Ngaahi Faiʻanga Kemi Fakatupulakí

Puleʻi ʻo e Kelekele Faiʻanga ʻEkitivitī Fakatupulakí

ʻOku ʻomi ʻe he ngaahi feituʻu faiʻanga ʻekitivitī fakatupulaki ʻo e Siasí ha feituʻu ʻi tuʻa ʻoku fakataumuʻa ki he ngaahi ʻekitivitī faka-Siasí. ʻOku langa ia ʻo fakatatau ki he ngaahi tuʻunga mo e ngaahi palani kuo fokotuʻu ʻe he Siasí. ʻOku ua ʻa e faʻahinga ʻo e kelekele faiʻanga ʻekitivitií:

Kelekele faiʻanga kemi fakatupulaki
Senitā Faiʻanga ʻEkitivitī Fakatupulaki ki he ʻIuniti Fakalotofonuá (Local Unit Recreation Center - LURC)

Ko e tefitoʻi taumuʻa ʻo e ngaahi feituʻu faiʻanga kemi fakatupulakí ke tokoniʻi e kau finemuí ke nau ongoʻi ʻa e Laumālié he lolotonga ʻenau fiefia ʻi ha ngaahi ʻekitivitī ʻoku malu mo leleí. ʻE lava foki ke fakaʻaongaʻi ʻe he ngaahi siteikí, uōtí, ngaahi fāmili Siasí, mo haʻanau kau fakaafe ʻa e ngaahi faiʻanga kemi ko ʻení ki ha ngaahi ʻekitivitī kuo ʻosi fakangofua. ʻOku ʻikai totonu ke taʻofi fakatatali ʻa e ngaahi faiʻanga kemi ʻo e Siasí ki ha ngaahi kautaha fakakolo, ngaahi pisinisi fakakomēsialé, mo ha niʻihi fakafoʻituitui ʻo e ngaahi tui fakalotu kehé. Neongo ia, ʻoku talitali lelei ʻa e kāingalotu ʻo e Siasí ke nau fakaafeʻi mai honau kaungāmeʻa mei he ngaahi tui fakalotu kehé ke kau fakataha mo kinautolu.

ʻE lava ke tānaki ha totongi ki hono fakaʻaongaʻi ʻo ha faiʻanga kemi fakatupulaki ke ne totongi e fakamole ki hono tokangaʻí, monomonó, pe fakaleleiʻí. ʻOku totonu ke fakaʻaongaʻi ʻe he ngaahi faiʻanga kemi fakatupulaki kotoa pē ʻa e polokalama ʻa e Siasí ʻi he ʻinitanetí camping.ChurchofJesusChrist.org. ʻOku totonu ke tānaki ʻa e ngaahi totongi kotoa pē ʻo fakafou ʻi he founga feʻaveʻaki paʻanga mei he ʻiuniti ki he ʻiunití, ʻi hono taʻofí pea ʻi ha kaati kulētiti ki he ngaahi taʻofi fakafoʻituituí.

ʻOku meimei ke faʻa tuʻu ʻa e LURC ʻi loto ʻi he ngaahi ngataʻanga ʻo e siteikí pea ʻoku fakataumuʻa ia ke fakaʻaongaʻi pē ʻe he ngaahi uooti ʻi he siteikí pe ngaahi siteiki ofi maí. Ko e sīpinga angamahení, ko ha feituʻu ʻoku ʻi ai ha faka-faletolo pe ko ha feituʻu makehe ki he ngaahi ʻekitivitī ʻi tuʻá. ʻOku ʻikai totonu ke tānaki ʻe he ngaahi siteikí ha totongi mei he kāingalotu ʻo e Siasí ʻi he taimi ʻoku nau fakaʻaongaʻi ai ha LURC.

ʻE lava ke kole ʻe he ngaahi siteikí ke tānaki mo fakalahi mai ha LURC foʻou ki ha kelekele faiʻanga kemi fakatupulaki ʻi ha taimi ʻe ʻi ai ai ha fiemaʻu moʻoní. ʻE lava ke fetuʻutaki ʻa e kau palesiteni fakasiteikí ki he pule ʻo e ʻū nāunau fakatuʻasinó pe ʻōfisi fakaʻēliá, ʻa ia te ne lava ʻo fakakau ʻa e kolé ke fakakaukauʻi ʻi he palani fakataʻu ko ia ʻe fakahū ki he Kau Palesitenisī Fakaʻēliá.

