Sipsip We I Lus, i kam long Yongsung Kim, havenlight.com

Gudlaef long saed blong Bodi

4.0

Fas Toktok

Misinari wok i askem blong wan i mas komitim hem long saed blong bodi mo long saed blong filing. Ol standet insaed long seksen ia, mo insaed long Stretem Yuwan long Misinari Laef, bae i helpem yu blong yu mekem yuwan i rere long maen mo long bodi blong yu blong yu givim wan moa gud seves long Lod mo long wok blong Hem. Oltaem, luklukbak long olgeta standet ia truaot long misin blong yu.

4.1

Kaekae mo Fasin blong Rere long Kaekae

Yu mas givim inaf wota mo kaekae long bodi blong yu, blong mekem se yu yu gat wan gudlaef.

4.1.1

Ol Jeneral Gaedlaen long saed blong Gud Fasin blong Kaekae

Plis folem ol jeneral gaedlaen long saed blong wan gud fasin blong kakae we oli stap andanit ia:

Dring 6 kasem 12 glas (48 kasem 96 ons, o 1.5 kasem 3 lita) blong klin wota evri dei. Maet bae yu nidim moa wota mo sol sapos yu yu stap swet bigwan truaot long dei, o long taem blong wan eksasaes.
Kakae ol kaekae we oli gat balens, mo hemia i tekem ol vejetebol, ol frut, ol sid, ol helti fat, mo protin.
Daonem ol kaekae olbaot, ol dring we oli gat gas, ol kaekae we oli rere finis mo putum long aes bokis, mo ol kaekae long ol restrong we oli rere long kaekae hariap.

4.1.2

Sef Fasin blong Rere long Kaekae

Folem gud olgeta gaedlaen ia blong meksua se kaekae blong yu i sef:

Wasem gud ples we bae yu rere long kaekae; yusum wota we i klin, i hot, mo i gat sop long hem, hemia bifo mo afta long kuk.
Yusum ol tul blong kuk mo kakae wetem wota we i klin, i hot mo gat sop long hem, hemia afta evri taem we oli yusum.
Putum gud ol mit we oli no tan, ol jikin, ol eg, mo ol kaekae blong solwota oli seperet long ol nara kaekae long taem we yu stap kuk.
Kukum mit, fis mo jikin i tan gud.
Traem blong no kakae ol mit we oli no tan gud, mo tu, ol mit we oli no tan.
Tekemaot skin blong ol frut mo vejetebol, o wasem gud olgeta.
Putum ol haf kaekae mo ol kaekae we bae oli no go nogud insaed long aesbokis. Blong yu no sik, sakem eni samting we i stap longtaem tumas, o deit we i stap long paket i pas finis.
Traem blong no kakae ol kaekae we ol pipol oli stap salem folem rod, from se kwaliti blong kaekae mo fasin blong rere long ol kaekae ia, i no sef tumas.

Stap yusum ol gaedlaen ia oltaem, iven sapos ol narawan (we i tekem ol nara misinari tu) oli pusum yu blong yu go long ol situesen we oli no sef.

Wajem vidio ia blong gat moa infomesen abaot stret fasin blong kaekae mo kaekae we i sef.

17:51

4.1.3

Sefti long saed blong Wota mo Kaekae we Oli Tanem I Kam Narafala Kaekae

Wota nomo we i klin mo ol kaekae we oli tanem i kam narafala long wan stret fasin, i sef blong yu yu dring o kakae.

Folem olgeta gaedlaen ia, mo sam moa gaedlaen we misin blong yu i givim long yu:

Yusum wan wota filta sapos yu yu stap long wan eria we oli no stap klinim gud wota.
Yusum klin wota blong brasem tut, mo blong wasem mo rere long kaekae.
Kakae nomo ol kaekae we oli tanem i kam narafala kaekae long wan stret wei.

Yu mas save se, long sam ples, ol aes mo ol jus long ol restrong o ol maket, maet oli mekem wetem wan wota we oli no klinim. Yu mas lukaotgud, mo yu no dring aes o jus sapos yu ting se i no sef.

