Pagmentinar sa mga Meetinghouse

Pagpanglimpyo sa mga Meetinghouse

Ang mga meetinghouse sa Simbahan kinahanglan nga atimanon sa paagi nga ikapakita ang sagrado nga matang ug katuyoan niini. Ang lokal nga mga lider, mga miyembro, ug ang grupo sa facilities management magtinabangay sa responsibilidad nga mapabiling limpyo ug hapsay ang meetinghouse ug ang mga nataran.

Pagpaapil sa mga Miyembro

Ang mga miyembro gihangyo nga moangkon og responsibilidad, uban sa grupo sa facilities management, alang sa pagpanglimpyo ug pag-atiman sa meetinghouse. Ang unang katuyoan sa pagpaapil sa mga miyembro mao ang paghatag og kaayohan ug pagpanalangin sa tanang miyembro—lakip ang mga batan-on ug ang dili kaayo mga aktibo—pinaagi sa paghatag og oportunidad sa pagserbisyo. Mopalig-on usab kini ug mopalambo sa pagtahod alang sa mga balay sa Ginoo alang sa pagsimba.

Ang pagpaapil sa mga miyembro i-organisar ug ipatuman ubos sa direksyon sa kapangulohan sa stake. Ang mga representante sa gambalay sa stake ug ward mahimong tawagon aron motabang sa pagtudlo ug sa pakigsabot niini nga responsibilidad. (Tan-awa ang impormasyon mahitungod sa pag-organisar sa programa.)

Ang panginahanglan sa paghimo og ekstensibo nga pagpanglimpyo ug ubang buluhaton maminosan kon kadtong mogamit sa gambalay manglimpyo human nila og gamit ug mogamit sa ilang kaalam, pag-amping, ug respeto sa tanang panahon.

Ang representante sa gambalay sa ward makaorganisar ug, kon mahimo, modumala sa sinemana nga mga oportunidad sa pagpanglimpyo. Ang tanang miyembro kinahanglang mahatagan og oportunidad nga makaapil sa pagpanglimpyo. Ang mga batan-ong lalaki ug mga batan-ong babaye gidapit nga moapil uban sa ilang mga pamilya, mga korum, o mga klase.

Ang mga batan-on kinahanglan nga dili himoong responsable sa pagpanirado sa gambalay inigka gabii o sa paggamit sa dagkong mga ekipo.

Hiposanan sa mga Gamit alang sa mga Miyembro

Ang meetinghouse mahimong adunay hiposanan sa mga gamit alang sa mga miyembro diin ang ekipo sa pagpanglimpyo ug mga suplay anha makuha dayon aron magamit sa mga miyembro. Ang mga representante sa gambalay sa stake ug ward makigsabot sa grupo sa facilities management aron mosangkap, mopundo, ug momentinar niini nga hiposanan.

Mga Pamaagi kon may Emerhensiya

Ang lokal nga mga lider sa pagkapari mopalambo og mga plano sa pagtubag sa lain-laing mga emerhensiya nga mahimong mahitabo sulod sa meetinghouse. Gamiton nila kini nga mga plano sa pagbansay sa mga miyembro ug sa paggamit niini atol sa mga panahon sa emerhensiya. Girekomendar kini nga ibutang diha sa tukma nga mga dapit ang impormasyon sa pagkontak sa lokal nga pulis, bombero, ug pang-emerhensiya nga medikal nga mga serbisyo.

Paglikay sa Sunog

Ang risgo sa sunog maminosan kon ang tanan nga mogamit sa meetinghouse motuman sa makatarunganong mga pasidaan. Ang mosunod mao ang pipila ka gisugyot nga mga paagi aron malikayan ang sunog:

• Ang tanang daling modakop og kalayo nga mga materyal—lakip ang mga kahoy, papel nga mga produkto, mga kemikal, ug ubang mga tinapok—dili ibutang sa mga kwarto, mga hiposanan sa mga gamit, mga kabinet, ug mga dapit nga adunay mga lutoanan, mga pugon, mekanikal nga ekipo, ug mga utility.

• Likayan ang paggamit og mga pangpainit nga ekipo [space heater].

• Dili mobiya sa mga stove o mga oven nga walay magbantay kon mag-init og pagkaon o magpabukal og tubig.

Mga Agianan ug mga Dalan sa Gawas

Ingon nga ang mga lider mohawan sa mga pasilyo ug sa ubang mga agianan sa sulod, importante usab nga hawanan ang mga agianan o mga dalan sa gawas alang sa luwas nga pagsulod ug paggawas.

Mga Yawe sa Meetinghouse

Ang grupo sa facilities management mohatag og mga yawe sa meetinghouse ngadto sa mga lider sa stake. Ang mga bishopric moapud-apod sa mga yawe ngadto sa mga lider sa ward sigon sa sugo sa stake. Ang matag bishopric magtipig og rekord kon kinsa ang adunay mga yawe ug mahimong mohatag og kopya niana nga rekord ngadto sa representante sa gambalay sa stake. I-uli sa mga miyembro ang tanang yawe kon ma-release sila gikan sa mga responsibilidad kalabot niini.

Kwarta

Ang kwarta dili gayod biyaan diha sa meetinghouse tibuok gabii o pasagdan nga walay magbantay.

Mga Pamaagi sa Kasiguroan ug Pagpangandado

Ang mga lider sa stake o ang mga agent bishop mokonsiderar sa paggamit og eskedyul alang sa mga oras sa pagpanirado sa meetinghouse ug mga pamaagi sa pagpangandado. Kini nga mga pamaagi kinahanglan nga sundon matag gabii pagkahuman dayon sa naestablisar nga oras sa pagpanirado.

Ang mga lider sa pagkapari mahimong mosangon og mga tawo nga mokandado sa gambalay nga magtinagurha aron maminosan ang personal nga kapeligro. Ang pamaagi sa pagpangandado naglakip sa pagsuta nga walay dili awtorisado nga mga tawo nga magpabilin diha sa gambalay, sa pagpalong sa tanang suga ug sa temporaryo nga pangpainit o pangpabugnaw, ug pagpangandado sa mga pultahan ug mga bintana.

Ang mga miyembro sa Simbahan nga adunay yawe nga mosulod sa meetinghouse kinahanglan nga mosirado ug mokandado sa gawas nga mga pultahan ug tanang bintana kon sila mobiya.

Ang lokal nga mga lider kinahanglan nga mosuta nga ang mga computer, mga copy machine, mga portable electronic keyboard, ug audiovisual nga ekipo gibutang diha sa kinandadohan nga mga kwarto o mga dapit nga hiposanan. Agi og dugang, ang mga computer ug elektronik nga ekipo markahan isip kabtangan sa Simbahan, ug ang lista sa model ug mga serial number kinahanglan nga hiposon.