Usa ka batan-ong lalaki nga nakigkita sa iyang Bishop.
Nakahibalo ka ba nga ang mga bishop mialagad sa Simbahan sa panahon ni Pablo? Sa unsang paagi nga ang mga bishop ug ang mga presidente sa branch makapanalangin sa imong kinabuhi? Sa mga sulat ni Pablo ngadto kang Timoteo ug Tito, iyang gilatid ang mga kwalipikasyon sa mga tawo nga gitawag og mga bishop. Kini nga leksiyon makatabang kanimo aron mas makasabot sa mga hiyas sa mga bishop ug sa mga presidente sa branch ug sa unsang paagi nga kining mga sulugoon sa Ginoo mahimong makatabang nimo sa imong kinabuhi.
Kang kinsa ka modangop?
Handurawa nga ikaw nakigbisog sa usa ka importanteng isyu sa imong kinabuhi. Tingali usa kini ka desisyon mahitungod sa imong kaugmaon, usa ka hagit nga imong giatubang, o usa ka bati nga kinaiya nga imong gipaningkamotang bag-ohon.
Asa ka modangop kon ikaw nakigbisog og importanteng mga isyu?
Kang kinsa ka makigsulti ug ngano?
Basaha ang mosunod nga pamahayag ni Elder Quentin L. Cook sa Korum sa Napulog Duha ka Apostoles:
Imahe
Opisyal nga hulagway ni Elder Quentin L. Cook. Gitawag ngadto sa Korum sa Napulog Duha ka Apostoles niadtong 6 sa Oktubre 2007.
Kaninyo bililhong kabatan-onan … anaa kamo sa ngilit sa pinakaimportanteng mga desisyon nga inyo unyang pagahimoon sa inyong kinabuhi. Palihog pakigtambag sa inyong mga ginikanan ug sa inyong bishop kabahin sa importanteng mga pagpili nga nagpaabot kaninyo. Tugoti ang bishop nga mahimo ninyong higala ug tigtambag.
Paggahin og higayon sa pagpamalandong sa mosunod nga mga pangutana:
Imo bang gihunahuna ang imong bishop o presidente sa branch isip usa ka higala ug magtatambag?
Kon mag-atubang ka og usa ka importanteng desisyon, o kon nagkinahanglan ka og espirituwal nga tabang, unsa kadako ang posibilidad nga mangayo ka ug tambag gikan sa imong bishop? Ngano man?
Sa unsang paagi nga ang pagdangop sa imong bishop o presidente sa branch alang sa paggiya nakatabang kanimo?
Sa imong pagtuon niini nga leksiyon, pangita og mga paagi nga ang usa ka bishop o presidente sa branch mahimong makasuporta kanimo sa imong mga hagit, mga desisyon, ug hugot nga pagtuo diha kang Jesukristo.
Si Pablo nagtudlo mahitungod sa kwalipikasyon sa usa ka bishop
Ang mga sulat ni Pablo nga nailhan isip 1 Timoteo, 2 Timoteo, ug Tito sa kasagaran gitawag og pastoral nga mga sulat kay naglakip kini sa mga tambag ni Pablo ngadto sa mga pastor o mga lider sa Simbahan (ang pastor nagagikan sa Latin nga pulong alang sa “magbalantay sa karnero”). Sila si Timoteo ug Tito mga sinaligang kauban ni Pablo nga mialagad uban kaniya sa lainlaing mga panahon sa tibuok niya nga misyonaryong mga pagpanaw. Niadtong panahona, si Timoteo nag-alagad isip usa ka lider sa Simbahan sa Efeso, ug si Tito anaa sa isla nga Gresyanhon sa Creta.
Taliwala sa daghang mga kamatuoran nga gitudlo ni Pablo niining dinasig nga mga epistola, siya milista og daghang mga kwalipikasyon alang sa mga tawo kinsa gitawag isip mga bishop. Ang bishop mao ang usa ka tawo nga gi-ordin ug gi-set apart isip tigdumala nga high priest alang sa usa ka ward, o kongregasyon. Siya adunay kinatibuk-ang responsibilidad sa pagdumala sa temporal ug espirituwal nga mga kalihokan sa kongregasyon. Ang presidente sa branch adunay susamang tahas. Ang Ginoo nagpili og usa ka bishop pinaagi sa usa ka kapangulohan sa stake, kinsa nagtinguha og pagpadayag. Sa dili pa tawgon, ang bishop giaprobahan sa Unang Kapangulohan isip parehas nga takos ug makahimo sa pag-alagad.