Neongo ia, kimuʻa pea fakahū ha faʻahinga kole pehē, ʻoku poupouʻi atu e ngaahi ʻiuniti fakalotofonuá ke nau fakaʻaongaʻi ʻa e ngaahi feituʻu fakapuleʻanga mo fakafoʻituitui ʻoku ʻataá. Ko e feituʻu ʻoku ofi feʻunga ai e ngaahi fale ʻoku ʻo e Siasí ʻi loto he ngaahi ngataʻanga ʻo e siteikí, ʻoku totonu ke fakaʻaongaʻi ʻa e ngaahi fale ko ʻení kimuʻa pea toki kole ke langa ha ngaahi fale kehe.

Ko e fakamatala ko ʻení ʻoku fakapatonu mahino pē ia ki he ngaahi kelekele faiʻanga kemi fakatupulakí.

Ngaahi Feituʻu Faiʻanga Kemi Fakatupulaki Foʻoú

Ko e ngaahi kole paʻanga ki he Siasí ke fakatau pe langa ha nofoʻanga kemi fakatupulakí ʻoku fakahū ia ʻo fakafou ʻi he talēkita ki he ngaahi meʻa fakatuʻasinó. Ko e sinoʻi paʻanga fakalūkufua ʻa e Siasí ʻoku toki kole pe ia ʻo fakaʻaongaʻi e founga palani fakataʻu ki ha faiʻanga kemi fakatupulaki, ʻi ha kakato kotoa e ngaahi fiemaʻu mo e ngaahi tuʻunga ʻoku fokotuʻutuʻú. Fetuʻutaki ki he pule ʻo e nāunau fakatuʻasinó ke kamata ʻa e ngāue ke fakakaukauʻí.

Ngaahi Siteiki ʻOku ʻIkai Vahe ki ha Feituʻu Faiʻanga Kemi Fakatupulakí

Ko e Fitungofulu Fakaʻēliá (fakatatau mo hono vahe ʻe he Kau Palesitenisī Fakaʻēliá) te ne vahe ʻa e ngaahi siteiki ʻi he ʻēliá ki ha faiʻanga kemi ʻo e Siasí, ʻo fakatatau mo e ʻēliá ʻi he ngaahi fiemaʻu fakasiteikí pea mo e vāofí mo hono fakaʻaongaʻi ʻo e faʻahinga feituʻu peheé. ʻOku totonu foki ke fakakaukauʻi hano fakaʻaongaʻi ʻo ha ngaahi faiʻanga kemi fakapuleʻanga pe fakataautaha.

Ko e ngaahi siteiki ʻoku ʻikai vahe ange hanau faiʻanga kemí, te nau lava ʻo aleaʻi ke taʻofi ha faiʻanga kemi fakatupulaki ʻo fakaʻaongaʻi ʻa e taʻofi ʻi he ʻinitanetí mo muimui ki he Taimi-tēpile ʻo e Muʻomuʻa Maí ʻi he ngaahi taʻofi kuo tukuatu ʻi he uepisaití.

Ko Hono Fakapaʻanga ʻa e Ngaahi Fakaleleiʻi ʻo e Ngaahi Faiʻanga Kemi Fakatupulaki Lolotongá

ʻOku vahe ha pule ʻo e nāunau fakatuʻasino ki he kemi takitaha pea ʻokú ne fatongia fakapatonu ʻaki e ngaahi faiʻanga kemi kotoa. Ko e fakapaʻanga ʻo e nofo kemí ko ha konga ia ʻo e palani fakataʻú pea ʻoku kau ai hono fakapaʻanga ʻo ha ʻū meʻa ke fetongi, fakaleleiʻi, hono fakalelé, mo hono tauhí. Ko e ngaahi fakamole ki he ngaahi ʻekitivitī ʻo e polokalama nofo kemí mo e naunaú ʻoku totongi ia ʻe he kemí ʻo fakafou ʻi he ngaahi totongi mei he tokotaha ʻokú ne fakaʻaongaʻí (vakai, Fakapaʻanga ʻe he Siteikí ʻo e Ngaahi Nofo Kemí).

Fakalelé mo hono Tauhí

ʻOku sivi ʻa e ngaahi faiʻanga kemí ʻo ʻikai to e siʻi hifo ʻi he tuʻo ua ʻi he taʻú ke fakafuofuaʻi ʻa e ngaahi fakaleleiʻi ʻoku fiemaʻú mo ha ngaahi hohaʻa fekauʻaki mo ʻene malú. ʻOku totonu foki ke sivi ʻa e ngaahi feituʻu faiʻanga kemí mo e ngaahi vao ʻakaú ʻi he ʻosi pē ha meʻa naʻe hoko, hangē ko ha hakohako, ʻuha-lōvai, pe sinou.

