2 Timoteo 3

Ang Balaan nga mga Kasulatan

Mibati ka ba sukad nga nabug-atan o gikulbaan bahin sa espirituhanong kahimtang sa kalibotan karon? Sa usa ka epistola ngadto kang Timoteo, gitagna ni Pablo nga ang kataposang mga adlaw maglakip sa “mga malisod nga panahon” (2 Timoteo 3:1), apan siya usab nitudlo nga ang Ginoo naghatag kanimo og gasa sa balaan nga mga kasulatan aron matabangan ka sa mga malisod nga panahon (tan-awa ang 2 Timoteo 3:14–17). Kini nga leksiyon gituyo aron matabangan ka nga mobati og tinguha sa pagtuon sa mga kasulatan, nga makatabang pagprotektar kanimo gikan sa mga daotan sa atong panahon.

Ang kataposang mga adlaw

Basaha ang mosunod nga pamahayag ni Elder Neil•L.Andersen sa Korum sa Napulog Duha ka Apostoles, ug pamalandong kon nganong ang pagkabuhi niining panahona nakahimo nimong mobati og dakong pasalamat, kakulba, o ang duha.

Kita nagpuyo sa makaikag kaayo nga mga panahon, apan kahibulongan nga mga panahon. …

Nasayod kita nga samtang kita nagkaduol sa Ikaduhang Pag-anhi sa Manluluwas nga ang atong kalibotan mapuno sa kaguliyang ug kalibog. Daghan sa katilingban ang dili magtagad sa mga sugo sa Dios. Ako kasagaran mokutlo niining pamahayag ni Presidente Thomas S. Monson ga: “Diin kanhi ang mga sumbanan sa Simbahan ug mga sumbanan sa katilingban hapit nahiangay, karon aduna nay halapad nga kal-ang taliwala kanato, ug kini mas nagkadako pa.”

(Neil L. Andersen, “A Compensatory Spiritual Power for the Righteous” [Brigham Young University Education Week nga debosyonal, Ago. 18, 2015], speeches.byu.edu)

Sa unsang mga paagi nga ang mga panahon diin kita nabuhi kahibulongan?
Unsa kaha ang makapakulba nimo mahitungod sa pagpuyo sa kalibotan nga gihulagway ni Elder Andersen?

Samtang magtuon ka niini nga leksiyon, pangitaa ang mga paagi nga ang Dios mahigugmaong naghatag og tabang alang sa kalibog, espirituhanong mga kapeligrohan, o kabalaka nga imong mabati gikan sa mga kondisyon sa kalibotan.

Basaha ang 2 Timoteo 3:1–7, 12–13; 4:3–4, nga mangita sa mga paghulagway ni Pablo sa mga kapeligrohan sa kataposang mga adlaw. Tingali ganahan kang mogamit sa mga footnote aron sa pagtabang kanimo nga makasabot sa bisan unsa nga lisod nga mga pulong.

Unsa nga mga pananglitan sa mga kondisyon nga gihulagway ni Pablo ang imong nakita sa kalibotan karon?

Usa ka gasa gikan sa Dios

Ang Langitnong Amahan wala mibiya kanato nga moatubang sa mga peligro sa kataposang mga adlaw sa atong kaugalingon. Sa Iyang kaluoy ug gugma, Siya naghatag kanato og daghang mga makahibulongang mga gasa.

Si Elder Andersen mipadayon:

Samtang atong makit-an ang atong kaugalingon nga nagpuyo sa kalibotan nga dili kaayo mopatalinghog sa mga sugo sa Dios, siguradong magmainampoon kita, apan dili kita kinahanglang mabalaka pag-ayo. Ang Ginoo mopanalangin sa Iyang mga Santos og dugang nga espirituhanong gahom aron mahinagbo ang mga hagit sa atong panahon.

