Ngaahi Fakahinohino ki he Fetuʻutaki ʻi he Meʻa Fakatuʻupakeé
Talateu
ʻI he lolotonga ʻo ha fakatamaki, ʻe lava ke ʻikai toe ngāue ʻa e founga fetuʻutaki angamahení; ka, ko e fiemaʻu ko ia ke fetuʻutaki mo e kau taki ʻo e Siasí, kau faifekaú, kau ngāue totongí, kau maʻu mafai fakapuleʻangá mo e niʻihi kehé ʻe fakautuutu ʻo lahi. ʻE lava ke tokoni hono fakaʻaongaʻi ha ngaahi founga fetuʻutaki totonu ki ha meʻa fakatuʻupakeé ke holoki ai ʻa e loto hohaʻá mo e loto mafasiá ʻi he lolotonga ʻo ha meʻa fakatuʻupakē.
Ko e Fakavaʻe ʻo e Fetuʻutaki ʻi ha Meʻa Fakatuʻupakeé
Ko e taumuʻa ʻa e Siasí ʻi he fokotuʻu ha fetuʻutaki ʻi ha meʻa fakatuʻupakē ke fakapapauʻi ʻe lava ke maʻu mo ʻave ʻa e fakamatala mahuʻingá. ʻOku fakafalala ʻa e kau taki ʻo e Siasí, kau ngāue totongi ʻi he Siasí, kāingalotú, kau ngāue tokoní, mo e kau maʻu mafai fakapuleʻangá ki he ngaahi pōpoaki mahuʻinga mo e ngaahi founga fetuʻutaki ko ʻení, kimuʻa, lolotonga, pea mo e ʻosi ʻa e fakatamakí.
ʻOku kau heni ʻa e:
-
ʻAve ʻo e fakamatalá mo e ngaahi fakahinohinó mei he kau taki ʻo e ʻēliá, misioná, mo e siteikí ki he kau taki fakauōtí, kau faifekaú, mo e kāingalotú.
-
Ngaahi lipooti ki he tuʻunga ʻo e kau faifekaú, kāingalotu ʻo e Siasí, mo e ngaahi koloa ʻa e Siasí.
-
Ngaahi palani ke tokoni ki he ngaahi fiemaʻu ʻa e kāingalotu ʻo e Siasí pea mo e koló.
-
Fakafekauʻaki ʻo e ngaahi ngāue tokoní mo e kau maʻu mafai fakapuleʻangá pea mo e ngaahi kautaha tokoni kehé.
ʻOku fakaʻaongaʻi ʻe he Siasí ha kau mataotao he fetuʻutaki ʻi he meʻa fakatuʻupakeé pea pehē ki ha kau mataotao ʻi he uelofeá mo e moʻui fakafalala pē kiate kitá, ke nau tokoni ʻi he ngaahi fetuʻutaki mahuʻinga ko ʻení. ʻOku fakamatalaʻi ʻe he ngaahi konga ko ʻení ʻa e fatongia ʻo e mataotao he fetuʻutakí, fatongia ʻo e mataotao fakauelofeá mo e moʻui fakafalala pē kiate kitá, founga fetuʻutaki ʻoku maʻú, mo ha ngaahi toe founga fetuʻutaki kehekehe pē.
Ko e hā ʻa e Fatongia ʻo ha Mataotao ʻi he Uelofeá mo e Moʻui Fakafalala pē Kiate Kitá?
Ko e fatongia ʻo ha mataotao ʻi he uelofeá mo e moʻui fakafalala pē kiate kitá kuo vahe ke ne tokangaʻi ʻa e ngaahi fetuʻutaki he meʻa fakatuʻupakeé, ke fakaleleiʻi ʻa e malava ʻe he takí ke fetuʻutaki kimuʻa pea toki hoko ha fakatamaki pea ʻi he lolotonga ʻo e fakatamakí.
