Ia taulai atu i le avea e faapei o le Faaola, nai lo le tau lava o le faataunuuina o ni mea e fai.

I taimi o faigata, e oo lava i le faataunuuina o galuega laiti e mafai ona lagonaina le tele o le faigata. I ia taimi, e mafai ona tatou taulai atu i le mea o loo avea ai i tatou, e le na’o mea o loo tatou faamae’aina. Sa aoao mai Iesu Keriso: “O lea, o a ituaiga o tagata e tatau ona outou i ai? E moni ou te fai atu ia te outou, e pei lava o a’u nei” (3 Nifae 27:27). Pe a tatou tauivi ma luitau o le soifua maloloina faalemafaufau, e ono faigata ona fai mea uma e tatou te mananao e fai, ae e mafai ona tatou manatua o loo tatou avea atili e faapei o le Faaola a o tatou tauivi ina ia alualu i luma i aso taitasi. E taua ona manatua e faapea o la tatou faigamalaga o le avea ma soo o se faagasologa ma faapea o lo tatou tuputupu a’e e oo mai i le gasologa o le olaga.

E taua foi le manatua e leai se taimi faatulagaina mo le faamaloloina ma le avea ai. O le onosai ma le maelega o ni vaega uma taua e lua o lenei faagasologa. Na faamatalaina e Peresitene Dallin H. Oaks e faapea: “O le talalelei a Iesu Keriso o le fuafuaga lea e mafai ai ona avea i tatou ma ituaiga fanau a le Atua e tatau ona avea ai i tatou. O lenei tulaga le pona ma le atoatoa o le a maua mai i se faasologa faifaipea o feagaiga, sauniga, ma faatinoga, o se tuufaatasiga o filifiliga sa’o, ma mai le salamo faaauau pea” (“O Le Luitau o le Avea Ai,” Ensign, Nov. 2000, 33).