(Neil L. Andersen, “A Compensatory Spiritual Power for the Righteous” [Brigham Young University Education Week nga debosyonal, Ago. 18, 2015], speeches.byu.edu)

Basaha ang 2 Timoteo 3:14–17, nga mangita og usa sa mga gasa nga gihatag sa Dios aron matabangan kita diha sa mga peligro sa atong panahon.

Ang 2 Timoteo 3:15–17 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.

Unsa ang pipila sa mga panalangin nga atong madawat gikan sa pagtuon sa kasulatan nga imong namatikdan niini nga mga bersikulo?

Ang pagtuon sa kasulatan makatabang kanimo nga:

Mapalawom ang imong hugot nga pagtuo diha kang Jesukristo.
Makadawat og kaalam ug panudlo sa mga sitwasyon nga imong giatubang.
Makasabot sa doktrina o mga kamatuoran sa ebanghelyo.
Magtul-id sa sayop nga mga ideya o dili maayo nga mga batasan.
Mahimong mas sama ni Jesukristo.

Unsaon man nimo pagpamubo [summarize] sa unsay gitudlo ni Pablo mahitungod sa pagtuon sa kasulatan?

Diha sa imong journal sa pagtuon, pagsulat mahitungod sa panahon diin ang mga kasulatan nakatabang kanimo sa usa sa mga paagi nga gihulagway ni Pablo. Kon wala kay mahunahunaan nga kasinatian, isulat nganong sa imong hunahuna ang mga kasulatan mahimong makatabang kanimo sa usa sa mga paagi nga gihulagway ni Pablo.

Unsa ang lain pang mga paagi nga ang Ginoo makapanalangin kanimo diha sa imong pagtuon sa mga kasulatan?
Ang Ginoo naghatag kanimo sa gasa sa mga kasulatan aron makatabang kanimo sa kataposang mga adlaw. Unsa ang gitudlo niini kanimo mahitungod Kaniya?

Paggamit sa mga kasulatan

Aron mabansay ang paggamit sa mga kasulatan sa pagpalig-on sa imong hugot nga pagtuo kang Jesukristo, pagpili og duha ka mga hagit sa ulahing mga adlaw nga gitagna ni Pablo sa 2 Timoteo 3:1–7, 12–13; 4:3–4 o pagpili og laing mga hagit nga may kalabotan sa imong kinabuhi. Pangita og mga tudling sa kasulatan nga mahimong makatabang sa usa ka tawo kinsa nahiatubang niini nga mga hagit. Mahimong makatabang ang pagpangita og mahinungdanong mga pulong diha sa Giya ngadto sa mga Kasulatan, nga anaa sa ChurchofJesusChrist.org. O mahimo nimong unahon pagpili ang pipila sa imong paborito nga mga kasulatan ug dayon pagdesisyon kon hain nga mga hagit sa ulahing mga adlaw kini makatabang kanimo.

Magsulat diha sa piraso sa papel gamit ang ballpen o lapis.

Ang imong tumong sa pagtuon sa kasulatan

Gipahinumdoman ni Pablo si Timoteo nga si Timoteo gipanalanginan nga mahibalo sa mga kasulatan gikan sa panahon nga siya bata pa (tan-awa sa 2 Timoteo 3:15). Sa samang paagi, ang Langitnong Amahan mopanalangin kanimo tungod sa pagtuon sa mga kasulatan sa imong kabatan-on. Paggahin og pipila ka minuto sa mainampoong paagi sa paghimo og tumong o sa pagkonsiderar sa imong tumong karon alang sa personal nga inadlaw nga pagtuon sa kasulatan. Pamalandongi ang mosunod nga mga pangutana:

Kumusta man ka sa imong tumong?
Sa unsang paagi nga ang imong tumong nagtabang kanimo nga mapalambo ang imong hugot nga pagtuo kang Jesukristo ug mabuntog ang mga hagit sa atong panahon?
Unsa nga mga pagpahiangay, kon adunay bisan unsa, sa imong tumong ang nabati nimo nga kinahanglan nimong buhaton?

