Nakoa n te Mition
2. Aia Bootaki Mitinare ao Mwakuri Ake A Karaoaki
Tamnei
Berena ao Ika iroun Rose Dall

2

Aia Bootaki Mitinare ao Waaki ni Kakukurei

2.0

Moantaeka

E taekinna te Uea, “Bwa kam na barongaingkami ao n anganiia aomata nako mwiokoaia mwaane nako [ao aine] teuanne [ke neienne] mwiokoana n tararua” (Reirei ao Berita aika Tabu 104:11). Te mwakoro aei n te aeniboki aei e kabwarabwara ana bootaki te mition ao e kabwarabwara arom ni kona ni mwakuri n ae tamaroa riki ao ni maeka ma toam, karaoi waaki ni kakukurei n te mition, bairei tain taian waaki ni katoabong, ao ni beku imarenami ma ana tangira ae itiaki Kristo (taraa Moronaai 7:44–47).

Ibukin te kamataata, kainibaire aikai a kabonganai taeka taan kairiiri irouiamitinare aika kairake ni kaineti nakoia mitinare ake iai katabeaia n te nakoa ni kairiiri, n aron tiinia kambanion, titita aika taan kairiiri n te kataneiai, ke taan kairiiri n te tioun. Taan kairiiri n te Mition e kaineti nakon tei beretiteinti n te mition, ake iai irouia kiingin te nakoanibonga, ao kainnabana.

Kainibaire aikai a kabonganai naba taeka aika bitiobi, beretitenti n te titeiki, uoote, ao titeiki. Kabonganai kainibaire aika irekereke n aron riaina nakoia beretitenti ni mwaanga, beretitenti ni mwakoro, mwaanga, ao membwa n te mwakoro.

2.1

Te Aro ni Kairiiri n te Mition

Tibwangam ae moan te kakawaki, ni kaineti ma aekakin nako katabeaki n te aro ni kairiiri, bwa kona riki bwa te mitinare ae kakaonimaki ae babane nanona. Te reirei mairoun te Uea ae e tauaki mwiina inanon Reirei ao Berita aika Tabu are e kaineti naba nakoim: “Te bwai ae moan te kakawaki nakoim bon taekinan te rairannano nakoia te [roro aei], bwa ko aonga ni uotiia aomata nakoiu” (Reirei ao Berita aika Tabu 15:6).

2.1.1

Taan Kairiiri n te Mition: Am Beretiteinti n te Mition ao Kainnabana

Am beretiteinti n te mition ao kainnabana, ake a ikotaki ni beku bwa am taan kairiiri n te mition, a weteaki iroun te Atua ao a katabuaki bwa ana kaira te mition. Ngaiia a na kaai n tangiriko ao a beku ibukim, ni buokiko ni kakoroi bukin am kantaninga ni mitinare, ao ni buokiko ni kawakiniko bwa kona mano ao kona kukurei.

Am taan kairiiri n te mition a na tibwauai tibwangaia aika a mwaiti ibukin te mition. A na ikotaki ni mwakuri ni boutokaiko ao ni kaungako, ongoraea am tabeaianga, kaekai titiraki, taraa rikirakem, ao n anganiko taeka n reirei. Ibukina bwa am beretiteinti n te mition iai irouna kiingin nakoanibonga, e riki bwa te tia moti ae kinaaki n te mition. Bure ni wenenibure ao bure tabeua aika a kakaiaki a riai ni kaotaki nakon am beretiteinti n te mition (taraa Motiaea 26:29–30). Kaota te koaua raoi nakoina. E na buokiko n am rairannano (taraa Ibukin Kakorakoraia Kairake: Te Kairi ibukin Karaoan Rinerine [2022], “E na buokiko Iesu Kristo,” 6–9).

Kona bae ni kaoa buun te beretitenti n te mition, te mitinare ae te tiinia, ke bon toam bwa e na raoniko n te intawiu ma am beretiteinti n te mition. Am babaire ni kaoa temanna bwa e na raoniko e riai n aki kanakoa ana tangira te tia kairiiri n te mition, tabeaianga, ke mataiakinam irouna.

2.1.2

Te Beretitentii n te Mition

Am beretiteinti n te mition e tararua n te mition ma kiingin te nakoanibonga. Ngaia te membwa n te beretitentii n te mition ma uoman ana kauntira.

Kauntira n te beretitentii n te Mition, n aroia kauntira n te titeiki beretitentii ke bitioburiki, a buoka barongaan ao a ibuobuoki n te mwakuri. Kauntira n te mition beretitentii aki rinanon bwaai iaon taun te mitinare.

2.1.3

Aia Bootaki Taan Kairiiri n te Mition

Am beretiteinti n te mition e kabonganai kaotioti ao kiingin te nakoanibonga ni baronga te mwakuri. E katabeia kairake ni mitinare n riki bwa taan kataneiai, tinia kambanion, taan kairiiri n te mwakoro, taan kataneiai ibukiia mitinare aine, taan kairiiri n te tioun, ao taan ibuobuoki. Taan ibuobuoki, mitinare n te aobiti, ao mitinare ake tabeman aki karaoi babaire ibukin katabeaia mitinare n te nakoa ni kairiiri ke ni bairei taabo ake kona beku iai. E ngae n anne, te beretiteinti n te mition e kona ni marooro ma kainnabana ke ana tia ibuobuoki ibukin katabeaia mitinare.