-
ʻE lava ke ui ʻe he kau palesiteni fakasiteikí ha mataotao ki he uelofeá mo moʻui fakafalala pē kiate kitá ke ne tokangaʻi ʻa e ngaahi fetuʻutaki ʻi he meʻa fakatuʻupakeé. ʻOku uiuiʻi ha mataotao fakasiteiki ki he uelofeá mo e moʻui fakafalala pē kiate kitá ʻe he kau palesitenisī fakasiteikí pea ʻe lipooti pē kiate kinautolu.
-
ʻE lava ke ui ʻe ha Fitungofulu Fakaʻēlia ha mataotao fakaʻēlia ki he uelofeá mo e moʻui fakafalala pē kiate kitá (i he malumalu ʻo e fakahinohino ʻa e Kau Palesitenisī Fakaʻēliá) pea mo fakafekauʻaki vāofi mo e kau pule fakaʻēlia ʻo e uelofeá mo e moʻui fakafalala pē kiate kitá (AWSRMs).
-
ʻE fakahoko ki he kau pule fakalotofonua ʻo e uelofeá mo e moʻui fakafalala pē kiate kitá (LWSRMs) ʻa hono uiuiʻi ʻo e kau mataotao fakasiteiki foʻou ki he uelofeá mo e moʻui fakafalala pē kiate kitá.
-
ʻE fakahoko ki he kau pule fakaʻēlia ki he uelofeá mo e moʻui fakafalala pē kiate kitá hono uiuiʻi ʻo ha kau mataotao fakaʻēlia foʻou ki he uelofeá mo e moʻui fakafalala pē kiate kitá.
-
ʻE fetuʻutaki ʻa e kau mataotao fakaʻēlia ʻo e uelofeá mo e moʻui fakafalala pē kiate kitá, mo e fakataha alēlea fakafekauʻakí pea mo e AWSRM fakatouʻosi, ʻi he ʻēlia kuo vahe angé. ʻIkai ngata aí, ʻe fakafekauʻaki ʻa e kau mataotao ko ʻení mo e LWSRM, ʻo ka fiemaʻu.
Ko e taimi ʻoku ngāue ai ki he fetuʻutaki ʻi he ngaahi meʻa fakatuʻupakeé, ʻoku ʻikai totonu ke fetongi ʻe he kau mataotaó ʻa e kau taki fakalotu ʻoku nau tokangaʻí pe ngāue ʻo mavahe mei heʻenau tuʻutuʻuní. Ko e mataotaó ʻoku totonu ke maheni mo e ngaahi founga kehekehe ʻo e fetuʻutakí (vakai, konga ki he “Ngaahi Founga Fetuʻutakí”). ʻOku maʻu ʻe ha mataotao fakasiteiki ki he uelofeá mo e moʻui fakafalala pē kiate kitá ʻa e ngaahi fatongia ko ʻení ʻo fekauʻaki mo e ngaahi fetuʻutaki ʻi he meʻa fakatuʻupakeé:
-
Ngāue ʻi he malumalu ʻo ha taki lakanga fakataulaʻeiki ke fakapapauʻi ʻe lava ʻo fetuʻutaki mo e kau taki ʻo e Siasí ʻi he siteikí pe uōtí pea moe kau maʻu mafai fakapuleʻanga fakalotofonuá.
-
Fokotuʻu ki he (ngaahi) talifaki he fetuʻutakí ʻe ngāue lelei tahá.
-
Tokoni ke faʻu ha konga ki he ngaahi fetuʻutaki ʻi he meʻa fakatuʻupakeé, ʻi he palani ʻa e siteikí ke mateuteu mo ngāue ʻi ha meʻa fakatuʻupakeé.
-
ʻAi ke mahino maʻu pē ʻa e palani honau koló/puleʻangá ʻi he meʻa fakatuʻupakeé.
