He Leadeth Me [E arata’i ’oia iā’u], nā Yongsung Kim, havenlight.com

6

Te fa’aotira’a o tā ’oe misiōni

6.0

’Ōmuara’a

’A fa’aineine ia ’oe i teienei nō te tāmau noa i te orara’a ’ei pipi nā Iesu Mesia ’e ’ei melo ha’apa’o maita’i nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ia ho’i atu ’oe i te fare ’e ’a rave ai i te misiōni o tō ’oe orara’a.

6.1

’Ia vai noa te natira’a

Tāmau noa i te paraparau i te feiā tā ’oe i ha’api’i ’e i ’ohipa nā muri, i roto i tā ’oe misiōni, mai tō ’oe feiā fa’atere misiōni. ’A pāturu ’e ’a ha’apūai ia rātou nā roto i tā ’oe mau parau ’e tō ’oe hi’ora’a, ’e ’a fa’ahanahana i te mau taime faufa’a rahi i roto i tō rātou orara’a.

6.2

Ho’i i te fare mai tā ’oe misiōni

Nō te mea e misiōnare noa ’oe ē tae noa atu i tō ’oe ha’amāuruurura’a nā tō ’oe peresideni titi, ’ei ha’apa’o i te mau ture misiōnare ato’a ē tae noa atu terā taime. ’A ’ōpua e ho’i ’āfaro i te fare. E mea faufa’a rahi te reira mai te mea tē tāvini ra ’oe i roto i te hō’ē fenua ’ē, e mau tītaura’a tei fa’ahepohia nō te parau tītiro mana. E riro te fa’ataimera’a i te ho’ira’a i te ha’afifi i te mau misiōnare nō muri iho, ’ia noa’a tā rātou parau tītiro mana. Mai te mea e ’āmui ’oe i tō ’oe ’utuāfare nō te ho’i i te fare, ’a hi’o ’e ’a ani nā mua i tō ’oe peresideni misiōni.

E’ita tā ’oe e nehenehe e fa’aoti i tā ’oe tāvinira’a misiōnare i te tahi atu misiōni, ’aore rā e’ita tā ’oe e nehenehe e tītau ’ia fa’anu’uhia ’oe i roto i te tahi atu misiōni i muri iho i tō ’oe mahana ha’amāuruurura’a nō te riro ’ei hoa misiōnare nō te hō’ē fēti’i.

’Ia ho’i ’oe i te fare, ’a fa’aau ’e tō ’oe peresideni titi ’ia ha’amāuruuru-’oi’oi-hia ’oe.

’Ia ho’i ’oe i te fare, i te taime ra iho ā e nehenehe tā ’oe, ’a hi’opo’a e ma’i tūto’o ānei tō ’oe, noa atu ā ’ua hi’opo’ahia ’oe hou te misiōni ’e ’aita e fa’a’itera’a i ni’a ia ’oe.

6.3

Te tāvinira’a ’e te tupura’a i te rahi i muri iho i tā ’oe misiōni

’Ia ho’i ’oe i te fare, ’a tāmau noa i te ora i te mau ture nō te ’evanelia. ’A hi’o maita’i ē e :

• Pure ’e ha’api’i i te ’evanelia i te mahana tāta’itahi.

• Haere ’e e ’āmui i tā ’oe pāroita tumu ’aore rā i te pāroita feiā pa’ari ’ōtahi.

• ’Imi i te mau rāve’a nō te tāvini i roto i te hiero mai te mea tē vai ra hō’ē nā reira.

• Haere i te mau piha a te ha’api’ira’a ’evanelia a te feiā pa’ari ’aore rā te mau piha ha’api’ira’a fa’aro’o.

• ’Imi i te fāito ha’api’ira’a ’e te ’ohipa nā roto i te ’Ēkālesia ’e te tahi atu mau fa’anahora’a.

Ora i te huru orara’a e ’ite ai ’oe i te huru ’oa’oa tei fa’a’itehia i roto i te Buka a Moromona i te fārereira’a Alama tamaiti i tōna mau hoa misiōnare i muri ri’i mai i roto i tōna orara’a :

« ’E i teienei, i muri a’era, ’a tere atu ai Alama mai te fenua atu o Gideona i te pae apato’a, ’ia tae i te fenua ra nō Maniti, inaha, ’ua māere roa ’oia i te fārereira’a i te mau tamari’i tamāroa a Mosia ’o tē haere ra i te fenua ra nō Zarahemela.

« […] Nō reira ’ua ’oa’oa roa Alama i te ’itera’a i tōna ra mau taea’e ; ’e ’ua rahi roa atu tōna ’oa’oa i te mea e mau taea’e noa ā rātou nōna i te Fatu ; ’oia ïa, ’ua tupu tō rātou ’ite i te parau mau i te rahi ; e mau ta’ata mana’o pāpū ho’i rātou ’e ’ua ’imi māite rātou i te mau pāpa’ira’a mo’a, ’ia ’ite rātou i te parau a te Atua.

« E ’ere rā i te reira ana’e ; ’ua pinepine rātou i te pure, ’e i te ha’apae i te mā’a ; nō reira ’ua fāri’i rātou i te vārua nō te tohu, ’e te vārua nō te heheura’a ; ’e ’ia ha’api’i rātou, ’ua ha’api’i ïa ma te mana ’e te ha’amanara’a nō ’ō mai i te Atua » (Alama 17:1–3 ; pāpa’ira’a fa’ahipa tei tuuhia).