātou ’ia ’ite mai ’e ’ia ha’amata i te ’ohipa i ni’a i te mau tuha’a e ha’api’i mai tei auhia e rātou. Ha’amata ’aore rā, tāmau noa i te pure ’utuāfare, te tuatāpapara’a i te ’evanelia, te mau rāve’a tāvinira’a, ’e te mau fa’a’oa’oara’a nō te tauturu i tā ’outou mau tamari’i ’ia tupu i te rahi.
Te feiā fa’atere ’e te mau ’orometua o te Paraimere
E aha tō’u ti’ara’a ?
Here ’e e ha’apūai i te mau tamari’i. Tauturu i te mau metua i roto i te tauturura’a i te mau tamari’i ’ia ’ite mai i te here o te Metua i te ao ra ia rātou, ’ia māramarama i te ’evanelia a Iesu Mesia, ’ia fāri’i ’e ’ia ’ite i te fa’aurura’a a te Vārua Maita’i, ’e ’ia fa’aineine nō te rave ’e nō te ha’apa’o i te mau fafaura’a mo’a.
E aha tā’u e rave ?
Ha’apāpū ē, e tauturu te mau piha ha’api’ira’a ’e te taime hīmenera’a o te Paraimere i te mau tamari’i ’ia ’ite mai i te Vārua, ’ia fa’arahi i te fa’aro’o, ’e ’ia ’ite mai i te ’oa’oa o te ’evanelia a Iesu Mesia i roto i tō rātou orara’a. Mā te mau tuha’a o te tupura’a i te rahi i fa’a’itehia i roto i te Luka 2:52 ’ei hō’ē arata’i, fa’anaho i te mau ’ohipa tāvinira’a ’e te mau fa’a’oa’oara’a ’ana’anatae ’e te fa’ahiahia ’o te patu i te mau ’itera’a pāpū, e ha’apūai i te mau ’utuāfare, ’e ’o te fa’atupu i te hō’ēra’a ’e te tupura’a i te rahi o te ta’ata iho.
I hea vau e ha’amata ai ?
Ha’amātau i te mau tamari’i ’e tō rātou mau ’utuāfare, ’e ’a aupuru ’ia au i tō rātou mau hina’aro. ’Ei peresidenira’a nō te Paraimere, e ui nā roto i te pure nāhea e ti’a ai ia ’outou ’ia tauturu i tā ’outou mau ’orometua, te feiā fa’atere nō te hīmene, ’e te feiā fa’atere nō te mau fa’a’oa’oara’a ’ia tauturu i te mau tamari’i ’ia pe’e i te Fa’aora.
Feiā fa’atere nō te Feiā ’Āpī Tamāhine
E aha tā’u ’ohipa ?
Tauturu i te mau metua ’e i te ’episekōpora’a i roto i te arata’ira’a ’e i te fa’aurura’a i te feiā ’āpī tamāhine ’ia māramarama i tō rātou ihota’ata ’ei mau tamāhine nā te Atua, ’ia fa’aineine nō te mau fafaura’a o te hiero, ’e ’ia fa’aoti i tā rātou mau ’ōpuara’a hanahana. Arata’i i te mau peresidenira’a piha ha’api’ira’a ’a fa’atere ai rātou, ’a aupuru ai, ’e ’a tāvini ai i te mau melo o tā rātou piha ha’api’ira’a.
E aha tā’u e rave ?
Fa’a’ite i hō’ē hi’ora’a ’ei pipi nā Iesu Mesia. Arata’i i te mau peresidenira’a piha ha’api’ira’a ’a fa’anaho ai rātou nā roto i te pure ’e ’a tauturu ai i te ha’api’ira’a i te mau ha’api’ira’a nō roto mai i te Mai, pe’e mai—nō te Feiā ’Āpī Tamāhine. Fa’aitoito ia rātou ’ia fa’atere i roto i te fa’anahora’a ’e i te ravera’a i te ’ohipa tāvinira’a ’e te mau fa’a’oa’oara’a ’o te tauturu i te feiā ’āpī tamāhine ’ia tupu i te rahi i roto i te mau tuha’a ato’a o tō rātou orara’a. E hōro’a i te pāturura’a hau atu i te feiā ’āpī tamāhine e hina’aro ra i te reira.
