Tausiaina o Falelotu

Faamamāina o Falelotu

O falelotu o le Ekalesia e tatau ona tausia i se auala e faaalia ai lo latou natura paia ma le faamoemoega paia. O taitai i le lotoifale, tagata o le au paia, ma le vaega e pulea fale ma fanua e tausoaina faatasi le tiutetauave e tausi le mamā ma le lelei o falelotu ma lotoa.

Auai o Tagata o le Au Paia i le Faatinoina

Ua talosagaina tagata o le au paia e talia le tiutetauave, faatasi ai ma le vaega e pulea fale ma fanua, mo le faamamaina ma le tausiga o falelotu. O le faamoemoega autu lava o le auai o tagata o le au paia ia aoga ma faamanuia ai tagata uma o le au paia—e aofia ai le autalavou ma tagata e le malolosi i le ekalesia—e ala i le tuuina atu i ai o avanoa e auauna ai. E toe faamalosia ai foi ma faalolotoina le faaaloalo mo maota tapuai o le Alii.

O le auai o tagata o le au paia i le faatinoina e faatulagaina ma faataunuuina i lalo o le taitaiga a le au peresitene o le siteki. E mafai ona valaauina ni sui o le siteki ma le uarota e vaaia le falelotu e fesoasoani e aoao atu ma faamaopoopo lenei tiutetauave. (Tagai i faamatalaga e uiga i le faatulagaga o le polokalama.)

E tuuitiitia le manaomia o se faamamaaga tele ma isi galuega pe a tapena e i latou o e faaaogaina le fale pe a mae’a a latou gaoioiga ma faaaoga le poto, faaeteetega, ma le faaaloalo i taimi uma.

E mafai e le sui o le uarota e vaaia le fale ona faatulaga ma, i nofoaga e mafai ai, vaavaai avanoa e faamama ai i vaiaso taitasi. E tatau ona tuuina atu i tagata uma o le au paia se avanoa e auai ai i le faamamaaga. E valaaulia ia alii talavou ma tamaitai talavou ia auai ma o latou aiga, korama po o vasega (i le faamamaina o le falelotu).

E le tatau ona nafa tagata talavou ma le lokaina o le fale i le po pe latou te taulimaina ni masini e alu i le paoa.

Kapoti mo le Au Paia

E mafai ona i ai i se falelotu se kapoti mo le au paia lea e mafai ona maua ai masini ma sapalai e faaaoga e le au paia mo le faamamaina o le falelotu. E mafai ona faamaopoopo faatasi e sui o le siteki ma le uarota e vaaia le falelotu ma le vaega o le pulega o fale ma fanua le faatotogaina, toefaatutumu, ma le tausiaina o lenei kapoti.

Faiga Faavae mo Faalavelave Faafuasei

E atinae e taitai perisitua i le lotoifale ni fuafuaga e tali atu ai i faalavelave faafuasei eseese e ono tulai mai i falelotu. Latou te faaaoga nei fuafuaga e aoao faamasani ai le au paia ma tapa atu i ai i taimi o faalavelave faafuasei. E fautuaina ia faaalia i ni nofoaga talafeagai ia faamatalaga e faafesootai ai le ofisa o leoleo, tineimu, ma tautua faafomai mo faalavelave faafuasei i le lotoifale.

Puipuiga mai Mu

O le matautia o se mu e mafai ona tuuitiitia pe a faaeteete tagata uma e faaaogaina le falelotu. O loo i lalo nisi o tulaga fautuaina e puipui ai mai ni mu:

• Ia tuuese uma mea e faigofie ona mu—e aofia ai laupapa, mea e gaosi i pepa, vailaau, ma isi otaota—mai potu, kapoti, kapeneta, ma avanoa o loo i ai vaivevela, potu ea vevela, mea e faaaoga ai masini, ma mea taua.

• Aloese mai le faaaogaina o masini faamafanafana feavea’i.

• Aua ne’i tuua ogaumu pe a faavevela meaai pe faapuna ai vai i le umukuka e leai se tagata e vaaia.

Auala Savali i Tafatafāfale ma Fafo

E pei foi ona tausisia e taitai ia auala savali i totonu o le fale ma isi nofoaga e ui ai i totonu ia kilia, e taua foi le tausisia o auala savali i fafo po o tafatafāfale ia kilia mo le ulufale ma le ulufafo saogalemu.

Ki o Falelotu

O le vaega o pulega o fale ma fanua e tuuina atu ki o le falelotu i taitai o le siteki. O au epikopo e tufatufaina ki i taitai o uarota e pei ona faatonuina ai e le siteki. E teu e au epikopo taitoatasi se faamaumauga po o ai e i ai ki ma e mafai ona tuuina atu se kopi o lena faamaumauga i le sui o le siteki e vaaia le fale. E toefaafoi atu e tagata o le au paia ia ki uma pe a faamalolo i latou mai tiutetauave e faatatau i ai.

Tupe

E le tuua ni tupe i le falelotu i le po pe lē vaavaaia i soo se taimi.

Faiga Faavae mo le Puipuiga ma le Lokaina

O taitai o le siteki po o epikopo e vaaia falelotu e mafaufau e faaaoga se faasologa faatulagaina mo taimi e tapuni ai falelotu ma faiga faavae e loka ai. O nei faiga faavae e mulimulitaia i po taitasi i le mavae ai o le taimi faatulagaina e tapuni ai.

E mafai e taitai perisitua ona tofia ni tagata taitoalua e lokaina le fale ina ia tuuitiitia ai ni lamatiaga patino. O le faiga faavae o le lokaina e aofia ai le vaai e leai se tagata e le faatagaina o i ai pea i totonu o le fale, tape uma moli ma masini faavevela po o le ea malulu, ma loka ia faitotoa ma faamalama.

O tagata o le Ekalesia o e e i ai ki e mafai ona o atu ai i le falelotu e tatau ona latou tapunia ma loka faitotoa pito i fafo ma faamalama uma pe a latou tuua le falelotu.

O taitai i le lotoifale e vaai ua teuina lelei ia komepiuta, masini fai kopi, piano eletise feaveai, ma masini otovitio i potu po o nofoaga e teu ai e lokaina lelei. Ma le isi, ia faailoga ia komepiuta ma masini eletonika o meatotino a le Ekalesia, ma ia teuina se lisi o le ituaiga fausaga ma numera o masini.