2 Kolinitō 11–12

Ko Hono Kātekina e Ngaahi Faingataʻá ʻaki e Tui Kia Kalaisí

Ko ha finemui ʻoku tangutu ki lalo. ʻOku hili ʻe ha fefine hono nimá (mahalo ko ʻene faʻeé) ʻi he uma ʻo e taʻahiné. ʻOku fotu lotomamahi ʻa e taʻahiné.

Naʻa mo e kau ākonga tui faivelenga taha ʻa Sīsū Kalaisí ʻoku nau kātekina ʻa e faingataʻá ʻi heʻenau moʻuí. Naʻe vahevahe ʻe Paula ha niʻihi ʻo e ngaahi faingataʻa naʻá ne kātekiná mo e founga naʻá ne lava ai ʻo maʻu ha fiefia ʻi he ngaahi aʻusia ko iá ʻo fakafou ʻi he tokoni ʻa e Fakamoʻuí. ʻE lava ke tokoniʻi koe ʻe he lēsoni ko ʻení ke ke falala ki he ʻEikí ʻi hoʻo feinga ke kātekina faivelenga ho ngaahi faingataʻaʻiá.

Ngaahi ʻahiʻahi ʻo e moʻuí

Talatala ʻo e lose he faʻahitaʻu failaú.

ʻOkú ke pehē ko e hā e taumuʻa ʻo e talatalá ʻi ha vao ʻakau lose?

ʻOku lahi ha ngaahi meʻa fakaʻofoʻofa ʻoku tau aʻusia ʻi he moʻuí ʻe lava ke fakafehoanaki mo ha matalaʻilose. Ka neongo ia, ʻoku tau fehangahangai foki mo ha ngaahi ʻahiʻahi mo ha ngaahi faingataʻa ʻe lava ke fakafehoanaki mo e ngaahi talatalá.

Ko e hā ha ngaahi ʻahiʻahi mo ha ngaahi faingataʻa ʻe ala fehangahangai mo e kakaí ʻi he moʻuí?

Ko e hā ha ngaahi fakakaukau mo ha ngaahi fehuʻi ʻe ala ʻeke ʻe he kakaí fekauʻaki mo e ʻOtuá ʻi heʻenau aʻusia e ngaahi ʻahiʻahí? Ko e hā nai ha meʻa te nau fifili ki ai fekauʻaki mo kinautolu?

ʻI hoʻo ako he ʻaho ní, kumi ha ngaahi moʻoni ʻe lava ʻo tokoni atu ke ke kātekina faivelenga e ngaahi ʻahiʻahi ʻoku fili ʻe he ʻOtuá, ʻi Heʻene ʻofá mo e potó, ke ʻoua ʻe toʻó. Fakalaulauloto ki he ʻuhinga ʻokú ke fiemaʻu ai e tokoni ʻa e ʻOtuá ʻi hoʻo kātekina kinautolú.

Ngaahi ʻahiʻahi ʻo Paulá

Lau ʻa e 2 Kolinitō 11:24–28, ʻo kumi ha niʻihi ʻo e ngaahi faingataʻa naʻe kātekina ʻe Paula lolotonga ʻene ngāue fakafaifekaú.

Ko e hā ha ngaahi sīpinga kehe mei he folofolá pe mei he hisitōlia ʻo e Siasí te ke lava ʻo fakakaukau ki ai ʻokú ne fakahaaʻi mai ʻoku aʻu pē ki he kakai angatonú ʻoku nau fefaʻuhi mo ha ngaahi faingataʻa? ʻOku hoko fēfē ʻa e moʻui ʻa e Fakamoʻuí ko ha fakamoʻoni ki he meʻá ni?
ʻOkú ke pehē ko e hā ʻoku fakaʻatā ai ʻe he Tamai Hēvaní e kau ākonga faivelenga ʻa Sīsū Kalaisí ke nau kātekina ha ngaahi meʻa lahí?

Neongo naʻe tāpuakiʻi ʻe he ʻOtuá ʻa Paula ʻaki ha ngaahi fakahā fakaʻofoʻofa, kau ai ha meʻa-hā-mai ʻo e puleʻanga fakasilesitialé (vakai, 2 Kolinitō 12:1–4), ka naʻe pau pē ke kei kātekina ʻe Paula ha ngaahi ʻahiʻahi mo ha ngaahi sivi ʻo ʻene tuí. Lau ʻa e 2 Kolinitō 12:7 ke ʻiloʻi ʻa e meʻa naʻe fakafehoanaki ki ai ʻe Paula ha taha ʻo ʻene ngaahi faingataʻaʻiá.

