2 Korinito 13

“Ina Tofotofo Ia Outou ia te Outou, Po Ua Outou i le Faatuatua”

O taitai i le malo o le Atua e tele lava ina avea ma taulaiga o faitioga. I taimi o le Feagaiga Fou, o nisi o tagata o le Ekalesia i Korinito sa faitio ia Paulo. Sa ia tali atu e ala i le valaauliaina o i latou e suesue lo latou lava sootaga ia Keriso. O lenei lesona e mafai ona fesoasoani ia te oe e faatoilalo ai le faaosoosoga e faitioina isi, e aofia ai taitai o le Ekalesia, e ala i le suesueina o lou faamaoni i le Alii.

Fesili faamaoni po o le faitioina?

• O a nisi o faataitaiga o auala e ono faitio ai tagata i taitai o le Ekalesia i ona po nei?

• O le a le eseesega i le va o le i ai o ni fesili faamaoni po o ni atugaluga e uiga i se mea na aoao mai pe na fai mai ai se taitai o le Ekalesia ma le faitioina o lena tagata?

E masani lava, o le faitioina o se tasi o lona uiga o le faamasinoina lea o o latou leaga, faasinosino i o latou masei po o mea sese. I tusitusiga paia, o faitioga e ono mafai ona faasino i ai le upu leaga po o le muimui faasaga i se tasi.

E mafai ona iloa sese po o vaivaiga i isi e aunoa ma le faitio. Ua tatou faitio pe a tatou tautatala pe tusitusi e uiga i isi i se auala faamasinosino pe le lelei.

• Aisea e taua ai le faatoilaloina o le faaosoosoga o le faitioina o isi, e aofia ai taitai o le Ekalesia?

A o e suesueina le 2 Korinito 13, vaavaai pe mafai faapefea ona tatou aloese mai le faitio, aemaise lava i latou ua valaauina e le Alii e taitai i Lana Ekalesia.

Faitioga, upu leaga, ma le muimui

E foliga mai o nisi o le Au Paia i Korinito sa faitio faalauaitele ia Paulo (tagai i le 2 Korinito 10:10; 12:10–15). I le 2 Korinito 13:1–2, na valaau atu ai Paulo ia i latou i se gagana malosi ia salamo.

Faitau le 2 Korinito 13:3, ma vaavaai mo mea na saili e nisi tagata o le Ekalesia i Korinito ia ni faamaoniga mai ia Paulo. O le tauanau malosi e nei tagata ia vaai i faamaoniga e faapea sa tautala moni lava Paulo mo Keriso atonu o se faamaoniga faaopoopo lea sa faitioina faalauaitele ai o ia e tagata. Faitau le saunoaga lenei a Peresitene Henry B. Eyring o le Au Peresitene Sili, ma vaavaai pe mafai faapefea e le faitioina o o tatou taitai ona aafia ai i tatou.

Na tuuina mai e Peresitene George Q. Cannon se lapataiga lea ou te tuuina atu ia te outou e fai ma a’u lava [lapataiga]. Ou te talitonu na ia saunoa i le upumoni: “… E leai se tagata … e mafai ona upu leaga i e ua faauuina a le Alii ma saili masei i le pule a le Atua i luga o le fogaeleele e aunoa ma le faatupuina o Lona le fiafia. O le a alu ese le Agaga Paia mai sea tagata, ma o le a alu atu o ia i le pogisa . O sea tulaga, e te le o iloa ea le taua o le tatau ona tatou faaeteete?”

(Henry B. Eyring, “O Le Mana o le Faatuatua Lagolago,” Liahona, Me 2019, 59)

Faitau le 1 Nifae 2:12–13, 16, 19–21. Faatusatusa le muimui o Lamana ma Lemuelu e faasaga ia Liae ma le Alii i faatinoga faamaoni a Nifae.

1. Tali fesili nei i totonu o lau api talaaga mo suesuega:

• O le a se mea o aoao mai e lenei tala e uiga i le eseesega i le va o le faitio ma le faaaogaina o le faatuatua ma faatatau i o laua taunuuga?

