Te peu nō te hō’ē misiōnare

3.0

’Ōmuara’a

Tē fa’a’ite nei teie tuha’a i te mau fa’aturera’a i te pae nō te mau ravera’a ’e te hīro’a huru Mesia tei tīa’ihia ia ’oe ’ia ha’api’ipi’i ’e ’ia fa’atupu i roto i tā ’oe misiōni ’a riro mai ai ’oe ’ei pipi pūpū rahi atu ā nō Iesu Mesia. Mai tā te peropheta Moroni i parau : « Ha’amana’o […] i te parau a te Atua ’o tē nā ’ō mai ra ē, e ’ite ’outou ia rātou nā roto i tā rātou mau ’ohipa ; ’e ’ia maita’i tā rātou ra mau ’ohipa, ’ua maita’i ato’a ïa rātou » (Moroni 7:5).

3.1

Te peu a te Mesia

’A pure ’e ’a ha’a nō te fa’atupu i te hīro’a mai te Mesia te huru, mai tei fa’ata’ahia i roto i te mau pāpa’ira’a mo’a ’e i te ’Ia poro haere i tā’u nei ’Evanelia ’oia ho’i te māuruuru, te hāmani maita’i, te here, te ha’eha’a, te fa’a’oroma’i, te aroha ta’ata ’e te ha’apa’o. Maoti te tauturu a te Fa’aora ’e tā ’oe iho mau tauto’ora’a ateate ’e te itoito e ti’a ai ia ’oe ’ia fa’atupu i te hīro’a mai te Mesia te huru (hi’o Mosia 3:19).

’A hamani maita’i i te ta’ata, ’a parau i te parau ’ana’anatae ’e te fa’auru. ’A vai ara i te vaira’a o te ta’ata tāta’itahi, mai te uira’a ia ’oe iho i te mau uira’a mai teie nei :

’Ua pō roa ānei ’aore rā ’ua po’ipo’i roa ānei nō te tāniuniu i teie ta’ata ? E riro ānei teie ’ohipa i te fa’ataupupū tano ’ore i te ’utuāfare ’e tō te ta’ata taime ?
Tē vai rā ānei te hō’ē rāve’a e nehenehe iā’u e tauturu atu i terā vaira’a ?
E nehenehe ānei teie ’ohipa ’aore rā teie parau e fa’aha’amā i te ta’ata, ’aore rā e fa’ahō’ū’ū atu ’aore rā e parau e ’ino’ino mai te ta’ata ?
E aha te peu i’ō nei ?

E manihini ’oe i te vāhi tā ’oe e tāvini ra ’e e mea ti’a ia ’oe ’ia rave i te mau ta’ata ’e te mau vāhi ma te fa’atura ’e te māuruuru. Fa’atura i te mau peu, te mau ti’aturira’a pae fa’aro’o ’e te mau ravera’a, nā reira ato’a te mau vāhi mo’a i reira, i te mau taime ato’a. ’A hi’o maita’i ē, e’ita te ta’ata e ’ino’ino mai i tā ’oe mau ’ohipa. ’A ha’amana’o ē, te mea tā ’oe e parau ’e tā ’oe e rave, e fa’aro’o mai te ta’ata, e hi’o mai rātou ’e e tāmau rātou.

Nō te tahi atu ā ha’amāramaramara’a hi’o i te tuha’a 7.3, « Fa’atura ia vetahi ’ē » ’e te Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, 38.6.14, « Te ha’avā na », i roto i te Vaira’a buka ’evanelia.

3.2

Te vai-ti’a-mā-ra’a nō te hiero

Tē ani nei te Fatu Iesu Mesia ia ’oe ’ia « fa’aineine ia ’outou iho, ’e ’ia ha’amo’a ia ’outou iho ; ’oia ïa, ’ia tāmā i tō ’outou ’ā’au, ’e ’ia horoi tāmā ho’i i tō ’outou mau rima ’e tō ’outou mau ’āvae i mua iā’u nei, ’ia ti’a iā’u nei ’ia tāmā atu ia ’outou na » (Te Ha’api’ira’a Tumu ’e te mau Fafaura’a 88:74). Hō’ē tuha’a nō teie fa’aineinera’a, ’oia ho’i ïa te ha’apa’ora’a i tā ’oe mau fafaura’a o te hiero.