ʻE lava fēfē ke hoko ʻa e “tolounua ʻi he kakanó” ko ha fakamatala lelei ʻo ha ngaahi ʻahiʻahi fakataautaha?

Ko e hā ha fakafehoanaki te ke ala fakaʻaongaʻi ke fakamatalaʻi ʻaki ha ʻahiʻahi pau kuó ke kātekina pe ko kinautolu ʻokú ke ʻofa aí? Ko e hā hono ʻuhingá?

Lau ʻa e 2 Kolinitō 12:8–10 ke vakai ki he aʻusia ʻa Paula ʻi heʻene lotu ke toʻo meiate ia ʻa e “tolounua ʻi he kakanó.” ʻI hoʻo laú, manatuʻi ʻoku ʻuhinga ʻa e foʻi lea ʻaloʻofá ki ha “tokoni pe ivi fakalangi … [ʻoku foaki mai] ʻi he ʻaloʻofa mo e ʻofa ʻa e ʻOtuá” (Fakahinohino ki he Ngaahi Folofolá, “ ʻAloʻofá,” scriptures.ChurchofJesusChrist.org; vakai foki, ʻEta 12:27).

Ko e moʻoni ʻe taha te tau lava ʻo ako mei he aʻusia ʻa Paulá, mahalo he ʻikai ke toʻo maʻu pē ʻe he ʻEikí hotau ngaahi faingataʻaʻiá, ka ʻe lava ke fakamālohia kitautolu ʻe Heʻene ʻaloʻofá ʻi heʻetau kātekina faivelenga kinautolú.

ʻOku fakamoʻoniʻi fēfē ʻa e moʻoni ko ʻení ʻi he moʻui ʻa e Fakamoʻuí? (vakai, Luke 22:41–44).

Kumi pea lau ha fakamatala fakafolofola ʻe taha pe lahi ange ʻokú ne fakahaaʻi e founga ʻe lava ke faitāpuekina ai ʻe he ʻEikí ʻa kinautolu ʻoku nau kātekina e ngaahi faingataʻá ʻi he tui kiate Iá. (Ko ha ngaahi fokotuʻu ʻeni ʻo ha talanoa te ke ala fili.)

Tokāteline mo e Ngaahi Fuakava 121:1–8; 122:7–9. (Naʻe lotu ‘a Siosefa Sāmita ʻi heʻene faingataʻaʻia ʻi he Fale Fakapōpula Lipetií.)
Mōsaia 24:8–15. (Naʻe nofo pōpula ʻa e kakai ʻo ʻAlamaá ki he kau Leimaná pea naʻe puleʻi kinautolu ʻe he taulaʻeiki faiangahala ko ʻAmuloné.)

Tohi ʻi ha laʻipepa ʻaki ha peni pe penivahevahe.

Sio ʻi he vitiō “Ngaahi Faingataʻa ke Ikunaʻí” (5:05), ʻoku maʻu ʻi he ChurchofJesusChrist.org, ʻo kumi ʻa e meʻa te tau lava ʻo fai ke kātekina faivelenga ai ʻa e ngaahi ʻahiʻahí.

Ngaahi Faingataʻa ke Ikunaʻí
ʻE tokoni hono maʻu e tui ki he ʻEiki ko Sīsū Kalaisí ke tau maʻu e mālohi ke kātakiʻi mo ikunaʻi e ngaahi faingataʻa lalahi ʻi he moʻuí.

Ko e hā naʻá ke ako fekauʻaki mo hono kātekina ʻa e ngaahi ʻahiʻahí ʻi he tui kia Sīsū Kalaisí?

Fili Pē: Fie Ako Lahi Ange?

