5
Te ha’amanara’a ’e te mau ’ōro’a o te autahu’ara’a
’O te autahu’ara’a te ha’amanara’a a te Atua i tāna mau tamari’i nō te fa’atupu i te fa’aorara’a nō te tā’āto’ara’a. Tē fa’aterehia nei te ha’amanara’a o te autahu’ara’a e te feiā fa’atere autahu’ara’a tei fāri’i ’e o tei fa’a’ohipa i te mau tāviri o te autahu’ara’a. Nō te mea tē fa’ahiti nei te mau pāpa’ira’a mo’a ē « ’ua riro te tahi atu mau ha’amanara’a ’e ’aore rā mau tōro’a i roto i te ’ēkālesia ’ei ’āpitira’a nō teie nei autahu’ara’a [a Melehizedeka] » (Te Ha’api’ira’a Tumu ’e te mau Fafaura’a 107:5), te mau mea ato’a ïa e ravehia i raro a’e i te fa’aterera’a o teie mau tāviri nō te autahu’ara’a, e ravehia ïa nā roto i te ha’amanara’a o te autahu’ara’a.
’Ia fa’ata’a-ana’e-hia te hō’ē vahine nō te poro i te ’evanelia ’ei misiōnare rave tāmau, tē ’ohipa nei ’oia i raro a’e i te ha’amanara’a o te autahu’ara’a nō te rave i te hō’ē ti’ara’a autahu’ara’a. Te ta’ata ato’a e fāri’i i te hō’ē pi’ira’a mai roto mai i te hō’ē ta’ata tei mau i te mau tāviri o te autahu’ara’a, e fa’a’ohipa ïa ’oia i te ha’amanara’a o te autahu’ara’a nō te rave i tāna mau hōpoi’a i fa’auehia.
Mai te mea tē mau ra ’oe i te autahu’ara’a a Melehizedeka, e fāna’o ’oe i te rāve’a nō te ’āmui i roto i te mau ’ōro’a ’e te mau ha’amaita’ira’a o te autahu’ara’a.
Nō te tahi atu ā ha’amāramaramara’a, hi’o i te tuha’a 7.11, « Te mau ’ōro’a ’e te mau ha’amaita’ira’a o te autahu’ara’a ».