Am tia kairiiri n te mition ao taan ibuobuoki, taan kairiiri n te tioun, ao taan kataneiai ibukiia mitinare aine bon kain te kauntira ibukiia taan kairiiri n te mition. Taan kairiiri aikai a marooro ibukin kainnanoia mitinare ao a karaoi babaire ni buoka rikiraken te mition ni kamwakuria bwa e na waaki nako.

2.1.4

Tibwangaia Kairake ni Mitinare n te Aro ni Kairiiri

Taan kairiiri aika kairake ni mitinare, n aroia mitinare ni kabane, a na ira ana reirei Iesu Kristo ni “beku ibukin [te Atua] ma nano [ia] ni kabane, marurungiia, aia iango ao korakoraia” ao n “uringa te onimaki, te raoiroi, te atatai, te taubaang, te taotaonakin nano, te akoi imarenami, te aro n Atua, te tangira ae kororaoi, te karinanoia, te nanomatoa” (Reirei ao Berita aika Tabu 4:2, 6). Tibwanga ibukin te aro ni kairiiri e aki kaota te kinaaki ae onoti ke karakakiia ke ni kaota taun te mitinare.

Taan kairiiri aika kairake ni mitinare iai tibwangaia n:

  • Kakaai, reirei, bwabetito, ao n iraorao ma aomata.

  • Katea te banna ni katooto n aia kainibaire mitinare ibukin te anua (taraa 3.0).

  • Kataneiai ma mitinare ake tabeman ao kaira kaibibitakiia toam (taraa 2.3.1).

  • Tibwai rongorongo ao kaetieti man te kauntira ibukin te nakoa ni kairiri n te mition ma mitinare ake a kairia.

  • Tangiriia ao iraorao ma mitinare ake tabeman. Buokiia bwa a na noora kakaawakin aia mwakuri.

  • Ongora nakon aia tabeaianga mitinare ake tabeman. Aanga te boutoka ao te reirei.

  • Kaetiia mitinare ake tabeman ma te akoi ao n te aro ae onoti, ngkana e kainnanoaki, n rimwiiaki ma “te tangira ae rikirake” (taraa Reirei ao Berita aika a Tabu 121:41–43).

  • Reitaki mwakuri ma taan kairiiri n te tabo ao kain te aro.

N ai aroia mitinare ni kabane, mitinare mwaane ao aine ma taan kairiiri ake a katabeaki a riai ni kakaraoa te aro ni kairiiri n ai aron Kristo. Ngkana iai aron te mitinare temanna, n raonaki ma taan kairiiri mitinare aika kairake, ae taraa n aki booraoi ma te tua ao aia kainibaire mitinare, maroroakina te kangaanga anne ma te mitinare. Ngkana e aki toki te kangaanga, tibwa am raraoma ma am tia kairiiri ni mitinare ae kairake ke te beretitenti n te mition ao tiaki ma mitinare ake tabeman, kain te aro, ke raraom.

Ibukin rongorongo riki tabeua ibukin katabeaki aika onoti ao tibwangaia taan kairiiri aika kairake (taan kataneiai, tiinia kambanion, taan kairiiri n te mwakoro, taan kataneiaia mitinare aine, taan kairiiri n te tioun, ao taan ibuobuoki nakon te beretitenti), taraa mwakoro 7.1, “Tibwangaia Kairake ni Mitinare n te Aro ni Kairiiri.”

2.1.5

Katabeam I Bon Iroum

“Kakorakorai nakoa[mi] imatan te Uea” (Iakobwa 1:19), n riki n toronibwai n te maiu n tamnei, ao “ni mwakuri i bon [ibukim]” (2 Nibwaai 2:16) man onimakinan te Uea ao n iriira te Tamnei. Ngkana iai ami titiraki ke tabeaianga:

  • Kabongana te reirei nakon “ko riai ni kamatebwaia n am iango; ngkanne … titirakinai ngkana e bon eti” (Reirei ao Berita aika Tabu 9:8).

  • Ukora te kairiiri rinanon kaotioti iroun temanna; tataro; ao kamatebwaian koroboki aika a tabu (riki ana Boki Moomon), Taetaekina Au Euangkerio, aia reirei burabeti aika a maiu, ao kainibaire aikai.

Ngkana ko kainnanoa rakan riki te ibuobuoki imwiin karaoan reirei aikai, tuanga toam ke te tia kairiiri irouia mitinare aika kairake. N angiin te tai, a kona ni buokiko ni karekei kaekaan am titiraki ao a katoka am tabeaianga. Ngkana e aki, reitaki nakoia am taan kairiiri n te mition, am karo, ke taan kairiiri n te nakoanibonga ni mweengam. Taiaoka tai reitaki ma ana etekuata te Ekaretia. Ngkana ko karaoia, kona bon kaokaki rikaaki n taetae nakon am beretitenti n te mition.

Marooro ma am beretitenti n te mition ibukin aroaro iaon kororaoim. Taetae ma tao am tia kairiiri n te mition ibukin tabeaianga ibukin kamanoam, n reitaki ma mwakuri n aki rau ke iowawa, ke kangaanga tabeua ake aki kona ni katokaki ma mitinare ake tabeman.

