“Ko hono Ngāue ʻAki Fakapotopoto ʻo e Mītiá,” Malu ʻi he Mītiá (2020)
“Ko hono Ngāue ʻAki Fakapotopoto ʻo e Mītiá,” Malu ʻi he Mītiá
Ko hono Ngāue ʻAki Fakapotopoto ʻo e Mītiá
Fakapapauʻi he taimí ni ʻa e founga te ke ngāue ʻaki ai ʻa e mītiá mo e tekinolosiá. Teuteu he taimí ni ʻaki hoʻo akoako fakahoko ʻa e ngaahi tefitoʻi moʻoni totonú ki he mālohi lolotonga e ngaahi taimi faingataʻá. Kuo faleʻi kitautolu, “Ko ia, mou tuʻu ʻi he ngaahi potu toputapu, pea ʻoua ʻe hiki mei ai kae ʻoua ke hokosia ʻa e ʻaho ʻo e ʻEikí; he vakai, ʻoku haʻu vave ia, ʻoku folofola ʻe he ʻEikí” (Tokāteline mo e Ngaahi Fuakava 87:8). Fakakaukau fakaʻaongaʻi ʻa e potufolofola ko ʻení ko ha fakahinohino ki he feituʻu founga lolotonga ʻokú ke ngāue ʻaki ai e mītiá. Faifeinga ke ʻi he ngaahi feituʻu ʻa ia ʻe nofoʻia maʻu ai pē koe ʻe he Laumālié.
“Kāinga, ʻoku tau maluʻi fēfē ʻetau fānaú mo e toʻu tupú? Ko ha meʻangāue ʻaonga ʻa e meʻa sivi ʻo e ʻinitanetí, ka ko e meʻa sivi lelei taha he māmaní, pea ko e meʻa pē ia ʻe taha ʻe ngāué, ko e meʻa sivi fakataautaha ʻoku maʻu mei ha fakamoʻoni loloto mo tuʻuloa ki he ʻofa ʻa ʻetau Tamai Hēvaní mo e feilaulau huhuʻi ʻa hotau Fakamoʻuí maʻatautolú” (Linda S. Reeves, “Maluʻi mei he Ponokalafí—ko ha ʻApi ʻOku Fakatefito ʻia Kalaisi,” Liahona, Mē 2014, 16).
Ko e mītiá ko ha meʻaʻofa fakaofo ia mei he ʻOtuá, hangē ko e māmaní ʻiate ia peé. Ka, ʻoku faʻa feinga ʻa e filí ke tohoakiʻi ʻetau tokangá mei he ngaahi holi māʻoniʻoní mo e ngaahi ueʻi mei he Laumālie Māʻoniʻoní, ʻo hangē ko ʻene meʻa ʻoku fai ki he ngaahi meʻafoaki kehé.