Basaha ang 1 Timoteo 3:1–7 ug Tito 1:6–9, mangita sa mga kwalipikasyon alang sa mga bishop. Pangita og tulo niini nga mga kinaiya nga mahimong makatabang sa usa ka bishop o presidente sa branch nga magiyahan ug mapanalanginan ang imong kinabuhi.
Giunsa ni Jesukristo sa pagpakita og ehemplo niini nga mga hiyas? (Mahimong mag-cross-reference niini nga mga bersikulo ngadto sa 1 Pedro 2:25, diin si Pedro nipasabot sa Manluluwas isip “ang Magbalantay ug Magdudumala [Bishop] sa [atong] mga kalag.”)
Sa unsang paagi kaha nga ang pagbaton niini nga mga hiyas magtugot sa bishop o sa presidente sa branch sa pagtabang kanimo sama sa mahimo sa Manluluwas?
Unsaon man nimo pagpamubo kon unsa ang imong nakat-onan mahitungod sa mga bishop ug mga presidente sa branch?
1. Tubaga ang mosunod nga mga pangutana diha sa imong journal sa pagtuon:
Unsa nga Kristohanong mga hiyas ang imong namatikdan sa imong bishop o presidente sa branch? Sa unsang paagi nga kining mga hiyas mitugot kaniya aron mahimong usa ka instrumento sa mga kamot sa Ginoo?
Giunsa o sa unsang paagi ang bishop makatabang kanimo nga mas mapaduol kang Jesukristo ug mapalig-on ang imong hugot nga pagtuo Kaniya?
Usa ka magbalantay sa panon sa Ginoo
Mahimong markahan ang bisan unsang mga pulong o hugpong sa mga pulong diha sa 1 Timoteo 3:2 o sa Tito 1:7–9 nga nagpaila sa responsibilidad sa usa ka bishop sa pagtudlo.
Ang bishop o presidente sa branch makatudlo sa lainlaing mga paagi, lakip diha sa mga miting, mga klase, ug sa personal nga mga interbyo, ug pinaagi sa iyang ehemplo.
2. Tubaga ang mosunod nga mga pangutana diha sa imong journal sa pagtuon:
Sa unsang paagi nga ang tambag o panudlo sa usa ka bishop o presidente sa branch nahimong usa ka panalangin nganha kanimo o sa imong kaila?
Sa unsa pang uban nga mga paagi nga ang Ginoo miamuma ug mitabang kanato pinaagi sa mga bishop ug sa mga presidente sa branch?
Ang usa ka bishop makatabang kanato nga maghinulsol
Ang Ginoo mitawag usab sa mga bishop ug mga presidente sa branch aron motabang ug mogiya kanato latas sa proseso sa paghinulsol, ilabi na kon kita nakabuhat og seryoso nga mga sala.
Si Elder C. Scott Grow sa Seventy mipasabot:
Imahe
Opisyal nga Hulagway ni Elder C. Scott Grow. Gilitratohan niadtong Marso 2017.
Pinaagi sa ordinasyon ug matarong nga pagpuyo, ang bishop adunay katungod sa pagpadayag gikan sa Espiritu Santo kabahin sa mga miyembro sa iyang ward, lakip nimo.
Ang bishop makatabang nimo sa proseso sa paghinulsol sa mga paagi nga dili mahatag sa imong mga ginikanan o ubang mga lider. …
… Isip usa ka sulugoon sa Ginoo, siya mabination ug masinaboton samtang siya naminaw kanimo. Dayon motabang siya ninyo sa proseso sa paghinulsol. Siya ang mensahero sa Ginoo alang sa kalooy sa pagtabang nimo nga mahimong limpyo pinaagi sa pag-ula ni Jesukristo.
(C. Scott Grow, “Ngano ug Unsay Angay Nakong Ikumpisal ngadto sa Akong Bishop?,” Liahona, Okt. 2013, 58–60)
Paggahin og pipila ka panahon aron magsulat og mubo nga sulat, email, o text ngadto sa imong bishop o presidente sa branch. Mahimong pasalamatan siya sa iyang serbisyo, pagtudlo, ug ehemplo. Ilakip ang bisan unsang mga pihong paagi nga siya nakatabang kanimo. Mahimong hisgotan ang bisan unsa sa iyang Kristohanong mga ehemplo nga imong namatikdan ug gipasalamatan. Kon magamit, mahimo usab nimong hangyoon nga makigkita kaniya alang sa iyang tambag sa lisod nga desisyon, sa usa ka kabalaka nga lagmit aduna ka, o alang sa tabang sa proseso sa paghinulsol.