E na iai taai inanon am mition are kona kunea bwa e kangaanga bwa kona kabotoa am iango iaon te mwakuri ni kaineti ma kangaanga aika riki, ibon iroum ke ma am utu, ke bon bwaai aika riki aika a tia n nako. Anne e kona n ota te aba iai. Tai rawa n tibwa am tabeaianga ma toam, taan kairiiri irouia mitinare aika kairake, ke bon am tia kairiiri n te mition ao ni karekea te boutoka.

Uringa ana kakao te Tia Kamaiu: “Tanimai nakoiu n ami iango n taai nako; tai nanououa, tai maaku. Noori taian ikoaki aika i rarikiu, ao mwiin naba taian neera i baiu ma waeu; bwaina te kakaonimaki, kawakin au tua, ao ko na abaaba n abanuean karawa. Amen” (Reirei ao Berita aika a Tabu 6:36–37).

2.2

Toam

Te Uea e weteiia mitinare bwa a na taetaekina Ana euangkerio n ikatoatoa. “A riai n nako ni kakauoman, ao a riai n tataekin i aon kawaia n aia botaki aomata nako, ni bwabetito n te ran, ao ni katoka bai .” (Reirei ao Berita aika Tabu 52:10). Kona mwakuri ma toam aika kakaokoro rinanon nako am mition. Itoatoa:

  • Katiteuanaaki n te mwakuri ao ikotaki ni kakoaua iroun Iesu Kristo.

  • Boutoka imarenami n te maiu n tamnei, namakin, ao ni maiuraoin rabwatami.

  • Kataia ni kamanoi ngkami imarenami.

  • Kam bukintaeka imarenami ni kawakinan kainibaire ibukiia mitinare.

2.2.1

Ibuobuoki Imarenami

A riai ni ibuobuki raao irouia n reiakinaki, rikirake, ao ni karikirakea anuan maiun Kristo (taraa Reirei ao Berita aika Tabu 4 ao “N na Kanga ni Karikirakea Anuan Maiun Kristo?” inanon Taetaekina Au Euangkerio, mwakoro 6). Reiakinan te taotaonannano ao te tangira, kakaraoa te ikabwarabure, ao butimwaai kakaokoro n aroaro e na kakabwaiako rinanon maium.

Ngkai taan itoatoa:

  • Tatangira, karinerine, ao kakorakora imarenami.

  • Ikotaki kamatebai ni katoabong ao tataro n ikotaki n tainako rinanon nako te bong.

  • Bwaina te nanorinano ao kinai korakorami imarenami.

  • Karaoa aron are ko tangiria bwa e na karaoaki nakoim imarenami.

  • Totokoa te kabuakaka ao te unun.

  • Totokoi taetae aika aki raraoi imarenami nakoia mitinare tabeman, kain te Ekaretia, ke utu ao rao ni mweengami.

Ngkana ko noori aroaro ke anua aika aki tau, maroroakin ma toam. Ngkana e aki toki te aroaro akanne ke ngkana toam e rang bwaina te iowawa, karekea te ninikoria n am tangira ibukin toam ao butiia te beretitenti n te mition ibukin ana ibuobuoki (taraa 3.9.2).

2.2.2

Tiku n Ikotaki

Te tiku n ikotaki ma toam e na buokiko ni kataniko man kangaanga n rabwata ao n tamnei, kabuakaka aika kaairua, ao te maroa. Ongeaba nakon aia kainibaire mitinare aei n tainako ao n tabo ni kabane. Bon tai tiku n ti ngkoe.

  • Ko riai ni kona n noora toam ke n ongo bwanaana n tainako ti ngkana e rin n te roki, e intawiu ma te tia kairiiri n te mition, ke karaoa te intawiu n te bwabetito (taraa 2.3.6).

  • Ko riai ni matu n te ruu ae ti teuana ma tiaki n te kainiwene ae ti teuana.

  • Ngkana ko karaoi am mwakuri i bon iroumi n ami auti, kabongana am iango ni kataniko i bon iroum ao ira aia kainibaire mitinare n te aroaro (taraa 3.0).

  • Tai karekea te tai n tiku n ti ngkoe. Te katooto, tai tiku ni kabwakanakotai ke ni kautimwaakako nakon toam.

  • Ngkana ngkoe ao toam kam maenako, reitaki ma am beretiteinti n te mition n te tai ae waekoa.

2.2.3

Te Mwakuri n Am Aono

“Nako ao mwakuri ma korakora[mi]” (Iakobwa 5:72), ao kabanei ami iango n ami mwakuri n ami tabo ake kam katabeaki iai. Kabanea am mwaku ri n am aono are kona buokiia iai aomata ao ni kawakin berita aika a tabu. Te katooto, kabanea am iango irouia kain raraikim ni uakaan ma ana kateitei te aro ke n te tabo are a maeka iai kain te aro aika kakaonimaki. Uringa ana berita te Uea: “Ao ane e butimwaingkami, ao N na mena naba ikekei” (Reirei ao Berita aika Tabu 84:88).

Ko kona ni kiitana am tabo are ko kabaeaki iai ibukin kaibibitakin toam (taraa 2.3.1) ke kaibibiti (taraa 2.3.2). Ngkana ko na kiitana am tabo ni bukina riki teuana, bubuti te kariaiakaki mairoun am tia kairiiri n te tioun bwa kona kiitana am tabo ma am tia kairiiri n te mwakoro ke am tia kairiiri n te tioun ngkana ko kainnanoia ni mwananga i tinanikun am mwakoro. Ko kainnanoa ana kariaia te beretiteinti n te mition, ke te aomata are e katabeaki, ni kiitana te tioun.

