Iloilo Lou Aoaoina 9

1 Korinito 8–16 ma le 2 Korinito

O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu ae patino na e mauaina i le taimi o au suesuega o le Feagaiga Fou.

I lenei lesona o le a e maua ai le avanoa e iloilo ai lou aoaoina ma le auala na e faaaogaina ai mataupu faavae o loo aoaoina i le 1 Korinito 8––16 ma le 2 Korinito. O le iloiloina o lou aoaoina e mafai ona fesoasoani ia te oe e faavasega ai pe faapefea e le suesueina o tusitusiga paia ona fesoasoani ia te oe ia avea atili e faapei o le Faaola.

Iloilo au sini

Mate mai pe fia itulau ua lolomiina o tusitusiga paia o loo i ai i le Tusi Paia, Tusi a Mamona, Mataupu Faavae ma Feagaiga, ma le Penina Tau Tele ua tuufaatasia.

• Aisea e te manatu ai ua tuuina mai e le Alii ia i tatou le tele o itulau o tusitusiga paia?

• E faapefea ona e faaalia le loto faafetai mo Lana upu?

Na faamalamalama mai e Elder D. Todd Christofferson o le Korama a Aposetolo e Toasefululua le mafuaaga ua saunia ai e le Alii le tele o Ana afioga i tusitusiga paia. Faitau le faamatalaga lenei pe matamata i le “The Blessings of Scripture” (3:03), o loo maua i le ChurchofJesusChrist.org.

O Faamanuiaga o Tusitusiga Paia

I le avea ai ma se vaega o le faamanatuina o le 400 tausaga o le King James Bible [Tusi Paia o le lomiga a King James], mafaufau i o tatou faamanuiaga ma tiutetauave i le mauaina i taimi uma o le afioga a le Atua.

Mafaufau i le maoae o o tatou faamanuiaga i le i ai … i le tele naua o tusitusiga paia. Ma e le gata i lena, ae o alii, tamaitai, ma tamaiti taitoatasi ua mafai ona iai ma suesueina a latou lava kopi o nei tusitusiga paia, i la latou lava gagana. … E moni, e faatasi ai ma lenei faamanuiaga, ua ta’u mai e le Alii ia i tatou le sili atu ona manaomia o lo tatou faaaogaina pea lava pea o tusitusiga paia nai lo se isi lava taimi muamua. Ia tumau pea lava pea lo tatou fiafia i afioga a Keriso ia e ta’u maia ia i tatou mea uma e tatau ona tatou faia (tagai i le 2 Nifae 32:3).

(D. Todd Christofferson, “O Le Faamanuiaga o Tusitusiga Paia,” Liahona, Me 2010, 35)

1. Tali se tasi po o fesili uma e lua i lau api faamaumau mo suesuega:

• Aisea e te manatu ai ua “sili atu lo tatou manaomia ona liliu atu i tusitusiga paia i le taimi [nei] nai lo se isi taimi ua mavae”?

• O a manaoga patino e faamalieina e tusitusiga paia i lou olaga, po o a manaoga e mafai ona latou faamalieina?

Faaalu se minute e manatunatu ai i lau suesuega patino o tusitusiga paia. Feutagai ma le Tama Faalelagi e uiga i le auala o loo faamalieina ai e au suesuega o tusitusiga paia ou manaoga ma pe o manaomia ona e faia ni fetuunaiga. Atonu e manaomia ona e tumau atili i au suesuega o tusitusiga paia i aso taitasi pe faateleina le loloto o le malamalama e te maua mai au suesuega. Tusi i lalo soo se fetuunaiga e te lagona e tatau ona e faia. Mafaufau e fesili atu i lou aiga, lou faiaoga seminare, po o se taitai o le Ekalesia e fesoasoani ia te oe i au sini o le suesueina o tusitusiga paia.

Faalagolago i le Faaola ma saili Lana fesoasoani

Ina ua tusi atu Paulo i le Au Paia i Korinito, sa ia taulai atu i auala e faamanuia ma fesoasoani ai Iesu Keriso ia i tatou. O nisi o faataitaiga e aofia ai le fesoasoani ia i tatou e sosola ese mai faaosoosoga (tagai i le 1 Korinito 10:13), fesoasoani ia i tatou e atiina ae le alofa mama (tagai i le 1 Korinito 13), faatuina o i tatou mai le oti e ala i le Toetu (tagai 1 Korinito 15), valaaulia i tatou ina ia faalelei ma Ia (tagai i le 2 Korinito 5:16–21; 7:1–10), ma faamalosia i tatou e onosaia ma le faamaoni luitau (tagai i le 2 Korinito 11–12).

