៦
ការបញ្ចប់បេសកកម្មរបស់អ្នក
៦.០
សេចក្ដីផ្ដើម
សូមរៀបចំខ្លួនអ្នកផ្ទាល់ឥឡូវនេះ ដើម្បីបន្តជីវិតរបស់អ្នកជាសិស្សម្នាក់របស់ព្រះយេស៊ូវគ្រីស្ទ និងជាសមាជិកដ៏ស្មោះត្រង់ម្នាក់របស់សាសនាចក្រព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពេលអ្នកត្រឡប់ទៅផ្ទះវិញ និងកាលដែលអ្នកបំពេញបេសកកម្មក្នុងជីវិតអ្នក ។
៦.១
បន្តទាក់ទង
សូមបន្តទាក់ទងទៅមនុស្សដែលអ្នកបានបង្រៀន និងបានធ្វើការជាមួយនៅក្នុងបេសកកម្មរបស់អ្នក រួមទាំងថ្នាក់ដឹកនាំបេសកកម្មរបស់អ្នកផងដែរ ។ គាំទ្រ និងពង្រឹងពួកគេ តាមរយៈពាក្យសម្ដី និងគំរូរបស់អ្នក ហើយអបអរព្រឹត្តិការណ៍សំខាន់ៗនៅក្នុងជីវិតរបស់ពួកគេ ។
៦.២
ការត្រឡប់ពីបេសកកម្មទៅផ្ទះរបស់អ្នកវិញ
ដោយសារអ្នកនៅតែជាអ្នកផ្សព្វផ្សាយសាសនាម្នាក់ រហូតទាល់តែអ្នកត្រូវបានដោះលែង ដោយប្រធានស្តេករបស់អ្នក នោះអ្នកត្រូវបានរំពឹងឲ្យធ្វើតាមបទដ្ឋានអ្នកផ្សព្វផ្សាយសាសនាទាំងអស់រហូតដល់ពេលនោះ ។ សូមពិចារណាក្នុងការត្រឡប់ទៅផ្ទះវិញតែម្ដង ។ ជាពិសេស ការណ៍នេះសំខាន់ ប្រសិនបើអ្នកកំពុងបម្រើនៅក្នុងប្រទេសមួយក្រៅពីប្រទេសរបស់អ្នក ជាកន្លែងដែលតម្រូវឲ្យមានទិដ្ឋាការ ។ ការពន្យាពេលការវិលត្រឡប់ទៅផ្ទះរបស់អ្នកវិញ ធ្វើឲ្យវាពិបាកសម្រាប់ពួកអ្នកផ្សព្វផ្សាយសាសនាពេលខាងមុខ ដើម្បីទទួលបានទិដ្ឋាការ ។ ប្រសិនបើអ្នកជួបគ្រួសារ ដើម្បីធ្វើដំណើរទៅផ្ទះវិញ សូមស្វែងរកការប្រឹក្សា និងការដឹកនាំពីប្រធានបេសកកម្មរបស់អ្នកជាមុន ។
អ្នកមិនអាចបញ្ចប់ការបម្រើជាអ្នកផ្សព្វផ្សាយសាសនារបស់អ្នក នៅក្នុងបេសកកម្មមួយផ្សេងទៀត ឬស្នើប្ដូរទៅបេសកកម្មមួយទៀត បន្ទាប់ពីថ្ងៃដោះលែងរបស់អ្នក ដើម្បីធ្វើជាដៃគូរបស់សាច់ញាតិម្នាក់ឡើយ ។
ពេលអ្នកត្រឡប់ទៅផ្ទះវិញ សូមរៀបចំជាមួយប្រធានស្តេករបស់អ្នក ដើម្បីដោះលែងឲ្យបានឆាប់បំផុតតាមដែលអាចធ្វើទៅបាន ។