Ngkana ko kainanoa kiitanan am tabo are ko katauaki iai ibukin te kabuanibwai ae karina, n aron angibuaka n te aba ke kakeru ke kakaean bwain aoraki ni bwaai aika karina, ukoukora te kamanoaki ke tararua n te bwain aoraki moa ao imwiina reitaki ma am beretiteinti n te mition ke taan kairiiri irouia mitinare aika kairake n te tai naba are ko kona iai.

2.2.4

Te mwakuri ma Aomata i tinanikun Am Aono

I nanon am mition kona bae ni kaitibo ma aomata aika a maeka i tinanikun am tabo are ko katabeaki iai. Ngkana a nano ni kan ongora taekan ana euangkerio Iesu Kristo, ko kona:

  • Tibwa te rongorongo ma ngaiia.

  • Reitaki nakoia ni bwaai n reitaki aika kariaiakaki (taraa 7.5.6).

  • Kanakoa nakoia mitinare te tabo are a maeka iai ao n tibwa rongorongoia ma mitinare ake a katabeaki ibukin te tabo anne (taraa 2.3.4).

  • Man ana kariaia te beretiteinti n te mition, kabonganai rabakau aika boou (taraa 7.5.4) ni mwakuri ma mitinare ake a maeka iai aomata akanne ni buokia n reireiniia ao ni boutokaia. Ko kona naba ni kaoiia am utu ao raraom ni ibuoboki n reireiniia, ma te kariaia (taraa 3.9.5).

Ngkana ko mwakuri ma mitinare tabeman ke membwa inanon ao i tinanikun am tabo ke mition:

  • Ikotaki ni marooro bwa kam na ataia bwa e na kanga aron buokaia aomata ae tamaroa are iai nanona n roko ni kaniiaki riki nakon Tamara are i Karawa ao Iesu Kristo.

  • Bwaina te karinerine nakoia membwa ke mitinare ake tabeman n aia tai.

  • Angan te mitinare are e katabeaki n te tabo are e maeka iai te aomata bwa e na kaira te reirei n te tai ae kona ni waekoa ni waaki iai.

2.3

Waaki ni Kakukurei ibukiia Mitinare

Mitinare a iri waaki ni kakukukrei aika a mwaiti aekakiia ni kakoroa bukin are e tua te Uea ni “katauraoi bwaai nako aika kainnanoaki” (Reirei ao Berita aika Tabu 88:119) bwa ko aonga ni katia Ana mwakuri. Waaki ni kakukurei aikai a raonaki ma irakin kaibibiti iroun toam, ao te kamwaingaki, te mwakuri ma membwa, kaeka nakoia naake a kan ongora te euangkerio, reirei, irakin te reirei ao boowi, ao te beku. Mitinare mwaane a kona naba ni karaoi intawiu n te Bwabetito bwa mwakoron aia waaki ni mitinare.

2.3.1

Kaibibitakiia Toam

Inanon kaibibitan toam, te tia kairiiri ni mitinare ae te kairake, n aron te tia kairiiri ni kataneiai ae te titita ke te tia ibuobuoki nakon te beretitenti, e mwakuri ma te mitinare temanna. Inanon te kaibibiti te tia kairiiri e na angareirei, kataneiai, ao e na reiakinaki mairoun te mitinare. Te tia kairiiri e na ira ana reirei te Uea are e kuneaki n Reirei ao Berita aika Tabu ni kakorakoraia mitinare ake tabeman “n [aia] kakaraki ni kabane, n [aia] tataro ni kabane, n [aia] kaunganano ni kabane, ao inanon [aia] mwakuri ni kabane” (Reirei ao Berita aika Tabu 108:7).

Taan kairiiri mitinare aika kairake a katabeaki ibukin babairean te kaibibiti ma mitinare ake a kairiia. Mitinare aine ake a karaoi kaibibiti ma mitinare aine ake tabeman, ao mitinare mwaane a karaoi kaibibiti ma mitinare mwaane ake tabeman.

N angiin taian mition, taan kairiiri mitinare aika kairake a ti karaoi kaibibiti ni ikatoatoa ni katoa te kaibibiti.

  • Taan kairiiri n te mwakoro a karaoi kaibibiti ma mitinare mwaane n tatabemaniia n aia mwakoro.

  • Taan kairiiri n te tioun a karaoi kaibibiti ma taan kairiiri n te mwakoro n tatabemaniia ao ngkana e kainnanoaki ma mitinare mwaane tabeman n aia tioun.

  • Taan kairiiri aika mitinare aine ake a karaoi kataneiai a karaoa te kakaibibiti ma mitinare aine n aia tioun are a katabeaki iai ke n taian tioun.

  • Taan ibuobuoki nakon te beretitenti a karaoi kaibibiti ma taan kairiri n te tioun ke ma tabeman mitinare mwaane n aron tuangakiia iroun te beretitenti n te mition.

  • Te kaibibiti n te itoatoa e taneiai ni kabanea ae nakon 24 te aoa. Ibukin te kaibibiti n te itoatoa n tatabeua nako, te tia kairiri ni mitinare ae te kairake e riai:

    • Kaira karaoan te kaibibiti toa n te tabo are e kairiiri iai te mitinare ae kairake. N taai aikanne, kaibibiti a kona naba ni karaoaki n aia aono mitinare ngkana e riai.

    • Karaoa te babaire ni kaibibiti nte ikatoatoa ni moantaai.