-
Palani ke ngāue ʻi he tafaʻaki ʻo e kau taki lakanga fakataulaʻeikí ke fakapapauʻi ʻoku lelei ʻa e fetuʻutakí ʻi he lolotonga ha fakatamaki. ʻE poupouʻi ʻe he AWSRM ʻa e kau mataotao fakasiteikí ʻi heʻenau ngaahi fetuʻutaki he meʻa fakatuʻupakeé mo ngāue ʻi he malumalu ʻo e fakahinohino ʻa e Fitungofulu Fakaʻēliá ke fakapapauʻi ʻe lava ʻo fetuʻutaki mo e AWSRM, mo e kau taki fakasiteiki ʻi he fakataha alēlea fakafekauʻakí, pea mo e kau maʻu mafai fakapuleʻanga fakafeituʻú.
Ko e hā ʻa e Naunau Fetuʻutaki ʻOku Maʻú?
-
Kuo fokotuʻu ha naunau fetuʻutaki ʻi he hetikuota ʻo e Siasí, ngaahi ngāueʻanga fakauelofea ʻe niʻihi, mo e ngaahi ʻōfisi fakaʻēliá. ʻOku tokoni ʻa e ngaahi meʻangāue ko ʻení ki he ngāue fakalūkufua ʻa e Siasí ki ha fakatamaki pea ʻe fakaʻaongaʻi ia ki ha fetuʻutaki ʻi ha meʻa fakatuʻupakē, ʻo ka fiemaʻu.
-
ʻE toe lava foki ke hoko ʻa e naunau fetuʻutaki fakalotofonuá ko ha maʻuʻanga tokoni lelei ki he ngaahi ʻiuniti fakalotofonuá. ʻOku poupouʻi ʻa e kau mataotao ki he uelofea mo e moʻui fakafalala pē kiate kita kuo vahe ki he ngaahi fetuʻutaki ʻi he meʻa fakatuʻupakeé, ke nau kumi ha niʻihi ʻoku ʻi ai haʻanau naunau fetuʻutaki mo ha ʻilo fakatekinolosia te nau lava ʻo tokoni ki he kau taki fakalotofonuá ʻi he fetuʻutaki lolotonga ha fakatamaki.
Ngaahi Fetuʻutaki Fakaletiō ʻIkai Fakakomēsiale (“Nets”)
-
ʻE lava foki ke fokotuʻu ʻa e Nets ʻi he lēvolo ʻo e ʻiuniti fakalotofonuá ʻi he fakahinohino ʻa e kau taki lakanga fakataulaʻeikí.
-
ʻOku totonu ke lau ʻa e letiō ʻoku ʻikai fakakomēsialé ko ha taha ʻo e ngaahi meʻa ke fili ai ʻoku totonu ke maheni mo e kau mataotao fetuʻutaki ʻi he meʻa fakatuʻupakeé (vakai ki he konga “Ngaahi Founga Fetuʻutakí” ).
Fakatokangaʻi ange: ʻE lava ke maʻu ha fakamatala lahi ange fekauʻaki mo e naunau fetuʻutakí ʻi he Meetinghouse Facilities Handbook ʻi he “Other Information Related to Meetinghouse Facilities.”
Ko e Hā ʻa e Ngaahi Founga Fetuʻutakí?
ʻOku faʻa uesia ʻa e ngaahi telefoní mo e ʻinitanetí hili ha fakatamaki lahi pe fakavahelahi lahi. ʻOku totonu ke mateuteu ʻa e kau takí mo e kāingalotú ke nau fetuʻutaki ʻo fakaʻaongaʻi ʻa e ngaahi founga kehe ʻoku maʻu fakalotofonuá. Neongo ia, kuo hā mei he aʻusiá, ko ha pēseti ʻe 80 ʻo e ngaahi kautaha fetuʻutakí ʻoku toe faʻa ngāue pē ia ʻi loto ʻi he houa ʻe 72, neongo ne hoko ha ngaahi meʻa lalahi. (ʻI ha ngaahi meʻa ʻe niʻihi, ʻe lava ʻo ʻosi ha ngaahi uike pea toki moʻui ʻa e ʻuhilá mo e naunau fetuʻutakí.