Opsiyonal: Gustong Makakat-on Pa og Dugang?
1 Timoteo 3:1. Asa naggikan ang titulo nga bishop diha sa Bag-ong Tugon?
Ang titulo nga bishop gikuha gikan sa Gresyanhon nga pulong nga episcopos—epi, nga nagpasabot nga “ibabaw,” ug scopos, nga nagpasabot nga “tan-aw” o “magbantay.” Busa, ang usa ka episcopos, o bishop, mao ang usa ka tawo kinsa magbalantay ibabaw sa panon isip tiggiya o tig-amuma.
Nganong gikinahanglan ko moadto sa akong bishop aron mangompisal sa mga sala?
Si Elder Richard G. Scott (1928–2015) sa Korum sa Napulog Duha ka Apostoles mitudlo:
Imahe
Kataposang opisyal nga hulagway ni Elder Richard G. Scott sa Korum sa Napulog Duha ka Apostoles, 2004. Mitaliwan niadtong 22 sa Septyembre 2015.
Ang seryosong kalapasan sama sa imoralidad nagkinahanglan sa panabang sa usa ka tawo kinsa naghupot og mga yawe sa pagka may awtoridad, sama sa usa ka bishop o presidente sa stake, sa hilom nagtabang sa proseso sa paghinulsol aron masiguro nga kini kompleto ug tarong nga pagkahimo.
(Richard G. Scott, “The Power of Righteousness,” Ensign, Nob 1998, 69–70)
1 Timoteo 3:1. Unsa ang “maayong buhat” sa usa ka bishop?
Si Elder Cook sa Korum sa Napulog Duha ka Apostoles mitudlo mahitungod sa nag-unang mga responsibilidad sa usa ka bishop:
Imahe
Opisyal nga hulagway ni Elder Quentin L. Cook. Gitawag ngadto sa Korum sa Napulog Duha ka Apostoles niadtong 6 sa Oktubre 2007.
Ang bishop adunay lima ka dagkong mga responsibilidad sa pagdumala sa usa ka ward:
Siya mao ang tigdumalang high priest diha sa ward.
Siya ang presidente sa Aaronic nga Pagkapari.
Siya ang maghuhukom sa kadaghanan [common judge].
Siya makigsabot sa buhat sa kaluwasan ug kahimayaan, lakip na sa pag-amuma alang niadtong nanginahanglan.
Ug siya modumala sa mga rekord, mga panalapi, ug sa paggamit sa meetinghouse.
Sa iyang tahas isip ang tigdumalang high priest, ang bishop mao ang “espiritwal nga lider” sa ward. Siya usa ka “matinud-anon nga disipulo ni Jesukristo.” …
Ang bishop adunay hilabihan kaayo kaimportante nga tahas sa pagpangalagad isip magbalantay aron sa paggiya sa bag-o nga kaliwatan, lakip na sa mga young single adult, paingon ngadto ni Jesukristo.
Tito 1:7. Unsay gipasabot ni Pablo sa dihang miingon siya nga “[ang usa ka bishop] kinahanglang dili siya salawayon”?
Ang usa ka bishop gipili sa Ginoo ug kinahanglan usa ka tawo nga adunay taas nga moral sa kinaiya ug katakos. Bisan pa niana, ang tanang mga bishop dili perpekto ug may mga panahon nga makahimo og mga kasipyatan panahon sa ilang pagserbisyo.
Si Elder Jeffrey R. Holland sa Korum sa Napulog Duha ka Apostoles mitudlo sa mosunod:
Imahe
Opisyal nga Hulagway ni Elder Jeffrey R. Holland. Gilitratohan niadtong Enero 2018.
Pagmapailobon kabahin sa tawhanon nga kahuyang—ang inyong kaugalingon ingon man usab niadtong nagserbisyo uban ninyo niini nga Simbahan gipangulohan sa mga boluntaryo, mortal nga mga lalaki ug babaye. Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios. Tingali makasagmuyo kaayo kini Kaniya, apan Iya kining gisagubang. Mao usab kita. Ug kon inyong makita ang pagkadili hingpit, hinumdomi nga ang limitasyon dili diha sa kabalaan niini nga buhat. … Mao nga pagmapailobon ug pagmabination.
(Jeffrey R. Holland, “Nagatuo Ako” Liahona, Mayo 2013, 94)