    • Ikotaki ni mwakuri ni katei kouru ma te mitinare n te bwai are e na kakoroaki nanona n tain te kaibibiti. Irii mwakoro ni kabane n te mwakuri ni mitinare, n raonaki ma kakaean, reiakinan, kamatebwai ma toam, kamatebwai n te taetae (ngkana e riai), ni bairei ni katoabong, ao ni karaoa te iraorao.

    • Kataneiai ni kabonganai koroboki aika a tabu ao reirei man Taetaekina Au Euangkerio.

    • Rinanon ao maroroakiniia aomata ake a mwakuri ma mitinare ke a reirei ma ngaia.

    • Angania mitinare bwaai aika onoti, n taian kaeka aika ibuobuoki, n raonaki ma bwaai ake a nakoraoi iai mitinare ao a na kangaa n rikirake.

    • Tauraoi butimwaai kaeka mairouia mitinare iaon bwaai ibukin katamaroakiia.

    • Rinanon ao maroroakin bwaai ake a reiakin mitinare n tatabemaniia n tain kaibibitakin toaia.

    • Ribooti iaon kaibibitakin toaia inanon te reta ni katoa wiiki nakon te beretitenti n te mition.

2.3.2

Kamwaing

Aobitin te mition e na bairei mwamwananga n tain te kamwaing bwa ko aonga n aki tiku n ti ngkoe. Inanon waaki tabeua, ibukin te raroa ao bwaai aika riki, ami beretitenti n te mition a kona ni kaira karaoana. N aro aikai, bwaina te taratara raoi, kabonganai am iango, ao ira te Tamnei.

Ngkana ko kamwaingaki:

  • Nako kaineti nakon am tabo ae boou n ikotaki ma toam ae boou.

  • Tai kana ke n nima te bwai are e tiku n aki tararuaaki n tain mwanangam.

  • Ngkana ko mwananga, kakoaua bwa iai baeteren am tareboon ae tau ibukin te mwananga. Ngkana ko mwananga n ti ngkoe n te maan ae raka iaon teniua te aoa, katoatai rooko n tuoa aobitin te mition.

Ngkana e kamwaingaki toam ao ngkoe ko aki, mwakuri ma mitinare ake tabeman, ni karokoa e roko toam ae boou.

2.3.3

Tai n Reirei ma Membwa

Kaoiia membwa bwa a na raoniko n te aro are a tataneiai iai ngkai ko kunei kawai aika kakaraoaki , reireiniia, bwabetitoia, ao ni karaoi iraorao. Kaungaiia ao buokiia membwa bwa a na iraorao ma aomata ake ko reireiniia ao ni kaoiia aomata akanne bwa a na irii waaki ni kakukurei n te uoote ao utu. Tuangiia membwa bwa a na tibwai bwaai aika a rinanona ao aia koaua.

Mitinare a riai n tiku n ikotaki n itoatoa. Ngaia are, akea te kakaibibiti irouia mitinare ao membwa. E ngae n anne, membwa aika aine (ae aki kee iaan 16 te ririki, ma e ikawai a riai n ira tuan te tabo) e kona n raoniia ao n reirei ma uoman ke e raka riki mitinare aine. Membwa aika mwaane (ae aki kee iaan 16 te ririki, ma e ikawai a riai n ira tuan te tabo) e kona n raoniia ao n reirei ma uoman ke e raka riki mitinare mwaane. Taanga aika a tia ni mareaki a kona n anga reirei ma mitinare aine ke mwane.

2.3.4

Taan kan Reireinaki

Taan kan reireinaki bon temanna are e bubuti ibukiia mitinare bwa a na reitaki nakon teuanne ke neienne.

Ngkana ko mwakuri ma aomata aika a tia ni kamwaingaki nakoim:

  • Reitaki ma mitinare, kain te aro, ke aomata ake anga aran te aomata anne, ngkana e kona. Marooro mangaiia iaon arom ni kona ni buoka te aomata anne.

  • Kataia n reitaki ma te aomata are e kan reireinaki n te tai ae waekoa, ae tataneiai te aba iai inanon 24 te aoa.

  • Ongora ao reiakina aron buokakin te aomata are e kamwaingaki nakoim.

  • Anga bwaai ake e bubuti ibukina.

  • Reirei nakon te aomata ni kainnanona ao bwaai ake e tatangiri.

  • Reitinako ni mwakuri ma mitinare, membwa, ke aomata ake a anga aran te aomata anne (taraa 2.2.4).

Ibukin rongorongoia riki taan kan reireinaki, taraa “Member, Missionary, and Church Headquarters Referrals(Membwa, Mitinare, ao Taan kan Reiakinaki man ana Etekuata te Ekaretia)” inanon “How Do I Find People to Teach?(N na Kanga ni Kuneia Aomata ake N na Reireiniia?)” inanon Taetaekina Au Euangkerio,, mwakoro 9.

2.3.5

Boowi ao Kauntira

Mitinare a ikotaki ni marooro ngkai a anga ao a karekei kataneiai ao ngkai a baire ao a kairii mwakuri ni mitinare. Boowi ao kauntira a riai ni kaoa Tamnein te Uea ao n riki bwa te tai ni karekei kaotioti (taraa Reirei ao Berita aika a Tabu 6:32). N reitia riki, bootaki ni mitinare a na karekea te tai n ata aroia imarenaia ao ni kimwareirei n ikotaki ni mwakuri (taraa Reirei ao Berita aika a Tabu 43:8; 50:22).