3.2.1

Te mau fafaura’a o te hiero

Nā te ha’apa’ora’a i te mau fafaura’a o te hiero nō te ha’apa’o, te fa’atusiara’a ’e te ha’amo’ara’a e ha’afaufa’a ia ’oe ’e e tauturu ia ’oe ’ia riro rahi atu ā mai te Fa’aora te huru.

Noa atu ē ’aita e hiero i roto i tā ’oe misiōni, ’ia vai noa tā ’oe parau fa’ati’a nō te hiero ti’a, nō te fa’aha’amana’o ia ’oe i tā ’oe mau fafaura’a. ’A ani i tō ’oe peresideni misiōni i te hō’ē uiuira’a parau fa’ati’a hiero nā mua a’e te reira e hope ai.

3.2.2

Te haʼamoriraʼa i roto i te hiero

Mai te mea e hiero ’aita i ātea roa, e nehenehe tō ’oe peresideni misiōni e fa’ati’a ia ’oe ’e i te tahi atu mau misiōnare ’ia haere i te hiero i te mahana fa’aineinera’a, i terā taime ’e terā taime.

Nō te tahi atu ā ha’amāramaramara’a, hi’o i te tuha’a 7.4, « Te haerera’a i te hiero ».

3.3

Te ture nō te vi’ivi’i ’ore

Hō’ē fafaura’a hiero tā ’oe i rave , ’o te ha’apa’ora’a ïa i te ture nō te vi’ivi’i ’ore. ’A rave i te mau mea ato’a tē roa’a ia ’oe nō te pāruru ia ’oe, tō ’oe hoa misiōnare, ’e te tahi atu mau ta’ata i mua i te ’umera’a ’ia rave i te hara ’āpeni e ’ōfati atu ai i teie fafaura’a mo’a. E nehenehe ato’a te mau mea e ’ōfati i te ture nō te vi’ivi’i ’ore ’ia riro ’ei hara i mua i te ture, i te tahi mau vāhi.

E mea ti’a ia ’oe ’ia ha’apae i te mau mana’o ’aore rā te mau ’ohipa ato’a e fa’ata’a ’ē ia ’oe i te Vārua o te Atua. Taua mau mea ra, ’o teie ri’i ïa te tahi, te fa’aturi ; te poreneiā ; te ’ohipa homo’āpeni ; te ’āpeni i te vaha ; te fa’aauma’ira’a ’āpeni ; te tāpe’ape’ara’a huru au ’ore ; te hāponora’a ’aore rā te fāri’ira’a i te mau poro’i, te mau hōho’a ’aore rā te mau video faufau nō ni’a i te ’āpeni ; te mirimirira’a ’āpeni ’e te māta’ita’ira’a ’e te fa’a’ohipara’a i te hōho’a faufau (hi’o 7.5.3). Hi’o Nō te pūai o te feiā ’āpī, « E mea mo’a tō ’oe tino », 22–29, nō te tahi atu ā ha’amāramaramara’a.

’Ua ha’api’i te Fatu ē : « Tē ’imi nei Sātane i te rāve’a nō te ha’amou atu » (Te Ha’api’ira’a Tumu ’e te mau Fafaura’a 132:57), ’e ’ia « ro’ohia [’oe] i te ’oto mai iāna ihora » (2 Nephi 2:27). E fa’a’ohipa ’oia i te mau ta’ata, i te mau rāve’a ha’apararera’a ti’a ’ore ’e te tahi atu mau ’umera’a ’ia hara nō te fa’ahema, nō te ha’amārei, nō te ha’amata’u ’e nō te fa’ahāmā ia ’oe. ’Ei hi’ora’a, ’a hi’o maita’i i te mau ta’ata e tītau i te moni ’aita rā e fa’a’ite ’oia i te tahi mau hōho’a ’e mau poro’i huru fifi ’aore rā ti’a ’ore tā ’oe i hāpono ia rātou ra.

Mai te mea tē fifi ra ’oe nō te ha’apa’o i teie mau fa’aturera’a ’aore rā te ha’amata’u ra te ta’ata ia ’oe, ’a ani i te tauturu a te Fatu ’e ’a paraparau i tō ’oe peresideni misiōni i reira ra.

