Talateú

ʻOku Talitali Lelei Koe! ʻOkú ke ʻamanaki ʻeni ke kau ʻi ha fononga fakaʻofoʻofa ʻe toe fakafoki ai koe ki he hisitōliá pea laka atu ki he ʻitānití.

Kuo teʻeki ʻi ai ha taimi ʻe toe fakafiefia ange ki hono fakahoko ʻo e ngāue fakatemipalé mo e hisitōlia fakafāmilí. ʻOku lahi ange ʻi ha toe taimi kimuʻa e ngaahi temipale kuo langa ʻi māmaní. ʻOku hokohoko atu hono hanga ʻe he ngaahi fakalakalaka fakatekinolosiá ʻo fakatupulaki ʻetau malava ke ʻilo mo fekumi ki he ngaahi lekōtí mo fetuʻutaki mo e niʻihi kehé. ʻOku fai ʻe he kakai ʻi he māmaní ʻa e fekumi, fakatahatahaʻi, pulusi mo paaki e ngaahi hisitōlia fakafāmilí pea toe tuku atu ʻi he ʻInitanetí.

Naʻe pehē ʻe Palesiteni Tōmasi S. Monisoni:

“ʻI he ngāué ni, ʻe ʻikai lava ʻo fakaava ha loka, taʻe fakaava ʻaki [ʻa e kī ʻo e tuí]. ʻOku ou fakamoʻoniʻi atu, ko e taimi ko ia ʻoku tau fai ai hotau tūkuingatá ke fakahoko ʻa e ngāue ko ia ʻoku hanga mai kiate kitautolú, ʻe foaki mai ʻe he ʻEikí kiate kitautolu ʻa e kī toputapu ko ia ʻoku fie maʻu ke fakaavaʻaki ʻa e koloa ko ia ʻoku tau fekumi lahi ki aí. …

“Siʻoku ngaahi tokoua mo e tuofāfine, ʻoua naʻa mou fiu ʻi he faileleí. Kapau te mou pehē ʻi ha taimi ʻoku ʻikai ke lahi pe mahuʻinga hoʻomou ngaahi tokoní, mou manatuʻi pē ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá. Ko hotau fatongiá ke teuteuʻi ʻa e halá mo fakahoko ʻa e ngaahi ouaú, hili haʻatau fekumi faivelenga ki ai, koeʻuhí ke lava ai ʻo teuteuʻi ʻa e kakaí ke nau maʻu ʻa e nāunau ko ia ʻe hoko ko honau monū fakalangí” (“Ko e Kī ʻo e Tuí,” Tūhulu, Mē 1994, 5, 7).

Ko e tefitoʻi taumuʻa ʻo e ngāue ki he hisitōlia fakafāmilí ke kumi e hingoa ʻo e ngaahi kuí ʻo fakahoko ʻa e ngaahi ouau fakatemipalé maʻanautolu. ʻOku faingofua ʻa e ngāué ni:

• Tānaki e fakamatala ʻe ʻilo ai hoʻo ngaahi kuí.

• Lekooti e fakamatala kau ki hoʻo ngaahi kuí ke fakafehokotaki kinautolu ki he ngaahi fāmilí.

• Fakahoko e ngaahi ouau fakatemipalé maʻa hoʻo ngaahi kui ʻoku teʻeki ai ke nau maʻu iá.

ʻOku faʻa tākiekina ʻe he foungá ki ha fakamatala ki he kāinga kehe ʻo hoʻo ngaahi kuí—ko e mātuʻá, fānaú, mo e kāinga ʻo kinautolu kuó ke ʻiló—pea toe kamata pē he foungá.

Tānaki ʻo e Fakamatalá

Lekooti ʻo e Fakamatalá

Fakahoko ʻo e Ngaahi Ouau Fakatemipalé

ʻE tokoniʻi koe ʻe he tohi fakahinohino ko ʻení ke fakaʻaongaʻi e founga ke ʻiloʻi ai hoʻo ngaahi kuí pea tāpuekina kinautolu ʻo fakafou ʻi he ngaahi ouau ʻo e temipalé. Te ke lava foki ʻo ako ki he ngaahi maʻuʻanga tokoni ʻe lava ʻo tokoniʻi koe ʻi he founga ko ʻení, kau ai ʻa e saiti ko e FamilySearch Internet, ʻa ia ʻoku ʻi he new.familysearch.org.

Kapau kuó ke ʻosi fakahoko e ngāue fakatemipalé mo e hisitōlia fakafāmilí, te ke lava ʻo liliu ʻa e tohi fakahinohino ko ʻení ʻo fakatatau ki he meʻa kuó ke aʻusiá. ʻOku ʻoatu ʻi he fakaʻosinga ʻo e vahe takitaha ha fokotuʻu ki he ngaahi ʻekitivitī ʻe fakalahi atu ki hoʻo aʻusiá mo ha ngaahi maʻuʻanga tokoni lahi ke ako. Te ke lava foki ke ʻaʻahi ki he Senitā Tokoní ʻi he new.familysearch.org ʻo maʻu ai ha ngaahi maʻuʻanga tokoni lahi ange ke tokoniʻi koe ʻi he hokohoko atu hoʻo akó.

Te ke lava ke ʻilo ko e tohi fakahinohino ko ʻení ko e kotoa ia e meʻa ʻoku fie maʻu ke kamata ʻakí, pe ko hoʻo loto ke maʻu ha tokoni lahi ange mei ha tokotaha fai faleʻi ki he hisitōlia fakafāmilí. ʻE lava ke fakaʻaongaʻi ʻa e tohi fakahinohinó ni ʻe he kau fai faleʻi ki he hisitōlia fakafāmilí ke tokoniʻi ʻa e niʻihi fakafoʻituituí mo e ngaahi fāmilí ʻi honau ngaahi ʻapí. ʻOku toe hoko foki ʻa e fakahinohinó ni ko ha tefito ia ki ha kalasi ki he Temipalé mo e Hisitōlia Fakafāmilí ʻe lava ke akoʻi lolotonga e Lautohi Faka-Sāpaté, fakatatau ki he tuʻutuʻuni ʻa e kau taki lakanga fakataulaʻeiki fakalotofonuá.

ʻI hoʻo kau ki he ngāue fakatemipalé mo e hisitōlia fakafāmilí, ʻe lava ke tāpuekina koe ʻaki ha fakamoʻoni mālohi ange ki hono mahuʻingá, mo houngaʻia lahi ange ʻi he ʻofa ʻa e ʻEikí ki Heʻene fānaú, mo ha holi lahi ange ke fakahoko e ngāue fakatemipalé ki hoʻo ngaahi kuí. ʻE mahino lahi ange kiate koe ʻa e tupuʻanga ho fāmilí mo ha ʻofa lahi ange ki hoʻo ngaahi kuí.