Boowi ake a barongaaki irouia mitinare aika ikatoatoa, mitinare aika kairake aika taan kairiiri, ao taan kairiiri n te mition a riai n raonaki n aikai:

  • Taai ni babaire ni katoa bong ao wiiki

  • Boowi ni kauntira n te mwakoro

  • Maungatabu n te tioun

  • Boowi irouia taan kairiiri n te mition n kauntira

Boowi ake a barongaaki irouia taan kairiiri n te tabo e kairii aikai:

  • Aia boowi mitinare n tibwai iango

  • Boowin kauntira n te uoote

2.3.6

Intawiu n te Bwabetito

Ngkana a karaoa te intawiu n te Bwabetito, mitinare mwane a riai:

  • Rinanon te bwai are e a tia n taekinna te Uea inanon Reirei ao Berita aika a Tabu 20:37.

  • Ira ana kairiri te Tamnei ae Raoiroi.

  • Titiraki n titirakin te intawiu n te bwabetito ake a reke n te “Titiraki ibukin te Marooro n te Bwabetito” iteran mwakoro 12 inanon Taetaekina Au Euangkerio.

  • Kangaraoi titiraki nakon aia ririki ao roroia aomata.

  • Kakoaua bwa te beretitenti n aia kooram unimwaane ke te tia kairiiri n te mition n te uoote e a kaman ataa te intawiu n te bwabetito mai imwaina.

Ngkana te aomata are e bwabetitoaki e tangiria, teuanne ke neienne e kona ni kaoiia ana karo, buuna, ke ikawai riki tabeman n raonna n ana intawiu n te bwabetito. Taratara raoi nakon ana namakin te aomata ibukin buuna te mwaane ke te aine ke te ataei are e intawiunaki. Irii kainibaire inanon Taetaekina Au Euangkerio ibukin te intawiu ao karekean kariaiakaki ni bwabetitoia buuia ao ataei (taraa “Aron Kairan te Intawiu” inanon “I Kanga ni Katauraoia Aomata ibukin te Bwabetito ao te Kamatoa?” inanon Taetaekina Au Euangkerio, mwakoro 12).

Taan kairiiri n te mwakoro a intawiuniia taan bwabetitoaki ake a reireinaki irouia mitinare n aia mwakoro, n raonaki ma naake a reireinaki irouia taan ibuobuoki nakon te beretitenti, taan kairiiri n te tioun, ao taan kairiiri ni kataneiai aika mitinare aine n aia mwakoro.

Taan kairiiri n te tioun a intawiuniia taan bwabetitoaki ake a reireinaki irouia taan kairiiri n te mwakoro n aia tioun.

Ngkana taan kairiiri n te mwakoro ao te tioun aki tauraoi, te beretiteinti n te mition e kona ni manga katabea te mitinare te mwaane temanna bwa e na karaoa te intawiu.

2.3.7

Te Bwabetito

Mwakuri ma te beretitenti n aia kooram unimwaane ke te tia kairiiri n te mition n te uoote bwa e na bairea te bootaki n taromauri ibukin te bwabetito (taraa “Te Bootaki n Taromauri ibukin te Bwabetito” i nanon “N na Kanga ni Katauraoia Aomata ibukin te Bwabetito ao te Kamatoa?“ inanon Taetaekina Au Euangkerio, mwakoro 12). Waakna te katauraoi ibukin te taromauri ni bwabetito n te tai ae waekoa.

2.4

Kanoan Taian Waaki ni Katoabong ao Taia

Bairea aron waakin am tai ni kakoroa bukin am kantaninga ni mitinare ao kabotoa am taratara iaon kainnanoia tabeman. Uringnga te bwai are e a tia ni berita iai te uea nakoia ake a weteaki bwa a na taetaekina ana euangkerio: “Ao ngkana ngaia bwa kam na mwakuri n ami bong ni kabane n takaruaea te rairannano nakoia aomata aikai, ao ni kairiia nakoiu, ngkana tii temanna te aomata nakoiu, ai korakorara kimwareireimi ma ngaia n abanuean Tamau!” (Reirei ao Berita aika Tabu 18:15).

2.4.1

Bwaai aika a Kakaraoaki ni Katoabong

Kairi waaki aikai inanon baike ko bairei ni katoabong:

  • Katei ao rinanon arom, toam, ao kouru n te mition.

  • Bairea te bwai are ko na karaoia ibukin te bong anne.

  • Katauraoi reirei.

  • Kamatebwai koroboki aika a tabu, Taetaekina Au Euangkerio, aia reirei burabeti aika a maiu ao abotoro, ao booki tabeua ake a kariaiakaki (taraa 2.4.4).

  • Rinanon teuana te taobiki iaon te marurung ao te kamanoakike teuana man te waaki n tararua ibukin kabonganaan rabakau aika a boou (taraa 4.0–4.7).

  • Kakaaia aomata aika ko na reireiniia.

  • Mwakuri ma taan kairiiri n te tabo ao membwa.

  • Buokiia tabeman ni waakini kakukurei aika baireaki ao aika aki baireaki.

  • Tararuai bwaai aika ko kainnanoi, n aron kanakin amwarake ao te katauraoi ibukin te bong.