4.2

Eksasaes

Eksasaes i kipim yu yu helti mo i help blong mekem se tingting i no fasfas tumas. Mekem hemia i kam pat blong evri dei fasin blong yu (luk long 2.4.2). Kontaktem misin ofis sapos yu gat eni kwestin. Folem eni spesifik misin gaedlaen, mo tu, folem olgeta jeneral gaedlaen ia:

Mekem ol defren kaen eksasaes long taem blong wik, olsem spot we i mekem hat i wok, we i mekem masel i kam strong mo hemia we i pulum ol masel. Blong sefti blong yu, traem blong no leftemap ol hevi samting.
Sapos yu gat wan mobaelfon, yu save yusum wan ap we misin lida blong yu i apruvum blong yu mekem plan blong ol eksasaes blong yu.
Yu no mas eksasaes long pablik o long ol gim we oli pem fi from.

4.3

Lukaotem Gud Yu Taem Tingting i Fasfas

Misinari wok, hem i wan hevi wok. Mo sapos yu filim se tingting i fasfas samtaem, hemia i nomol. Yu save mekem bodi mo maen blong yu i rere blong save gotru long taem we tingting i fasfas; yu mekem hemia taem yu tekem sapot we i kam long famli (luk long 3.9.1) mo taem yu stap praktis blong gat ol helti fasin blong kakae (luk long 4.1.1), mekem eksasaes oltaem, (luk long 4.2), taem yu slip gud oltaem, mo yu gat taem blong spel, mo taem we yu gat taem long saed blong spirit (we i tekem taem blong prea, stap tingting hevi, mo stap stadi).

Truaot long misin blong yu, yusum Stretem Yuwan long Misinari Laef blong save helpem yu blong lukaot blong no gat tingting i fasfas tumas, mo blong helpem ol nara misinari. Sapos yu yu filim se yu o kompanion blong yu i gat hadtaem blong lukaotem fasin blong tingting i fasfas long sam wei we i helti, o sapos i gat wan imejensi, kontaktem ol misin lida blong yu.

Sapos dokta i givim meresin blong yu tekem blong tingting blong yu i no fasfas tumas, folem tritmen ia mo ol toktok blong dokta blong yu.

Aposol Pol i bin tingtingbak long ol hadwok blong hem long saed blong wok blong misinari, mo i bin tijim se Lod bambae i sastenem, i sapotem mo bambae i helpem olgeta we oli stap lukaotem Hem. Lod bambae i neva lego yu samtaem. Pol i bin tijim:

“’Laet i mas saenaot long tudak ya i kam,’ hemia sem God ya nomo we i mekem laet blong hem i saenaot finis, i kam kasem tingting blong mifala. Laet ya blong hem i mekem mifala i waes blong save bigfala paoa ya blong God, we mifala i luk long fes blong Kraes. … Mifala i gat trabol, be neva tingting blong mifala i foldaon. Mifala i no save rod, be neva mifala i lus olgeta; ol man oli stap ronem mifala, be oltaem mifala i gat ol fren we oli stap givhan long mifala. Ol man oli stap kilim mifala, be neva mifala i ded olgeta. … Mi mi tok from we mi bilif. Mo from we mifala tu i gat sem Spirit we i mekem we mifala i bilif, mifala tu i tok, from we mifala i bilif. … Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya blong God long heven, we i no save finis samtaem” (2 Korin 4:6, 8–9, 13, 17).

Blong gat moa infomesen, luk long seksen 7.6, “Ol Had Situesen.”

4.4

Medikol Kea

Yu no mas tingting nating long helt blong bodi mo helt blong filing blong yu. Yu mas tekem i series. Talem long misin medikol kodineta sapos yu gat eni medikol problem (olsem ol meresin we yu mas tekem, ol samting we yu nogud long ol, o ol aktiviti we yu no sapos blong mekem) blong mekem se yu kasem sapot ia we yu nidim. Kontaktem misin ofis sapos yu gat eni kwestin abaot sam wari long saed blong helt.