3.4

Te ha’avare ’ore

I roto i te vai-ti’a-mā-ra’a nō te hiero, tē vai nei te ha’avare ’ore i roto i tā ’oe mau ’ohipa ato’a ’e te ta’ata. I roto i te tāvinira’a misiōnare, ’oia ho’i ïa :

E parau i te parau mau, i tō ’oe peresideni misiōni iho ā rā, nō ni’a i tā ’oe mau peu, te ’itera’a pāpū, te huru ’ohipara’a ’e te ea pae manava ’e pae tino.
E ’āfa’i i te parau fa’a’ite ti’a nō ni’a i tā ’oe ’ohipa ’e te huru nō tō ’oe fa’a’ohipara’a i tō ’oe taime i te roara’a o te hepetoma, i roto i te mau parau fa’a’ite hepetoma.
E fa’a’ohipa i te ’āfata moni misiōni ma te ti’a’aura’a pāpū ’e e fa’aho’i i te mau tīteti ho’ora’a ti’a.
E riro ’ei ta’ata ti’aturihia ’e ’eiaha roa e fa’atae i te parau fa’ati’a hape ’aore rā te parau hape nō ni’a i te hō’ē ta’ata, mai tō ’oe hoa misiōnare.
E fa’atura i te ta’ata ’e ’eiaha e tīpe’e, e rave ’aore rā e fa’a’ohipa i te tao’a iho o te hō’ē ta’ata (mai te ’ahu, te mau buka, te mau mātini rorouira ’e te tao’a fa’a’una’una) mai te mea ’aita i fa’ati’ahia.

3.5

Te mau ’ohipa ’e te mau ta’ata

’Ua ha’api’i te Fa’aora : « Teie tā’u parau, ’Ia aroha ’outou ia ’outou iho, mai iā’u e aroha atu ia ’outou na » (Ioane 15:12). ’A mā’iti ’ia pe’e i te hi’ora’a o te Fa’aora ’e ’ia fa’a’ite i te peu maita’i ’e te ha’afifi ’ore ’e te au nō terā taime.

3.5.1

Te mau ture rahi nō te ’ohipara’a ’e te mau ta’ata pa’ari

Ha’amau i te tā’amura’a mau nō te ti’aturi ’e te feiā tā ’oe e tāvini ra, mai te ta’ata tā ’oe e ha’api’i ra, te tahi atu mau misiōnare, nā reira ato’a te mau melo i reira. ’Ei huru ta’ata tōro’a ’e te hāmani maita’i, ’e ’a ha’apa’o i teie mau fa’aturera’a :

’A fa’aea noa i pīha’i iho i tō ’oe hoa misiōnare.
’Eiaha e hōro’a i te parau a’o i te feiā pa’ari nō ni’a i tō rātou mau fifi orara’a. Fa’atoro atu ia rātou i ni’a i tō rātou ’episekōpo mai te mea e tītauhia te parau a’o. Mai te mea tē mana’o ra ’oe ē, e ta’ata nō te tahi atu ha’apa’ora’a tei hina’aro i te tauturu nō tōna orara’a, ’a paraparau i tō ’oe peresideni misiōni.
Ha’apae i te mau ’ohipa e tupu ai te ’ohipa ata’ata i pae tino ’e i te pae vārua, ’aore rā ’o tē fa’ahape i te mana’o.
’Eiaha e arapae i te ta’ata ’aore rā e tāpiri ti’a ’ore i te hō’ē ta’ata. ’Eiaha e tāpe’a i te ta’ata nō te tahi atu ’āpeni, maori rā nō te aroha rima atu.
E hi’o maita’i ē, tei reira te tahi atu ta’ata pa’ari nō tō ’ōrua ’āpeni, ’ia fārerei tino ’ōrua, ’ia ha’api’i tino ’ōrua, ’ia rātere ’ōrua ’e ’aore rā ’ia tāmā’a ’ōrua ’e te hō’ē ta’ata nō te tahi atu ’āpeni. ’A tītau i te parau fa’ati’a a tō ’ōrua peresideni misiōni nō te tahi atu parau fa’ati’a ta’a ’ē.
’Ia vai tura noa tā ’oe mau parau ’e ’eiaha te reo purūmu. ’A fa’a’ohipa i te i’oa ’e te ti’ara’a tano ’ia pi’i ’oe i te ta’ata. ’Ei hi’ora’a, ’a fa’ahiti i te ti’ara’a « Elder » ’aore rā « Tuahine » ’ia paraparau ana’e i te tahi atu mau misiōnare, ’ei fa’a’itera’a i te fa’atura i tō rātou pi’ira’a.

