Seminelí
Fakamanatu 20 ʻo e Fakataukei Fakatokāteliné

Fakamanatu Hono 20 ʻo e Fakataukei Fakatokāteliné

Mahino pea Fakamatalaʻi

Talavou ʻoku lau folofola

Ko e taumuʻa ʻe taha ʻo e fakataukei fakatokāteliné ke tokoni ke mahino kiate koe ʻa e ngaahi akonaki ʻa e Fakamoʻuí ʻoku ʻi he ngaahi potufolofola fakataukei fakatokāteliné pea lava ke fakamatalaʻi kinautolu ʻi hoʻo lea pē ʻaʻau. ʻE ʻoatu ʻe he lēsoni ko ʻení ha faingamālie ke fakaloloto hoʻo mahinó mo akoako fakamatalaʻi e ngaahi moʻoni mei he ngaahi potufolofola fakataukei fakatokāteline kehekehe ʻo e Fuakava Foʻoú.

Ko e hā ʻoku ke ʻilo fekauʻaki mo Sīsū Kalaisí?

Fakamatalaʻi ʻa e meʻa ʻokú ke ʻilo fekauʻaki mo Sīsū Kalaisí ʻo fakaʻaongaʻi pē ʻa e konga ʻo ʻEne moʻuí ʻoku fakafofongaʻi ʻe he fakatātā ko ʻení:

Ko e tautau ʻa Kalaisi ʻi he kolosi ʻi Kalevalé. ʻOku ʻi he tafaʻaki toʻohema mo e toʻomataʻu ʻo Kalaisí ha ongo kaihaʻa ʻokú na tautau ʻi he kolosí. ʻOku haʻohaʻo takai ʻi he kolosí ha kau mamata tokolahi, kau ai ʻa Mele, faʻē ʻa Kalaisí, Mele Makitaline, kau tengihia kehe mo e kau sōtia Lomá. ʻOku fakafakataha ʻa e ngaahi ʻao maná ʻi he langí.

Vakai ki he ngaahi ʻīmisi ko ʻení pea tali ʻa e ngaahi fehuʻi ko ʻení:

Fakatātaaʻi ʻe ha tokotaha ʻeti. ʻOku fua ʻe Mele ʻa e pēpē ko Sīsuú mo sio kiate Ia.
Ko e tuʻu ʻa Sīsū Kalaisi ʻo hilifaki Hono ongo nimá ʻi he fofonga ʻo ha tangata kui ʻoku tūʻulutui ʻi hono ʻaó. Ko e haʻohaʻo takai ha kau tangata, kakai fefine mo ha fānau ʻia Kalaisi. ʻOku fakamoʻoniʻi ʻe he kakaí hono fakamoʻui ʻe Kalaisi ʻa e tangata kuí. ʻOku ʻi mui ha ngaahi ʻāleso maka.
Ko e ʻUluaki Mata Meʻa-Hā-Maí, tā fakatātaaʻi ʻe Del Parson (62470); GAK 403; Tohi lēsoni ʻa e Palaimelí 1-04; Tohi lēsoni ʻa e Palaimelí 2-38; Tohi lēsoni ʻa e Palaimelí 3-10; Tohi lēsoni ʻa e Palaimelí 5-06; Tohi lēsoni ʻa e Palaimelí 6-40; Tohi lēsoni ʻa e Palaimelí 7-40; Siosefa Sāmita—Hisitōlia 1:14–20

  • Ko e hā e ngaahi meʻa naʻe hoko ʻoku fakahaaʻi atu ʻi he ngaahi ʻīmisi takitaha ʻe tolu ko ʻení?

  • Ko e hā ʻoku tānaki atu ʻe he ngaahi meʻa takitaha ko ʻeni naʻe hokó ki hoʻo mahino kia Sīsū Kalaisi mo Hono misioná?

Ke ʻiloʻi moʻoni ko hai ʻa e Fakamoʻuí mo e ʻuhinga ʻokú Ne mahuʻinga ai kiate koé, ʻe tokoni ke ke ako ha ngaahi fakamatala lahi ʻo ʻEne moʻuí mo ha ngaahi tohi ʻa ha kau palōfita tokolahi ange.

ʻE tatau pē ia mo e lava ke tokoni atu hono ako mo fakafehoanaki e ngaahi moʻoni ʻoku maʻu ʻi ha ngaahi potufolofola fakataukei fakatokāteline lahi ke mahino kakato ange kiate koe ʻa e tokāteline ʻa e Fakamoʻuí ʻi haʻo fakafalala pē ki ha potufolofola pē ʻe taha.

Tohi ʻi ha laʻipepa ʻaki ha peni pe penivahevahe. 1. Ako ʻa e ngaahi potufolofola fakataukei fakatokāteline ko ʻení, pea tali ʻa e ngaahi fehuʻi ʻoku ʻoatu fakataha mo iá ʻi hoʻo tohinoa akó:

Lau pea fakakaukau ki he meʻa ʻoku akoʻi mai ʻe he Hepelū 12:9, Sēmisi 1:5–6, mo e Sēmisi 2:17–18 fekauʻaki mo ʻetau Tamai Hēvaní mo hotau vā fetuʻutaki mo Iá.

  • ʻOku tokoni fēfē hono ako fakataha e ngaahi potufolofola fakataukei fakatokāteline ʻe tolu ko ʻení ke mahino lelei ange ai kiate koe hotau vā fetuʻutaki mo e ʻOtuá?

Lau pea fakakaukau ki he meʻa ʻoku akoʻi mai ʻi he 1 Pita 4:6 mo e Fakahā 20:12 fekauʻaki mo e Fakamaau Fakaʻosí ʻi he palani ʻa e Tamai Hēvaní.

  • ʻOku tokoni fēfē hono ako fakataha e ongo potufolofola fakataukei fakatokāteline ko ʻení ke mahino lelei ange kiate koe ʻa e Fakamaau Fakaʻosí?

Fakakaukau ke fakafekauʻaki pe fakafehokotaki ha faʻahinga potufolofola pē te ke fiemaʻu ke toe ako fakataha ʻi he kahaʻú.

Ko hono fakafehokotaki e ngaahi potufolofola fakataukei fakatokāteliné

Tohi ʻi ha laʻipepa ʻaki ha peni pe penivahevahe. 2. Fakakakato ʻa e ‘ekitivitī ko ʻení:

  1. Fili ha taha ʻo e ngaahi potufolofola fakataukei fakatokāteline ʻo e Fuakava Foʻoú te ke fie ako lahi ange ki aí, pea hiki ʻa e veesi folofolá mo e kupuʻi lea tefitó ʻi hoʻo tohinoa akó.

  2. e. Kumi pea lau kakato ʻa e potufolofola fakataukei fakatokāteliné, pea lekooti ʻa e meʻa ʻoku mahino kiate koe fekauʻaki mo e tokāteline ʻokú ne akoʻí.

  3. Kumi ʻa e lisi kakato ʻo e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻingá ʻoku maʻu ʻi he fakaʻosinga ʻo e Fakamatala ki he ʻElito ʻo e Fakataukei Fakatokāteliné (2022).

  4. Kumi pea lau ha potufolofola fakataukei fakatokāteline ʻe ua pe lahi ange mei he ngaahi kalasi folofola kehe ʻoku fekauʻaki mo e potufolofola ʻi he Fuakava Foʻoú naʻá ke filí.

  5. Lekooti ʻi hoʻo tohinoa akó ʻa e founga ʻoku fakalahi ai ʻe he ngaahi potufolofola ko ʻení hoʻo mahino ki he potufolofola ʻi he Fuakava Foʻoú.