ʻI he ʻIunaiteti Siteití mo Kānata, ʻe maʻu ʻa e ngaahi maʻuʻanga tokoni ki hono siví mo e monomonó ʻo ka fai ha kole ki he pule ʻo e nāunau fakatuʻasino ʻoku ngāue mo e Vaʻa ki he Koloa Fakanatulá ʻi he Potungāue ki he Ngaahi ʻApi-siasí.

ʻOku fakafuofua pē ‘a e fakamole ki hano fokotuʻu mo tauhi e ngaahi faiʻanga kemi fakatupulakí ʻi ha kelekele naʻe lisi, tuku kehe kapau kuo fai ha aleapau lisi taimi lōloa ke ne fakatonuhiaʻi ha ngaahi fakamole lahi.

Fakatau pe Lisi ʻo ha Ngaahi Faiʻanga Kemi Fakatupulaki Kuo ʻOsi Langa

Ko e kau palesitenisī fakasiteiki ʻoku fakaʻamu ke fakatau atu pe lisi ha faiʻanga kemi kuo ʻosi tuʻú, te nau fetuʻutaki ki he pule ʻo e ngaahi nāunau fakatuʻasinó pe ʻōfisi fakaʻēliá. ʻOku ʻikai fakamafaiʻi ʻa e ngaahi siteikí ke nau fai ha faʻahinga alea mo ha kau pule pe fakafofonga ʻo fekauʻaki mo hano fakatau mai, lisi atu, pe tukuange ʻo ha faiʻanga kemi fakatupulaki.

Ko Hono Puleʻí

ʻE hanga ʻe he Fitungofulu Fakaʻēliá (ʻo fakatatau mo hono vahe ʻe he Kau Palesitenisī Fakaʻēliá) ʻo fokotuʻu ha palesiteni fakasiteiki ke ne tokangaʻi hono fakalele ʻo e faiʻanga kemí. Ko e palesiteni fakasiteiki fakafofongá ʻoku totonu ke nofo ʻi he vāhenga fakalotu tatau ʻoku tuʻu ai ʻa e kelekelé.

Tuʻunga Fakaʻatā mei he Tukuhaú

Ko e tuʻunga fakaʻatā mei he tukuhau ʻo e ngaahi faiʻanga kemi fakatupulakí ʻoku totonu ke pukepuke. ʻOku ʻikai totonu ke fakaʻaongaʻi ʻa e kelekelé ki ha ngaahi taumuʻa fakakomēsiale pe fakapolitikale pe ke maʻu mai ha paʻanga ʻo lahi ange ʻi he meʻa ʻoku fiemaʻu ki hono fakalelé, tauhí, pe monomonó. Kapau he ʻikai foaki ʻe he puleʻanga fakalotofonua ʻoku tuʻu ai e feituʻu faiʻanga kemí ha tuʻunga ke fakaʻatā mei he tukuhaú, ʻe totongi ʻe he hetikuota ʻo e Siasí ʻa e tukuhaú.

Fakapaʻanga ʻe he Siteikí ʻo e Ngaahi Faiʻanga Kemí

ʻI he ʻIunaiteti Siteití mo Kānata, ʻe tokangaʻi ʻe he siteiki fakafofongá ʻa e ngaahi meʻa fakapaʻanga ʻo e faiʻanga kemí ʻo ngāueʻaki ha ʻakauni pangikē fakaʻiuniti ʻo e Siasí (CUBS) ne fokotuʻu ʻe he Potungāue ki he Paʻangá ʻi he hetikuota ʻo e Siasí. He ʻikai fokotuʻu pe ʻe tipōsiti fakahangatonu ʻe he ngaahi siteiki fakafofongá ha ngaahi ʻakauni mo e pangikeé. ʻOku fakaʻaongaʻi ʻa e ʻakauni CUBS ke totongi ʻaki e ngaahi fiemaʻu ki he polokalama nofo kemí ʻi he ngaahi ʻekitivitií mo e ʻū nāunaú. ʻOku totonu ke fakahū ʻa e ngaahi totongi kotoa pē ʻa e tokotaha ʻokú ne fakaʻaongaʻí ki he ʻakauni CUBS. ʻI he ngaahi feituʻu mavahe mei he ʻIunaiteti Siteití mo Kānatá, ʻe fetuʻutaki ʻa e palesiteni fakasiteiki fakafofongá ki he kau ngāue ʻi he ʻēliá ki he tafaʻaki fakapaʻangá ki ha ngaahi fakahinohino ki hono fakaava ha ngaahi ʻakauní.

ʻE ʻaotitaʻi ʻe he tokotaha ʻaotita ʻo e siteiki fakafofongá ʻa e ngaahi ngāue ki he nofo kemí ʻo fakaʻaongaʻi ʻa e foomu lolotonga ki hono ʻAotita ʻo e Nofo Kemi Fakatupulakí ʻoku ʻi he Area Audit Resource Library.