• Aisea e te manatu ai e alu ese le Agaga pe a “upu leaga” tagata pe “saili masei” ia i latou ua valaauina e le Alii e taitai Lana Ekalesia?

• O a nisi o auala e mafai ona tatou faatino ai i le faatuatua pe afai e i ai ni a tatou fesili e uiga i mea na aoao mai e se taitai o le Ekalesia pe le ioe foi i se mea na aoao mai e se taitai o le Ekalesia?

Aloese mai faitioga

Faitau le 2 Korinito13:5–6, ma vaavaai mo le fautuaga na tuu atu e Paulo i le Au Paia i Korinito o e na fesiligia pe na fetalai mai le Alii e ala mai ia te ia. Atonu e fesoasoani le iloa o se teenaina o se tasi e le agavaa pe ua toilalo i se suega.

E faavae i mea na aoao mai e Paulo, faauma le faamatalaga lenei: Nai lo le faitio i taitai o le Ekalesia, e ao ona tatou …

Mai le 2 Korinito 13:5, atonu na e faailoa maia se mataupu faavae faapenei:

Nai lo le faitioina o taitai o le Ekalesia, e ao ona tatou iloiloina lo tatou faamaoni i le Alii.

Na taua e Peresitene Eyring le mea lenei e uiga i o tatou uiga faaalia ia i latou o e ua valaauina e le Alii e auauna atu. Vaai pe faapefea e ana upu ona faamalosia mea na aoao mai e Paulo i le 2 Korinito 13:3, 5:

E Taitai e le Alii Lana Ekalesia

Ua aoao mai e Peresitene Eyring i tatou e faapea o loo taitai e le Alii Lana Ekalesia e ala mai i perofeta ma e manaomia ona i ai lo tatou faatuatua e lagolago ai i latou ua valaauina e taitai i le Ekalesia.

E manaomia le faatuatua e talitonu ai na te [Iesu Keriso] silafia atoatoa ia tagata Na te valaauina, i o latou malosiaga ma o latou gafatia, ma o lea e le sese lava se mea na te faia i Ana valaauga.

E ono aumaia e lena mea se soisoi po o se lulu o le ulu i nisi o lenei aofia—o i latou ua manatu e sese lo latou valaauga e auauna atu faapea foi i latou o vaavaai faalemafaufau atu i nisi latou te iloa e foliga e le fetaui i o latou tofiga i le malo o le Atua. O la’u fautuaga i vaega uma ia o le, ia faatuatuai i na ituaiga o faamasinoga seia mafai ona e iloa atu le mea o loo silafia e le Alii. O le faamasinoga e tatau ona e faia, nai lo lena, o lea ua ia te oe le mana e maua ai faaaliga ma e galue ai e aunoa ma le fefe.

(Henry B. Eyring, “E Taitai e le Alii Lana Ekalesia,” Liahona, Nov. 2017, 82)

2. Tali fesili nei i totonu o lau api faamaumau mo suesuega:

• E mafai faapefea ona fesoasoani le fautuaga a Peresitene Eyring ia i tatou pe afai e faaosoosoina i tatou e faamasino pe faitioina taitai filifilia a le Alii?

• E faapefea e le iloiloina o lo tatou faamaoni ia Iesu Keriso ona fesoasoani ia i tatou e aua nei upu leaga pe faamasinoina isi?

Iloilo oe lava ia

Pe a faatalanoaina i tatou mo se pepa faataga o le malumalu, e fesiligia i tatou pe tatou te lagolagoina taitai o le Ekalesia. Sa fautuaina mai e Peresitene Eyring nisi o fesili e mafai ona fesoasoani ia i tatou e saunia ai e tali atu i lenei mea. Saili le musumusuga a le Agaga Paia a o e mafaufau loloto i nei fesili.

