Pagpangandam og usa ka Plano

Itugot nga ang imong pamilya mouswag sa espirituhanong paagi uban sa luwas nga paggamit sa teknolohiya pinaagi sa pagpangandam og usa ka plano sa media. Bisan kon ikaw rang usa, ang pagpangandam og usa ka plano usa ka importanting lakang. “Pagpundok sa inyong mga kaugalingon; pag-andam sa matag gikinahanglan nga butang, ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagkat-on, usa ka balay sa himaya, usa ka balay sa kahusay, usa ka balay sa Dios” (Doktrina ug mga Pakigsaad 109:8).

“Bisan unsa pa ang mga panginahanglan alang sa atong indibidwal nga mga pamilya, tudloan nato ang matag sakop sa pamilya sa paggamit sa teknolohiya sa maalamon ug positibo nga paagi gikan sa sinugdanan—sa pagpalambo og moral nga sumbanan sa paghunahuna. Atong tudluan ang mga bata sa mapuslanong mga paagi sa paggamit sa teknolohiya alang sa kaayohan. Kita makatudlo nila sa pagtimbang-timbang pinaagi sa pagpangutana sa ilang kaugalingon, ‘Ang paggamit ba niini makahatag og maayo nga katuyoan?’ Ang atong mga pagpili kon sa unsang paagi kita motudlo sa atong mga pamilya karon makaimpluwensya sa umaabut nga mga henerasyon” (Joy D. Jones, “It Starts with Us” [pakigpulong nga nahatag atol sa komperensya sa Utah Coalition against Pornography, Mar. 10, 2018], newsroom.ChurchofJesusChrist.org).

Bisan og ang gipahayag nga mga utlanan importante, si Elder Bednar mitanyag sa mosunod nga tambag: “Magmainampingon nga dili mapalabihan ang pagdiktar sa paggamit sa teknolohiya o magmugna og walay katapusang mga lagda o pagdili. Ang gitinguha nga mga kinaiya ug matarung nga mga pamatasan dili mouswag diha sa kahimtang sa kanunayng pagpugong ug pagpamugos. Ang inyong gugma, pailub, pagtudlo, ug pagpangalagad makahatag og mahinungdanon nga espirituhanong suporta samtang sila mopadayon diha sa higpit ug pig-ot nga dalan” (“They Should Proclaim These Things unto the World” [pagkigpulong nga gihatag atol sa seminar alang sa bag-ong mga presidente sa misyon, Hunyo 24, 2016], ChurchofJesusChrist.org). Si Elder Bednar mipadayon sa pagsugyot sa mosunod nga mga baruganan nga hunahunaon:

Pagtudlo sa mga anak nga “matarung nga mogamit sa moral nga kabubut-on ug mamahimong instrumento kinsa molihok pinasubay sa doktrina ni Kristo kay sa mga butang nga aghaton sa paglihok.”
Pagtabang sa mga bata nga “makakat-on nga ang bugtong salaan nga malampuson nga makabuntog ug makalikay sa dautan anaa diha sa kasingkasing ug hunahuna sa usa ka matinud-anong disipulo ni Kristo. Ang pakig-uban lang sa Espiritu Santo ang igong makapalig-on batok sa ‘nagsiga nga ipana kaninyo sa Yawa’ [Mga Taga-Efeso 6:16].”
Pagtabang sa mga bata “nga madiskubrihan ang daghang mga paagi sa paggamit niining mga kahimanan pinaagi sa pagdasig aron mapadayon ang buhat sa kaluwasan.”

Ang ideya sa pagbuhat og usa ka plano mahimong makapabati og kabug-at. Ayaw ibutang kanang tanang kabug-at sa inyong kaugalingon. Buhata kining plano kauban niadtong inyong gihigugma. Ania ang pipila ka pangutana nga hisgutan:

Kanus-a Ok ang paggamit sa teknolohiya, ug unsa ka dugayon?
Unsa ang mahimo ra ug unsay dili?
Unsa nga ang-ang sa pagbantay ang maanaa?
Unsa ang mga sangputanan kon ang mga lagda gituyo sa paglapas?
Unsa ang atong plano sa pagpalayo kon kita sulagma nga makasugat og ngil-ad nga media?
Sa unsang paagi nga atong marekord ang atong plano?

Magpahiuyon uban sa espirituhanong mga pag-aghat. Ang mga filter makatabang sa pagpanalipod sa imong pamilya gikan sa sulod nga dili tukma, apan kini dili epektibo sa tanang higayon. Ang labing maayo nga salaan [filter] mao ang kaugalingong kabubut-on sa indibidwal ug tinguha sa paghimo og matarung nga mga pagpili, inabagan sa gasa sa Espiritu Santo.