2 Mga Taga-Tesalonica 2

Ang Dakong Apostasiya

Usa ka grupo sa mga tawo panahon sa Bag-ong Tugon nagpundok palibot sa usa ka tawo. Ang mga tawo naminaw sa tawo nga nag-istorya. Ang imahe nagpakita sa pagtumaw sa sayop nga mga pagtuo ug apostasiya nga nahitabo sa sayong bahin sa Kristiyano nga simbahan human sa pagkamatay sa orihinal nga mga apostol ni Jesukristo.

Unsa kaha ang imong kinabuhi kon wala sa imoha ang kahingpitan sa ebanghelyo ni Jesukristo? Gitudloan ni Pablo ang mga Santos sa Tesalonica nga sa kataposan ang pagkadaotan sa mga tawo moresulta sa pagsupil gikan sa ebanghelyo (tan-awa ang 2 Mga Taga-Tesalonica 2:1–7). Kini nga leksiyon makatabang kanimo nga makasabot giunsa pagkahitabo sa Apostasiya sa Simbahan sa Bag-ong Tugon ug nganong ang Simbahan sa Manluluwas kinahanglan nga ipahiuli sa ulahing mga adlaw.

Ang Dakong Apostasiya

Handurawa nga ikaw usa ka misyonaryo nga anaa sa imong unang adlaw sa misyon. Kinahanglan kang magtudlo sa usa ka tawo mahitungod sa Dakong Apostasiya.

Unsaon man nimo pagpasabot niini ngadto kanila?
Ngano kaha nga kini mahagiton?
Ngano kaha nga importante man nga makasabot sa Dakong Apostasiya?

Sa imong journal sa pagtuon, isulat ang mga pangutana nga aduna ka mahitungod sa Dakong Apostasiya o ang mga pangutana nga lagmit ipangutana sa usa ka investigator. Diha sa imong pagtuon, pagtinguha sa panabang sa Langitnong Amahan aron makakaplag og mga tubag alang niining mga pangutana.

Gitagna ni Pablo ang pagsupil sa Simbahan

Ang mga Santos nga Taga-Tesalonica adunay daghang mga kabalaka mahitungod sa Ikaduhang Pag-anhi ni Jesukristo ug naghunahuna nga kini mahitabo sa labing dali gayod. Gitubag ni Pablo ang ilang mga kabalaka sa iyang sulat ug gipasabot nga adunay laing mahitabo una pa si Kristo mobalik pag-usab.

Ang 2 Mga Taga-Tesalonica 2:1–3 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon ra nimo kining makit-an.

Basaha ang 2Mga Taga-Tesalonica 2:1–3 ug pangita unsa ang gitudlo ni Pablo nga mahitabo una pa ang Ikaduhang Pag-anhi ni Kristo. Gamita ang mga footnote aron sa pagtabang kanimo nga mas makasabot sa mga pulong ni Pablo.

Unsa ang gitudlo ni Pablo nga mahitabo una pa ang Ikaduhang Pag-anhi ni Kristo?

Kining “pagsupil” nga gihulagway ni Pablo mao ang Dakong Apostasiya, diin nahitabo human sa pagkamatay sa Apostoles ni Jesukristo. Kini nga Dakong Apostasiya lahi gikan sa personal nga apostasiya, diin sa higayon nga ang mga indibidwal nagrebelde o nagmasupilon sa kamatuoran (tan-awa ang Giya ngadto sa mga Kasulatan, “ Apostasiya,” scriptures.ChurchofJesusChrist.org).

Sa unsang paagi nga ang mga pulong ni Pablo nagpakita sa pag-atiman ug pagpakabana sa Dios alang sa mga Santos nga Taga-Tesalonica?

Usa sa mga kamatuoran nga atong makat-onan gikan niining mga bersikulo mao nga gipanagna na sa karaan nga una pa ang Ikaduhang Pag-anhi ni Jesukristo, usa ka apostasya gikan sa Iyang Simbahan mahitabo.

Ngano sa imong hunahuna nga importante kini nga kamatuoran nga masabtan?

Si Presidente M. Russell Ballard sa Korum sa Napulog Duha ka Apostoles mipasabot nganong ang mga panahon sa apostasiya mahitabo.

Ang atong Langitnong Amahan naghigugma sa tanan Niyang mga anak, ug Siya buot nga silang tanan makaangkon sa mga panalangin sa ebanghelyo sa ilang mga kinabuhi. Ang espirituhanong kahayag wala mawala tungod ang Dios mitalikod sa Iyang mga anak. Hinoon, ang espirituhanong kangitngit miresulta sa dihang ang Iyang mga anak naghiusang mitalikod Kaniya. Kini natural nga sangpotanan sa sayop nga mga pagpili nga gihimo sa mga indibidwal, mga komunidad, mga nasod, ug sa tanang mga sibilisasyon.