3.5.2

Te mau ture rahi nō te ’ohipara’a ’e te mau tamari’i

Nō tō ’oe pārurura’a ’e te pārurura’a o te mau tamari’i, ’a ha’apa’o ’eta’eta i te mau arata’ira’a i muri nei :

’A fa’aea noa i pīha’i iho i tō ’oe hoa misiōnare.
’Eiaha roa atu ’o ’oe ana’e ’e te tahi atu taure’are’a i raro mai i te 18 matahiti.
E hi’o maita’i ’ia ha’uti ’oe ’e te hō’ē pupu tamari’i, mai te tu’era’a pōpō ’aore rā te tahi atu ha’uti. ’Eiaha roa atu e rave i te mau ’ohipa e mana’ohia ai e ’ohipa ti’a ’ore.
E tītau i te parau fa’ati’a a te metua nō te rave i te hō’ē mea ’e te hō’ē tamari’i, i te mau taime ato’a e nehenehe te reira.
’Eiaha e ha’amāineine i te mau tamari’i, ’eiaha e taui i tō rātou pāhi’i, ’eiaha e amo ia rātou ’aore rā e tauahi ia rātou, ’aore rā e fa’ati’a ia rātou ’ia pārahi i ni’a i tō ’oe turi ’āvae. E nehenehe teie mau ’ohipa ’ia hi’ohia ’ei mea ti’a ’ore ’aore rā e mana’ohia e ’ohipa ti’a ’ore.
Ma te tura, ’eiaha e fāri’i e ha’apa’o i te mau tamari’i, noa atu ā te matahiti.
’Eiaha e fāri’i i te mau ’ohipa tāvinira’a e tītau ia ’ōrua ’ia fa’aea ’o ’ōrua ana’e ’e te mau tamari’i (hi’o 7.2.2).

3.6

Te fa’a’oa’oara’a

E nehenehe ’oe e ha’api’i ’ia here hope atu ā i te ta’ata tā ’oe e tāvini ra maoti te ’ana’anataera’a i tā rātou ta’ere, te ’ā’amu, te fenua ’e te mau peu nā roto i te tere-māta’ita’i-ra’a i te mau vāhi māta’ita’ira’a o te fenua, te tanora’a, i te mahana fa’aineinera’a ïa (hi’o 2.5).

’A ui i te ta’ata tā ’oe e fārerei ’ia parau mai i te mau vāhi tano ’e te ata’ata ’ore e māta’ita’i atu. ’A mā’iti i te mau ’ohipa ri’i e fa’auru i te ta’ata ’e ’o tē tauturu i te tāmarū i te mana’o. Teie te mau vāhi tano e haere e māta’ita’i (e ’ere rā i te reira ana’e) :

Te mau vāhi nō te ’ā’amu ’e ta’ere o te fenua
Te mau fare manaha ’e te mau fare anoihi
Te mau Zoo ’e te mau ’āua tere māta’ita’ira’a

3.6.1

Te mau ture rahi nō te mau ’ohipa fa’a’oa’oara’a

Ha’apae i te mau ha’aputuputura’a ’ua rahi roa te mau misiōnare i te hō’ē vāhi ta’ata. Te tanora’a, ’eiaha e ha’aputuputu ’ei pupu rahi atu ā i te mau ta’ata i roto i tō ’oe mata’eina’a. E nehenehe ho’i te mau ta’ata e hi’o noa mai ’aore rā e nehenehe rātou e taiā.

Fa’a’ohipa i te mau pere’o’o a te misiōni nō te mau ’ohipa ri’i noa tei ha’amanahia e te peresideni misiōni.

Fa’ahā’uti’uti i te tino ’e fa’aitoito i te aupuru i te tino maita’i nō te ’ohipa misiōnare. Ha’uti i te mau tū’aro e’ita te tino e pēpē ’e e rohirohi roa.