I hea vau e ha’amata ai ?
Ha’amātau i te feiā ’āpī tamāhine tāta’itahi. Paraparau i te feiā ’āpī tamāhine, i tō rātou mau metua, ’e i te ’episekōpora’a e nāhea e ti’a ai ia ’outou ’ia pāturu i te tupura’a i te rahi o te feiā ’āpī tamāhine. Pure nō te ’ite e nāhea e ti’a ai ia ’outou ’ia tauturu i tā ’outou mau peresidenira’a piha ha’api’ira’a ’ia manuia i roto i tō rātou mau pi’ira’a.
Te feiā fa’atere o te autahu’ara’a a Aarona
E aha tō’u ti’ara’a ?
E tauturu i te mau metua ’e i te ’episekōpora’a i roto i te fa’aineinera’a i te feiā ’āpī tamāroa nō te fa’atōro’ara’a i roto i te mau tōro’a o te autahu’ara’a, te mau fafaura’a o te hiero, te mau misiōni, ’e te mau ti’ara’a hanahana. Fa’auru ia rātou ’ia māramarama i tā rātou ’ōpuara’a ’e i tō rātou ihota’ata ’ei mau tamaiti nā te Atua. Arata’i i te mau peresidenira’a o te pupu autahu’ara’a ’a arata’i ai rātou, ’a aupuru ai, ’e ’a tāvini ai i te mau melo o tā rātou pupu ’e ’a fa’atere ai rātou i te ’ōro’a o te ’ōro’a mo’a.
E aha tā’u e rave ?
Fa’a’ite i hō’ē hi’ora’a ’ei pipi nā Iesu Mesia. Arata’i i te mau peresidenira’a o te pupu ’a fa’a’ohipa ai rātou i tā rātou mau tāviri, ’a fa’atere ai i te ’ōro’a nō te ’ōro’a mo’a, ’e ’a fa’anaho ai nā roto i te pure ’e ’a tauturu ai i te ha’api’ira’a i te mau ha’api’ira’a nō roto mai i te Mai, pe’e mai—nō te feiā ’āpī tamāroa. Tauturu ia rātou ’ia fa’anaho ’e ’ia rave i te ’ohipa tāvinira’a ’e te mau fa’a’oa’oara’a ’o te tauturu i te feiā ’āpī tamāroa ’ia tupu i te rahi i roto i te mau tuha’a ato’a o tō rātou orara’a. Vaiiho ia rātou ’ia fa’atere. Hōro’a i te pāturura’a hau atu i te feiā ’āpī tamāroa e hina’aro i te reira.
I hea vau e ha’amata ai ?
Hōro’a i te taime nō te feiā ’āpī tamāroa. Ha’amātau ia rātou ’e ’a here ia rātou tāta’itahi. Paraparau i te ’episekōpora’a, i te feiā ’āpī tamāroa, ’e i tō rātou mau metua nō te fa’ata’a e nāhea e ti’a ai ia ’outou ’ia pāturu ia rātou ’a tupu ai rātou i te rahi nō te riro hau atu mai te Fa’aora te huru. Pure nō te ’ite e nāhea e ti’a ai ia ’outou ’ia tauturu i tā ’outou mau peresidenira’a pupu ’ia fa’a’ohipa i tā rātou mau tāviri ’e ’ia manuia i roto i tō rātou mau pi’ira’a.
Te mau ’orometua nō te Ha’api’ira’a Sābati
E aha tō’u ti’ara’a ?
Tūtava i te tauturu i te feiā ’āpī ’ia haere mai i te Mesia nā roto i te ’apora’a mai ’e te pe’era’a i tāna ha’api’ira’a tumu. Ha’api’i i te feiā ’āpī ’ia māramarama, ’ia fa’a’ite, ’e ’ia ora i te ’evanelia a Iesu Mesia.