Blong sefti blong yu:

No serem eni meresin we dokta i givim long yu blong tekem wetem eni narawan; o no yusum meresin we dokta i givim long wan narawan.
No mekem se famli o fren oli sendem meresin long yu sapos ol meresin ia oli blokem long kantri o eria we yu yu stap givim seves long hem.

Sapos yu gat wan helt imejensi, tekem ol aksen wetem gud tingting blong mekem se yu yu sef o yu kea long yuwan. Ringim ol lokol imejensi seves (olsem 911 long Yunaeted Stet); be sapos oli givim ol nara instraksen long yu long misin blong yu, yu folem olgeta instraksen ia. Ringim kwik ol misin lida blong yu.

Sapos yu nidim sam medikol kea we i no hariap, ringim misin medikol kodineta kwiktaem. Eni visit we i no ol imejensi visit, bae medikol kodineta i mas givim raet from fastaem. Medikol kodineta i save lidim yu i go long wan medikol dokta insaed long eria blong yu.

Blong gat moa infomesen, luk long seksen 7.7, “Ol Trabol long saed blong Helt blong Bodi mo Tingting.”

4.5

Ol Denja Situesen mo Ol Toktok Agensem Laef blong Yu

Plante denja we i stap, bae yu save stap longwe long olgeta sapos yu yusum gud tingting blong yu, mo sapos yu stap folem ol standet blong misin, we i tekem tu blong stap long ples we yu save luk mo harem kompanion blong yu. Be, ol pipol oli stil save mekem nogud long yu iven taem yu stap traem blong stap sef. Sapos i gat wan problem, kwiktaem, ripotem problem ia long evri misin lida blong yu.

Aot kwiktaem, sapos yu o kompanion blong yu i no filim gud abaot wan ples, wan man o woman, o wan situesen (we i tekem tu wan tijing situesen). Lisin long kwaet toktok blong Spirit. Yu save aot long kompanion blong yu sapos yu tingting se hem i wan denja long yu. Sapos yu aot long kompanion blong yu, ringim evri misin lida blong yu kwiktaem.

Blong gat moa infomesen, luk long seksen 7.8, “Ol Denja Situesen.”

4.6

Haos

Soem respek long haos we yu gat, ona blong propeti, o man o woman we i lukaot long yu, mo ol neba blong yu. Sapos yu brekem wan samting, yu nao yu responsibol blong yu pem ol ripea wok, mo bae yu pem wetem mane blong yuwan. Toktok wetem haos kodineta blong yu sapos yu gat eni wari abaot haos blong yu.

Blong gat moa infomesen, luk long seksen 7.9, “Haos Sefti.”

4.7

Transpot

Oltaem yu mas folem ol rul, ol loa, mo ol kastom blong lokol trafik taem we yu stap travel. Yusum gudfala tingting blong yu, save gud wanem i stap raon long yu, mo kam blong save gud eria we yu stap long hem, mo folem ol jeneral sefti standet we oli stap insaed long hanbuk ia.

Blong gat moa infomesen, luk long seksen 7.10, “Transpot Sefti.”

4.8

Mane

Ol sapot mane blong ol misinari i ripresentem sakrifaes blong wanwan memba blong Jos. Oli ol tabu mane, mo yu sapos blong yusum olgeta wetem fasin blong stap responsibol, stap ones mo stap tru long yuwan.

4.8.1

Sapot Mane blong Ol Misinari

Yusum sapot mane blong ol misinari blong pem ol samting blong yuwan blong sapotem yu long misinari wok. I gat sam taem we bae i no olsem, be sapos no, yu sapos blong yusum evri misin mane blong yu long wanwan manis. Yu no sevem mane aot long ol mane ia, o yu no givim mane long eni narawan, mo i tekem tu, eniwan long hom. No givim lon o yu no boro mane.

Bajet blong yu blong yusum sapot mane blong ol misinari i save tekem ol poen ia:

Fast ofring we yu pem long wod o branj we yu stap wok insaed long hem.
Kaekae blong rere long sam kaekae we i givim paoa long bodi (luk long 4.1.1).
Transpot, mo i tekem fiul o pablik transpot.
Kea long hea mo ol samting blong kipim bodi blong yu i klin.
Ol saplae blong klinim ples mo wasem klos.
Postem leta, o pem intanet blong toktok evri wik i gobak hom (luk long 3.8).
Sam taem long restrong o tekawe.