3.6.2

Te mau ’ohipa ri’i ’aita e fa’ati’ahia

Hi’o maita’i i te pae nō te pāruru ’e ’a feruri noa pa’i ’ia haere ’oe i te mau fa’a’oa’oara’a. Nō te mea i pēpē pāpū a’enei te mau misiōnare i roto i te mau ’ohipa ataata, ’eiaha e rave i te mau ’ohipa ataata rahi i roto i te misiōni. Teie te mau ’ohipa ri’i i muri nei, ’aita i hope roa :

Te mau tū’aro ’arora’a, te fa’a’eta’etara’a tino, te mau tū’aro tau hiona ’e i roto i te pape (mai te ’aura’a)
Te ta’umara’a nā ni’a i te mou’a ’e te ’ōfa’i
Te fa’ahorora’a moto ’e pua’ahoro fenua
Te haerera’a nā ni’a i te poti ’e te manureva
Te fa’a’ohipara’a i te pupuhi
Te fa’a’ohipara’a i te ahitiri ’aore rā te paura

Māta’ita’i i teie video nō te ha’amāramaramara’a rahi atu ā nō ni’a i te pārurura’a i roto i te ’ohipa fa’a’oa’oara’a.

16:41

3.6.3

Rāve’a ha’apararera’a

’A mā’iti i te mau rāve’a ha’apararera’a tei ha’amanahia ’e te ti’a, ’o tē tītau manihini i te Vārua ’e ’o tē tauturu ia ’oe ’ia rave i tā ’oe fā misiōnare. I te rahira’a o te taime, te aura’a ra :

E fa’a’ohipa i te mau fa’aaura’a rorouira rāve’a tūreiara’a ’e te ’āfa’ifa’i, ’e tae noa atu te rāve’a ha’apararera’a i ni’a i te natirara, ’o tei ha’amanahia nō tā ’oe misiōni, nō te ha’api’i i te ta’ata i te ’evanelia ’e nō te paraparau i tō ’oe ’utuāfare ’e te mau hoa (hi’o 3.9).
E ha’apae i te ’āfata teata, te mau hōho’a, te mau ha’uti te mau hōho’a māta’ita’i, te mau ha’uti rorouira ’e te tahi atu mau video ’aita i fa’ati’ahia.
E mā’iti i te mau buka fa’aro’o tari’a, te pehe ’e te mātēria tai’o ’o tē fa’arahi i tō ’oe fa’aro’o ia Iesu Mesia. ’Ei rāve’a mo’a, ’o tē tītau manihini i te Vārua ’e ’o tē fa’aitoito i te ’ā’au (hi’o Buka arata’i rahi, 19.1).

’A hi’o i te mau ture nā te mau misiōnare nō te mau rāve’a ’āpī, nō te tahi atu ā ha’amāramaramara’a (hi’o 7.5). Paraparau i te mau uira’a nō ni’a i te rāve’a ha’apararera’a ’e te feiā fa’atere misiōni.

3.6.4

Te mau ’upa’upa

Mai te mea e fa’ati’ahia e tō ’oe peresideni misiōni, e nehenehe ’oe e ’āfa’i mai i te hō’ē ’upa’upa i roto i te ’āua misiōni. ’Eiaha te reira i te mea moni rahi, e mea ’ōhie ’ia ta’ita’i ’e e ha’apa’o i te mau ture nō te tauiha’a manureva. ’Ia tano te huru ’upa’upa nō te mau rurura’a i te sābati (hi’o Buka arata’i rahi, 19.3.6).

E ti’a ia ’oe ’ia ha’api’ipi’i i tā ’oe ’upa’upa i te mahana fa’aineinera’a, ’e i te tahi atu mau taime tā te peresideni misiōni e parau mai. ’Ia ha’uti ’oe i tā ’oe ’upa’upa, ’a feruri i te veutupura’a ’e te tahi atu mau misiōnare, e aha tō rātou huru nō te reira. Te pehe tā ’oe e ha’uti i ni’a i tā ’oe ’upa’upa, e pehe mo’a ïa ’e te tura ’e te tano nō te ’ohipa misiōnare.

