Fakamatala Kehe Fekauʻaki mo e Ngaahi ʻApi-siasí

Mīsini Hiki Tataú

Ko hono fakatau ʻo e ngaahi mīsini hiki tataú ʻe fakafuofuaʻi ia ʻe he ngaahi fakahinohino ʻa e ʻōfisi fakaʻēliá, ʻa ia ʻoku makatuʻunga ʻi he ngaahi fiemaʻu ʻa e ʻiuniti fakalotofonuá. Ko e kulupu pule ki he nāunau fakatuʻasinó ʻoku nau fatongiaʻaki hono fakatau ʻo e ngaahi mīsini hikitatau ki he ngaahi ʻōfisi fakasiteikí mo e ngaahi senitā ki he nāunau ʻo e ʻapi-siasí.

Ko e taimi ʻoku fiemaʻu ai ha ngāue pe monomonó, ʻe fetuʻutaki ʻa e kau taki fakalotofonuá ki he tokotaha ʻokú ne fai ʻa e ngāué kapau ʻoku ʻi ai ha aleapau ngāue. Ka ʻikai, ʻe fetuʻutaki ʻa e kau taki fakalotofonuá ki he kulupu pule ki he nāunau fakatuʻasinó, ʻa ia ʻoku nau fakataimi-tēpileʻi mo totongi ʻa e ngāué.

Ko e nāunau hangē ko e pepá mo e vaitohí ʻoku fakatau ia ʻe he ngaahi ʻiuniti fakalotofonuá, ʻo ngāue ʻaki e ʻinasi patiseti honau ʻiuniti fakalotofonuá.

Meʻangāue Fetuʻutakí ʻi he Meʻa Fakatuʻupakeé

He ʻikai fakatau mai pe tali ʻe he ngaahi uōtí mo e ngaahi siteikí ha telefoni satelaite pe nāunau fakaletiō ʻoku foaki mai ke ngāue ʻaki ʻi ha meʻa fakatuʻupakē ʻi ha ʻapi-siasi. ʻOku poupouʻi ʻa e kau takí ke nau feinga ke ʻiloʻi ha niʻihi fakafoʻituitui kuo ʻosi ʻi ai haʻanau nāunau pē ʻanautolu ke tokoni ʻi he ngaahi fiemaʻu fakafetuʻutaki ʻa ha uooti pe siteiki.

Meʻangāue maʻá e Kau Pēteliaké

ʻI ha ngaahi meʻa hāhāmolofia, mahalo he ʻikai lava ai ha pēteliake ke fakaʻaongaʻi ha komipiuta (hangē ko ʻení, mahalo he ʻikai ke ʻi ai haʻane komipiuta pe lava ke fakaʻaongaʻi e komipiutá ʻi he ʻōfisi ʻo e kalaké ʻi ha ʻapi-siasi). Kapau ko ia, ʻe lava ʻe ha palesiteni fakasiteiki ʻo fakangofua ke fakatau mai ha komipiuta pea fakahoko ʻa e kolé ʻaki haʻane fetuʻutaki ki he pule ʻo e nāunau fakatuʻasinó. ʻE ʻoange ʻe he ngaahi siteikí ʻa e nāunau hiki tepi ʻa e kau pēteliaké ʻo fakaʻaongaʻi e panga ʻinasi patiseti fakalotofonuá (LUBA).

Ngaahi Totongí

ʻOku ʻikai ʻeke ha totongi pe fai ha tipōsiti ʻe he kāingalotú ke fakaʻaongaʻi ʻa e ngaahi ʻapi-siasí pe kelekele ʻo e Siasí ki ha kai fakafiefia ʻo ha mali, meʻafakaʻeiki, ngaahi fakataha fakafāmili, ngaahi fakataha ʻa e kau faifekaú, ngaahi polokalama tā piano kuo ʻosi fakangofua, pe ngaahi meʻa tatau mo ia.

Ako ʻi ʻApí mo e Tauhi ʻo e Fānau Īkí

Neongo ʻoku poupouʻi mālohi ʻe he Siasí ʻa e akó, ka ʻoku ʻikai fakaʻaongaʻi ʻa e ngaahi ʻapi-siasí ko ha feituʻu ke fai ai ha ako ʻi ʻapi pe tauhiʻanga ʻo ha fānau iiki pe fakahoko ai ha ngaahi ʻekitivitī ʻa e ako ʻi ʻapí.

ʻE paotoloaki ʻe he talangofua ki he tuʻutuʻuni ko ʻení ʻa e malú pea fakaʻehiʻehi ai mei ha haʻisia fakaetukuhau ʻa e Siasí.

Nāunau Fakasatelaité mo e Meʻangāue Faka-vitioó

ʻOku toki fakaʻaongaʻi pē ʻa e nāunau fakasatelaite mo e meʻangāue fakavitiō ʻa e Siasí ki ha ngaahi taumuʻa ʻoku ʻikai fakakomēsiale ʻi hano fakangofua ʻe he kau palesitenisī fakasiteikí pe kau pīsopelikí. Kuo pau ke lokaʻi malu ʻa e ʻū meʻangāué kotoa ʻi he taimi ʻoku ʻikai fakaʻaongaʻi aí. He ʻikai ʻave ia mei he falelotú ke fakaʻaongaʻi ʻi ha ʻapi pe fakaʻaongaʻi fakataautaha.

Fakaʻaongaʻi ʻo e Kelekele e Siasí ʻoku Fakaʻaongaʻi Fakatokolahí

Ko e fakaʻaongaʻi fakatokolahi ʻo e kelekele ʻo e Siasí ʻoku fiemaʻu ki ai ha fakangofua, kau ai e hū ki he kelekele ʻo e Siasí, ngaahi palopalema ki he ngataʻangá, mo e ngaahi aleapau ʻo e totonu ki he kelekelé.

Ngaahi Mīsini Puhi Sinoú

ʻOku ʻoatu ha meʻangāue ʻa e Siasí ki hono toʻo ʻo e sinoú, ki he ʻapi-siasi takitaha ʻe fiemaʻu ai. ʻE lava ke fakaʻaongaʻi ʻe he kāingalotu ʻo e Siasí ʻa e meʻangāue ko ʻení ke fakaʻataʻatā ʻaki e ngaahi luelueʻanga he ʻapi-siasí. ʻE fakangatangata ʻe he kau takí ʻa e ngaahi ngāue ko ʻení ki he kāingalotu matuʻotuʻa mo fakapotopotó pē pea mo fakahinohinoʻi kinautolu ke nau fakaʻaongaʻi tokanga mo malu ia.

Kelekele ʻo e Siasí ʻOku ʻAtaá

He ʻikai fakaʻaongaʻi pe nofoʻi ha konga kelekele ʻo e Siasí ʻoku ʻatā taʻe-maʻu ha ngofua mei he Palesiteni Fakaʻēliá. ʻI ha ngaahi tūkunga ʻe niʻihi, ʻe lava ke fakaʻaongaʻi fakataimi ai ʻe he kāingalotu fakalotofonuá ha kelekele ʻo e Siasí ʻoku ʻatā ki ha ngoue. Fetuʻutaki ki he pule fakalotofonua ʻo e nāunau fakatuʻasinó ʻi ha ngaahi fehuʻi pe ke kole ha ngofua.