ឆាប់បំផុតតាមដែលអាចធ្វើទៅបានបន្ទាប់ពីត្រឡប់មកផ្ទះវិញ ចូរពិនិត្យរកជំងឺរបេង ទោះបីជាអ្នកត្រូវបានពិនិត្យពីមុនបេសកកម្មរបស់អ្នក ហើយពុំមានរោគសញ្ញាក្ដី ។
៦.៣
ការបម្រើ និងការរីកចម្រើនបន្ទាប់ពីបេសកកម្មរបស់អ្នក
ពេលអ្នកត្រឡប់ទៅផ្ទះវិញ សូមបន្តរស់នៅតាមបទដ្ឋានដំណឹងល្អ ។ សូមប្រាកដថាបាន ៖
-
អធិស្ឋាន និងសិក្សាដំណឹងល្អជារៀងរាល់ថ្ងៃ ។
-
ចូលរួមនៅក្នុងវួដនៅផ្ទះរបស់អ្នក ឬនៅវួដយុវមជ្ឈិមវ័យនៅលីវ ។
-
ស្វែងរកឱកាសដើម្បីបម្រើនៅក្នុងព្រះវិហារបរិសុទ្ធ ប្រសិនបើមាននៅជិត ។
-
ចូលរួមថ្នាក់វិទ្យាស្ថាន ឬការអប់រំខាងសាសនា ។
-
ស្វែងរកការអប់រំ និងឱកាសការងារ តាមរយៈសាសនាចក្រ និងប្រភពដទៃទៀត ។
រស់នៅដើម្បីអ្នកនឹងបានដកពិសោធន៍នូវអំណរដែលត្រូវបានពិពណ៌នានៅក្នុងព្រះគម្ពីរមរមន ពេលដែលអាលម៉ាជាកូនបានជួបនឹងពួកបងប្អូនអ្នកផ្សព្វផ្សាយសាសនារួមគ្នា នៅពេលក្រោយមកក្នុងជីវិត ៖
« ហើយឥឡូវនេះ ហេតុការណ៍បានកើតឡើងថា កាលអាលម៉ាកំពុងតែធ្វើដំណើរពីដែនដីគេឌាន ទៅឯទិសខាងត្បូង គឺឆ្ពោះទៅរកដែនដីម៉ាន់តៃ មើលចុះ លោកមានសេចក្ដីអស្ចារ្យជាខ្លាំងដោយបានជួបនឹងពួកបុត្រានៃម៉ូសាយ ដែលកំពុងតែធ្វើដំណើរទៅដែនដីសារ៉ាហិមឡា ។
« … ហេតុដូច្នេះហើយ អាលម៉ាបានអររីករាយជាខ្លាំង នៅពេលបានជួបបងប្អូនរបស់លោកទៀត រីឯសេចក្ដីអំណររបស់លោកកាន់តែកើនឡើងថែមទៀត ព្រោះពួកគេនៅជាបងប្អូនរបស់លោកក្នុងព្រះអម្ចាស់នៅឡើយ មែនហើយ ពួកគេបានមាំមួននៅក្នុងការស្គាល់ពីសេចក្ដីពិត ព្រោះពួកគេជាមនុស្សដែលមានយោបល់ដ៏ជ្រាលជ្រៅ ហើយគេបានព្យាយាមពិចារណាមើលបទគម្ពីរ ដើម្បីឲ្យគេអាចស្គាល់ព្រះបន្ទូលនៃព្រះ ។
« ប៉ុន្តែនេះពុំទាន់អស់នៅឡើយទេ ពួកគេបានប្រគល់ខ្លួនទៅក្នុងការអធិស្ឋាន និងការតមអាហារជាច្រើន ហេតុដូច្នេះហើយ ពួកគេប្រកបដោយវិញ្ញាណនៃការព្យាករណ៍ និងវិញ្ញាណនៃវិវរណៈ ហើយកាលណាគេបង្រៀន គឺគេបង្រៀនដោយអានុភាព និងសិទ្ធិអំណាចពីព្រះ » ( អាលម៉ា ១៧:១–៣ អក្សរទ្រេតត្រូវបានបន្ថែម ) ។