3.7

Te mau hōho’a ’e te mau video

E nehenehe te mau hōho’a e tauturu ’ia fa’a’ite i te ’ohipa i roto i tā ’oe misiōni i te ta’ata i te fare ’e e nehenehe te reira e riro mai ’ei ha’amana’ora’a rahi nō tā ’oe misiōni. ’Ia pata ’oe i te mau hōho’a ’e te mau video, e hi’o maita’i ’eiaha te tahi atu mau ta’ata ’ia ha’amā mai, te mau ta’ata mai te tahi atu mau misiōnare ’e te mau ta’ata e tāfifi i te fifi fa’arava’ira’a faufa’a, te fifi sōtiare ’e te fifi tino. ’Aita paha te tahi mau ta’ata e hina’aro ’ia ’ite ’oe ’aore rā vetahi ’ē i te mea i ni’a i te hōho’a, ’aore rā ’ia ’ōperehia te reira ’e ’ia fa’a’itehia te reira. ’A ani i te parau fa’ati’a hou ’a pata ai ’e ’a fa’a’ite ai i te mau hōho’a ’e te mau video. I roto i te tahi mau misiōni, e’ita paha ’oe e fa’ati’ahia ’ia fa’a’ite atu i te hōho’a nō te ta’ata tā ’oe e ha’api’i ra nō te mau ture parau ’ōmo’e i reira.

E nehenehe te patara’a i te hōho’a ’ia riro ’ei fa’a’inora’a ’aore rā ’ei ’ohipa ’ōfati ture i roto i te tahi mau ta’ere ’e te tahi mau vāhi. Te tahi hi’ora’a, ’o te patara’a ïa i te hōho’a nō :

Te tahi mau fare a te hau ’e ’a te nu’u fa’ehau.
Te mau vāhi pāruru o te mau taura’a manureva, te mau vāhi hi’opo’ara’a buka rātere, te mau tomora’a ’ōti’a fenua, te mau fare tōnitera (consulat) ’e te mau fare monohau (ambassades).
Te mau ti’a nō te ture ’e nō te fa’ehau.
Te mau ta’ata, te mau fare ’aore rā te mau ’ohipa a te tahi atu mau fa’aro’o.
Te mau mea ta’a ’ē mai te ta’ata i roto i tō rātou ’ahu tumu.
Te mau ta’ata i roto i te veve, tei ma’ima’i ’aore rā tei huma.

’Ei arata’ira’a rahi, ’eiaha e pata i te hōho’a nō te mau tao’a, te mau vāhi ’aore rā te mau ta’ata i tāpurahia i ni’a nei. Paraparau i te mau uira’a ato’a e nehenehe e tae mai i te feiā fa’atere misiōni.

E mau ture ta’a ’ē ato’a tā te ’Ēkālesia nō ni’a i te patara’a hōho’a i te fare purera’a :

’Eiaha e pata i te hōho’a ’aore rā e tāviri i te hōho’a i roto i te piha nō te ’ōro’a mo’a.
’Eiaha e pata i te hōho’a, e hāpono ’aore rā e tāviri i te mau ’ōro’a mo’a, mai te ’ōro’a mo’a ’e te mau bāpetizora’a ’e te mau ha’amaura’a.

Māta’ita’i i teie video nō te tahi atu ā ha’amāramaramara’a nō ni’a i te mau arata’ira’a nō te patara’a hōho’a ’e te tāvirira’a hōho’a.

5:24

3.8

Te fa’a’ohipara’a i te mau rāve’a ’āpī

’Ua parau te Fatu : « Inaha, e rave ’oi’oi au i tā’u ’ohipa i te tau mau nō te reira » (Te Ha’api’ira’a Tumu ’e te mau Fafaura’a 88:73). E nehenehe te mau rāve’a ’āpī ’ia riro ’ei mauiha’a nō te fa’a’ite i te mau ha’api’ira’a o te ’evanelia a Iesu Mesia, e mea ti’a ’ia fa’a’ohipa-parauti’a-hia te reira.

Nō te tahi atu ā ha’amāramaramara’a, hi’o i te tuha’a 7.5, « Te mau rāve’a ’āpī ».

3.9

Te ’āparaura’a ’e te ’utuāfare, te feiā fa’atere misiōni ’e te mau hoa

E nehenehe tō ’oe ’utuāfare, te feiā fa’atere misiōni ’e te mau hoa ’ia riro ’ei turu rahi nō ’oe i roto i tā ’oe misiōni. I te mahana fa’aineinera’a, ’a paraparau i tō ’oe ’utuāfare ’e te mau ta’ata nō te tahi atu mau vāhi, mai te mau melo ’e te feiā tā ’oe i ha’api’i. ’A ha’apūai ia rātou ma te fa’ati’a atu i te mau ’ohipa pae vārua tei tupu nō ’oe, nā reira ato’a tō ’oe ’itera’a pāpū.

