Mga Taga-Filipos 3

“Ako Nag-antus sa Kapildihan sa Tanang mga Butang … Aron Ako Makadaug kang Kristo”

Unsa ang andam nimong isakripisyo aron makasunod kang Jesukristo ug mahimong Iyang disipulo? Si Apostol Pablo daghan og gitalikdan dihang iyang gipili nga mosunod sa Manluluwas, lakip ang iyang maimpluwensiyahong kahimtang sa katilingban sa Judio isip usa ka Pariseo (tan-awa ang Mga Taga-Filipos 3:5). Kini nga leksiyon mahimong makatabang kanimo nga makasabot sa importansiya sa paghimo og mga sakripisyo aron makaila kang Jesukristo.

Unsa ang ihatag nimo?

Basaha ang mosunod nga asoy ni Presidente Dallin H. Oaks sa Unang Kapangulohan bahin sa usa ka batan-ong lalaki kinsa mipakigbahin ngadto ni Presidente Gordon B. Hinckley (1910–2008) sa mga sakripisyo nga siya andam mobuhat aron mahimong miyembro sa Simbahan.

sakripisyo

Ang atong kinabuhi sa pagserbisyo ug pagsakripisyo ang labing tukma nga pahayag sa atong pasalig sa pagserbisyo sa Manluluwas ug sa atong isigkatawo.

Kaniadto nadunggan dinhi ang bahin sa batan-ong lalaki nga nakakaplag sa gipahiuling ebanghelyo samtang nag-eskwela sa Estados Unidos. Sa hapit na siya mouli sa iyang nasod, si Presidente Gordon B. Hinckley nangutana niya unsay mahitabo niya kon mopauli na siya isip Kristiyano. “Masagmuyo ang akong pamilya,” mitubag ang batan-ong lalaki. “Mahimong palayason ko nila ug isipon nga patay na. Sa akong kaugmaon ug panginabuhi, tanang oportunidad mahimong mawala.” “Andam ka ba nga mobayad og dakong bili alang sa ebanghelyo?” Nangutana si Presidente Hinckley.

(Dallin H. Oaks, “Sakripisyo,” Liahona, Mayo 2012, 21.)

• Sa imong hunahuna giunsa kaha pagtubag sa batan-ong lalaki? Ngano man?

• Unsa kaha ang makapadasig sa usa ka tawo sa pagtalikod sa daghan kaayong mga butang aron mosunod kang Jesukristo?

Diha sa imong pagtuon sa Mga Taga-Filipos 3, hunahunaa unsa ang imong gisakripisyo alang sa ebanghelyo ni Jesukristo ug sa unsang paagi ikaw napanalanginan sa pagbuhat sa ingon. Sa lain pang bahin, ang pagsakripisyo aron mas mahiduol sa Manluluwas mahimong usa ka dili pamilyar nga konsepto kanimo. Bisan unsa pa man ang imong kahimtang, ang Manluluwas matinguhaon sa pagtabang kanimo nga mouswag. Sa tibuok leksiyon, hatagig pagtagad ang mga hunahuna ug mga pagbati gikan sa Espiritu Santo nga mahimong makatabang kanimo nga makasabot sa tahas sa pagsakripisyo diha sa imong kinabuhi.

Ang ebanghelyo ni Jesukristo takos sa matag sakripisyo

Hinumdomi nga sa wala pa ang pagkakabig ni Pablo ngadto kang Jesukristo sa dalan paingon sa Damasco (tan-awa ang Mga Buhat 9), siya usa ka Pariseo, usa ka tawo nga taas ug relihiyoso ug sosyal nga posisyon taliwala sa mga Judio (tan-awa ang Mga Taga-Filipos 3:5). Tungod kay gipili niya ang pagsunod ni Jesukristo ug gigahin ang iyang kinabuhi sa pagsangyaw sa ebanghelyo, si Pablo nakasinati og grabeng pagpanggukod, kalisdanan, pisikal nga kasakit, ug emosyonal nga kahingawa (tan-awa ang 2 Mga Taga-Corinto 11:23–28). Atong nabasa sa Mga Taga-Filipos 3:7–17 unsa ang gibati ni Pablo mahitungod sa iyang pagtalikod sa kanhing kinabuhi aron sa pagsunod ni Jesukristo ug sa mga panalangin nga miabot isip resulta.

Basaha ang Mga Taga-Filipos 3:7–14 nga mangita kon unsa ang andam nga talikdan ni Pablo aron makaila ug mosunod kang Jesukristo. Timan-i nga ang pulong nga mahisama sa bersikulo 10 nagpasabot nga mauyonan, ang hugpong sa mga pulong nga “nagpadayon ako sa pagpaningkamot” diha sa bersikulo 12 nagpasabot nga padayon sa unahan, ang pulong nga pagkab-ot diha sa bersikulo 12 nagpasabot nga pag-angkon.

1. Kompletoha ang mosunod diha sa imong journal sa pagtuon:

Pagpili og duha ka mga tudling o mga hugpong sa pulong gikan sa Mga Taga-Filipos 3:7–14 ug isulat og balik ang mensahe ni Pablo sa imong kaugalingong mga pulong. Pananglitan, usa ka paagi sa pagsultig balik sa mensahe sa Mga Taga-Filipos 3:7 mao “Ang mga butang nga importante kanako kaniadto, karon wala nay bili kanako tungod ni Jesukristo.” Kon mahuman na ka, tubaga ang mosunod nga mga pangutana.

• Unsa ang pipila sa mga panalangin nga nadawat ni Pablo gumikan sa iyang pagsakripisyo alang sa Ginoo?

• Unsa ang pipila sa mga panalangin nga iya gihapong gipaningkamotan nga makab-ot pinaagi sa iyang mga sakripisyo?

