Vahe 2
Ko Hono Kamatá
Ko e Feituʻu ʻe Maʻu ai e Tokoní
ʻOku lahi e ngaahi founga te ke lava ʻo maʻu ai ha tokoni ʻi hoʻo tānaki e fakamatala ki he hisitōlia fakafāmilí. Te ke ako ʻi he konga ko ʻení ki hono fakaʻaongaʻi e ngaahi maʻuʻanga tokoni te ke lava ʻo maʻú.
Tānaki ʻo e Fakamatalá
Lekooti ʻo e Fakamatalá
Fakahoko ʻo e Ngaahi Ouau Fakatemipalé
Ko e meʻa mahuʻinga taha te ke lava ke faí ko e fekumi mo muimui ki he fakahinohino ʻa e Laumālie Māʻoniʻoní. Te ke lava foki ke fekumi ki ha tokoni mei he kau fai faleʻi ʻo e hisitōlia fakafāmilí mo e ngaahi senitā ki he hisitōlia fakafāmilí. Ko ha maʻuʻanga tokoni lelei ʻaupito ʻa e saiti ʻInitaneti ko ia ko e FamilySearch he ʻe tokoni lahi ia kiate koe ʻi hoʻo tānaki mo lekooti ʻa e fakamatalá mo teuteuʻi ʻa e ngaahi hingoa ki he ngaahi ouau fakatemipalé.
Muimui ki he Fakahinohino ʻa e Laumālie Māʻoniʻoní
ʻE maʻu ʻa e ola lelei taha ki hoʻo ngāue fakatemipalé mo e hisitōlia fakafāmilí ʻi he taimi ʻokú ke fekumi mo muimui ai ki he fakahinohino ʻa e Laumālie Māʻoniʻoní.
ʻE lava ʻo fakatatau hoʻo ngāue ki hono tānaki e fakamatala ki he fāmilí ki he ngāue ʻa Nīfai ke maʻu ʻa e ngaahi lauʻi peleti ʻo e palasá, ʻa ia naʻe maʻu ai e fakamatala ʻo kau ki heʻene tohi hohokó. Pea hangē ko Nīfaí, ko ho fatongiá ke maʻu ʻa e fakamatala ki ho fāmilí. Pea hangē ko Nīfaí, mahalo ʻe fie maʻu ke ke vilitaki atu kimuʻa, “ʻo ʻikai ke tomuʻa ʻilo ʻa e meʻa [te ke] faí” (1 Nīfai 4:6). Kapau te ke loto-fakatōkilalo ʻo falala ki he ʻEikí ke Ne teuteu ha founga ke ke tānaki ai e ngaahi lekōtí, te Ne tāpuekina ʻaki koe ha tataki lahi ange ʻa e Laumālie Māʻoniʻoní.
ʻE lava ʻe he Laumālie Māʻoniʻoní ʻo ueʻi fakalaumālie koe ke ke ʻiloʻi ʻa e founga lelei taha ki hono kamataʻi e ngāue ki he hisitōlia fakafāmilí, ʻa e kui pe tafaʻaki ʻo e fāmilí ke nofotaha ki ai e tokangá, feituʻu ke maʻu mei ai ha ngaahi lekooti ʻoku ʻaongá, pe ko e kau mēmipa ʻo e fāmilí ke fetuʻutaki ki ai ke maʻu ha fakamatala ki he fāmilí.
ʻE lava ke fetuʻutaki ʻa e Laumālie Māʻoniʻoní kiate koe ʻaki ʻa e:
-
Lea atu ki ho ʻatamaí mo e lotó pea ʻoatu ha ngaahi ongo pe fakakaukau (vakai, T&F 8:1–2).
-
Tataki ʻa e niʻihi kehé ke fai ha faleʻi fakalaumālie maʻau (vakai, ʻEkesōtosi 18:13–24).
-
Tokoniʻi ke ke ongoʻi nonga (vakai, T&F 6:23).