Mahimong sultihan ang imong magtutudlo, usa ka ginikanan, o usa ka tawo nga imong gisaligan mahitungod sa imong tumong sa pagtuon sa kasulatan ug dapita sila nga magfollow up kanimo.

Opsiyonal: Gustong Makakat-on Pa og Dugang?

Unsaon man nako pagkasabot sa mga peligro nga nalista sa 2 Timoteo 3:1–7?

Ang mosunod nga mga paghatag og kahulogan mahimong magamit:

“Walay pagbati sa paghigugma” (2 Timoteo 3:3) mahimong maglakip sa mga batasang may koneksiyon sa pagkawalay pagbati o walay pagpakabana, mga pagbati sa pagdumot ug pagtamay, o kauban sa malaw-ay nga mga tinguha nga mosangpot sa sekswal nga imoralidad
“Mapatuyangon” (2 Timoteo 3:3) nagpasabot nga walay pagpugong sa kaugalingon
“Madalidalion” (2 Timoteo 3:4) nagpasabot nga dali-dali, walay pagtagad
“Garboso kaayo” (2 Timoteo 3:4) nagpasabot nga magpahitaas, mapahitas-on

Sa unsang paagi ako mas makasabot sa 2 Timoteo 3:16–17?

Mahimong basahon ang artikulo nga “Line upon Line: 2 Timothy 3:16–17” (New Era, Abr. 2012,19), nga naglangkob og mga tabang sa pulong, propetikanhong komentaryo, ug mga pagpasabot nga mahimong makatabang kanimo nga makasabot og dugang niini nga mga bersikulo.

Sa unsa nga paagi nga makatabang kanako ang pagtuon sa mga kasulatan sa akong kinabuhi?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Himoa ang Paggamit sa Pagtuo nga Inyong Unang Prayoridad
Elder Richard G. Scott namulong sa Oktubre 2014 nga Kinatibuk-ang Komperensya.

Makigsulti kita sa Dios pinaagi sa pag-ampo. Siya sa kasagaran makigsulti ngari nato pinaagi sa Iyang nasulat nga pulong. Aron masayod unsay tono ug pamati sa Balaang tingog, basaha ang Iyang mga pulong, tun-i ang kasulatan, ug pamalandonga kini. Himoa kining importante nga bahin sa matag adlaw nga kinabuhi. …

Pinaagi sa inadlaw, padayon nga pagtuon sa kasulatan, duna moy kalinaw diha sa kagubot sa inyong palibot ug kalig-on sa pagbuntog sa mga tintasyon. Makapalambo mo og lig-ong pagtuo sa grasya sa Dios ug masayod nga pinaagi sa Pag-ula ni Jesukristo ang tanan mamaayo sumala sa kaugalingong panahon sa Dios.

(Richard G. Scott, “Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 92–95)

Unsaon nako nga mobati nga malaomon mahitungod sa umaabot kon ang direksiyon sa katilingban daw supak sa mga sugo sa Dios?

Si Presidente Boyd K. Packer (1924–2015) sa Korum sa Napulog Dugha ka Apostoles mitabang sa pagtubag niini nga pangutana diha sa bidyo nga “On Zion’s Hill” gikan sa time code 0:00 ngadto sa 1:41, anaa sa ChurchofJesusChrist.org.

On Zion’s Hill
Every soul who willingly affiliates with The Church of Jesus Christ of Latter-day Saints and seeks to abide by its principles and ordinances is standing “on Zion’s hill.”

Unsa ang pipila ka mga paagi nga ako epektibong makatuon sa mga kasulatan?

Si Elder David A. Bednar sa Korum sa Napulog Dugha ka Apostoles mitubag niini nga pangutana diha sa bidyo nga “Advice for Studying the Scriptures” (2:07), anaa sa ChurchofJesusChrist.org.