Atonu na fesiligia oe, pe o le a fesiligia, pe e te lagolagoina lou epikopo, peresitene o le siteki, le au Pulega Aoao, ma Taitai Aoao o le Ekalesia. …

… E mafai ona e saunia e ala i le fesili ifo ia te oe lava ia i fesili faapenei:

1. Pe sa ou mafaufau pe na talanoa i ni vaivaiga faaletagata o tagata na ou tautino atu e lagolagoina?

2. Pe sa ou vaavaai mo se faamaoniga o loo taitaiina i latou e le Alii?

3. Pe sa ou mulimuli ma le faaeteete ma le faamaoni i la latou taitaiga?

4. Pe sa ou talanoa e uiga i le faamaoniga na ou vaaia o i latou o auauna a le Atua?

5. O o’u tatalo soo ea mo i latou [ma ta’u o latou] igoa faatasi ai ma lagona o le alofa?

O na fesili o le a, taitai atu ai le toatele o i tatou i se lagona o le lē toafimalie ma se manaoga ia salamō.

(Henry B. Eyring, “O Le Mana o le Faatuatua Lagolago,” Liahona, Me 2019, 59)

Afai o nei fesili “e taitai atu ai i le lē toafimalie,” tatalo ma tusi e uiga i mea e mafai ona e faia e salamo ai ma suia.

Tuu i le faitalia: O e Manao e Aoao Atili?

O le a le tulaga matautia o le faitioina o i latou e valaauina e le Alii?

Sa aoao mai le Perofeta o Iosefa Samita (1805–44):

[Afai o se tagata] e tulai mai e tauemuina isi, saili masei i le Ekalesia, ma fai mai e sese i latou, ae o ia ua amiotonu, ona iloa lea ma le mautinoa, o lena tagata ua i le alatanu agai atu i le liliuese; ma afai e le salamo o ia, o le a liliuese, aua o loo soifua le Atua.

(Aoaoga a Peresitene o le Ekalesia: Iosefa Samita [2007], 318)

Pe afaina le i ai o ni fesili?

Sa aoao mai Peresitene Dieter F. Uchtdorf, o le sa avea ma uso o le Au Peresitene Sili:

E le afaina le i ai o ni fesili e uiga i le Ekalesia po o ana aoaoga faavae? Au uo talavou pele, o i tatou o ni tagata fai fesili aua ua tatou iloa o le fesili e taitaiina atu ai i le mea moni. …

… E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. O le faia o fesili e le o se faailoga lea o le vaivai; ae o se teuteuala mo le tuputupu ae. …

Aua le fefefe; ia faia fesili. Ia magafagafa, ae aua le masalosalo! Ae ia uumau pea e le aunoa i le faatuatua ma le malamalama ua uma ona e maua. Ona tatou te vaai ma le le atoatoa i le olaga nei. E le o mea uma o le a tulagatonu i le taimi nei.

(Dieter F. Uchtdorf, “The Reflection in the Water” [Faigalotu a le Ofisa o Aoga a le Ekalesia mo talavou matutua, Nov. 1, 2009], broadcasts.ChurchofJesusChrist.org)

E aunoa ea perofeta ma sese?

Na saunoa mai Sheri Dew, o le sa avea muamua ma Fesoasoani i le Au Peresitene Aoao o le Aualofa:

O nisi tagata e le mautonu i le fesili lenei: Ae, o perofeta ea, tagatavaai, ma talifaaaliga e aunoa ma ni sese? O le fesili sese lena. O le fesili e sili atu o le, O ai tonu lava perofeta? O i latou o e ua faauuina e umia ki o le perisitua ua faatagaina le mana o le Alii e tufatufaina atu i le lalolagi atoa. Atonu e le atoatoa i latou. Ae o i latou o taitai e sili ona atoatoa le musuia i le lalolagi, ma e na o le pau lo latou faamoemoega e mama atoatoa—e fesoasoani ia i tatou e saili lo tatou ala e toe foi atu ai i lo tatou aiga e ala i le faasino atu o i tatou ia Iesu Keriso.

(Sheri Dew, “Prophets” [BYU–Pathway Faigalotu i le Lalolagi Atoa, Iulai 13, 2021], 2, byupathway.org/speeches)