Faaalu ni nai taimi e toe faamanatu ai fuaitau o mau na e makaina po o faamatalaga na e faia i le 1 Korinito 8–16 ma le 2 Korinito na fesoasoani ia te oe e aoao e uiga i le Faaola pe faalagolago ai ia te Ia.

Saunia se savali e 3 i le 5-minute e uiga i auala e fesoasoani ai Iesu Keriso ia te oe. Ia faaaofia ai mea nei:

• o se tasi pe sili atu fuaitau o mau mai le 1 Korinito 8–16 po o le 2 Korinito sa anoa ia te oe

• o se faamatalaga o mea ua aoao mai e na fuaitau e uiga i ala e fesoasoani ma faamalosia ai oe e le Faaola

• o se aafiaga mai lou olaga po o se faataitaiga i tusitusiga paia a Iesu Keriso o loo fesoasoani i le ala o loo aoao mai i na fuaitau

• pe mafai faapefea ona e valaaulia isi ia maua le fesoasoani ma le malosi o le Faaola

2. Tusi lau savali i lau api faamaumau mo suesuega. Vaavaai mo se avanoa e faasoa atu ai lau savali i lou aiga, i lau vasega seminare, po o se vasega i le lotu.

Talafaasolopito o aiga ma galuega faalemalumalu ma le Toetu

Filifili le gaoioiga A po o le E.

Gaioioga A: Auai i galuega o talafaasolopito o aiga ma galuega faalemalumalu

Talu ai nei, atonu na e suesueina le 1 Korinito 15:29 . Mafaufau pe faapefea e le Toetu o le Faaola ona aafia ai ou tuaa. Matamata i le vitio lenei a o e manatunatu.

#Aleluia—O Se Savali o le Eseta e uiga ia Iesu Keriso

Na ave e Iesu Keriso i Ona luga agasala ma faanoanoaga a le lalolagi. E ui sa faasatauro o Ia, na Ia toetu mai le oti. Saili i lenei Eseta, le ala tatou te maua ai le ola fou e ala ia Iesu Keriso. #Hallelujah. Aoao atili i le FollowHim.mormon.org.

A o e suesueina le 1 Korinito 15:29, atonu na e fatuina se fuafuaga e auai i galuega o talafaasolopito o aiga ma galuega faalemalumalu. Afai na e faia, faaalu sina taimi e iloilo ai lau fuafuaga ma manatunatu i faatinoga na e faia e faatino ai lena fuafuaga. Afai e te lei faia, mafaufau e fai se fuafuaga i le taimi nei pe mafai faapefea ona e fesoasoani i ou tuaa ia olioli i faamanuiaga uma o le talalelei a Iesu Keriso.

3. Afai e te filifilia lenei filifiliga, fai mea nei i lau api faamaumau mo suesuega:

Lipoti i lau fuafuaga.

Afai na e faia se fuafuaga, faasoa atu po o le a le mea na lelei ma po o a faafitauli na e feagai ai. Pe o i ai ni fetuunaiga e te lagona e finagalo le Tama Faalelagi e te faia? O le a faapefea ona fesoasoani na fetuunaiga ia te oe?

Afai e te lei faia se fuafuaga, faasoa atu se mea e te manao e fai atoa ma lona faapogai. O le a sou manatu o le a faapefea ona aafia oe ma isi i lau fuafuaga a o e faatinoina?

Tali se fesili e tasi o fesili nei:

• E faapefea e lou auai i talafaasolopito o aiga ma galuega faalemalumalu ona faaalia ai lou faamoemoe mo le Toetu?

• Na faapefea e le auai i talafaasolopito o aiga ma galuega faalemalumalu ona fesoasoani e te lagona ai le latalata atili i le Tama Faalelagi ma avea atili ai e faapei o Iesu Keriso?

Gaoioiga E: Faamatala le aoaoga faavae o le Togiola a le Faaola

3. Afai e te filifilia le filifiliga lenei, tali ni fesili se lua o fesili nei i lau api faamaumau mo suesuega:

• Aisea ua avea ai le Toetu o le Faaola ma se vaega taua o Lana Togiola?

• O le a se mea ua e suesueina i le 1 Korinito 8–16 po o le 2 Korinito e uiga i le Toetu ua fesoasoani ai ia te oe?

• O a filifiliga e te manatu o le a ese i o tatou olaga pe afai tatou te le talitonu i se Toetu moni [o le tino ma le agaga]?

• Aisea e te loto faafetai ai ua ofoina mai e Iesu Keriso ia i tatou le mana e manumalo ai i le oti? E mafai faapefea ona e faaalia lena loto faafetai?