Ni sa Cava na Nomu Kaulotu

6.0

Ai Vakamacala Taumada

Vakarautaki iko ena gauna oqo mo tomana tiko na nomu bula vakatisaipeli i Jisu Karisito ka mo dua na lewe yalodina ni Lotu i Jisu Karisito ni Yalododonu Edaidai ni ko sa lesu tale i vale kei na nomu sa qarava vinaka na nomu ilesilesi ni bula.

6.1

Sema Tiko ga

Tomana tiko na veivosaki vata kei ira o vakavulica ka cakacaka vata ena nomu kaulotu, oka kina o ira na nomu iliuliu ni kaulotu. Tokoni ira ka vaqaqacotaki ira ena nomu vosa kei na ivakaraitaki, ka marautaka na veigauna bibi ena nodra bula.

6.2

Lesu iVale mai Na Nomu Kaulotu

Baleta nio se daukaulotu tiko me yacova ni o sa vagalalataki mai vua na nomu peresitedi ni iteki, sa namaki mo muria taucoko na ivakatagedegede ni kaulotu me yacova na gauna oya. Nanuma tiko mo lesu vakadodonu ivale. Oqo e sa ka bibi sara kevaka o veiqaravi tiko ena dua na vanua ka sega ni nomu vanua e vakalawataki kina na veika e lavaki ena visa. Nio lokuyarataka nomu lesu mai vale ena rawa me vakadredretaka vei ira na daukaulotu mai muri me ra taura na nodra visa ni veilakoyaki. Kevaka o sotava nomu matavuvale mo dou lako vata mai vale, vakasaqara e liu na ivakasala kei na veidusimaki mai vei nomu peresitedi ni kaulotu.

O na sega beka ni vakacavara na nomu veiqaravi vakadaukaulotu ena dua tale na tabana ni kaulotu se kerea mo toki kina dua tale na tabana ni kaulotu ni oti na tikinisiga ni nomu vagalalataki me rawa mo itokani vei dua na wekamu.

Nio sa lesu ivale, veivosaki vata kei na nomu peresitedi ni iteki e nomu vanua mo vagalalataki vakatotolo sara.

Ena gauna totolo ga nio sa lesu tale ivale, mo laki vakadikevi ke tiko vei iko na mate na tuberculosis, kevaka sara mada ga o sa vakadikevi oti kina ni bera ni ko lai kaulotu ka sega ni kune na kena ivakatakilakila.

6.3

Veiqaravi ka Tubu ni Oti na Nomu Kaulotu

Nio sa lesu i vale, tomana mo bulataka tiko na ivakatagedegede ni kosipeli. Raica mo:

Masu ka vulica na kosipeli ena veisiga.
Dau tiko ka vakaitavi ena nomu tabanalevu se tabanalevu ni itabagone qase cake.
Vakasaqara na madigi eso mo veiqaravi ena valetabu kevaka e tiko e dua e voleka.
Mo lewena na kalasi ni inisitute se vuli vakalotu.
Vakasaqara na madigi ni vuli kei na cakacaka mai na Lotu kei na ivurevure tale eso.

Mo bula tiko me rawa kina nio sotava na mataqali reki e vakamacalataki tiko ena iVola i Momani ena gauna a sotava kina o Alama Lailai na itokani daukaulotu ena nona bula mai muri:

“Ka sa qai yaco ni sa lako tiko ko Alama mai na vanua ko Kitioni vaka ki na ceva, ka lako tani yani kina vanua ko Manitai, raica, sa kurabui ko koya, ni sotavi iratou na luvei Mosaia ni ratou sa lako tiko yani ki na vanua ko Saraemala.

“… O koya sa marau vakalevu sara kina ko Alama ni sa raici iratou na tacina; ka sa qai vakalevutaka sara na nona marau, ni ra se veitacini tiko ga ena vuku ni Turaga; io, sa kaukauwa sara na nodratou kilaka ena ivakavuvuli dina; ni ra sa tamata yalomatua ka dau wilika vagumatua na ivolanikalou, me rawa kina ni ra kila na vosa ni Kalou.

“Ia e sega nio koya wale ga oqori; eratou sa soli iratou vakagumatua sara ena masumasu, kei na lolo; o koya sa tu kina vei iratou na yalo ni parofisai, kei na yalo ni vakatakila, ia ni ra sa vakatavuvuli, era sa vakatavuvuli ena kaukauwa kei na lewa ni Kalou” (Alama 17:1–3, kuri ena vosakala).