PAGPANGITA OG KUSOG SA PAGSALIKWAY SA SALA

Kon ikaw nahisugamak na sa pornograpiya sa bisan unsa kagrabe, mahimo kang makaundang. Aduna kay kabubut-on sa pagpili sa imong mga hunahuna ug mga buhaton. Mahimo nga ang kaaway miilad kanimo kaniadto, apan anaa kanimo ang katapusang pagpili. Maangkon nimo pagbalik ang kusog sa Espiritu sa imong kinabuhi. Sa pagbuhat niini, ikaw magkinahanglan labaw sa tanan nga masayud nga ang Manunubos nahigugma kanimo. Aduna Siyay gahum sa pagtabang kanimo. Namatay Siya aron sa pagbayad sa kasal-anan sa tanan nga maghinulsol ug mosunod Kaniya. Masangpit nimo ang gahum sa Iyang Pag-ula alang sa paglaum ug kusog samtang ikaw maghinulsol. Hinumdumi ang mga pulong ni Apostol Pablo: “Mahimo ko ang tanang butang pinaagi kang Kristo nga nagapalig-on kanako” (Mga Taga-Filipos 4:13).

Paglaum

Kon misulay na ka nga moundang sa pornograpiya apan wala magmalampuson, mahimong mawad-an ka og gana. Si Satanas mosulay sa pagpahimulos sa imong pagkawalay gana pinaagi sa pagsulay sa pagkombinsir kanimo nga dili ka makahunong o nga ang Pag-ula dili mosalir kanimo. Kining tanan mga bakak. Tungod sa matubsanon nga sakripisyo ni Jesukristo, mahimo ka nga maghinulsol ug magusab. Ang Ginoo misaad nga “bisan pa ang inyong mga sala mapula, sila pagapution ingon sa nieve” (Isaias 1:18).

Pagdawat og tulubagon ug pag-ila sa pagpangatarungan

Ang mga tawo mangatarungan sa sala pinaagi sa pagsulti sa ilang kaugalingon, “Wala bitaw tawo nga nasakitan,” “Panagsa ra bitaw nako kini buhaton,” o “Kini nalang gyud ang katapusan.”

Kon ikaw magpasagad sa pornograpiya, kinahanglan ka nga moila sa kamatuoran kabahin sa imong kaugalingon ug sa imong mga binuhatan. Tinguhaa ang Ginoo pinaagi sa pag-ampo, ug Siya motabang kanimo nga moeksamin sa imong batasan sa matinuorong paagi ug klaro nimong makita ang imong kaugalingon ug ang imong mga pangatarungan. Kon masayud ka sa kamatuoran, “ang kamatuoran magahatag kaninyog kagawasan” (Juan 8:32). Hinumdumi nga ikaw usa ka anak sa Dios. Pinaagi sa Pag-ula, aduna kay gahum nga mahimong sama Kaniya. Dili gayud ikaw makakita og kalipay diha sa makasasala nga batasan. Ang bisan unsang pag-apil sa pornograpiya makadaot kanimo sa espirituhanong paagi. Ayaw og risgo sa mga sangputanan sa sala.

Paghinulsol ug ang Pag-ula

Ang yawe sa pagbiya sa pornograpiya makita diha sa paghinulsol ug sa Pag-ula ni Jesukristo. Ang paghinulsol makadala og kalig-on ug usa ka bag-ong pagtagad sa Dios, sa kaugalingon, ug sa kinabuhi sa kinatibuk-an. Pinaagi niini nga kalig-on, makatalikod ka sa dautan. Mapahiuyon nimo ang imong kasingkasing ug kabubut-on sa plano sa Dios alang kanimo.

