Ko hono Teuteuʻi ha Palani

Fakaʻatā ho fāmilí ke tupulaki fakalaumālie ʻi hono ngāue ʻaki ʻo e tekinolosiá ʻo fakafou ʻi hono teuteuʻi ha palani ki he mītiá. Neongo kapau ʻokú ke toko taha pē ʻi ho fāmilí, ko hono teuteuʻi ha palaní ko ha sitepu mahuʻinga ia. “Fokotuʻutuʻu ʻa kimoutolu; teuteu ʻa e meʻa ʻaonga kotoa pē; pea fokotuʻu ha fale, ʻio, ko ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtua” (Tokāteline mo e Ngaahi Fuakava 88:119).

“ʻOku tatau ai pē pe ko e hā e ngaahi fie maʻu hotau fāmilí, tau akoʻi muʻa ʻa e mēmipa takitaha ʻo e fāmilí ke nau fakaʻaongaʻi fakapotopoto ki he leleí ʻa e tekinolosiá mei he kamataʻangá—ke nau fakatupulaki ha fakakaukau ʻoku maʻá. Tau akoʻi muʻa ki he fānaú ʻa e ngaahi founga ʻaonga ki hono fakaʻaongaʻi lelei ʻo e tekinolosiá. Te tau lava ʻo akoʻi kinautolu ke nau fakafuofuaʻi ʻaki ʻenau fehuʻi pē kiate kinautolu, ‘ʻE maʻu nai ha ola lelei ʻi hono fakaʻaongaʻi ʻení?’ Ko e ngaahi fili ʻoku tau fai ʻi he taimí ni ki he founga hono akoʻi hotau fāmilí, te ne tākiekina e ngaahi toʻutangata ʻi he kahaʻú” (Joy D. Jones, “It Starts with Us” [lea ne fakahoko ʻi ha konifelenisi ʻa e Utah Coalition against Pornography conference, ʻi Māʻasi 10, 2018], newsroom.ChurchofJesusChrist.org).

Neongo ʻoku mahuʻinga hono fakahaaʻi e ngaahi ngataʻangá, ʻoku ʻomi ʻe ʻEletā Petinā ʻa e faleʻi ko ʻeni: “Tokanga ke ʻoua ʻe fuʻu tōtuʻa hono puleʻi e ngāue ʻaki ʻo e tekinolosiá pe faʻu ha fuʻu lisi lōloa ʻo e ngaahi laó mo e ngaahi fakangatangatá. He ʻikai lava ke tupulaki ʻa e ngaahi tōʻonga ʻoku fie maʻú mo e ʻulungaanga māʻoniʻoní ʻi he loto ʻoku feinga maʻu pē ke puleʻi mo fakamālohiʻí. ʻE ʻomi ʻe hoʻo ʻofá, faʻa kātakí, akonakí, mo e ngāue fakaetauhí ha poupou mahuʻinga ʻoku fakalaumālié ʻi heʻenau laka atu ʻi he hala hangatonu mo fāsiʻí” (“They Should Proclaim These Things unto the World” [lea ne fakahoko ʻi ha seminā maʻá e kau palesiteni fakamisiona foʻou, 24 ʻo Sune, 2016], ChurchofJesusChrist.org). Naʻe hoko atu ʻa ʻEletā Petinā ʻo ne poupouʻi mai ʻa e ngaahi tefitoʻi moʻoni ko ʻení ke fai ha fakakaukau ki ai:

Ko hono akoʻi ʻo e fānaú ke nau “ngāue ʻaki angatonu ʻa e tauʻatāina ke filí pea hoko ko ha kau fakafofonga ʻoku nau ngāue ʻo fakatatau mo e tokāteline ʻo Kalaisí kae ʻikai ko ha ngaahi meʻa pē ʻoku tali ke fekauʻi.”
Ko hono tokoniʻi e fānaú ke nau “ʻiloʻi ko e meʻa sivi lelei pē te ne lava ʻo ikunaʻi mo fakaʻehiʻehi mei he ngaahi kovi ʻoku ʻi he loto mo e fakakaukau ʻo ha ākonga faivelenga ʻa Kalaisi. Ko e takaua pē ʻo e Laumālie Māʻoniʻoní te ne fakamālohia feʻunga ke fakafepakiʻi ʻa e ‘ngaahi ngahau vela ʻa e filí’ [ ʻEfesō 6:16].”
Ko hono tokoniʻi e fānaú ke “nau ʻiloʻi ʻi he ueʻi fakalaumālie ʻa e ngaahi founga lahi ʻe lava ke fakaʻaongaʻi ai ʻa e ngaahi meʻangāué ni ke laka atu ai ki muʻa ʻa e ngāue ʻo e fakamoʻuí.”

ʻE ala ongo fakamafasia ʻa e fakakaukau ki hono faʻu ha palaní. ʻOua ʻe hilifaki kotoa e mafasia ko iá ʻiate koé. Ngāueʻi ʻa e palani ko ʻení fakataha mo kinautolu ʻokú ke ʻofa aí. Ko ha ngaahi fehuʻi ʻeni ke aleaʻi:

Ko e fē ʻa e taimi ʻoku SAI ai ke ngāue ʻaki e tekinolosiá, pea ko e hā hono fuoloá?
Ko e hā e meʻa ʻoku talí mo e meʻa ʻoku ʻikaí?
Ko e hā e tuʻu ʻo hono vakaiʻí?
Ko e hā ʻa e ngaahi tautea ʻi he taimi ʻe maumauʻi ai ʻa e ngaahi laó ʻi heʻene ʻiloʻilo pau?
Ko e hā ʻetau palani ke tafoki ʻi he taimi ʻoku fakatuʻupakē ai ha mītia ʻoku kovi?
Te tau lekooti fēfē ʻetau palaní?

Moʻui taau ke maʻu e ngaahi ueʻi fakalaumālié. ʻE lava ke tokoni ʻa e ngaahi meʻa siví ke maluʻi ho fāmilí mei he ngaahi meʻa ʻikai tāú, ka ʻoku ʻikai ngāue lelei pehē he taimi kotoa. Ko e meʻasivi lelei tahá ʻa e tauʻatāina ke fili ʻa e fakafoʻituituí mo e holi ke fakahoko ha ngaahi fili māʻoniʻoni, fakataha mo e tokoni ʻa e meʻafoaki ʻo e Laumālie Māʻoniʻoní.