2.4.2

Katooton tain Bwaai aika Karaoaki ni Katoabong

Tain bwaai aika baireaki ni katoabong ibukin am mition e kona n taraa n ae aekakin te taibora ae inano. Tain bwaai aika baireaki ni katoabong e kona ni bibitaki iroun te beretitenti n te mition ibukin boong ni motirawa, waaki aika onoti n am mition, ao a bati riki.

6:30 te moaningabong

Moana te bong.

6:30–10:00 n te moaningabong

Tataro.

Kamarurung (30 te miniti).

Tebotebo, kaingabong, ao katauraoi ibukin te bong anne.

Karaoa oin am kamatebwai (60 te miniti).

Babaire (30 te miniti).

10:00 n te moaningabong.–9:00 n te tairiki

Kakaai, reirei, ao buokiia tabeman.*

Kaboui rekooti iaon bwaai aika a maiu man te iti ke beebwa rinanon nako te bong.

Rinanon taobiki iaon te kamarurungn ke te kamanoaki ke teuana man te tararua ibukin kabonganaan rabakau aika a boou.

Karaoa te kamatebwai ma toam ao katauraoi reirei (30 te miniti).

Kamatebwai bwaai n reirei riki tabeua ibukiia mitinare aika a boou ao taan kataneiai inanon moan te 12 ni wiiki ni mwakuri (30–60 te miniti, ngkana e riai).

Ngkana ko reiakina te taetae ae e boou, kamatebwaia te taetae anne (30–60). Ko kaungaaki bwa ko na kamatebwaia te Taetae ni Imatang ngkana tiaki ngke te tia taetae n te Taetae ni Imatang.

Amwarake n am katawanou ao katairiki (n aki raka iaon uoua te aoa ngkana e ikotaki).

9:00 n te tairiki.

Okira ami auti, ti ngkana iai te bontaeka n angareirei, ngkana iai, oki imwain 9:30 n te tairiki.

9:00–9:30 n te tairiki.

Koroboki n am tieno, katauraoi nakon te matu, ao tataro.

9:30–10:30 n te tairiki.

Nako matu.

*Am waaki ni katoabong e riai ni boboto iaon am reitaki ma aomata. Kamaenakoa am babaire ao am waaki ni kamatebwai rinanon te bong n totokoa kabanean am tai ae abwabwaki n am tabo ni maeka. Ngkana e raroa ao n reken taina, ko kona ni kitana ao n okira am tabo ni maeka rinanon te bong ni karekei kainnano aikai.

Waaki ake a baireaki ake a kariaiakakai ibukin am mition e na karekea am tai ni mwakuri, motirawa ao ni manga kabotoa taraakin bwaai. E kakaawaki bwa kona karekea te tai ni motirawa ae tau ao kanan tamneim, namakin ao marurungin rabwatam.

2.4.3

Te Tai ni Katei Kouru ao ni Babaire

Karaoi babaire ni katoabong ao ni katoa wiiki ma toam. Iangoa kainnanoia naake ko reireiniia ao kona kanga ni mwakuri ma membwa ngkai ko rinanon te rikirake, katei kouru, ao ni karaoi baire ibukin te bong ao ibukin te wiiki (taraa “Kona Kanga ni Katei Kouru,” “Te Tai ni Babaire ibukin te Wiiki,” ao “Tai ni Babaire ni Katoabong,” inanon “N na kanga ni Kabongana raoi au Tai?“ inanon Taetaekina Au Euangkerio,, mwakoro 8).

2.4.4

Te Tai ni Kamatebwai

Kabongana am tai ni kamatebwai i bon iroum ao ma toam iaon koroboki aika a tabu (riki n ana Boki Moomon), Taetaekina Au Euangkerio,, aia reirei burabeti aika a maiu (reke n te Gospel Library), ao kainibaire aikai. Bwaai n ibuobuoki aika a kariaiakaki aikai a kona ni kakorakora am atatai ao am koaua n ana euangkerio are e kaokaki Iesu Kristo ao ni buokiko ni karekei kainnanoia naake ko reireiniia.

Ngkana koa tia ni katabeaki bwa kona reiakina te taetae ae e boou, kamatebwaia ao kakabongana ni katoabong.

Ngkana ngke te mitinare ae boou, kamatebwai ma am tia kataneiai n te maan ae 30 nakon 60 te miniti ni katoa bong i nanon te moan 12 te wiiki n te tabo ni mitinare (taraa “For New Missionaries: Additional Companion Study” in “Introduction: How Can I Best Use Taetaekina Au Euangkerio?” inanon Taetaekina Au Euangkerio).

2.4.5

Amwarake ma Tabeman

Ngkana e kona, am beretitenti n te mition ao beretitenti n te titeiki n te tabo e na katauraoi kainibaire ibukin bairean amwarake ma aomata n am mition. Ngkana membwa ke tabeman a karaoi amwarake:

  • Bwaina te karinerine nakon aroia are a maeka inanona ao te tai.

  • Bwaina te kakaitau ibukin te amwarake ake a katauraoi.

  • Bubuti te tai n angareirei ae 15- ke 20-te miniti imwain ke imwiin te amwarake ni kakorakoraia naake ko kawariia ao ni karekea am tai ni katamaroa am konabwai n reirei ma te Tamnei.

Temanna te ikawai ae raom n aine ke ni mwaane e riai n raoni ngkami ma toam ngkana kam amwarake ma temanna ae kaokoro teim ma ngaia.

