Sukda ang Imong Nakat-onan 10

Mga Taga-Galacia–2 Mga Taga-Tesalonica

Kini nga leksiyon gituyo aron matabangan ka sa pagtimbang-timbang sa mga tumong nga imong gitakda ug sa personal nga pag-uswag nga imong nasinati sa panahon sa imong pagtuon sa Bag-ong Tugon. 

Ang imong espirituwal nga pag-uswag

Paghunahuna og usa ka abilidad, talento, o kinaiya nga imong gipalambo nga nagkinahanglan og regular ug makanunayon nga paningkamot.

• Unsa ang nakapadasig nimo nga mogahin og panahon ug paningkamot nga gikinahanglan aron molambo?

• Diha sa imong pagpaningkamot nga mouswag, unsa ang imong gilaoman nga mahitabo nga nagtabang kanimo nga mahibalo nga ang imong mga paningkamot mapuslanon?

Aduna kitay daghang mga kahigayonan sa atong panahon sa kalibotan sa pagpaningkamot paingon sa pagkahimong mas susama sa Manluluwas, nga nag-andam kanato sa pagbalik pagpuyo kauban Niya ug sa atong Langitnong Amahan. Mahimong makatabang ang matag karon og unya nga pagtimbang-timbang sa atong pag-uswag ug paghimo sa bisan unsang gikinahanglang mga pagpahiangay.

Ang katuyoan niini nga leksiyon mao ang paghatag kanimo og mga kahigayonan sa pagtimbang-timbang sa imong espirituhanong pag-uswag. Makabaton ka og kahigayonan sa pagsusi unsa ang imong nakat-onan gikan sa Bag-ong Tugon ug sa pagsukod sa imong pag-uswag nga may kalabotan sa mga tumong nga imong gitakda tungod sa unsa ang imong nakat-onan.

Paggahin og higayon sa paghunahuna mahitungod sa imong bag-ohay lang nga pagtuon sa Bag-ong Tugon ug sa imong gipangbuhat gumikan sa unsay imong nakat-onan. Lagmit gusto nimong irebyo unsa ang imong nasulat sa imong journal o unsa ang imong bag-o lang gimarkahan sa imong mga kasulatan aron maila ang mga tumong nga imong gitakda ug ang mga impresyon nga imong nadawat.

• Unsa ang imong nakat-onan gikan sa Bag-ong Tugon nga nakatabang kanimo aron mahiduol kang Jesukristo?

• Unsa ang imong nakat-onan mahitungod Kaniya gikan sa Bag-ong Tugon nga mipatigbabaw diha kanimo?

1. Pagpili ug kompletoha ang duha sa mosunod nga mga kalihokan diha sa imong journal sa pagtuon alang sa imong pagsumiter niini nga leksiyon.

Kalihokan A: Pagpasabot sa Dakong Apostasiya ug sa Pagpahiuli

Tan-awa kining duha ka mga hulagway, ug paghunahuna mahitungod sa unsa ang ipasabot niini nga ipahiuli ang usa ka butang.

• Ngano nga adunay kinahanglan nga ibalik?

• Sa unsa nga paagi kini nga mga hulagway ikatandi sa Apostasiya ug sa Pagpahiuli?

Aron marebyo ang koneksiyon tali sa Apostasiya ug sa Pagpahiuli, kompletoha ang mosunod nga mga kalihokan:

Hunahunaa nga ang mga misyonaryo nagtudlo sa usa sa imong mga higala sa imong panimalay. Gihangyo ka nila nga motudlo sa bahin sa sunod nga leksiyon sa Apostasiya ug sa Pagpahiuli. Nasayod ka nga ang imong higala pamilyar sa Biblia, mao nga ingon og maayo nga ideya ang paggamit og pipila ka mga bersikulo gikan sa Bag-ong Tugon atol sa leksiyon.

Gamit ang Mga Buhat 3:21; Mga Taga-Efeso 1:10; Mga Taga-Efeso 2:19–22; ug 2 Mga Taga-Tesalonica 2:1–3 (o lain pang mga bersikulo nga imong gipili), isulat unsa ang lagmit nimong isulti panahon sa leksiyon aron matabangan ang imong higala nga makasabot nganong ang Manluluwas nagkinahanglan nga mopahiuli sa Iyang ebanghelyo sa kalibotan.

Kon imong gipili nga kompletohon kini nga kalihokan, irekord unsa ang imong isulti sa imong higala.

Kalihokan B. Pagdugang sa imong gugma alang kang Jesukristo ug sa imong tinguha nga moalagad Kaniya

Sa leksiyon sa “Mga Taga-Filipos 3,” gihatagan ka og kahigayonan sa pagsulat og usa ka sulat sa imong umaabot nga kaugalingon diin ikaw miila sa mga sakripisyo nga mahimo nimong buhaton nga makatabang kanimo aron mas makaila kang Jesukristo ug makaandam alang sa kinabuhing dayon.

Kon imong gidawat kini nga kahigayonan, basaha ang sulat nga imong gisulat. Itandi ang imong kasamtangang pagbati mahitungod kang Jesukristo o sa imong mga tinguha sa pag-alagad Kaniya ngadto sa mga pagbati ug mga tinguha nga anaa kanimo sa dihang imong gisulat ang maong sulat. Kon adunay bisan unsa nga gusto nimong idugang sa sulat base sa imong bag-ong mga kasinatian, buhata kini karon.

Kon imong gipili nga kompletohon kini nga kalihokan, tubaga ang duha sa mosunod nga mga pangutana:

• Samtang imong girebyo ang imong sulat, namatikdan ba nimo ang bisan unsang mga pagbag-o mahitungod sa imong gugma alang kang Jesukristo? Kon mao, ngano sa imong hunahuna nga kini nabag-o?

• Unsa nga bag-ong kasinatian ang nakapadugang sa imong gugma alang sa Dios ug sa imong pagkaandam nga moalagad Kaniya?

• Unsa sa imong pamati ang pipila sa sunod nga mga lakang nga imong buhaton aron makatabang kanimo nga madugangan ang imong gugma alang sa Dios?

Kalihokan C: Pagsul-ob sa tibuok hinagiban sa Dios

• Unsa ang imong nahinumdoman mahitungod sa hinagiban sa Dios? Unsa ang imong nahinumdoman mahitungod sa kahulogan sa matag piraso? Kon nagkinahanglan ka og tabang, tan-awa ang Mga Taga-Efeso 6:14–18 alang sa mga tubag.

• Unsaon kaha nimo pagpamubo sa unsa ang buot ipasabot sa “pagsul-ob sa tibuok hinagiban sa Dios”? (Mga Taga-Efeso 6:11).

Kon imong gipili nga kompletohon kini nga kalihokan, buhata ang mosunod nga kalihokan ug tubaga ang nag-uban nga mga pangutana:

Pagdrowing og tukog nga porma [stick figure] sa imong journal.

• Unsa nga mga paningkamot ang imong gihimo aron masul-ob ang hinagiban sa Dios?

Pagdrowing og usa ka piraso o mga piraso sa hinagiban nga nagrepresentar niadtong mga paningkamot.

• Nakasinati ka ba sa bisan unsang mga resulta gikan sa imong mga paningkamot? Kon mao, unsa ang imong nasinati? Kon wala, unsa nga mga resulta ang sa imong hunahuna mahimong moabot pinaagi sa pagpadayon sa imong mga paningkamot?