Yu no nid blong pem taeting long sapot mane blong ol misinari.

Luk long 4.8.2 blong gat wan lis blong ol samting we oli sapos blong pem wetem mane we i blong yuwan.

4.8.2

Basket Mane blong Wanwan

Ol mane blong yuwan, oli mane we olgeta long hom oli sendem i kam stret long yu. Yusum mane blong yuwan blong ol samting olsem:

Pem klos mo sus.
Pem baeskel, pem samting blong lukaotem baeskel mo ol ripea wok.
Ol medikol bil we misin i no pem, olsem ol peimen we i kam long wan, ol nomol visit blong ae mo tut, mo kea blong sam sik we i stap bifo wan i go long misin.
Ol faen blong trafik mo paking.
Ol ripea long haos sapos yu nao yu brekem samting.
Ol odio o vidio tul.
Ol Suvenir mo ol presen.

Taeting long ol mane blong yuwan we yu kasem, mo eni mane we yu kasem long wan bisnis o invesmen long hom we yu sapos blong pem wetem mane blong yuwan tru long homwod o tru long onlaen donesen.

4.8.3

Indipenden Laef mo Plan blong Spendem Mane

Yu mas save kam blong dipen long yuwan long taem blong misin blong yu taem yu mekem mo stap folem wan plan blong spendem mane. Skil ia bae i help mo bae i blesem yu truaot long laef blong yu. Yu no askem ol kompanion o famli blong kasem moa mane, be nomo sapos i wan imejensi.

Blong stap mekem mo folem wan plan blong spendem mane, i tekem blong mekem wan lis blong evri samting we yu mas pem long manis, mo afta, jusum wanem samting i moa impoten mo pem olgeta faswan. Oltaem yu mas jusum wanem we yu nidim bifo yu jusum ol samting we yu nomo yu wantem.

Sapos yu nidim moa mane o sapos yu gat eni kwestin abaot fasin spendem mane, toktok long faenens sekretari, o toktok long ol misin lida blong yu.

4.9

Fasin blong Dresap mo Fasin blong Mekem Yu

Olsem wan ripresentativ we i nogat raet, blong Jisas Kraes mo Jos blong Hem We I Kambak, wei we yu dresap, plante taem i givim fas mesej long ol narawan. Dresap blong yu i mas semmak long tabu mesej we oli singaotem yu blong go serem. Truaot long misin blong yu, mekemsua se fasin blong mekem yu mo fasin blong yu, i helpem ol narawan blong lukluk moa long mesej ia.

4.9.1

Ol Jeneral Standet blong Ol Dresap mo Mekem Yu

Samfala samting mo stael blong klos, bae oli talem se i gud blong werem blong i go stret wetem kalja mo weta blong misin blong yu. Long taem blong priperesen dei, yu sapos blong werem ol nomol misinari klos long pablik. Be, sapos i nid long wan spesifik aktiviti, yu save wetem sam klos i go wetem. Plis, luklukbak long ol standet we yu save faenem long ChurchofJesusChrist.org/callings/missionary/dress-and-appearance Websaet ia i givim ol eksampol blong ol stret, mo profesonol wei blong dresap long misin blong yu. Ol misin lida blong yu mo Eria Presidensi i save jenisim ol gaedlaen ia blong i go wetem ol lokol situesen we i stap.

Luk long 7.7.4 blong kasem moa instraksen abaot olsem wanem blong protektem skin blong yu long ol animol mo bebet we i save kakae yu.

4.9.2

Ol Jeneral Standet blong Mekem Yu

Folem ol helti standet blong mekem yu:

Swim evri dei, sapos i posibol.
Brasem tut blong yu oltaem.
Yusum senta spre evri dei.
Wasem hea blong yu oltaem.
Wasem han oltaem, mo tu, bifo yu rere long kaekae, mo afta we yu yusum toelet.
Putum sanskrin long skin blong yu.
Jusum wan heastael we i klin, i luk profesonol mo i isi blong lukaotem.