“1: Malisud sa pagtan-aw sa akong minahal nga nakigbisog, ug ako sa tinuod gustong motabang. Unsa ang akong buhaton sa pagsuporta kanila?” Mental nga Kahimsog: Tabang alang sa mga Ginikanan ug sa mga Pamilya (2019)
“Unsaon Nako sa Pagsuporta Kanila?” Mental nga Kahimsog: Tabang alang sa mga Ginikanan ug sa mga Pamilya
Malisud sa pagtan-aw sa akong minahal nga nakigbisog, ug ako sa tinuod gustong motabang. Unsa ang akong buhaton sa pagsuporta kanila?
Adunay daghang mga paagi nga ikaw makasuporta sa imong minahal pinaagi niini nga hagit:
-
Padayon sa pagpakigsulti. Pakigsulti sa imong minahal sa samang paagi nga wala pa ang ilang mga sintomas maklaro o sa wala pa sila mahiling. Pangutana kay sa tagnaon kon unsa kaha ang makatabang.
-
Sabta ang mga kinutuban. Ang mental nga sakit makakunhod sa kusog ug gana. Ilha nga kini mahimong malisud alang sa imong minahal sa pagbasa, pag-ampo, o sa pag-apil sa mga kalihokan sa uban. Padayon sa pagdapit kanila sa pagbuhat niining mga butanga, apan ayaw kalain kon ikaw balibaran nila.
-
Awhaga sila sa pagpangayo og tabang sa doktor sa mental nga kahimsog. Pagsensitibo ug pagmaloloy-on sa paghimo niini nga sugyot. Kay sa moingon, “Adunay dili maayo nimo—nagkinahanglan kang magpatambal!” paninguhaa ang pagsulti sama sa,“Malipay kong maminaw kon mosulti ka. Basin gusto kang mangita og usa ka tawo nga may mas kahibalo aron sa pagtabang usab.”
-
Pagbansay og pag-atiman sa panginahanglan sa imong kaugalingon. Ang kaugtas makadaut kaayo sa imong kahimsog. Paghatag og panahon sa pag-amuma sa imong kaugalingon pinaagi sa pagbuhat og usa ka butang nga imong kalingawan kada adlaw—mahimong mobasa ka og libro pila ka minuto, maminaw og musika, maglingkod sa gawas, o magdrowing og usa ka butang. Mahimo usab nga maghunahuna ka sa pagpakigsulti sa imong bishop o tigpangalagad nga mga kaigsoonan o sa pagtambong og tigsuporta nga grupo sa imong dapit.
-
Pagpakita og kapuangod. Ipahayag ang imong kabalaka alang kanila ug itanyag ang imong suporta. Ayaw ipakanubo ang ilang pakigbisog, ug ayaw itandi ang ilang kasinatian ngadto sa laing tawo. Ang pagsulti kanila “pagpakaayo og dali” o “paninguha pa nga maayo” malagmit dili makatabang ug makadugang lamang og kadaot sa relasyon o makahimo nga mawad-an og kadasig.