“3: ʻOku ou ongoʻi ongosia mei he hohaʻa lahi fekauʻaki mo e taha ʻoku ou ʻofa aí. ʻE founga fēfē haʻaku tokangaʻi lelei ange au mo kei poupou pē?” Moʻui Lelei Fakaeʻatamaí: Tokoni maʻá e Ngaahi Mātuʻá mo e Fāmilí (2019)
“ʻOku Ou Ongoʻi Ongosia mei he Hohaʻá” Moʻui Lelei Fakaeʻatamaí: Tokoni maʻá e Ngaahi Mātuʻa mo e Fāmilí
ʻOku ou ongoʻi ongosia mei he hohaʻa lahi fekauʻaki mo e taha ʻoku ou ʻofa aí. ʻE founga fēfē haʻaku tokangaʻi lelei ange au mo kei poupou pē?
Mahalo te ke ongoʻi ʻokú ke tali e ui ʻa e Fakamoʻuí ke “fefuaʻaki ʻa hoʻomou ngaahi kavengá” mo “fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:8–9), ka kuó Ne toe akoʻi foki ʻoku ʻikai ʻaonga ke tau “lele ʻo vave ange ʻi he mālohi ʻoku [tau] maʻú” (Mōsaia 4:27). Feinga ke potupotutatau e ngaahi vā fetuʻutaki ʻaonga mo e niʻihi kehé pea mo e ngaahi fakangatangata feʻunga ʻi hoʻo moʻuí. ʻOku fie maʻu pē ke ʻi ai ha taimi mo ha feituʻu ke tokangaʻi ai e ngaahi hohaʻa ʻa ha taha ʻokú te ʻofa ai, ka ʻi hono fakangofua ke maʻunimā ʻe he ngaahi hohaʻa ko iá hoʻo ngaahi fakakaukaú mo hoʻo ngaahi ngāué, ʻoku ʻikai moʻui lelei ia. Fakakaukau ke feinga ʻahiʻahiʻi ha taha pe lahi ange ʻo e ngaahi fokotuʻu koʻení ke kamata hono ngaohi ke potupotutatau hoʻo moʻuí he ʻahó ni.
-
Fealeaʻaki mo e niʻihi kehé. Feinga he tapa kotoa pē ke ke fealeaʻaki fakataha mo ho fāmilí, hoʻo pīsopé, pe ko ha mataotao he moʻui lelei fakaeʻatamaí. ʻI hoʻo fealeaʻaki mo e niʻihi kehé, tokanga fekauʻaki mo kinautolu ʻokú ke vahevahe ki ai ʻa e ngaahi fakamatala pelepelengesí. ʻOku ʻi ai ha ngaahi founga lelei ke fekumi ai ki he tokoni ʻoku ʻaonga mo fakaakeaké. Fakahoko ʻi he faʻa fakakaukau ʻa e ngaahi fokotuʻu ʻaongá.
-
Tauhi hoʻo moʻui leleí. Fokotuʻu ha ngaahi founga angamaheni ki he mohé, kai fakatupu moʻui leleí, fakamālohisinó, pea mo e moihū fakafoʻituituí.
-
Akoako e tokangaʻi kitá. Fakakaukau ki hono fakahoko ha liliu ʻi hoʻo ngāue angamaheni fakaʻahó pe fokotuʻu ha tōʻonga moʻui ne palaniʻi lelei. Fekumi ki he fiefiá ʻi he ngaahi meʻa iiki mo faingofuá ʻi hoʻo fakatokangaʻi ʻa e ongo ʻo e ala ki ha matalaʻiʻakau, ko e ifo ʻo e meʻakai ʻokú ke saiʻia taha aí, ko e fakaʻofoʻofa ʻo e hiva ʻa ha manupuna. Akoako e faʻa fakakaukaú pe ko ha toe founga kehe ʻo e mālōloó. Tuku hoʻo ngaahi fakakaukaú ke nau tafoki ki he ʻOtuá ʻi hoʻo tuku ha taimi ke fakaakeake ai ho ʻatamaí mo e sinó.
-
Kole ha tokoni. ʻE ʻi ai ha ngaahi taimi he ʻikai ke ke lava ʻo fai e meʻa kotoa ʻokú ke fakaʻamu te ke lava ʻo faí ke tokoniʻi ha taha ʻokú ke ʻofa ai. ʻOku ʻikai ʻamanaki e Tamai Hēvaní ke ke fakahoko e meʻa kotoa pē. Kuó Ne akoʻi “ʻoku ai hono kuonga ʻo e meʻa kotoa pē, mo e ʻaho ki he ngāue kotoa pē ʻi he lalo langí” (Tangata Malanga 3:1). Ako ke kole pea tali e tokoni mei ho fāmilí, ko ho ngaahi kaungāmeʻá, ko ho komiunitī faka-Siasí, mo e Tamai Hēvaní.