’Ia paraparau ’oe i te mau ta’ata (ta’a ’ē i tō ’oe ’utuāfare), e nā roto noa i te rata uira ’aore rā te rata pāpie, ’eiaha rā nā roto i te niuniu ’aore rā te ’āparaura’a video maori rā ’ua fa’ati’ahia te reira e tō ’oe peresideni misiōni.

’A fa’anaho maita’i i tō ’oe taime i te mahana fa’aineinera’a, paraparau i tō ’oe metua nā mua, i te peresideni misiōni i muri iho.

’A feruri ma te pa’ari e aha te roara’a te paraparaura’a. ’Ia rave ana’e ’oe i taua mau fa’aotira’a ra, e feruri ato’a i tō ’oe hoa misiōnare ’e ’ia ha’amana’o noa ’oe i te tumu o tā ’oe tāvinira’a misiōnare.

E nehenehe ’oe e tai’o i te mau poro’i ato’a tā ’oe e fāri’i i roto i te hepetoma, ’ia taimehia nō te reira. E pāhono noa i te mau poro’i i te mahana fa’aineinera’a maori rā e ’ohipa rū (hi’o 3.9.7).

3.9.1

Te ’utuāfare

E nehenehe e paraparau i tō ’utuāfare i te mahana fa’aineinera’a o te hepetoma, nā roto i te mau rata, te mau rata uira, te mau poro’i, te mau poro’i natirara, te niuniu ’e te paraparau video.

Fa’a’ohipa i te mau rāve’a i ha’amanahia ’e ’o tē tano ia ’oe ’e i tō ’oe ’utuāfare, te mea māmā a’e ’eiaha tā ’oe moni i roto i te ’āva’e e pau. E mea ta’a ’ē nō terā vaira’a ’e terā vāhi ’e terā taime

Mai te mea tē ora ra tō ’oe nā metua i te vāhi ta’a ’ē, e nehenehe e paraparau i te metua tāta’itahi i te mahana fa’aineinera’a.

Tē fa’aitoito-ato’a-hia nei ’oe ’ia tāniuniu i tō ’oe ’utuāfare i te tahi atu mau taime ta’a ’ē mai te Noela, te mahana o te mau mama, te mahana o te mau papa, te mahana fānaura’a o tō ’oe nā metua, ’e te tahi atu mau mahana fa’afa’aeara’a faufa’a i tō ’oe fenua mai te au i tō ’oe hīro’a tumu.

Nā ’oe e ha’amata i te mau paraparaura’a ato’a, te mau poro’i nā ni’a i te natirara, te niuniu ’e te paraparaura’a video. Mai te mea ē, e hina’aro tō ’oe ’utuāfare e fārerei ti’a roa ia ’oe, tītauhia ia rātou ’ia tāniuniu nā mua i te peresideni misiōni.

’Ia paraparau ’oe ’e tō ’oe ’utuāfare nā ni’a i te niuniu ’aore rā te paraparaura’a video, ’a feruri ma te pa’ari i te roara’a o tā ’oe mau pi’ira’a. ’Ia rave ana’e ’oe i taua mau fa’aotira’a ra, e feruri ato’a i tō ’oe hoa misiōnare ’e ’ia ha’amana’o noa ’oe i te tumu o tā ’oe tāvinira’a misiōnare.

3.9.2

Te peresideni misiōni

Pāpa’i i te hō’ē rata i tō ’oe peresideni misiōni hō’ē taime i roto i te hepetoma, i te mahana fa’aineinera’a. Tei mātauhia, e hāpono atu ’oe i tā ’oe rata maoti te Missionary Portal [Tahua natirara nō te mau misiōnare].

’O tō ’oe noa peresideni misiōni tē hi’o i tā ’oe rata hepetoma. ’A parau hua atu tō ’oe mana’o, ma te ha’avare ’ore, ’ia ti’a iāna ’ia māramarama i tō ’oe mau māna’ona’ora’a, nō te hōro’a mai i te parau a’o ’e te mana’o tauturu. ’Ia ’ite ’oe ē, e tai’o ’oia i te reira, terā rā, e’ita paha tāna e nehenehe e pāhono i te mau rata ato’a.

Mai te mea e parau ’āpī rahi tā ’oe e fāri’i mai te fare mai ’e e mea rū te reira, ’a fa’aara i tō ’oe peresideni misiōni nō te ani iāna hou ’a tāniuniu ai i tō ’oe ’utuāfare i te mahana ’ē i te mahana fa’aineinera’a, ’aore rā i te tahi atu taime ta’a ’ē.

