សារមកពីគណៈប្រធានទីមួយ និងកូរ៉ុមនៃពួកសាវកដប់ពីរនាក់
ជូនចំពោះអ្នកផ្សព្វផ្សាយសាសនាជាទីស្រឡាញ់ ៖
បន្ទាប់ពីការមានព្រះជន្មរស់ឡើងវិញរបស់ទ្រង់ ព្រះយេស៊ូវគ្រីស្ទបានយាងមកជួបពួកសិស្សរបស់ទ្រង់ ហើយបានបញ្ជាពួកគេ « ឲ្យមានសិស្ស » (សូមមើលចំណត់ចំណាំក ចំពោះម៉ាថាយ ២៨:១៩ ) « នៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ ហើយបង្រៀនឲ្យគេកាន់តាមគ្រប់ទាំងសេចក្តី ដែលខ្ញុំបានបង្គាប់មកអ្នករាល់គ្នាផង » ( ម៉ាថាយ ២៨:១៩–២០ ) ។
អ្នកត្រូវបានហៅដោយវិវរណៈ តាមរយៈពួកអ្នកបម្រើដ៏ជម្រើសរបស់ព្រះ ដើម្បីជួយដល់ពួកសាវកនៅក្នុងកិច្ចការដ៏អស្ចារ្យនេះ ក្នុងការនាំយកដំណឹងល្អនៃព្រះយេស៊ូវគ្រីស្ទទៅកាន់ពិភពលោកដើម្បី « ឲ្យមានសិស្សនៅគ្រប់ទាំងសាសន៍ » ។
នៅពេលអ្នកបន្តបម្រើដោយអស់ពីចិត្ត នោះអ្នកជួយបំពេញនៃបទបញ្ញត្តិធំពីរ« ត្រូវឲ្យស្រឡាញ់ព្រះអម្ចាស់ជាព្រះនៃឯង … [ និង ]ត្រូវឲ្យស្រឡាញ់អ្នកជិតខាងដូចខ្លួនឯង » ( គោលលទ្ធិ និង សេចក្ដីសញ្ញា ៥៩:៥–៦ ) ។
ដើម្បីធ្វើជាអ្នកផ្សព្វផ្សាយសាសនាម្នាក់ដ៏មានប្រសិទ្ធភាព អ្នកត្រូវតែជាសិស្សដ៏ស្មោះត្រង់របស់ព្រះយេស៊ូវគ្រីស្ទ ។ យើងសូមអញ្ជើញអ្នកឲ្យពង្រីកទេពកោសល្យ និងជំនាញរបស់អ្នកសម្រាប់សិរីល្អនៃព្រះ ។ ព្រះយេស៊ូវគ្រីស្ទនឹងតម្កើងអ្នកឡើង ។ ព្រះវរបិតាសួគ៌ស្រឡាញ់អ្នក ហើយទ្រង់នឹងជួយអ្នកឲ្យស្រឡាញ់ និងផ្ដល់ពរជ័យដល់បុត្រាបុត្រីទ្រង់ នៅកន្លែងណាដែលអ្នកបម្រើ ។ ទ្រង់នឹងផ្ដល់អំណាចដល់អ្នក និងមនុស្សដែលអ្នកបម្រើ តាមរយៈដង្វាយធួនរបស់ព្រះយេស៊ូវគ្រីស្ទ ដើម្បីឲ្យ « បានប្រែចិត្តជឿដល់ព្រះអម្ចាស់ » យ៉ាងពិតប្រាកដ ( អាលម៉ា ២៣:៦ ) ។
បទដ្ឋានអ្នកផ្សព្វផ្សាយសាសនាទាំងនេះ ត្រូវបានអនុម័តដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ ។ វានឹងជួយអ្នកខាងរាងកាយ ខាងវិញ្ញាណ និងខាងសតិអារម្មណ៍ ហើយជួយអ្នកឲ្យក្លាយជាសិស្ស ដែលព្រះយេស៊ូវគ្រីស្ទត្រូវការឲ្យអ្នកប្រែក្លាយ ។
ប្រសិនបើអ្នកមានសំណួរអំពីបទដ្ឋានមួយ សូមអធិស្ឋានទូលសួរព្រះអម្ចាស់ ជួយអ្នកឲ្យយល់ពីសារសំខាន់របស់វា បន្ទាប់មកប្រសិនបើចាំបាច់ សូមសុំជំនួយពីដៃគូរបស់អ្នក ថ្នាក់ដឹកនាំអ្នកផ្សព្វផ្សាយសាសនាវ័យក្មេងរបស់អ្នក ឬថ្នាក់ដឹកនាំបេសកកម្មរបស់អ្នកក៏បាន ។ សូមសិក្សាបទដ្ឋានទាំងនេះជាទៀងទាត់ជាមួយដៃគូរបស់អ្នក ហើយខិតខំគោរពតាមវា ។
ពួកយើងសូមអបអរសាទរដល់អ្នក សម្រាប់ការទទួលយកការហៅដើម្បីបម្រើជាអ្នកផ្សព្វផ្សាយសាសនាពេញម៉ោង ហើយយើងអធិស្ឋានថា អ្នកនឹងរកឃើញភាពសុខសាន្ត និងអំណរដ៏ពិត នៅក្នុងការបម្រើព្រះអម្ចាស់ ព្រះយេស៊ូវគ្រីស្ទ ។
គណៈប្រធានទីមួយ និងកូរ៉ុមនៃពួកសាវកដប់ពីរនាក់
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