Sugdi uban sa matinguhaon nga pag-ampo, ug sa mapainubsanong paagi pangayo og tabang. Ang imong Langitnong Amahan makapasaka sa imong tinguha ug kusog kon ikaw mohangyo uban sa tinudanay nga tuyo, uban sa hugot nga pasalig nga mag-usab. Ang mga kasulatan motabang kanimo nga makasabot sa gahum ug gugma sa Dios. Ang imong hugot nga pagtuo mousbaw diha sa Iyang abilidad sa paglig-on kanimo ug mopalingkawas kanimo gikan niini nga pagkaulipon. Sa imong pagsalikway sa imong mga sala ug motuman sa mga kasugoan sa Dios, ang impluwensya sa Espiritu mobalik sa imong kinabuhi.

Ang Pag-ula ni Jesukristo adunay duha ka mga gamhanang epekto: kini molimpyo kanimo sa sala, ug kini molig-on kanimo. Si Elder Dallin H. Oaks sa Korum sa Napulog Duha ka mga Apostoles mipasabut:

“Kon ang usa ka tawo miagi sa proseso nga miresulta sa unsay gitawag sa mga kasulatan nga usa ka masulub-on nga kasingkasing ug usa ka mahinulsulon nga espiritu, ang Manluluwas mihimo labaw pa sa paglimpyo niana nga tawo sa sala. Siya mihatag usab kaniya og bag-ong kusog. Ang bag-ong kusog nga madawat nato gikan sa Manluluwas mahinungdanon alang kanato nga masabtan ang katuyoan sa atong pagkalinimpyohan sa sala, nga mao ang pagbalik ngadto sa atong Langitnong Amahan. Aron makasulod sa Iyang presenysa, kinahanglan nga kita mas labaw pa sa limpyo. Kinahanglan sab nga kita mausab gikan sa usa ka tawo nga huyang sa moral nga paagi nga nakasala ngadto sa usa ka tawo nga lig-on nga may espirituhanong paglambo nga makapuyo sa presenysa sa Dios. Kita kinahanglan nga, sumala pa sa gisulti sa kasulatan, ‘[mahimo nga] usa ka santos pinaagi sa pag-ula ni Kristo ang Ginoo’ (Mosiah 3:19). Mao kini ang gipasabot sa kasulatan sa pagpasabot niini nga ang usa ka tawo nga naghinulsol sa kasal-anan mosalikway niini nila (tan-awa sa D&P 58:43). Ang pagsalikway sa mga sala sobra pa kay sa pagresulbar nga dili na mousab niini. Ang pagsalikway naglakip sa usa ka mahingdanong pag-usab” (“Sins, Crimes, and Atonement,” usa ka pakigpulong nga gihatag ngadto sa mga magtutudlo sa relihiyon sa CES, Peb. 7, 1992, 12).

Pagkumpisal

Ang paghinulsol naglakip sa pagkumpisal sa imong mga sala ngadto sa Ginoo. Siya “maloloy-on ngadto niadto kinsa nagkumpisal sa ilang mga sala uban sa mapainubsanon nga mga kasingkasing” (D&P 61:2; tan-awa usab sa Mosiah 26:29). Ang seryoso nga mga kalapasan nagkinahanglan og pagkumpisal ngadto sa mga representante sa Ginoo sa Simbahan (kasagaran mao ang bishop). Ang wala tuyoa nga pagkasugat og pornograpiya wala magkinahanglan sa pagkumpisal ngadto sa imong bishop. Apan, kon gituyo nimo pagtan-aw ang pornograpiya o kon balik-balik ka nga nagpasagad niini o mangatarungan sa paggamit niini, kinahanglan nimong hisgutan ang mao nga butang uban sa imong bishop.

Panabang gikan sa imong bishop

Ang imong bishop nabalaka sa imong espirituhanong kaayohan. Gusto siya nga motabang kanimo. Mahimong magduhaduha ka sa pagsulti kaniya sa imong problema kabahin sa pornograpiya. Mahimong maulaw ka o dili sigurado kon unsay mahitabo. Ayaw tuguti ang imong mga kahadlok nga mohikaw kanimo sa mga panalangin sa paghinulsol. Pinaagi sa Espiritu, ang imong bishop makasabot sa imong mga gihunahuna, ug motabang kanimo nga makahinulsol. Siya mahimong usa ka mahinungdanon nga dumadapig.

