“3: Ou te lagona le vaivai mai le tele o le popole e faatatau i lē pele ia te a’u. E mafai faapefea ona ou tausia leleia a’u lava ma tuuina atu pea le lagolago?” Soifua Maloloina Faalemafaufau: Fesoasoani mo Matua ma Aiga (2019)
“Ou te Lagona le Vaivai mai le Popole,” Soifua Maloloina Faalemafaufau: Fesoasoani mo Matua ma Aiga
Ou te lagona le vaivai mai le tele o le popole e faatatau i lē pele ia te a’u. E mafai faapefea ona ou tausia leleia a’u lava ma tuuina atu pea le lagolago?
Atonu e te lagona faapea o loo e tali atu i le valaau a le Faaola e “tauave avega a le tasi, ina ia mama” ma “faamafanafana atu ia te i latou o e manaomia le faamafanafanaga” (Mosaea 18:8–9), a e sa Ia aoao atu foi e faapea e lē tatau mo i tatou ona “momo’e televave atu nai lo le malosi [ua ia te’i tatou]” (Mosaea 4:27). Ia saili le tulaga paleni i le va o fesootaiga anoa faatasi ma isi tagata ma tuaoi talafeagai i lou lava olaga. E moomia ona i ai se taimi ma se nofoaga e taulimaina ai popolega a sē pele ia te oe, a e o le faatagaina o na popolega ina ia mamafa i ou mafaufauga ma taumafaiga e lē soifua maloloina. Manatunatu e faataitai se tasi pe sili atu o fautuaga nei e amata ai ona fatuina le paleni i lou olaga i le asō.
-
Fefautuaa’i faatasi ma isi. Ia faia taumafaiga uma e talanoa, fefautuaai faatasi ma lou aiga, lou epikopo, po o se tagata tomai faapitoa o le soifua maloloina faalemafaufau. A o e talanoa, fefautuaa’i faatasi ma isi, ia ma’ale’ale lagona e faatatau i e o loo e faasoa i ai faamatalaga lē māpuipuia. O loo i ai ala matagofie e saili ai le lagolago lea e fesoasoani tele ma faamaloloina ai. Faatino ma le mafaufau lelei fesoasoaniga faalefautuaga.
-
Ia faatumauina lou soifua maloloina. Faatulaga ala faatino faalesoifua maloloina mo le moe, taumafa aoga, faamalositino, ma le tapuai atu faaletagata lava ia.
-
Faataitai le vaavaaia lelei e oe o oe lava ia. Manatunatu e faia se suiga i le faasologa masani o lou aso pe faavaeina se mausa fuafuaina ma le manatu i ai. Saili atu i le fiafia i mea iti ma faigofie e ala i le iloaina o se vaaiga i se fugalaau, le tofo o le meaai e fiafia lava i ai, po o le matagofie o le pese a se manulele. Faataitai le mafaufau i isi po o se isi faatulagaga e malolo lelei ai. Faataga ou mafaufauga e liliu atu i le Atua a o e tuuina atu lou mafaufau ma le tino e toe faafouina.
-
Fesili atu mo se fesoasoani. O le a i ai taimi o le’a le mafai ai ona e faia mea uma sa e naunau e te mafaia e fesoasoani ai i lē pele ia te oe. E le o manaomia e le Tama Faalelagi ona e faia mea uma. Na ia aoao mai e faapea “o le mea ma lona tausaga i mea uma, ma ona lava po i mea uma lava i lalo o le lagi” (Failauga 3:1). Aoao ia iloa ona fai atu mo le, ma taliaina le lagolago mai lou aiga, au uo, tagata o lau Ekalesia, ma le Tama Faalelagi.