“Siya Moanhi Pag-usab sa Pagmando ug Paghari” ni Mary R. Sauer. Jesukristo mikanaog sa Yuta sa Iyang Ikaduhang Pag-anhi. Adunay mga lalaki, mga babaye, ug kabataan nga naglibot kaniya. Siya nagsul-ob og pula nga sapot ug nagduko nga nagtan-aw ngadto sa nagpundok.
Unsang mga pangutana o mga panghunahuna ang moabot sa imong hunahuna kon maghunahuna ka mahitungod sa Ikaduhang Pag-anhi ni Jesukristo? Sa iyang unang epistola ngadto sa Mga Taga-Tesalonica, mga kapitulo 4–5, si Apostol Pablo nagtudlo og importanteng mga detalye mahitungod sa Ikaduhang Pag-anhi sa Manluluwas ug unsaon nato pagpangandam alang niini. Kini nga leksiyon gituyo aron matabangan ka nga makasabot unsa ang mahitabo ug unsaon nimo pagpangandam alang sa panahon diin si Jesukristo mobalik sa kalibotan.
Mga pangutana mahitungod sa Ikaduhang Pag-anhi ni Jesukristo
Paggahin og higayon sa pagtan-aw sa larawan diha sa sinugdanan sa leksiyon ug dayon paghunahuna mahitungod sa imong mga tubag sa mosunod nga mga pangutana:
Unsa ang pipila ka mga butang nga imong nahibaloan mahitungod sa Ikaduhang Pag-anhi ni Jesukristo?
Unsa ang pipila ka mga butang nga wala nimo nahibaloan?
Ang mga Santos nga Taga-Tesalonica aduna usab mga pangutana mahitungod sa Ikaduhang Pag-anhi sa Manluluwas. Base sa mga pagtulun-an ni Pablo niining mga kapituloha, mahimong nangutana sila sama sa, “Kanus-a mabanhaw ang atong mga minahal sa kinabuhi?,” “Kanus-a mahitabo ang Ikaduhang Pag-anhi ni Jesukristo?,” o “Unsaon nato pag-andam ang atong mga kaugalingon alang sa Ikaduhang Pag-anhi ni Jesukristo?” Seguro kamo adunay susama nga mga pangutana. Ang mosunod nga mga kalihokan sa pagtuon motubag niining mga pangutanaha.
1. Pagpili og labing menos duha sa mosunod nga mga kalihokan sa pagtuon aron kompletohon alang sa leksiyon karong adlawa. Sunda ang mga panudlo alang sa mga kalihokan nga imong gipili.
Kalihokan sa Pagtuon 1: Unsay mahitabo sa buhi ug sa patay panahon sa Ikaduhang Pag-anhi ni Jesukristo?
Basaha ang 1 Mga Taga-Tesalonica 4:13–18, mangita unsa ang mahitabo sa mga matarong sa higayon nga si Jesus mobalik pag-usab. Timan-i ang kalahian tali sa unsay mahitabo sa kadtong nangamatay ug sa kadtong mga buhi pa panahon sa Ikaduhang Pag-anhi. (Ang mga pulong nga “nangamatay” niini nga mga bersikulo nagpasabot niadtong kinsa patay na.) Tingali makatabang ang pagbasa sa Hubad ni Joseph Smith sa 1 Mga Taga-Tesalonica 4:15.
Unsay labing importante alang nimo niining mga bersikulo?
Sunod, basaha ang Doktrina ug mga Pakigsaad 88:96–98, nga mangita og dugang nga mga panabot mahitungod niining mga hitabo. (Mahimo usab nimong basahon ang mga bersikulo 99–101 aron makat-on mahitungod sa unsa ang mahitabo sa kadtong wala midawat kang Jesukristo niini nga kinabuhia.)
Unsa ang dugang nga mga panabot ang imong naangkon?
Usa ka kamatuoran nga mahimo nimong maila mao nga ang matinud-anong mga Santos kinsa namatay sa wala pa ang Ikaduhang Pag-anhi mabanhaw sa higayon nga si Kristo moanhi pag-usab.
