Ko e Maʻu ha Mahino ki he Mītiá

Ko e mītiá mo e tekinolosia fakaeonopōní ko ha ngaahi meʻafoaki fakaofo mei he ʻOtuá. ʻOku nau ngaohi ke malava ʻo vahevahe ʻa e ongoongoleleí ki he māmaní, kau atu ki he hisitōlia fakafāmilí ʻi ha ngaahi founga lelei, pea fakafehokotaki mo e kakai ʻokú ke ʻofa aí. Neongo e ngaahi tāpuaki lahi ʻoku maʻu mei hono ngāue ʻaki lelei ʻo e tekinolosiá, ʻoku mahuʻinga ke maʻu ha mahino ki he founga lelei taha ke ngāue ʻaki ai e ngaahi meʻangāue ko ʻení.

ʻE lava ke fakamālohia ʻa e ivi tākiekina ʻo e Laumālié ʻi hoʻo moʻuí pe fakavaivaiʻi ʻo makatuʻunga ʻi hoʻo ngaahi fili kau ki he mītiá. Naʻe poupouʻi ʻe ʻEletā Tēvita A. Petinā ʻa e kau ākonga ʻo Sīsū Kalaisí ke nau ngāue ʻaki ʻa e ngaahi meʻangāue lelei ko ʻení ʻi he founga lelei mo ʻaonga ange ke:

“Fakamoʻoni ki he ʻOtua ko e Tamai Taʻengatá, ki Heʻene palani ʻo e fiefiá maʻa ʻEne fānaú, pea ki Hono ʻAlo ko Sīsū Kalaisí, ko e Fakamoʻui ʻo e māmaní.”
“Talaki ʻa e moʻoni ʻo hono Fakafoki Mai ʻo e ongoongoleleí ʻi he ngaahi ʻaho kimui ní.”
“Fakakakato e ngāue ʻa e ʻOtuá” (“To Sweep the Earth as with a Flood” [Brigham Young University Education Week devotional, ʻAokosi 19, 2014], ChurchofJesusChrist.org).