-
Toe fakamanatu mai ha meʻa kiate koe (vakai, Sione 14:26).
Manatuʻi ke falala ki he talaʻofa ʻa e ʻEikí: “Pea ʻilonga ha meʻa te mou kole ki he Tamaí ʻi hoku hingoá, ʻa ia ʻoku totonú, ʻo tui te mou maʻú, vakai ʻe foaki ia kiate kimoutolu” (3 Nīfai 18:20).
Kau Fai Faleʻi ʻi he Hisitōlia Fakafāmilí
ʻOku uiuiʻi pea vaheʻi ʻe he pīsopé pe palesiteni fakakoló ʻa e kau fai faleʻi ki he hisitōlia fakafāmilí ke nau tokoni ki he ngāue fakatemipalé mo e hisitōlia fakafāmilí. ʻE lava ke akoʻi ʻe he kau fai faleʻí ʻa e ngaahi kalasi hisitōlia fakafāmilí mo fakahoko ha tokoni fakatāutaha. Te nau lava ʻo tokoniʻi koe ke ke kamata, pea tali hoʻo ngaahi fehuʻí, mo tokoniʻi koe ke fakaʻaongaʻi ʻa e saiti ko e FamilySearch Internet mo e ngaahi maʻuʻanga tokoni kehé.
Ngaahi Senitā Hisitōlia Fakafāmilí
Kuo fokotuʻu ʻe he Siasí ha ngaahi senitā hisitōlia fakafāmili ʻe lauiafe ʻi he māmaní. ʻOku ʻi ai ha ngaahi maʻuʻanga tokoni siʻisiʻi kuo ʻosi pulusi ʻi he meimei ngaahi senitā kotoa pē. ʻOku lahi ha ngaahi senitā ʻoku ʻi ai ha ngaahi komipiuta ke lava ʻo maʻu ai e saiti ko e FamilySearch Internet mo e ngaahi uepi saiti kehe ki he hisitōlia fakafāmilí. ʻE lava pē ke maʻu ai ha ngaahi mīsini ki hono lau ʻo e filimí.
ʻE lava ke akoʻi koe ʻe he kau ngāué ki he founga hono fakaʻaongaʻi ʻo e senitaá. Te nau lava ke tali hoʻo ngaahi fehuʻí pea tokoniʻi koe ke ke fakaʻaongaʻi e ngaahi maʻuʻanga tokoní mo ʻota e filimí mei he Laipeli ki he Hisitōlia Fakafāmilí ʻi Sōleki Siti, ʻIutā. Kapau ʻoku fie maʻu ke ʻota mai ha filimi, ʻe ʻosi ha ngaahi uike pea toki maʻu mai e ngaahi filimí.
Te ke lava ke talanoa ki ha tokotaha fai faleʻi ki he hisitōlia fakafāmilí, ke ʻilo ha senitā hisitōlia fakafāmilí.
Kamata ʻi he Saiti ko e FamilySearch Internet
Kuo fokotuʻu ʻe he Siasí ha saiti ʻi he ʻInitanetí, ʻi he new.familysearch.org ke fakafaingofuaʻi e ngāue fakatemipalé mo e hisitōlia fakafāmilí. Te ke lava ke tānaki mei ai ha fakamatala ki he fāmilí, lekooti e ngaahi hingoa ʻo e ngaahi kuí mo e fakamatala kehe, mo teuteu e ngaahi hingoá ki he ngāue fakatemipalé. Ko e meʻa ʻoku totonu ke ke ʻuluaki fai ʻi hoʻo kamata ngāue fakatemipalé mo e hisitōlia fakafāmilí, ko hoʻo lēsisita ʻi he saití pea kumi e fakamatala ʻoku maʻu kau kiate koe mo ho fāmilí.