ʻE vakaiʻi fakalelei ʻe he palesiteni siteiki fakafofongá pea mo fakangofua ʻa e paʻanga hū mai mo e ngaahi fakamole kotoa pē. Kapau ʻe fakatupu ha paʻanga ʻe ha faiʻanga kemi mei ha ngaahi koloa fakanatula, ʻe fakahā ʻe he siteiki fakafofongá ki he pule ʻo e ʻū nāunau fakatuʻasinó ʻoku ngāue mo e Vaʻa ki he Koloa Fakanatulá ʻi he Potungāue ki he Ngaahi ʻApi-siasí (ʻi he ʻIunaiteti Siteití mo Kānata) pe ʻōfisi fakaʻēliá (mavahe mei he ʻIunaiteti Siteití mo Kānatá). ʻOku fakahū ʻa e paʻanga hū mai kotoa ko iá ki he paʻanga fakalūkufua ʻa e Siasí.

ʻE lava ke tokoni ʻa e kāingalotu ʻo e Siasí ke fakasiʻisiʻi ʻa e fakamole ki hono tokangaʻi, monomono, pe fakaleleiʻi ʻo e ngaahi faiʻanga kemí ʻaki haʻanau ngāue, foaki ha ʻū naunau, pe fakaʻaongaʻi ha meʻangāue ki he ngaahi monomono īkí pē. Ko e ngāue kotoa ki ha fetongi ʻe fakahoko ia ʻe he pule ki he ngaahi nāunau fakatuʻasinó ʻo fakaʻaongaʻi pē ʻa e kau ngāue aleapau naʻe ʻosi fakangofuá pea mo e paʻanga naʻe ʻosi tali ki he palani fakataʻú. He ʻikai fakaʻaongaʻi ʻe he kau taki ʻo e Siasí ha ngaahi polokalama kumi paʻanga makehe ke totongi ʻaki e ngaahi fakamole fekauʻaki mo hano fakaleleiʻi ʻo e faiʻanga kemí fakatupulakí (vakai, Ko Hono Fakapaʻanga e Ngaahi Fakaleleiʻi ʻo e Ngaahi Faiʻanga Kemi Fakatupulaki Lolotongá).

Maʻuʻanga Vai Inú

Ko e ngaahi maʻuʻanga vai inu kotoa pē ʻi he kelekele kotoa ʻo e Siasí ʻoku maʻu ia mei ha vaitupu pe vaitafe fakatāutaha (ʻo kehe mei he vai fakakoló) ʻoku langa, fakalele, pea mo tokangaʻi ʻo fakatatau mo e ngaahi tuʻutuʻuni fakalaó mo e ngaahi tuʻunga ʻo e Siasí kuo ʻosi fokotuʻú. Ko e pule ʻo e ngaahi nāunau fakatuʻasinó ʻokú ne fatongiaʻaki hono fakapapauʻi mo hono sivi e tuʻunga lelei ʻo e vaí pea fakatatau mo e ngaahi fiemaʻu fakalaó pea mo e founga lelei taha hono tokangaʻí.

Meʻangāué mo e Meʻalelé

ʻOku ʻikai faʻa ʻomi pe tauhi ʻe he Potungāue ki he Ngaahi ʻApi-siasí mo e Siasí ha meʻangāue pe ʻū meʻalele ki ha ngaahi faiʻanga kemi fakatupulaki. Ko e taimi ʻoku fiemaʻu ai ha meʻangāué, ʻe nō totongi ʻi ha fakamole ʻa e siteikí, ʻomai ʻe he kāingalotu ʻo e siteikí, pe fakatau ʻo ngāueʻaki e ʻinasi patiseti ʻa e ʻiuniti fakalotofonuá mo e paʻanga mei he niʻihi ʻoku nau fakaʻaongaʻí.

Kau Tauhi ʻApí

Kapau ʻe ʻi ai ha fiemaʻu ki ha taha pe kau tauhi ʻapi taimi kakato tokolahi ange, ʻe lava ke ui ʻe he kau palesiteni siteiki fakafofongá ha kau faifekau ngāue tokoni faka-Siasi ke fakahoko ʻa e tuʻunga ko iá. ʻOku vaheʻi ʻa e kau faifekau ngāue tokoni faka-Siasi ko ʻení ʻe heʻenau pīsopé.

Ke maʻu ha fakamatala lahi ange ki hono ui ʻo e kau faifekau ngāue tokoni ʻo e Siasí, vakai, Tohi Tu‘utuʻuni Fakakātoá, 24.7.