Ang termino nga “bayawon” (1 Mga Taga-Tesalonica 4:17) nagpasabot sa mga matarong nga makighiusa sa pagsugat sa Manluluwas sa Iyang pag-anhi. Daghang mga Kristiyanos ang naggamit sa pulong nga pagbayaw (gikan sa Latin nga termino nga nagkahulogan og “misaka”) sa dihang nagtumong niining panahona.
Si Elder Neil L. Andersen sa Korum sa Napulog Duha ka Apostoles mipakigbahin sa mosunod mahitungod niining sagradong hitabo:
Imahe
Opisyal nga litrato ni Elder Neil L. Andersen sa Korum sa Napulog Duha ka Apostoles, 2010, Agosto.
Walay makadasig sa akong tinguha sa pagpamulong bahin ni Kristo labaw pa kay sa paghanduraw sa Iyang pagbalik. Samtang kita wala makahibalo kanus-a Siya moabot, ang mga panghitabo sa Iyang pagbalik makapahingangha! Siya moabot sa mga panganod sa langit diha sa kahalangdon ug himaya uban sa tanan Niyang balaan nga mga anghel. Dili lamang pipila ka anghel, apan ang tanan sa Iyang balaan nga mga anghel. Dili kini ang pulahon og aping nga kerubin nga gipintal ni Raphael nga atong makita sa atong mga Valentine card. Kini mao ang mga anghel sa mga siglo, ang mga anghel nga mopatak-om sa ba-ba sa mga liyon, nga moabli sa mga pultahan sa prisohan, sa pagpahibalo sa Iyang dugay nang gihulat nga pagkatawo, sa paghupay Kaniya sa Getsemani, sa paghatag sa Iyang mga disipulo og kasiguroan sa Iyang Pagkayab, ug sa pag-abli sa mahimayaong pagpahiuli sa ebanghelyo.
Makahanduraw ba kamo nga bayawon sa pagsugat Kaniya, niini nga habig o sa pikas habig sa tabil? Kana ang Iyang saad ngadto sa mga matarong. Kining talagsaon nga kasinatian moimpluwensiya sa atong mga kalag sa kahangtoran.
Kon imong gipili kini nga kalihokan sa pagtuon, irekord ang imong mga tubag sa mosunod nga mga pangutana:
Paggahin og panahon sa paghanduraw kon unsa kaha ang maihap uban sa mga matarong sa pag-anhi sa Manluluwas.
Unsa nga mga hunahuna o mga pagbati ang lagmit aduna ka nianang adlawa? Unsa ang imong gibati sa pagkasayod nga ang Manluluwas gusto nga mouban ka Kaniya sa Iyang pag-anhi? Sa unsang paagi nga ang paghanduraw niana nga umaabot nga adlaw makaimpluwensiya kanimo karon?
Sa 1 Mga Taga-Tesalonica 4:18, giawhag ni Pablo ang mga Santos sa “pagdinasigay [sa usag-usa] tungod niining paglaoma.”
Sa unsang paagi nga ang mga pagtulun-an ni Pablo naghatag kanimo og kahupay? Sa unsang paagi kini makahatag og kahupay sa umaabot nga mga kahimtang nga lagmit nimong maatubang?
Kalihokan sa Pagtuon 2: Kanus-a man mahitabo ang Ikaduhang Pag-anhi ni Jesukristo?
Nakahunahuna ka ba kon kanus-a mahitabo ang Ikaduhang Pag-anhi ni Jesukristo o kon maandam ka ba? Ang mga Santos nga Taga-Tesalonica kalagmitan adunay susama nga mga pangutana.
Basaha ang 1 Mga Taga-Tesalonica 5:1–3 ug pangitaa ang mga sumbingay nga gigamit ni Pablo sa paghulagway sa panahon nga si Jesus mobalik sa yuta.
Unsa man ang imong nakit-an?
Unsa ang gitudlo sa metapora ni Pablo sa usa ka kawatan sa kagabhion ug sa usa ka babaye nga nagbati mahitungod sa Ikaduhang Pag-anhi sa Manluluwas?
Usa ka kamatuoran nga atong makat-onan gikan sa mga pagtulun-an ni Pablo mao nga kon kita maningkamot nga mahimong “mga anak sa kahayag” pinaagi sa pagsunod ni Jesukristo, kita maandam sa higayon nga Siya moanhi pag-usab.