(M. Russell Ballard, “Pagkat-on sa mga Leksyon sa Nangagi,” Liahona, Mayo 2009, 32)

Unsa ang nagpatigbabaw alang kanimo niini nga pamahayag? Ngano man?

Tungod kay ang Langitnong Amahan nahibalo sa tanang mga butang (tan-awa ang 2 Nephi 9:20), ang Dakong Apostasiya wala miabot isip usa ka surprisa ngadto Kaniya. Siya naghigugma sa tanan Niyang mga anak (tan-awa ang Juan 3:16), busa Siya mihatag og paagi sa pagbuntog niining Dakong Apostasiya pinaagi sa Pagpahiuli sa Simbahan ni Jesukristo ug sa ebanghelyo (tan-awa ang Mga Buhat 3:19–21; Mga Taga-Efeso 1:10).

Palawoma ang imong pagsabot sa Dakong Apostasiya

Ang mosunod nga kalihokan makatabang kanimo aron mas makasabot giunsa pagkahitabo sa Dakong Apostasiya ug nganong ang Simbahan sa Manluluwas gikinahanglan nga ipahiuli sa ulahing mga adlaw.

Tun-i ang mosunod nga mga tudling sa kasulatan ug ang pamahayag ni Presidente Russell M. Nelson, ug dayon tubaga ang mga pangutana sa ubos.

1 Nephi 13:24–28: Si Nephi nakakita og usa ka panan-awon kon unsa ang mahitabo sa importanteng mga kamatuoran sa Biblia.
Amos 8:11–12: Gitagna ni Amos nga moabot ang usa ka espirituhanong kagutom.
Mga Buhat 20:29–30: Nagpasidaan si Pablo nga ang mga miyembro sa Simbahan sa Manluluwas mahisalaag gikan sa ebanghelyo.
Si Presidente Russell M. Nelson mitudlo:

“Ang buhi natong Dios mapinanggaon nga Dios! Gusto Siya nga ang Iyang mga anak makaila Kaniya ug kang Jesukristo, kinsa Iyang gipadala! Ug gusto Siya nga ang Iyang mga anak makabaton ug imortalidad ug kinabuhing dayon!

“Tungod niining mahimayaong katuyoan, ang atong mga misyonaryo nagtudlo sa Pagpahiuli. Nahibalo sila nga mga 2,000 ka tuig nang milabay, ang Ginoo miestablisar sa Iyang Simbahan. Human sa Iyang Pagkalansang ug pagkamatay sa Iyang mga Apostoles, giusab sa mga tawo ang Simbahan ug ang doktrina niini. Dayon, human sa mga henerasyon sa espirituhanong kangitngit, ug sigon sa gipanagna sa miaging mga propeta, ang Langitnong Amahan ug si Jesukristo mipahiuli sa Simbahan, doktrina, ug awtoridad sa pagkapari. Tungod niana nga Pagpahiuli, ang kahibalo ug importanteng mga ordinansa sa kaluwasan ug kahimayaan mahimong maangkon na usab sa tanang tawo. Human niana, kana nga pagkahimaya naghimo natong tanan nga makauban ang atong pamilya sa presensiya sa Dios ug ni Jesukristo sa hangtod!”

Russell M. Nelson, “Pahimusli ang Panahon,” Liahona, Mayo 2013, 46

Kon aduna ka pay mga pangutana mahitungod sa unsa ang apostasiya, ikonsiderar ang pagtuon sa “Ang Dakong Apostasiya” diha sa “Leksiyon 1: Ang Mensahe sa Pagpahiuli sa Ebanghelyo ni Jesukristo” sa Isangyaw ang Akong Ebanghelyo: Usa ka Giya sa Misyonaryo nga Pangalagad (2019). Makakt-on usab ka og dugang pa mahitungod niini nga mga hilisgotan pinaagi sa pagtan-aw sa “What Is the Restoration [Unsa ang Pagpahiuli]?” (5:13) o “Jesus Christ’s Church [Simbahan ni Jesukristo]” (1:27), nga makita sa ChurchofJesusChrist.org.

Unsa ang Pagpahiuli?Simbahan ni Jesukristo

Ang Pagpahiuli sa Simbahan ni Kristo
Tingali pamilyar mo sa Pagreporma isip ang panahon sa dakong kausaban sa Kristiyanismo; Ang Pagpahiuli usa ka lahi nga butang. Kini nagpasabut sa hingpit nga pagbalik sa karaang Simbahan ni Jesukristo.