|
Ngaahi Monūʻia |
Ngaahi Meʻa ke Fakakaukauʻí |
Ngaahi Fakaʻaongaʻi Angamahení | |
|---|---|---|---|
|
Telefoni toʻotoʻo | Ngaahi Monūʻia Fakaʻaongaʻi lahi | Ngaahi Meʻa ke Fakakaukauʻí Falala ki he telefoni toʻotoʻó; ʻoku ʻikai fakangatangata ki ha tuʻasila pe feituʻu pau pē; fokotuʻu atu ke ʻi ai ha meʻa fakafonu telefoni toʻotoʻo telia naʻa mate ʻa e ʻuhilá (ko e tekinolosiá ni ʻoku ngāvaivai mo pelepelengesi ʻi ha fakatamaki ʻoku lahi) | Ngaahi Fakaʻaongaʻi Angamahení Fetuʻutaki fakafoʻituituí pē |
|
Telefoni tuʻumaʻu (telefoni laine) | Ngaahi Monūʻia Tuʻu maʻu ʻi ha tuʻasila | Ngaahi Meʻa ke Fakakaukauʻí ʻOku fiemaʻu ʻa e tokotahá ke ʻi ha tuʻasila pau ke ne maʻu pe fakahoko ʻa e telefoní (he ʻikai lava ke maʻu ia kapau ʻoku maumau ʻa e fakauaeá) | Ngaahi Fakaʻaongaʻi Angamahení Fetuʻutaki fakafoʻituituí mo e telefoni fakatokolahí (conference call) |
|
Tohi SMS/Text | Ngaahi Monūʻia ʻOku faʻa lava pē ke maʻu neongo kapau ʻoku fuʻu moʻua ʻa e laine ki he leá | Ngaahi Meʻa ke Fakakaukauʻí Fakahoko ha kiʻi fakamatala siʻisiʻi; fokotuʻu atu ke ʻi ai ha meʻa fakafonu telefoni ʻe lava ke toʻo holo, telia naʻa mate ʻa e ʻuhilá | Ngaahi Fakaʻaongaʻi Angamahení Ngaahi fetuʻutaki ʻi he ngāué |
|
Ngaahi fetuʻutaki fakaʻinitanetí (ʻīmeili, mītia fakasōsiale, konifelenisi fakavitiō) | Ngaahi Monūʻia Faingofua (versatile) mo ngaahi ngofua (resilient) | Ngaahi Meʻa ke Fakakaukauʻí Fiemaʻu ʻa e taha ʻoku leá mo ia ʻokú ne maʻú ke ʻi ai haʻana fehokotaki fakaʻinitaneti mo ha polokalama (ʻoku ngaohi ngofua tatau pē mo e ʻinitanetí) | Ngaahi Fakaʻaongaʻi Angamahení Fakafekauʻaki lahi ʻo e ngaahi ngāue tokoní |
|
Telefoni fakasatelaite | Ngaahi Monūʻia Ngāue ʻi he taimi ʻoku mate ai ʻa e telefoni toʻotoʻó | Ngaahi Meʻa ke Fakakaukauʻí Ngāue lelei ʻi he ngaahi feituʻu ʻoku mālohi ai ʻa e satelaité pea ʻikai fuʻu tōtuʻa ai hono fakaʻaongaʻí | Ngaahi Fakaʻaongaʻi Angamahení Fakaʻaongaʻi ki he telefoni maí mo e telefoni ki tuʻá |
|
Letiō ʻikai fakakomēsiale (HAM) | Ngaahi Monūʻia Mātuʻaki tolonga, ʻo aʻu pē ʻi hengaahi tūkunga kovi tahá | Ngaahi Meʻa ke Fakakaukauʻí Fiemaʻu ha laiseni | Ngaahi Fakaʻaongaʻi Angamahení Falalaʻanga ‘i he feituʻutaki mai mo e fetuʻutaki ki tuʻa mei he ngaahi feituʻu ʻoku uesiá |