3.9.3

Te tāniuniura’a i te mau ta’ata i roto i tā ’oe misiōni

’Ia tāniuniu ’oe i te mau ta’ata i te tahi atu vāhi o te misiōni, ’a hi’o maita’i ē, e ’ohipa misiōnare te tumu nō te reira. ’A pe’e i te mau ture i roto i te tuha’a 3.5.1, « Te mau ture rahi nō te ’ohipara’a ’e te mau ta’ata pa’ari », ’e i roto i Te mau ture pāruru nō te fa’a’ohipara’a i te rāve’a ’āpī, ’e ’a ha’amana’o i te fa’aō ato’a mai i tō ’oe hoa misiōnare i roto i teie mau ’āparaura’a.

3.9.4

Te mau pū’ohu ’e te mau rata

I te tahi mau misiōni, e fa’a’ohipa rātou i te ’āfata rata o te piha tōro’a misiōni nō te fāri’i i te mau rata ’e te mau pū’ohu, nā reira ato’a nō te vāhi fa’aho’ira’a nō tā ’oe mau rata e hāpono atu. E nehenehe te reira fa’anahora’a e pāruru ia ’oe ’e e pāruru ato’a i te mau rata i te feiā ’eiā, ’e e’ita ato’a ïa te mau rata e mo’e i te taime tauira’a vāhi. ’A pe’e maita’i i te mau arata’ira’a ato’a e fāri’i atu ’oe nō te reira.

3.9.5

Te ’ohipa misiōnare ’e te mau ta’ata nō te vāhi nō reira mai ’oe

’Ua mātau paha ’oe i te hō’ē ta’ata i te vāhi nō reira mai ’oe e nehenehe te ’ohipa i tupu nōna e tauturu i te ta’ata tā ’oe e ha’api’i ra i roto i tā ’oe misiōni. E mea ti’a ia ’oe ’ia ani i tō ’oe peresideni misiōni i te parau fa’ati’a nō te fa’a’ite mai taua ta’ata ra i te ’ohipa i tupu nōna, nā reira ato’a tōna ’itera’a pāpū. ’A paraparau i terā ta’ata e aha te rāve’a tūreiara’a maita’i roa e fa’a’ohipa.

Mai te mea ’ua hina’aro tō ’oe ’utuāfare ’aore rā te mau hoa i te vāhi nō reira mai ’oe, i te ha’api’i rahi atu ā nō ni’a i te ’evanelia a Iesu Mesia, e nehenehe tō ’oe peresideni misiōni e fa’ati’a ia ’oe ’ia ha’api’i ia rātou nā roto i te mau rāve’a ’āpī (hi’o 7.5.4).

3.9.6

Te mau tere fārereira’a a te ’utuāfare ’e te mau hoa ia ’oe

Te tanora’a, ’eiaha te ’utuāfare ’e te mau hoa e tere fārerei mai ia ’oe i roto i tā ’oe misiōni. Terā rā, tē vai nei te tahi mau taime ta’a ’ē, e nehenehe te peresideni misiōni e fa’ati’a i te reira. ’Eiaha te reira mau fārereira’a ’ia roa roa, ’e ’eiaha ato’a ’ia taupupū tā ’oe mau hōpoi’a misiōnare. ’Eiaha te reira mau tere ’ia ha’uti i ni’a i tō ’oe hoa misiōnare, te tahi atu mau misiōnare ’aore rā te ta’ata tā ’oe e ha’api’i ra. ’A hi’o maita’i ē, ’eiaha te reira tere fārereira’a ’ia fa’afāriu i tō ’oe mana’o i te vāhi ’ē i tā ’oe tāvinira’a ’aore rā ’eiaha te reira ’ia riro mai ’ei fifi moni nō tō ’oe ’utuāfare.

3.9.7

Te mau taime rū

Mai te mea e parau rū tē tae mai nō ’ō mai i tō ’oe ’utuāfare, ’a fa’a’ite atu i tō ’oe feiā fa’atere misiōni ’ia ti’a ia rātou ’ia tauturu mai ia ’oe. E tāniuniu atu te feiā fa’atere misiōni i tō ’oe ’utuāfare mai te mea noa atu e tupu te tahi ’ohipa rū i ni’a ia ’oe.