Tauʻanga Meʻalele ʻo e ʻApi-siasí

Fakahinohino ki he Tauʻanga Meʻalelé ki he ʻIunaiteti Siteití mo Kānatá

Ko e fakamatala ʻeni ki hono fakaʻaongaʻi ʻo e tauʻanga meʻalelé, mo e tauʻanga meʻalele kiate kinautolu ʻoku faingataʻaʻia fakaesinó, pea mo e tānakiʻanga veve ki he kau taki ʻi he ʻIunaiteti Siteiti mo Kānatá. ʻE to e ala ʻaonga ia kiate kinautolu ʻi he ngaahi feituʻu kehé. Neongo ia, fakakaukauʻi ʻa e ngaahi tuʻutuʻuni mo e ngaahi fiemaʻu fakalotofonuá, pea feongoongoi mo e pule fakalotofonua ki he ngaahi meʻa fakatuʻasinó fekauʻaki mo hono fakaʻaongaʻi totonú.

Fakaʻaongaʻi ʻo e Tauʻanga Meʻalelé

Makehe mei he ngaahi fakahinohino ʻi he 35.5.8 ʻo e Tohi Tuʻutuʻuni Fakakātoá, manatuʻi ko hano kaungā fakaʻaongaʻi ʻo e ngaahi tauʻanga meʻalele ʻa e Siasí mo e ngaahi kautaha pe niʻihi fakafoʻituitui kehé, te ne lava ke fakafihiaʻi ai ʻa e Siasí ʻi ha ngaahi meʻa fakatuʻutāmaki, ngaahi moʻua, pea mo ha fakamole lahi ange ki hono tauhí. Te ne lava ke fakatupu ha ngaahi palopalema fakakelekele ʻoku ʻikai sai mo ala mole ai mo e ngaahi fakaʻatā mei he totongi tukuhaú. Naʻa mo hono fakaʻaongaʻi ʻo e tauʻanga meʻalelé ki he ngaahi feinga paʻanga ʻa e toʻutupú (ʻo fakatatau mo e natula ʻo e ʻekitivitií) ʻe lava ʻo iku ki ha ngaahi nunuʻa fakakelekele mo fakatukuhau ʻi he paʻanga hū maí.

Ka ʻi ai ha faʻahinga fakaʻatā mavahe mei he tuʻutuʻuní, kuo pau ke fakafekauʻaki ia mo e pule fakalotofonua ki he ngaahi meʻa fakatuʻasinó pea mo toki fakangofua ʻe he talēkita ki he ngaahi meʻa fakatuʻasinó. Ko e ngaahi fakaʻatā makehé ʻoku totonu ke ʻaonga ki he Siasí (hangē ko ha fakaʻehiʻehi mei ha fepaki mo e fakaʻaongaʻi ʻe he Siasí), fakaʻehiʻehi mei ha moʻua fakalao, pea maʻu kotoa mo e ngaahi fakangofua totonú kimuʻa pea toki fakangofua ke fakaʻaongaʻi.

Makehe mei he ngaahi tauʻanga meʻalele, ko e ngaahi sīpinga ʻeni ʻoku fakaʻaongaʻi fakatokolahi ʻe fiemaʻu ai ha fakangofua ʻo kau ai ʻa e hū ki he kelekele ʻo e Siasí, ngaahi matapā ʻo e ʻaá, palopalema ʻi he ngaahi ngataʻangá, pea mo e ngaahi felotoi fekauʻaki mo e totonu ke kolosi he kelekelé.

Tauʻanga Meʻalele Kuo Fakaʻilongaʻí

ʻOku lahi ha ngaahi tauʻanga meʻalele ʻoku fakaʻilongaʻi pau ke fakaʻaongaʻi ʻe he kakai ʻoku faingataʻaʻia fakaesino, ʻo hangē ko hono fiemaʻu ʻe he lao fakalotofonuá. Neongo ia, ʻe lava ke kole ʻe he kau pīsopé pe kau taki fakasiteikí ki he pule ʻo e naunau fakatuʻasinó ke fakaʻilongaʻi ha ngaahi feituʻu lahi ange ʻo ka fiemaʻu.

Ko e ngaahi fakatahaʻanga tokolahi hangē ko e konifelenisi fakasiteikí, ʻe fakapapauʻi ʻe he kau taki fakalotofonuá pea vahe (ʻe lava pē ke fakataimi) ha tauʻanga meʻalele feʻunga maʻá e kau faingataʻaʻia fakaesinó. ʻE fakafekauʻaki foki ʻe he kau pīsopé mo e ngaahi uooti kehé ʻo kapau ʻe femahiliaki ʻa e taimi te nau fakaʻaongaʻi ai ʻa e falé mo hono tauʻanga meʻalelé. Hangē ko ʻení, mahalo ʻe ʻi ai ha uooti he ʻikai lahi feʻunga ʻene fakaʻaongaʻí koeʻuhí ʻoku ʻi ai ha uooti kimuʻa ʻokú ne lolotonga fakaʻaongaʻi ʻa e feituʻu ki he faingataʻaʻia fakaesinó.

ʻE to e akoʻi foki mo fakamanatu ʻe he kau pīsopé ki he kāingalotú fekauʻaki mo hono fakaʻaongaʻi totonu ʻo e tauʻanga meʻalele ki he faingataʻaʻia fakesinó. Hangē ko ʻení, ko e tau ko ia ʻi ha tauʻanga meʻalele ʻoku ʻikai fakaʻilongaʻi ʻo fuʻu ofí, ʻe lava ke ne ʻai ai ʻa e tauʻanga ʻoku ʻataá ke ʻikai to e lava ʻo fakaʻaongaʻi. Naʻa mo kinautolu ʻoku ʻi ai haʻanau ʻū laʻi fakaʻilonga pe fakangofuá ʻe fiemaʻu ke nau tuku ʻatā ʻa e ngaahi tauʻanga veeni ʻoku fakaʻilongaʻí ki ha niʻihi ʻoku ʻi ai haʻanau ngaahi meʻalele ʻoku hiki pe fiemaʻu ha tauʻanga lahi ange ki hono hiki mo tukuhifó.

Ke maʻu ha fakamatala lahi ange mei he Siasí, ʻalu ki he uepisaiti Kau Faingataʻaʻia Fakaesinó .

Kapa Veve Lalahí mo Īkí

Ko e ngaahi kapa veve lalahí mo īkí ke fakaʻaongaʻi pē ʻe he Siasí. ʻE lava ke fakangatangata ʻa hono fakaʻaongaʻí ʻaki hano ʻaaʻi, loka, pe ha to e founga kehe, ʻo ka fiemaʻu.