Mataupu Faavae ma Taiala mo le Fuafuaina o Falelotu

“E saunia e le Ekalesia ia Falelotu ina ia mafai ai e i latou uma e ulufale mai ona:

• Osia ma faafou feagaiga e ala i sauniga paia (tagai i le Mataupu Faavae ma Feagaiga 20:75; 59:9–12).

• Potopoto faatasi (tagai i le 3 Nifae 18:22–23).

• Tapuai ma tatalo faatasi (tagai i le Mosaea 18:25; Moronae 6:9).

• Aoao atu ma auauna atu le tasi i le isi (tagai i le Moronae 6:4–5).

• Auai i isi faaaogaaga ua faamaonia e pei ona faamatalaina i le mataupu 35 o le Tusitaulima Aoao.

O se falelotu e mafai ona eseese fausaga e faalagolago i tulaga ma manaoga i le lotoifale” (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 35.1).

“Ina ia mafai ona faamalosia le Ekalesia, e saunia e eria ia fuafuaga autu mo se taimi umi a o lei faia ni faaiuga e faaopoopo pe toe faatulagaina avanoa mo falelotu” (Mataupu Faavae ma Taiala mo le Sauniaina o Falelotu [2021], ChurchofJesusChrist.org). O mataupu faavae ma taiala nei o le a fesoasoani i le aufaigaluega a le eria a o latou lagolagoina taitai perisitua o eria ma siteki i le faataunuuina o lenei faamoemoega.

Mataupu Faavae

Faamalolosia o Iunite

O le faamalosia o le Ekalesia e ala i le fetuunaia o le toatele ma tuaoi o iunite e pa’u i lalo o le tiutetauave o le taitaiga faaleperisitua e pei ona faatonuina ai e le Au Peresitene o le Eria. O suiga i tuaoi o iunite e mafai foi ona faaleleia ai le faaaogaina o falelotu.

Faaaogaina

“A o le’i sauniaina ni avanoa faaopoopo mo falelotu, e faamautinoa e taitai o loo faaaogaina ia falelotu uma o loo avanoa i totonu o taimi o feoa’iga talafeagai i lo latou gafatia faamoemoeina” (Mataupu Faavae ma Taiala mo le Sauniaina o Falelotu O le gafatia mo falelotu e aofia uma ai le aofai o tagata (gafatia o le toatele o le auai) ma le aofai o iunite (gafatia o le tele o iunite) e mafai ona ofi i se falelotu. I eria po o nofoaga e fesuisuia’i ai le auai o tagata o le Ekalesia, e mafai ona iloiloina le toe faatulagaina (faamutaina po o le suia o le faaaogaina) o falelotu ma meatotino ua le ausia tulaga e faaaoga ai.

Muai Vaaiga Talafeagai

O le muai vaaiga i le faatupula’ia o tagata o le Ekalesia ma le auai e taua tele i le atiina ae o se fuafuaga autu mataalia ma talafeagai mo falelotu. O vaaiga mamao i tagata o le Ekalesia ma le auai e tatau ona fuafuaina e tusa ai ma faiga ua faamaoniaina.

Fuafuaina o le Tulaga

Soo se fale e tauaofia ai e tatau ona tuu i le nofoaga e sili ona talafeagai e faofale lelei ai le aofaiga sili o tagata o le ekalesia, e tutoatasi mai tuaoi o le siteki. O le malamalama i suiga o le tuputupu ae, mamanu o femalagaaiga, ma auala o femalagaaiga o loo maua e manaomia e fuafua lelei ai nofoaga e faatu ai falelotu.

Taugofie

“E saili e taitai o le eria ma le lotoifale ia tali e sili ona talafeagai faaletamaoaiga, umi le taimi, ma mafai ona faatumauina i manaoga o falelotu” (Mataupu Faavae ma Taiala mo le Sauniaina o Falelotu

E tatau i eria ona iloiloina filifiliga uma e talafeagai e ogatusa ma tulaga i le lotoifale. O tali talafeagai e ono aofia ai se fale o se tagata o le ekalesia; se falea’oga i le lotoifale po o se nofoaga autu o le alalafaga; se fale e lisi mai; se avanoa e fauina, faatauina pe toefaaleleia e le Ekalesia; po o isi filifiliga.

Taiala

E tatau i taitai perisitua ona faitaulia mea nei pe a filima’oti pe toafia uarota e nofoia se falelotu:

• O faagasologa o sauniga i Aso Sa e tatau ona amata i se taimi talafeagai ma faaiu i se taimi o le aoauli ia mafai ai e aiga uma ona suesue le talalelei i le fale.