Simbahan ni Jesukristo
Did you know that Jesus Christ established a church when He was on the earth and called twelve Apostles to lead the Church after His death?

Magsulat diha sa piraso sa papel gamit ang ballpen o lapis.

Si Elder Jeffrey R. Holland sa Korum sa Napulog Duha ka Apostoles mipakigbahin og mga pangutana nga lagmit aduna siya ug ang iyang asawa kon sila nabuhi pa panahon sa Dakong Apostasiya: “Unsa ang kulang dinhi? Unsay atong gipangandoy nga duna unta kita? Unsay atong gilauman nga ihatag sa Dios agig tubag sa atong espirituhanong pangaliya?” (“Usa ka Hingpit nga Kahayag sa Paglaom,” Liahona, May 2020, 81). Pamalandong og susama nga mga panghunahuna ug mga pagbati nga lagmit aduna ka kon ikaw nabuhi pa unta niadtong panahona.

Opsiyonal: Gustong Makakat-on Pa og Dugang? 

Ang mga Kristiyanos ba nga nabuhi sa wala pa ang Pagpahiuli nakamatikod sa Apostasiya?

Ang repormador nga si Martin Luther (1483–1546) mitudlo:

Wala akoy laing gitinguha lapas sa pagreporma sa Simbahan nga nahiuyon sa Balaang mga Kasulatan. … Ako yanong moingon nga ang Kristiyanismo wala na maglungtad taliwala niadtong angay untang magpreserbar niini.

(Sa E. G. Schwiebert, Luther and His Times: The Reformation from a New Perspective [1950], 509)

Ang lider sa Sayong Bahin nga Kristiyano nga Amerikano nga si Roger Williams (1603–83) mipasabot:

Ang apostasiya … mihugaw sa tanan nga wala nay pagkaayo gikan niana nga apostasiya hangtod mopadala si Kristo og bag-ong apostoles aron sa pagtukod pag-usab sa mga simbahan.

(Sa Philip Schaff, The Creeds of Christendom, 3 ka bol. [1877], 1:851)

Ang Dutch nga pilosopo nga si Erasmus (1466–1536) mitudlo:

Ang tanan karon nalambigit pag-ayo niini nga mga pangutana [sa doktrina] ug mga mando nga dili gani kita mangahas sa pagtawag sa kalibotan balik ngadto sa tinuod nga Kristiyanismo.

(The Praise of Folly, trans. Clarence H. Miller, 2nd ed. [2003], 155–56)

Aduna bay usa lamang ka apostasiya?

Sa tibuok panahon, adunay daghang mga dispensasyon nga natapos sa apostasiya. Ang Ginoo sa Iyang kaluoy mipahiuli dayon sa Iyang ebanghelyo dinhi sa yuta pinaagi sa pagtawag og mga propeta. Aron sa pagkat-on og dugang bahin niini nga sundanan, tan-awa ang “Dispensations: The Pattern of Apostasy and Restoration [Mga Dispensasyon: Ang Sundanan sa Apostasiya ug Pagpahiuli]” (6:52), anaa sa ChurchofJesusChrist.org.

Mga Dispensasyon: Ang Sumbanan sa Apostasiya ug Pagpahiuli
Si Elder David A. Bednar sa Korum sa Napulog Duha ka mga Apostoles mipasabut sa mga dispensasyon sa ebanghelyo ug nganong lahi kining katapusan nga dispensasyon.

Unsaon nato pagtan-aw ang maayo nga mga tawo sa lain nga mga tinuohan?

Si Presidente Dallin H. Oaks sa Unang Kapangulohan mipasabot:

Kita nagtuo nga kadaghanan sa mga lider ug mga sumusunod sa relihiyon mao ang matinguhaong magtutuo kinsa nahigugma sa Dios ug nakasabot ug moserbisyo Kaniya kutob sa ilang mahimo. Kita may utang kabubut-on sa mga tawo kinsa padayong naghupot sa kahayag sa hugot nga pagtuo ug pagkat-on sulod sa daghang siglo hangtod karon. Kita kinahanglan lamang motandi sa gamay nga kahayag nga anaa taliwala sa mga tawo nga dili pamilyar sa mga ngalan sa Dios ug ni Jesukristo aron makaamgo sa dakong kontribusyon nga nahimo sa Kristohanong mga magtutudlo latas sa mga katuigan. Kita nagpasidungog kanila ingong mga alagad sa Diyos.

(Dallin H. Oaks, “Apostasy and Restoration,” Ensign, Mayo 1995, 85)