Te poro’i a te Peresidenira’a Mātāmua ’e te pupu nō te Tinō ’Ahuru Ma Piti ’āpōsetolo
E au mau hoa misiōnare :
I muri a’e i tōna ti’afa’ahoura’a, ’ua fā Iesu Mesia i tāna nā pipi ’e ’ua fa’aue ia rātou ’ia « fa’ariro […] ’ei pipi » (hi’o i te Mataio 28:19, te fa’ata’ara’a raro ao) te « mau fenua ato’a […] ’a bāpetizo atu ai ia rātou i roto i te i’oa o te Metua, ’e nō te Tamaiti, ’e nō te Vārua Maita’i ; ma te ha’api’i atu ia rātou i te ha’apa’o i te mau mea ato’a tā’u i parau atu ia ’outou na » (Mataio 28:19–20).
’Ua pi’ihia ’oe nā roto i te heheura’a ’e nā roto i te mau tāvini mā’itihia e te Atua ra, nō te tauturu i te mau ’āpōsetolo i roto i teie ’ohipa rahi nō te fa’ataera’a i te ’evanelia a Iesu Mesia i tō te ao ato’a nei nō te fa’ariro i te mau fenua ato’a ’ei pipi.
’Ia tāvini ’oe i ta ’oe misiōni ma tō ’ā’au ato’a, tē tauturu nei ’oe i nā fa’auera’a rahi e piti : « Here ’oe i te Fatu ra i tō ’oe Atua [’e] here ’oe i tō ta’ata tupu mai tō ’oe here ia ’oe iho na » (Te Ha’api’ira’a Tumu ’e te mau Fafaura’a 59:5–6).
Nō te riro ’ei misiōnare manuia maita’i, e mea tītauhia ia ’oe ’ia riro ’ei pipi ha’apa’o maita’i nā Iesu Mesia. Tē ani nei mātou ia ’oe ’ia fa’arahi i tā ’oe mau tārēni ’e te ’aravihi nō te hanahana o te Atua. E fa’arahi atu Iesu Mesia ia ’oe. ’Ua here te Metua i te Ao ra ia ’oe, ’e e tauturu mai ’oia ia ’oe ’ia here ’e ’ia ha’amaita’i i tāna mau tamari’i i te mau vāhi ato’a e tāvini ’oe. E ha’afaufa’ahia ’oe e ana, nā reira ato’a te ta’ata tā ’oe e tāvini, maoti te tāra’ehara a Iesu Mesia, nō te « fa’afāriu[-mau-]hia i te Fatu » (Alama 23:6).
’Ua ha’amanahia teie mau ture misiōnare e te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo. E pāruru te reira ia ’oe i te pae tino, i te pae vārua ’e i te pae manava, ma te tauturu ia ’oe ’ia riro ’ei pipi nā Iesu Mesia mai tei tītauhia.
Mai te mea e mau uira’a tā ’oe nō ni’a i te hō’ē ture, ’a ui i te Fatu nā roto i te pure ’ia tauturu mai ia ’oe ’ia māramarama i tō te reira faufa’a rahi, ’ei reira, mai te mea e tītauhia, ’a ani i te tauturu a tō ’oe hoa misiōnare, te mau taure’are’a misiōnare fa’atere ’aore rā hō’ē o te feiā fa’atere misiōni. ’A ha’api’i pinepine i teie mau ture ’e tō ’oe hoa misiōnare ’e ’a tūtava i te ha’apa’o i te reira.
Tē ha’apoupou nei mātou ia ’oe nō te fāri’ira’a i te pi’ira’a ’ia tāvini i te hō’ē misiōni rave tāmau, ’e tē pure nei mātou e ’ite mai ’oe i te hau ’e te ’oa’oa mau i te tāvinira’a i te Fatu Iesu Mesia.
Te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo
Te ’Ēkālesia a Iesu Mesia i te Feiā Mo’a i te Mau Mahana Hope’a nei