Kon imong gipili kini nga kalihokan sa pagtuon, irekord ang lista nga imong gihimo sigon sa gipanudlo sa sunod nga parapo.
Sa pagkat-on og dugang mahitungod sa lain-laing mga paagi nga ang Ginoo nagdapit kanato nga mahimong mga anak sa kahayag, basaha ang 3 Nephi 18:24; Doktrina ug mga Pakigsaad 50:23–25; 88:67–68. Ilista sa imong journal sa pagtuon unsa ang imong nakaplagan nga nakatabang kanimo nga makasabot unsaon pagkahimong anak sa kahayag.
Giunsa nimo pagdapit sa kahayag sa Ginoo diha sa imong kinabuhi? Unsaon nimo pagdapit sa dugang pa gayod nga kahayag sa Ginoo nganha sa imong kinabuhi?
Kalihokan sa Pagtuon 3: Unsaon nato pag-andam ang atong mga kaugalingon alang sa Ikaduhang Pag-anhi ni Jesukristo?
Gitapos ni Pablo ang iyang unang epistola ngadto sa mga Taga-Tesalonica pinaagi sa pagpakigbahin og tambag mahitungod kon unsaon sa mga Santos aron mas maandam sa pagsugat sa Manluluwas sa Iyang Ikaduhang Pag-anhi.
Basaha ang 1 Mga Taga-Tesalonica 5:14–22, ug tan-awa unsa nga mga panabot ang imong makuha mahitungod sa pagkaandam. Pagkahimong bukas sa panghunahuna mahitungod kon unsang mga pagtulun-an ang lagmit pihong makatabang kanimo.
Kon imong gipili kini nga kalihokan sa pagtuon, tubaga ang mosunod nga mga pangutana ug irekord ang cross-reference nga kasulatan nga imong napili.
Hain niini nga mga pagtulon-an ang labing makahuloganon kaayo kanimo? Ngano man?
Pangita og usa o duha ka kasulatan nga nagtabang kanimo nga makapalawom sa imong pagsabot sa pagtulun-an nga imong napili. (Mahimong makapangita ka og hilisgotan diha sa Giya ngadto sa mga Kasulatan aron matabangan ka nga makakita og usa ka may kalabotan nga kasulatan.)
Giunsa ni Jesukristo pagtabang kanimo, o unsaon ka Niya pagtabang, nga maandam sa Iyang Ikaduhang Pag-anhi? Unsa ang imong makat-onan mahitungod Kaniya gikan niini?
Pamalandongi ang mga kamatuoran nga imong nakat-onan karong adlawa ug ang mga buhat nga imong nabating gipang-aghat nga buhaton nga makatabang kanimo aron mas maandam ug maikag sa paghimamat og balik sa Manluluwas. Irekord ang imong mga hunahuna diha sa imong journal sa pagtuon.
Opsiyonal: Gustong Makakat-on Pa og Dugang?
1 Mga Taga-Tesalonica 5:2. Sa unsang paagi nga ang tayming sa Ikaduhang Pag-abot sa Manluluwas matandi sa usa ka kawatan sa kagabhion?
Si Elder Bruce R. McConkie (1915–85) sa Korum sa Napulog Duha ka Apostoles mipasabot nga ang kawatan sa kagabhion kasagaran moabot “nga wala damha ug walay pasidaan” (Doctrinal New Testament Commentary [1973], 3:54). Kini nga analohiya nagsugyot nga ang Ikaduhang Pag-anhi sa Manluluwas moabot ingon og usa ka surpresa ngadto sa uban.
Si Pablo midapit sa mga Santos sa Tesalonica sa “[pagsuta sa tanan nga mga butang]”—nagpasabut sa pagsusi o pagsulay kanila aron masabtan kon sila maayo o dautan—ug sa “[paghupot] sa maayo.” Isip mga miyembro sa Simbahan, gitudloan kita dili lamang sa pagkat-on sa ebanghelyo, apan sa pagpamalandong, pag-ampo, ug sa kataposan pagsabot niini (tan-awa ang 3 Nephi 17:1–3; Doktrina ug mga Pakigsaad 68:25–26). Dayon kinahanglan natong huptan sa hugot ug matinud-anon nga paagi ang maayo nga atong nasabtan.