2.5

Te Bong ni Katauraoi

Am beretitenti n te mition e na katabea teuana te bong ni katoa wiiki bwa te bong ni katauraoi. Te bong ni katauraoi e anganiko am tai ni kamarurung n rabwatam, n tamneim, ao n am namakin ngkai kam “tei bwa taan kakoaua ibukin te Atua n taai nako ao ni bwaai nako, ao n taabo nako” (Motiaea 18:9). E na karekea naba am tai ma toam n raoniia mitinare ake tabeman n am mwakoro ao n kukurei n waaki ni kakukurei ni ikotaki ni kakibotu (taraa 3.6).

Taiaoka uringa ana kauring te Uea iaon te tai: “Tai kabirimwakako ke ni mwakuri nakon are riaon korakoram” (Rerei ao Berita aika Tabu 10:4), ao “moantaai ni matu n am kainiwene, bwa kam aonga n aki kua; moantaai n uti, bwa e aonga rabwatami ao ami iango n maiureirei” (Rerei ao Berita aika Tabu 88:124).

2.5.1

Taian Waaki n te Bong ni Katauraoi

Waaki ake a karaoaki n te bong ni katauraoi e kona n raonaki (ma e aki tianaki nakon) aikai:

  • Reitaki ma am utu, beretitenti n te mition, ao raraom (taraa 3.9)

  • Karaoan te uaati

  • Karekean te koroira ao katararaoam tabeua i bon iroum

  • Kaitiaki

  • Bobwai

  • Motirawa

  • Irakin waaki ni kakukurei aika a tia ni kariaiakaki (taraa 3.6)

2.5.2

Katooton Tain te Bong ni Katauraoi

Bairean te bong ni katauraoi e kona n tara n tei n aron aikai:

6:30 n te moaningabong

Moanaki te bong.

6:30–8:00 n te moaningabong

Tataro.

Tebotebo, kaingabong, ao katauraoi ibukin te bong anne.

[Babaire (30 te miniti)]

Karaoa am kamatebwai i bon iroum (30 te miniti).

8:00 moaningabong–6:00 tairiki.

Karaoi waaki ni kakukurei n te bong ni katauraoi (taraa 2.5.1).

Uringnga: Ni kabane waaki ni kakukurei n te bong ni katauraoi a riai ni bane n tia imwain 6:00 n te tairiki.

6:00–9:00 n te tairiki.

Kakaai, reirei, ao ibuobuoki nakoia tabeman.

9:00 n te tairiki.

Oki nakon ami auti. Ngkana iai ami bontaeka n angareirei, oki n 9:30 n te tairiki.

9:00–9:30 n te tairiki.

Koroboki n am tieno, katauraoi nakon te matu, ao tataro.

9:30–10:30 n te tairiki.

Nako matu.

2.6

Taian Waaki n te Bong ae te Tabati

Bairei waaki n te Tabati ake a na buokiko ni kakoroa bukin am kantaninga ni mitinare ni karekei, reirei, bwabetito, ao ni buokiia tabeman n reiakina taekan ao n riki n ai aron Tamara are i Karawa ao Iesu Kristo. Uringa ana reirei te Uea ibukin te bong ae te Tabati n Reirei ao Berita aika Tabu 59:13–19, ao korei taeka ao kibuntaeka ake a taekinna bwa te Tabati ni koaua e raonaki n te kimwareirei, kukurei, te nano ae kukurei, ao moamoa ae kakatonga.

Waaki n te Bong ae te Tabati e raonaki n irakin te taromauri, maungatabu ni kabuta, tetere ni maungatabu n te Tabati n te maungatabu n te titeiki, ao rakan boowi n aron boowi ni kauntira ngkana e kaoaki. A raonaki naba n irakin te aki mamatam ni katoa namwakaina.

N am kekeiaki inanon am mwakuri ni mitinare, te Uea e aki tuangko bwa kona aki amwamwarake, ti ngkana tain te aki mamatam ni katoa namwakaina, ke n anganano n aki mamatu bwa ko aonga n riki bwa te mitinare ae bane arona. Ko kona n tabetai n aki mamatam ibukin bwaai aika iai bukiia ae onoti, ma tai aki mamatam n ae raka iaon 24 te aoa n te taina.

2.7

Mwakuri n Ibuobuoki n te Kaawa

Ko kona n reiakinna n riki bwa ana reirei Iesu Kristo man am beku n aron are E karaoia. Kakaai anga n ibuobuoki nakon toam, aomata ake ko reireiniia, membwa, ao tabeman man te kaawa, “bwa e aonga n reke iroumi te wanawana; bwa kam aonga n ataia bwa ngkana kam beku ibukiia raomi ao kam bon beku naba ibukin Atuami.” (Motiaea 2:17).

Ko riai ni beku ma te nano ae koaua ni buokiia tabeman n aki kantaningaa mwiina. Irii tuan ni kabane mwakuri n ibuobuoki (taraa 7.2), riki ngkana iai ae taekan te aki angareirei ngkai te ibuobuoki ke te aki ibuobuoki e na reke ae ko na tiku n ti ngkoe ma ataei. Ngkana iai temanna ae kaota nanona ni kan ongo am rongorongo, kaeka nakoia n ae kimototo ao baireia bwa kona kaitibo ma ngaia n te tai ao te tabo ae kaokoro n tibwa te rongorongo.

Ibukin riki rongorongona taraa mwakoro 7.2, “Guidelines for Service.”

Boretiia