“1: ʻOku faingataʻa e sio ki he faingataʻaʻia ha taha ʻoku ou ʻofa ai pea ʻoku ou fuʻu fie tokoni. Ko e hā te u fai ke tokoniʻi kinautolú?” Moʻui Lelei Fakaeʻatamaí: Tokoni maʻá e Ngaahi Mātuʻá mo e Fāmilí (2019)
“ʻE Anga Fēfē Haʻaku Poupouʻi Kinautolu?” Moʻui Lelei Fakaeʻatamaí: Tokoni maʻá e Ngaahi Mātuʻá mo e Fāmilí
ʻOku faingataʻa e sio ki he faingataʻaʻia ha taha ʻoku ou ʻofa ai pea ʻoku ou fuʻu fie tokoni. Ko e hā te u fai ke tokoniʻi kinautolú?
ʻOku lahi e ngaahi founga ʻe lava ke ke tokoniʻi ai ha taha ʻokú ke ʻofa ai ʻi he faingataʻa ko ʻení:
-
Tauhi e fetuʻutakí. Talanoa ki ho ʻofaʻangá ʻi he founga tatau pē naʻá ke fai kimuʻa pea kamata ke fakatokangaʻi e ngaahi fakaʻilongá pe kimuʻa ʻi hono sivi fakafaitoʻo kinautolú. Fehuʻi kae ʻoua te ke fakamahamahalo pē pe ko e hā e meʻa ʻe ngali tokoní.
-
Maʻu ha mahino ki he ngaahi fakangatangatá. ʻE lava ke holoki ʻe he fokoutua fakaeʻatamaí e iví mo e loto-vekeveké. Fakatokangaʻi ange ʻe ngali faingataʻa ki he taha ʻokú ke ʻofa aí ke laukonga, lotu, pe kau atu ki ha ngaahi ʻekitivitī mo e niʻihi kehé. Toutou fakaafeʻi maʻu pē ke nau fakahoko e ngaahi meʻá ni, kae ʻoua te ke loto-mamahi kapau ʻe ikai te nau tali.
-
Fakalotolahiʻi kinautolu ke nau fekumi ki ha tokoni fakapalōfesinale. Ongoʻingofua pea angaʻofa ʻi hono fakahoko e fokotuʻu ko ʻení. Fetongi mei he lea, “ʻOku ʻi ai ʻa e meʻa ʻoku fehālaaki mo koe—ʻoku fie maʻu ke faitoʻo koé!” ka ke feinga ke lea hangē ko e, “ʻOku ou fiefia ke fakafanongo ʻi he taimi ʻokú ke fie talanoa aí. Mahalo ʻoku fie maʻu ke ke kumi ha taha taukei ange ke tokoni atu foki.”
-
Akoako e tokangaʻi kitá. ʻOku malava pē ke fakatuʻutāmaki ʻa e loto-mafasiá ki hoʻo tuʻunga moʻui leleí. Tuku ha taimi ke ke tokangaʻi koe ʻaki hano fai ha meʻa ʻokú ke saiʻia ai ʻi he ʻaho taki taha—te ke lava ʻo tuku ha kiʻi taimi siʻi ke lau ha tohi, fakafanongo ki he mūsiká, nofo ʻi tuʻa, pe tā fakatātaaʻi ha meʻa. ʻE lava foki ke ke fakakaukau ke talanoa mo hoʻo pīsopé pe ko hoʻo kau tangata pe fafine ngāue fakaetauhí pe kau ki ha kulupu tokoni ʻi hoʻo feituʻú.
-
Fakahaaʻi e manavaʻofá. Fakahaaʻi hoʻo tokanga kiate kinautolú mo ʻoatu hoʻo tokoní. ʻOua te ke fakasiʻisiʻi ʻenau faingataʻaʻiá, pea ʻoua naʻá ke fakatatau ʻenau aʻusiá ki ha aʻusia ʻa ha taha kehe. ʻOku ngalingali he ʻikai tokoni hoʻo talaange ke “fakangaloki ia” pe “toe feinga mālohi angé” pea ʻe lava ke ne tafunaki e fakamafasia ki he vā fetuʻutakí pe fakatupu ha loto-foʻi lahi ange.