ʻE fie maʻu hoʻo fika lekooti mēmipasipí pea mo e ʻaho naʻe hilifakinima ai koe ko ha mēmipa ʻo e Siasí. ʻE lava ke maʻu mei he kalake ho uōtí pe koló ʻa e fakamatala ko ʻení maʻau mei ho lekooti mēmipasipí pe ko hoʻo Individual Ordinance Summary.
Muimui ki he ngaahi sitepu ko ʻení ʻi hono fakaʻaongaʻi ʻa e saiti ko e FamilySearch Internet:
-
Kapau ʻokú ke lava ke hū ki he ʻInitanetí, ʻalu ki he new.familysearch.org pea lēsisita ko ha tokotaha foʻou ʻaki hono fakahū hoʻo fika lekooti mēmipasipí mo e ʻaho hilifakinimá ke ʻiloʻi ai koe. ʻI hoʻo fakakakato pē ʻa e founga lēsisitá, te ke lava leva ʻo kamata ngāue ʻaki e saití.
-
Kapau ʻoku ʻikai lava ke ke hū ki he ʻInitanetí, te ke lava ʻo ʻalu ki ha senitā hisitōlia fakafāmili, ʻa ia ʻe lava ke maʻu ai e ʻinitanetí. Pe ko hoʻo talanoa mo ha tokotaha fai faleʻi ki he hisitōlia fakafāmilí, ʻa ia te ne lava ke paaki atu ha faʻahinga fakamatala kau kiate koe mo ho fāmilí mei he saiti ko e FamilySearch Internet. Kapau ʻoku ʻikai malava ʻe he tokotaha fai faleʻi ki he hisitōlia fakafāmilí ʻo paaki ʻa e fakamatalá maʻau, te ke lava ke lekooti ʻa e fakamatalá ʻi he lekooti kulupu fakafāmili mo e ngaahi saati hokohoko fakafāmilí. ʻOku ʻi ai ha sīpinga ʻo e ngaahi foomu ko ʻení ʻi he fakamatala fakalahi A.
-
Fakalahi mai e fakamatalá pe liliu e fakamatala ʻoku hala ʻi he saití. Kapau ʻoku ʻikai te ke maʻu ʻa e ʻInitanetí, te ke lava ke fai ʻa e fakalahí mo e fakatonutonú ʻi ha tatau ʻo e fakamatala naʻe paaki mei he saití pe ko ha lekooti kulupu fakafāmili mo e saati hokohoko fakafāmilí. Peá ke ʻave ʻa e ngaahi liliú ki ha tokotaha fai faleʻi ki he hisitōlia fakafāmilí, ʻa ia te ne lava ke taipeʻi kinautolu ki he saití. (Vakai, vahe 4 ʻo e fakahinohinó ni ki ha fakamatala lahi ange kau ki he fakamatala ki hono lekooti ʻo e hisitōlia fakafāmilí.)
-
Teuteu e hingoa ʻo e ngaahi kuí ki he ngāue fakatemipalé kapau ʻokú ke maʻu e fakamatala feʻunga kau kiate kinautolu ke fakahoko ʻaki e ngaahi ouau fakatemipalé. (Vakai, vahe 7 ʻo e tohi fakahinohino ko ʻení ki ha toe fakamatala kau ki hono teuteuʻi ʻo e ngaahi hingoá ki he ngāue fakatemipalé.)
ʻE lava ke toe tokoni atu ʻa e saiti ko e FamilySearch Internet ke fakafekauʻaki e ngaahi ngāue ki he hisitōlia fakafāmilí mo e ngāue fakatemipalé ki he kau mēmipa kehe ʻo e fāmilí, fakafetongi e fakamatala ki he hisitōlia fakafāmilí, mo kumi e kau mēmipa mamaʻo ʻo e fāmilí, tautefito kiate kinautolu kuo nau ʻosi fai ha fekumi ki hoʻo ngaahi kuí.
ʻAʻahi ki he new.familysearch.org ki ha fakahinohino fakaikiiki lahi ange ki he founga hono fakaʻaongaʻi ʻo e saití.