1

Tā ’oe tau misiōnare rave tāmau

1.0

’Ōmuara’a

’Aita tā ’oe misiōni i ha’amata mau i te mahana ’a fa’ata’ahia ai ’oe ’e e ’ore roa e fa’aoti i te mahana e ha’amāuruuruhia ’oe. E ’ere te misiōni mai te ’ō’omora’a i te hō’ē ’ahu rave ’ohipa, ’aore rā te ’ahu fare ha’api’ira’a i te po’ipo’i ē e tātara atu ai i te tapera’a mahana. Mai te taime ’a bāpetizohia ai ’oe, ’ua haere ’oe i ni’a i te ’ē’a nō te fafaura’a e tāpae i te poupou ’e te ’oa’oa ’e te hau mure ’ore. E nehenehe tā ’oe tau misiōnare rave tāmau ’ia riro ’ei tau fa’atauira’a ia ’oe, e mea ti’a ato’a rā te reira ’ia riro ’ei tuha’a mau nō te misiōni o tō ’oe orara’a.

’Ia hi’ohia i roto i te tau mure ’ore, ’ua hau atu tā ’oe tau misiōnare tāmau i te hō’ē tāpa’ora’a ’ohipa oti—e rāve’a nō te tāmau ā i te riro ’ei pipi nō Iesu Mesia, i te orara’a tā’āto’a.

’Ua feruri te peropheta Iosepha Semita nō ni’a i te mau ha’amaita’ira’a ’e te mau faufa’a nā tātou ’ia fa’aoti ana’e tātou ’ia riro ’ei tuha’a nō teie ’ohipa rahi nō te fa’aorara’a. ’Ua ui ’oia i te feiā mo’a mātāmua : « E au mau taea’e [e au mau tuahine] ē, e ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? ’A haere i mua ’e ’eiaha e haere i muri. ’A rohi, e au mau taea’e [e au mau tuahine] ē, ’a haere ā, ’a haere ā ē tae roa i te upō’ōti’ara’a ! ’Ia ’oa’oa tō ’outou ’ā’au, ’e ’ia ’oa’oa rahi roa » (Te Ha’api’ira’a Tumu ’e te mau Fafaura’a 128:22).

’A ’oa’oa i tā ’oe tau misiōnare i te herera’a i te Atua ’e tō ta’ata tupu. E taime teie nō te ’oa’oa ’e nō te ’ite i te poupou ’e te hau vai maoro, nā roto ia Iesu Mesia.

1.1

Ha’apa’o

E mea ha’apa’o te mau pipi mau a Iesu Mesia. ’Ua ha’api’i te Fa’aora : « ’Ua hina’aro ’outou iā’u ra, e ha’apa’o i tā’u parau » (Ioane 14:15). Te ha’apa’ora’a i te mau fa’auera’a, te aura’a ra, ’o te vai-ineine-ra’a ïa ’e te ha’apa’o-maita’i-ra’a i te ravera’a i te mea tā te Fatu e ani, nō te mea ’ua here ’oe iāna ’e tē rave nei ’oe i te reira « ma te ’oa’oa » (Kolosa 1:11) ’e « ma te ’oa’oa, ’e ma te rōtahi noa te ’ā’au » (Te ’Ohipa 2:46).

’O Iesu Mesia te hi’ora’a nō te ha’apa’o-maita’i-roa-ra’a. ’O te hina’aro noa o te Metua tāna i rave. ’A pe’e iāna ma te fa’aitoito roa nō te ha’apa’o i tāna mau fa’auera’a ato’a ’e ’a ora i te mau ture misiōnare. Te vai-ha’apa’o-maita’i-ra’a ’e te ha’apa’o, ’o te tāmatara’a ato’a ïa i te ha’api’i, i te tupu i te rahi ’e i te ha’amaita’i ia ’oe ; ’o te fa’atītī’aifaro-vitiviti-ra’a i te mau mea hape ; ’e ’o te amora’a i tā ’oe hōpoi’a i roto i tā ’oe mau ’ohipa.

E riro tō ’oe feiā fa’atere misiōni i te tauturu tāmau noa ia ’oe ’ia ’ite e nāhea i te fa’a’ohipa i te mau parau tumu i roto i teie buka arata’i.

E pāruruhia a’e ’oe i te taime e pe’e ’oe i te mau fa’auera’a ’e te mau ture misiōnare, nā reira ato’a te ferurira’a au. ’Ia ’ite maita’i rā ’oe ē, noa atu ā ’oe e ha’apa’o i te mau fa’auera’a, e nehenehe ’oe e fa’aruru i te tāfifira’a, te ma’i ’aore rā te pēpē (hi’o Ioane 16:33). ’Ua nā roto te Fa’aora i teie mau mea ato’a (hi’o Alama 7:11–12 ; Te Ha’api’ira’a Tumu ’e te mau Fafaura’a 122:8), ’e tē fafau nei ’oia ē : « E’ita vau e vaiiho ’ōtare noa ia ’outou, e ho’i mai ā vau ia ’outou nei » (Ioane 14:18).

’Ua here te Atua ia ’oe. ’A mā’iti i te ha’apa’o i te mau fa’auera’a nō te mea ’ua here ’oe i te Atua. ’Eiaha e tāmata i te fa’aau i te Fatu ra ma te tīa’i i te tahi mau ha’amaita’ira’a ta’a ’ē nā roto i te fa’atanora’a i ni’a i te mea tei tītauhia ia ’oe. ’Ua ha’amanahia te mau tītaura’a nō ’oe e te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo, ’e e ’itehia te reira i roto i teie mau ture. ’Ei hi’ora’a, ’eiaha e tītau i te tahi fa’aho’ira’a a te Fatu nō te ti’a-’oi’oi-ra’a, nō te haerera’a ma te tāmā’a ’ore ’e te inu ’ore (ta’a ’ē atu i te mahana ha’apaera’a mā’a o te ’āva’e), ’aore rā nō te ha’apaera’a i te hō’ē mahana fa’aineinera’a.

1.2

E mau ture nō te orara’a

Tē ani nei te Atua ia ’oe ’ia pūpū ia ’oe iāna ra i te roara’a o te orara’a E riro te mau ture misiōnare mai te ha’api’ira’a ta’ata hō’ē, te ha’amaura’a i te fā ’e te fa’a’ohipa-tano-ra’a i te rāve’a ’āpī, i te ha’amaita’i ia ’oe i roto i tā ’oe misiōni, ’e i te tauturu ia ’oe i te roara’a o tō ’oe orara’a.

’Ia riro te mau fa’auera’a i roto i te mau pāpa’ira’a mo’a, te mau parau tumu i roto i te ’Ia poro haere i tā’u nei ’Evanelia : Te hō’ē arata’i nō te ’ohipa misiōnare (2019), nā reira ato’a te mau ture misiōnare i roto i teie buka, ’ei mau parau tumu arata’i i te roara’a o te orara’a. ’A pe’e ai ’oe i te mau fa’auera’a ’e te mau ture a te Atua, e fa’atere, e ha’amaita’i ’e e arata’i ’oia ia ’oe i te roara’a o tō ’oe orara’a.