Na Nomu Gauna ni Kaulotu Tudei

1.0

iVakamacala Taumada

Na nomu ilesilesi ni kaulotu e sega sara ni tekivu ena siga o vakatikori kina ka na sega ni oti ena siga o sa vagalalataki kina. Na kaulotu e sega ni vaka na kena sulumi e dua na unifomu ni cakacaka se vuli ena mataka lailai ka luvati ni sa cava na siga. Mai na gauna o a papitaiso kina, o sa tu ena salatu ni veiyalayalati e veimuataki yani kina marau, reki, kei na vakacegu e tawamudu. Na nomu gauna tudei ni kaulotu sa rawa me dua na cakacaka ni veisautaki ia e dodonu talega me tiki bibi ni nomu bula o sotava ena kaulotu.

Ni digovi ena dua na rai tawamudu, na nomu gauna ni bula o sotava ena kaulotu tudei e levu cake mai na kena tikitaki na kato me makataki—sa ikoya e dua na sala me tomani tiko kina na noda bula taucoko vakatisaipeli i Jisu Karisito.

E vakananuma na parofita o Josefa Simici na veivakalougatataki kei na madigi sa tu vei keda ena noda lewa meda sa tiki ni cakacaka levu oqo ni veivakabulai. A tarogi ira kina na Yalododonu taumada, “Oi kemudou na wekaqu, me da kakua beka ni tomana tiko inaki cecere vakaoqo? Me toso e liu ka kakua ni suka imuri. Na yaloqaqa, kemudou na wekaqu ka toso tikoga e liu; ka toso tiko ga e liu, e liu kina qaqa! Me reki na lomamudou, ka marau vakalevu sara” (Vunau kei na Veiyalayalati 128:22).

Marautaka na nomu gauna ni kaulotu nio lomana na Kalou ka lomana na wekamu. Oqo na gauna meda reki kina ka sotava na marau tawayalani kei na vakacegu mai vei Jisu Karisito.

1.1

Talairawarawa

O ira na tisaipeli dina i Jisu Karisito era talairawarawa. E vakavulica na iVakabula, “Kevaka dou sa lomani au, dou talairawarawa kina noqu vunau” (Joni 14:15). Na muri ni ivakaro e kena ibalebale ni ko na cakava ena yalodina na veika e kerea na Turaga baleta ni o lomani koya kei na nomu vakayacora vakakina ena “marau” (Kolosa 1:11) ena “marau kei na yalo dina” (Cakacaka 2:46).

O Jisu Karisito sa ivakaraitaki ni yalodina sa uasivi sara. A vakayacora ga na lewa nei Tamana. Muri Koya ena nomu cakava na nomu vinaka duadua mo maroroya taucoko na Nona ivakaro ka bulataka na ivakatagedegede ni kaulotu. Na yalodina kei na talairawarawa e kena ibalebale talega ni o tovolea mo vuli, tubu, ka torocake; vakavinakataka vakatotolo na cala; ni sa nomu lewa ga na ivalavala o a cakava.

O ira na nomu iliuliu ni kaulotu era na dau vukei iko mo vulica na sala mo vakayagataka na ivakavuvuli e tiko ena ivoladusidusi oqo.

O na taqomaki vakalevu sara ni o muria na ivakaro kei na ivakatagedegede ni daukaulotu ka vakayagataka na vakasama matau. Ia mo kila tiko ni gauna mada ga o sa muria tiko kina na ivakaro, o na rawa ni sotava na leqa, tauvimate, se na mavoa (raica na Joni 16:33). Na iVakabula a sotava na veika kece oqo (raica na Alama 7:11–12; Vunau kei na Veiyalayalati 122:8), ka yalataka, “Au na sega ni laivi kemudou mo dou luveniyali: au na lako mai vei kemudou” (Joni 14:18).

E lomani iko na Kalou. Digitaka mo maroroya na ivakaro baleta nio lomana na Kalou. Kakua ni saga mo cakava na veidinadinati kei na Kalou ka namaka na veivakalougatataki eso ena nomu veisautaka na veika e gadrevi vei iko. Na ilavaki sa namaki mo tutaka era sa vakadonuya na Mataveiliutaki Taumada kei na Kuoramu ni iApositolo Le Tinikarua era sa tiko ena ivakatagedegede oqo. Me kena ivakaraitaki, kakua ni saga mo veisolisoli kei na Turaga ena nomu yadra vakamataka, sega ni kana se gunu ( ena taudaku ni lolo ena veivula) se calata na siga ni vakavakarau.

1.2

iVakarau ni Bula

Sa sureti kemuni tiko na Kalou moni yalodina tiko Vua ena gauna taucoko ni nomu bula. Na ivakarau ni kaulotu me vaka na vuli yadua, ituvatuva ni lalawa, kei na vakayagataki vakadodonu ni tekinolaji ena vakalougatataki iko ena nomu kaulotu ka na vukei iko ena vo ni nomu bula.

Laiva na ivakaro ena ivolanikalou, na ivakavuvuli ena Vunautaka na Noqu Kosipeli: iDusidusi ki na Veiqaravi ni Daukaulotu, (2019), kei na ivakatagedegede ni kaulotu e tuvai ena ivola oqo sa ikoya na ivakavuvuli ni veidusimaki ena bula taucoko. Nio muria na ivakaro kei na ivakarau ni Kalou, ena veidusimaki, veivakalougatataki, ka dusimaki iko o Koya ena nomu bula taucoko.