“1: E faigata le vaai atu i lē e pele ia te a’u o tauivi, ma e ou te matua mana’o lava e fesoasoani. O le a se mea e mafai ona ou faia e fesoasoani ai ia i latou?” Soifua Maloloina Faalemafaufau: Fesoasoani mo Matua ma Aiga (2019)
“E Faapefea Ona Ou Lagolagoina i Latou?” Soifua Maloloina Faalemafaufau: Fesoasoani mo Matua ma Aiga
E faigata le vaai atu i lē e pele ia te a’u o tauivi, ma e ou te matua mana’o lava e fesoasoani. O le a se mea e mafai ona ou faia e fesoasoani ai ia i latou?
E tele lava ni auala e mafai ona e lagolago atu ai i lē e pele ia te oe e taulima lenei luitau:
-
Ia fesootai pea lava. Ia talanoa atu i lē e pele ia te oe i le ala sa masani ai a o le’i iloaina o latou ā’uga pe a‘o lei faia a latou suesuega. Fai atu ni fesili nai lo le taumatemate pe o le a se mea atonu e aoga.
-
Malamalama i tapulaa. O le gasegase faalemafaufau e mafai ona faaitiitia ai le malosi ma le naunautaiga e faia ai se mea. Ia iloa e faapea, atonu o le a faigata i lē e pele ia te oe ona faitau, tatalo, pe auai i ni gaoioiga faatasi ma isi. Ia valaaulia pea i latou e faia nei mea, a e aua ne’i e ave seseina mo oe lava ia pe afai e latou te teenaina lena valaaulia.
-
Uunaia i latou ia maua se fesoasoani tau tomai faapitoa faapolofesa. Ia manatu i lagona ma ia agalelei i le tuuina atu o lenei fautuaga. Nai lo le faapea atu, “E i ai se mea o loo e faaletonu ai—e te manaomia se fofo!” faataitai le faapea atu, “Ou te fiafia e faalogo pe a e manao e talanoa. Atonu e te manao e saili se tasi e sili atu lona tomai e fesoasoani foi ia te oe.”
-
Faataitai le vaavaaia lelei e oe o oe lava ia. O le popole e mafai ona lamatia ai lou soifua maloloina. Ia tausia se taimi e te faaaluina e te vaaia lelei ai oe lava ma faia se mea e te fiafia i ai i aso taitasi—atonu e te faaaluina ni nai minute e faitau ai se tusi, faalogologo i musika, nofo ai i se siosiomaga faalenatura, pe tusia se ata. Atonu foi e te manatu e talanoa faatasi ma lou epikopo po o uso o auaunaga po o tuafafine o auaunaga po o le auai atu i se vaega lagolago i lau eria.
-
Faaali atu le alofa. Faailoa atu lou loto popole mo i latou ma ofo atu lau lagolago. Aua e te tuuitiitia lo latou tauivi, ma aua le faatusatusaina o latou aafiaga i aafiaga o se isi. O le fai atu ia i latou e “alu ese mai ai” po o le “taumafai atili” o le a le tupu mai ai se fesoasoaniga ma e mafai ona faaopoopo atu i ai se mamafa i le fesootaiga pe mafua ai foi le faaopoopoina o se faalotovaivaia.