• O tagata o le ekalesia e nonofo i totonu o taimi talafeagai e malaga ai i le falelotu.

• O fetuunaiga i le falelotu, pe a manaomia, e laiti ma e maualalo le tau.

E faaaoga e eria ia mataupu faavae o le fuafuaina o falelotu ma atiina ae ni fuafuaga autu e lima tausaga a o le’i faia ni faaiuga e faaopoopo pe toe faatulaga avanoa mo falelotu.

Fuafuaga Autu a Siteki Tuufaatasi po o le Aufono Faamaopoopo

O fuafuaga autu e mafai ona fatuina i le tulaga o siteki tuufaatasi po o le aufono faamaopoopo pe a:

• Fefaasoaai avanoa o loo i ai i le va o fale o i ai nei po o fale ua fautuaina e sopoia ai ni siteki se tele.

• O le toefaatulagaina o tuaoi e mafai ona aafia ai siteki e tele.

• O le tuputupu ae ua fuafuaina mamao ma le faaaogaina e faailoa mai ai le manaomia o se avanoa fou.

• O le fesuisuia’i o le auai o tagata o le Ekalesia ua fatuina ai se avanoa faaopoopo e mafai ona toe faatulagaina.

O pule o fuafuaga a le eria e galulue faatasi ma Fitugafulu Eria ma peresitene fitoitonu o siteki e saunia ni fautuaga mo le faamaoniga a le Au Peresitene o le Eria.

Fuafuaina i le Tulaga Faale-siteki

Pe a iloiloina se manaoga mo le faaopoopoina po o le toe faatulagaina o avanoa o falelotu e le o aofia ai i se fuafuaga autu a siteki tuufaatasi po o se aufono faamaopoopo, e galulue le pule o fuafuaga a le eria faatasi ma le peresitene o le siteki e fitoitonu i ai e saunia fautuaga mo le faamaoniga a le Au Peresitene o le Eria.

Faamaoniga ma le Faatupeina o Poloketi (po o Galuega Faatino)

O poloketi o avanoa fou po o ni avanoa toefaatulagaina ua faailoaina i totonu o le faagasologa o fuafuaga, e mafai ona auina atu o se vaega o le fuafuaga faaletausaga pe auala atu foi i se isi faagasologa faaopoopo o le faamaoniga.

Matafaioi ma Tiutetauave

Au Peresitene o le Eria

E tuuina atu e le Au Peresitene o le Eria le taitaiga mo fuafuaga faataatitia, faaiuga, ma taunuuga manaomia o le fuafuaina o falelotu. E faailoa mai e le Au Peresitene o le Eria vaega patino o popolega, a’oa’o Fitugafulu Eria e uiga i aoaoga faavae ma mataupu faavae, ma faamaonia mea e faamuamua o fuafuaga autu ma fautuaga faaiu.

Fitugafulu Eria ma Taitai Perisitua i le Lotoifale

E a’oa’o atu e le Fitugafulu Eria ia aoaoga faavae ma mataupu faavae i peresitene o siteki ma misiona ma fefautuaai foi ma le aufaigaluega a le eria. E iloilo ma tuuina atu e le Fitugafulu Eria, peresitene o siteki, ma peresitene o misiona ni finagalo faaalia e uiga i fuafuaga autu o falelotu. Latou te auina atu soo se suiga o tuaoi o le iunite i le Au Peresitene o le Eria mo le iloiloina.

Faatonu mo Mataupu Faaletino (DTA) ma le Aufaigaluega a le Eria

O le Faatonu o Mataupu Faaletino (DTA) ma le aufaigaluega a le eria e tuuina atu i taitai faalelotu ia faamaumauga sa‘o, lipoti, auiliiliga, ma fautuaga. I le ogatusa ai ma le taitaiga a le Au Peresitene o le Eria ma le Polokalama o Falelotu a le Eria, e saunia ai e le pule o fuafuaga a le eria ia fuafuaga autu e lima tausaga, lea e aofia ai aitema mai aufono faamaopoopo, siteki tuufaatasi, ma fuafuaga i le tulaga faale-siteki. O le pule o fuafuaga e galulue faatasi ma taitai perisitua e faia faaiuga e faailoa atu ma faai’ugafonoina ia fautuaga.

Manatua: O le faaupuga au peresitene o le siteki e faatatau foi i le au peresitene o le itu.