Naʻe hoko fēfē e Fakamoʻuí ko ha sīpinga ʻo e ngaahi moʻoni naʻe akoʻi ʻi he lēsoni ko ʻení?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo kau ki he Luke 22:41–44:

ʻOku tau mamata heni ki he tui mo e falala kakato ʻa e Fakamoʻuí ki he Tamaí. Naʻá Ne folofola, “Kae ʻoua naʻa fai hoku lotó, ka ko e fingangalo ʻoʻoú.” Naʻe fakaʻikaiʻi he tali ʻa e Tamaí ʻa e kole ʻa hono ʻAlo pē Taha Naʻe Fakatupú. Naʻe pau ke fakahoko ʻa e Fakaleleí ʻaki ha lami taʻe hano mele. Neongo naʻe ʻikai ke tali e kole ʻa e ʻAló, ka naʻe tali ʻEne lotú. ʻOku lekooti ʻi he ngaahi tohi folofolá: “Pea naʻe fakahā mai ʻa e ʻāngelo mei he langí kiate ia, ʻo ne fakamālohi ia” (JST, Luke 22:43).

(Dallin H. Oaks, “Faith in the Lord Jesus Christ,” Ensign, May 1994, 100)

Ko e hā ʻoku foaki mai ʻe he Fakamoʻuí lolotonga hotau ngaahi ʻahiʻahí?

Naʻe vahevahe ‘e Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku ʻatā e mālohi faifakamoʻui ʻo e ʻEiki ko Sīsū Kalaisí—ʻo tatau ai pē pe ʻokú ne toʻo atu ʻetau kavenga mafasiá pe fakamālohia kitautolu ke tau kātekina mo moʻui mo ia ʻo hangē ko e ʻAposetolo ko Paulá— ki he faingataʻaʻia kotoa pē ʻi he moʻui fakamatelié.

(Dallin H. Oaks, “He Heals the Heavy Laden,” Liahona, Nov. 2006, 8)

ʻE tokoniʻi fēfē kitautolu ʻe heʻetau ngaahi faingataʻaʻiá ke tāpuekina ʻa kinautolu ʻoku tau feohí?

Naʻe akonaki ‘a Sisitā Leina I. ʻApeto, Tokoni Ua ʻi he Kau Palesitenisī Lahi ʻo e Fineʻofá ‘o pehē:

ʻOku ʻikai tala ʻe homou ngaahi faingataʻaʻiá homou tuʻunga totonú, ka te nau lava ʻo fakaleleiʻi kimoutolu. Koeʻuhí ko ha “tolounua ʻi he kakanó,” ʻe lava ke mou maʻu ai ʻa e tuʻunga malava ke ongoʻi ha ʻofa lahi ange ki he niʻihi kehé.

(Reyna I. Aburto, “[Lolotonga e Ngaahi Faingataʻá, ʻEiki Ta Feʻao Pē]!,” Liahona, Nōvema 2019, 59)

ʻE lava nai ʻe kinautolu ʻoku nau maʻu ʻa e lakanga fakataulaʻeikí ʻo fakamoʻui ʻa kinautolu kotoa pē ʻoku nau maʻu ʻa e tui ke fakamoʻuí?

Naʻe fakamatala ʻa Palesiteni Tāleni H.ʻOakesi ʻo e Kau Palesitenisī ʻUluakí ʻo pehē:

He Heals the Heavy Laden
The healing power of the Lord Jesus Christ … is available for every affliction in mortality.

Neongo ʻe lava ʻe he Fakamoʻuí ʻo fakamoʻui ʻa kinautolu kotoa te Ne fakamoʻuí, ka ʻoku ʻikai ke tatau ʻeni kiate kinautolu ʻoku nau maʻu e mafai ʻo ʻEne lakanga fakataulaʻeikí. ʻOku fakangatangata pē ʻa hono fakaʻaongaʻi ʻi he matelié ʻa e mafai ko iá ki he finangalo ʻo Ia ʻoku ʻOʻona ʻa e lakanga fakataulaʻeikí. ‘I he taimi tatau pē, ko e meʻa ia ʻoku talamai ai ʻoku ʻi ai ha niʻihi ʻoku ʻikai fakamoʻui kinautolu hili hono tāpuakiʻi ʻe he kaumātuʻá he kuo “tuʻutuʻuni ke [nau] mate” [Tokāteline mo e Ngaahi Fuakava 42:48]. Ko e meʻa tatau pē ʻi he taimi ne fekumi ai ʻa e ʻAposetolo ko Paulá ke fakamoʻui ia mei he “tolounua ʻi he kakanó” ʻa ia naʻá ne ʻākilotoa iá (2 Kolinitō 12:7), naʻe ʻikai tali ʻe he ʻEikí ke fakamoʻui ia.

(Dallin H. Oaks, “He Heals the Heavy Laden,” Liahona, Nov. 2006, 7)