E savuya tiko o Jisu Karisito na yavadra na iapositolo

iTukutuku mai na Mataveiliutaki Taumada kei na Kuoramu ni iApositolo Le Tinikarua

Kemuni na iTokani Daukaulotu:

Ni oti na Nona Tucaketale, a rairai ko Jisu Karisito vei ira na Nona tisaipeli ka vakaroti ira mera “vakalotutaki ira” (raica na Maciu 28:19, ivakamacala e ra a) “na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu; Vakavulici ira mera vakabauta na ka kece kau na vosa kina vei kemudou” (Maciu 28:19–20).

O sa kacivi ena ivakatakila mai vei ira na italai digitaki ni Kalou mera vukei kina na iApositolo ena cakacaka cecere oqo ni kena kau na kosipeli i Jisu Karisito i vuravura me rawa ni ra tisaipeli ni veimatanitu kecega.

Nio kaulotu ena yalomu taucoko, o na veivuke ena kena vakayacori rawa na ivunau cecere e rua: “Lomana na Turaga na nomu Kalou … [ka] lomana na kai nomu me vaka ko sa lomani iko ”(Vunau kei na Veiyalayalati 59:5–6).

Me yaco mo dua na daukaulotu mana, e dodonu mo dua na tisaipeli yalodina i Jisu Karisito. Keimami sureti kemuni moni vakarabailevutaka na nomuni taledi kei na kila me baleta na lagilagi ni Kalou. Ena vakalevulevui iko o Jisu Karisito. E lomani iko na Tamada Vakalomalagi, ka na vukei iko o Koya mo lomani ira ka vakalougatataki ira na luvena ena vanua cava ga o veiqaravi kina. Ena vakaukauwataki iko o koya kei ira na tamata o qarava, ena Veisorovaki i Jisu Karisito, mo “saumaki vua na Turaga” (Alama 23:6).

Na ivakarau ni daukaulotu oqo sa vakadonui mai vei iratou na Mataveiliutaki Taumada kei na kuoramu ni iApositolo Le Tinikarua. Era na veivuke ena taqomaki iko vakayago, vakayalo, kei na lomamu ka vukei iko mo tisaipeli sa gadrevi iko o Jisu Karisito mo vakakina.

Kevaka e tiko e dua na nomu taro me baleta e dua na ivakatagedegede, masulaka na Turaga me vukei iko mo kila vakavinaka na kena bibi, ke qai gadrevi, tarogi nomu itokani, ira nomu iliuliu ni daukaulotu gone, se dua na nomu iliuliu ni kaulotu mo vukei kina. Dau vulica wasoma na ivakatagedegede oqo kei na nomu itokani ka saga mo talairawarawa kina.

Keimami vakacaucautaki kemuni ni ko ciqoma e dua na veikacivi moni kaulotu tudei, ka keimami sa masu oni na kunea na vakacegu dina kei na reki ena nomuni qarava na Turaga o Jisu Karisito.

Na Mataveiliutaki Taumada kei na Kuoramu ni iApositolo Le Tinikarua

Na Lotu i Jisu Karisito ni Yalododonu Edaidai