Pagmatinuoron sa imong bishop. Ayaw tagoi o pagamyi ang imong sala. Ang imong pagsulti sa tinuod motabang kaniya nga makasabot sa kagrabehon ug kaseryoso sa imong problema. Iyang himoong konpidensyal ang inyong pag-istoryahanay.

Pagputol sa balik-balik [cycle] nga pagpasagad

Ang pagpasagad sa pornograpiya kasaragaran balik-balik nga mahitabo. Kon ikaw anaa niini nga pagbalik-balik, magpunay ka sa paghambin og dili maayo nga mga hunahuna, mga talan-awon, ug mga imahe agig tubag sa kalaay, kamingaw, pagkakuryoso, bug-at nga gipamati, pagkawala sa kadasig, o panagsungi. Dayon imong ibutang ang imong kaugalingon sa mga kahimtang nga modangat kanimo sa pornograpiya. Human niina, mawad-an na ka sa kadasig ug mousab na pud sa pagbalik-balik [cycle].

Maputol nimo kining pagbalik-balik pinaagi sa pag-ila ug pagpugong sa pinakauna nga mga hunahuna ug binuhatan nga modangat kanimo sa pornograpiya. Sabta ang imong mga dagan [pattern] sa batasan ug ang imong mga pasumangil o mga pangatarungan. Kon dali ka nga makailis sa negatibo nga mga hunahuna mas sayon ka nga makalikay sa mga buhaton nga mosunod niini nila.

Ang pinakamaayo nga mga solusyon mao kadtong imong mapalambo samtang ikaw makigtambag sa Ginoo, apan kini nga mga sugyot mahimong makatabang:

Pagpuasa ug pag-ampo alang sa panabang.
Pag-ila og positibo nga mga kalihokan nga makaokupar sa imong panahon, sama sa pagtuon sa mga kasulatan, pag-exercise, o pakigistorya sa usa ka sakop sa pamilya o higala.
Usba ang imong palibut. Alirongi ang imong kaugalingon sa mga litrato, musika, ug mga basahon nga modasig og maayo ug makapabayaw nga mga hunahuna. Likayi ang medya, mga tawo, o mga kahimtang nga nakatintal kanimo kaniadto. Konsideraha ang pagpaibot sa kable sa Internet o telebisyon.
Pagkat-on og makapalig-on nga mga paagi sa pagtubag sa panagsungi, kalaay, o ubang dili maayo nga mga pagbati.
Isulti ug pangayo og tabang gikan sa ginikanan, sa kapikas, o laing sinaligan nga sakop sa pamilya.

Ang imong tinguha sa pag-usab kinahanglan kusog gayud—mas kusog pa kaysa imong pagtinguha sa pornograpiya. Pamalandongi ang imong pinakasinsero nga mga tinguha alang sa imong kinabuhi ug sa kinabuhi sa imong pamilya, ug tutok diha sa paghimo og maayo inay magsige og hunahuna sa imong mga panglimbasug uban sa pornograpiya. Si Jesukristo mitudlo sa Iyang mga tinun-an, “Ang mata mao ang suga sa lawas: Busa kon maayo ra ang imong mata, ang tibuok mong lawas mapuno sa kahayag” (Mateo 6:22). Kon mas punon nimo ang imong kinabuhi sa maayo nga mga hunahuna ug mga kalihokan, mas minos ang imong paghatag og pagtagad sa dautan.

Anaay makatabang nga propesyonal

Ang ubang mga tawo mahimong manginahanglan og dugang panabang sa pagbiya sa pornograpiya. Ang pagkaadik usahay mga timailhan sa uban pang mga problema. Ang imong bishop mahimong mo-refer kanimo ngadto sa usa ka propesyonal nga magtatambag nga makatabang kanimo. Pinakamaayo nga makakita ka og magtatambag nga adunay maayong pagsabot sa mga baruganan sa ebanghelyo.