E aha tā’u e rave ?
Fa’a’ite i te hō’ē hi’ora’a ’ei pipi nā Iesu Mesia, ’e e tauturu i te feiā ’āpī ’ia patu i tō rātou fa’aro’o. Fa’aitoito ia rātou ’ia tuatāpapa i te mau pāpa’ira’a mo’a i te fare—’ei ta’ata hō’ē ’e i pīha’i iho i tō rātou ’utuāfare. Tauturu ia rātou ’ia fa’aineine ’e ’ia ha’api’i i te mau parau ha’api’ira’a tumu. Ani ia rātou ’ia fa’a’ohipa i te mau mea tā rātou i ’apo mai i roto i tō rātou iho fa’ahotura’a.
I hea vau e ha’amata ai ?
Tūtava i te ha’api’i mai tā te Fa’aora i rave. Ha’amātau i te feiā ’āpī tāta’itahi. Pure nō te ’ite e nāhea e ti’a ai ia ’outou ’ia tauturu ia rātou ’ia tupu i te rahi nō te riro hau atu mai te Fa’aora te huru. Ha’apūai i te mau melo o te piha ha’api’ira’a ’e tō rātou mau metua i roto i te mau tauto’ora’a nō te ’apo mai ’e nō te ha’api’i i te ’evanelia i te fare purera’a ’e i roto i tō rātou fare.
Te ’episekōpora’a ’e te mau peresidenira’a o te pupu ’e te piha ha’api’ira’a
E aha tō rātou ti’ara’a ?
’O te ’episekōpora’a te peresidenira’a o te Autahu’ara’a a Aarona i roto i te pāroita ’e tei ia rātou ra te hōpoi’a nō te feiā ’āpī tamāhine ’e te feiā ’āpī tamāroa. E ’ohipa te mau peresideni o te autahu’ara’a a Aarona ma te mau tāviri tei hōro’ahia i te taime ’a fa’atōro’ahia ai te mau peresideni pupu autahu’ara’a. E ’ohipa te mau peresidenira’a piha tamāhine i raro a’e i te mana fa’atere o te autahu’ara’a i muri a’e i tō rātou fa’atōro’ara’ahia e te hō’ē melo o te ’episekōpora’a.
E aha tā rātou e rave ?
E tūtava te mau peresidenira’a ’ia riro ’ei mau pipi mau nā Iesu Mesia ’a tauturu ai rātou i te melo tāta’itahi o te pupu ’aore rā o te piha ha’api’ira’a ’ia fāri’i i te here ’e ’ia ’ite i te ’oa’oa nō te orara’a i te ’evanelia. I raro a’e i te arata’ira’a a te ’episekōpora’a, e arata’i te mau peresidenira’a pupu i te feiā tei mau i te autahu’ara’a a Aarona ’a fa’atere ai rātou i te ’ōro’a nō te ’ōro’a mo’a. E arata’i te mau peresidenira’a pupu ’e te piha ha’api’ira’a i roto i te ha’aputuputura’a ia ’Īsera’ela i nā pae e piti o te pāruru ’e i roto i te atuatura’a i te feiā nava’i ’ore.
I hea rātou e ha’amata ai ?
E ha’api’i mai te mau peresidenira’a i tā rātou mau hōpoi’a nā roto mai i te Fatu ’e nā roto mai i tō rātou feiā fa’atere. E pure rātou nō te mau melo o te pupu ’aore rā o te piha ha’api’ira’a ’e ’ia ’ite mai i tō rātou mau hina’aro. E pāturu rātou ia rātou ’ia riro mai ’ei mau pipi nā Iesu Mesia. E tāu’aparau ʼāmui rātou nō te fa’ata’a e aha te mau ha’api’ira’a, te mau fa’a’oa’oara’a ’e te ’ohipa tāvinira’a ’o tē ha’amaita’i ’e ’o tē ha’apūai i te feiā ’āpī ’e ’o tē ’āfa’i mai i te hō’ēra’a i roto i tā rātou pupu ’aore rā piha ha’api’ira’a.