• Unsang mga baroganan ang atong makat-onan gikan sa ehemplo ni Pablo sa pagsakripisyo?

Usa ka baroganan nga atong makat-onan gikan sa ehemplo ni Pablo mao nga kon atong biyaan ang tanan nga gikinahanglan ngari kanato aron sa pagsunod ni Jesukristo ug mopadayon sa unahan diha sa hugot nga pagtuo, kita makaila Kaniya ug makaangkon og kinabuhing dayon. Ikonsiderar ang pagsulat niini nga baroganan diha sa imong mga kasulatan o sa journal sa pagtuon.

Paggahin og higayon sa pagpamalandong sa unsang paagi kini nga baroganan may kalabotan kanimo.

• Unsa nga mga hunahuna, mga pangutana, o mga pagbati ang aduna ka?

Personal nga sakripisyo

Hinumdomi ang pangutana nga gipakita ni Presidente Hinckley sa sinugdanan sa leksiyon kalabot sa pagkaandam sa batan-ong lalaki sa pagsakripisyo og dako kaayo alang sa ebanghelyo. Basaha ang nahabilin nga asoy nga gipakigbahin ni Presidente Dallin H. Oaks.

Nagluha-luha ang batan-ong lalaki nga mitubag, “Tinuod kini, dili ba?” Sa dihang namatud-an, mitubag siya, “Busa unsa pay angay nga kabalak-an?” Kana ang diwa sa sakripisyo sa atong bag-ong mga miyembro.

(Dallin H. Oaks, “Sakripisyo,” Liahona Mayo 2012, 21)

• Unsa ang nakapadayeg kanimo mahitungod niining batan-ong lalaki?

• Sa unsang paagi nga ang kinabuhi, pangalagad, ug Pag-ula sa Manluluwas mao ang hingpit nga ehemplo sa sakripisyo?

• Unsa nga mga hunahuna o mga pagbati ang anaa nimo kon ikaw mamalandong unsa ang andam isakripisyo ni Jesukristo alang kanimo?

2. Kompletoha ang mosunod diha sa imong journal sa pagtuon:

Paghunahuna mahitungod sa sunod nga lima ka mga tuig sa imong kinabuhi ug pagsulat og sulat alang sa imong umaabot nga kaugalingon. Ilakip sa imong sulat ang mosunod nga mga detalye:

1. Mga butang nga tingali kinahanglan nimong isakripisyo sa sunod nga lima ka tuig aron mas makaila sa Ginoo ug makaandam alang sa kinabuhing dayon.

2. Mga babag nga mahimo nimong masugatan samtang mohimo ka og mga sakripisyo ug “[mopadayon] paingon … sa ganti” (Mga Taga-Filipos 3:14).

3. Unsa ang imong nakat-onan mahitungod sa kaimportansiya sa pagsakripisyo ug ang mga panalangin nga moabot isip resulta.

4. Sa unsang paagi nga ang pagsakripisyo mahimong makatabang nimo aron mas mahisama sa Manluluwas.

Opsiyonal: Gustong Makakat-on pa og dugang?

Mga Taga-Filipos 3:14. Unsa ang gipasabot ni Pablo dihang siya miingon, “Ako nagpadayon paingon sa dauganan”?

Si Elder Edward Dube sa Kapitoan nagtudlo sa mosunod.

Ang pagpadayon paingon sa daoganan mao ang matinud-anon nga pagpadayon diha sa “higpit ug pig-ot nga dalan nga mopadulong sa kinabuhi nga dayon” [2 Nephi 31:18] uban sa atong Manluluwas ug sa atong Amahan sa Langit. Gitan-aw ni Pablo ang iyang mga pag-antos nga “dili takos nga ikatandi sa himaya nga ipadayag ra unya kanato.” [Mga Taga-Roma 8:18; tan-awa usab ang 2 Mga Taga-Corinto 1:3–7]. Ang sulat ni Pablo ngadto sa Mga Taga-Filipos, nga iyang gisulat dihang gigapos siya sulod sa prisohan, usa ka sulat kabahin sa hilabihang kalipay ug pagmaya ug pagdasig alang kanatong tanan, ilabi na niining malisod nga panahon sa walay kasigurohan. …

Makaikag kaayo, ang pag-awhag ni Pablo nato sa pagpadayon sa unahan, samtang nagtudlo nato sa pagkalimot sa nangagi—atong nangaging mga kahadlok, atong mga gikahinaman, atong mga kapakyasan, ug nangaging kagul-anan.

(Edward Dube, “Nagapadayon Paingon sa Daoganan,” Liahona Mayo 2021, 90, 91)

Unsaon nako pagkahibalo unsa nga mga sakripisyo ang akong kinahanglang buhaton aron mas mahiduol kang Jesukristo?

Si Elder Larry R. Lawrence sa Seventy mitudlo nga ang labing maayong higayon sa matinahoron nga pagkonsiderar unsa nga mga sakripisyo ang atong himoon alang sa Ginoo mao ang panahon sa ordinansa sa sakramento.

Niining hilom nga palibot, samtang padulong sa langit ang atong mga hunahuna, sa kalumo mosulti ang Ginoo kanato unsay sunod natong buhaton. Sama ninyo, nakadawat ko og daghang mensahe gikan sa Espiritu sulod sa mga katuigan kon unsaon nako nga molambo. …

Tingali ang Espiritu moingon ninyo nga kinahanglan mo nga mopasaylo sa lain. O makadawat mo og mensahe nga kinahanglan mong mopili og maayong salida nga tan-awon o musika nga paminawon. Tingali madasig mo nga mas magmatinuoron sa inyong negosyo o mohatag og mas daghang halad sa puasa. Ang mga posibilidad walay kinutoban.

(Larry R. Lawrence, “Unsa Pa May Akong Kulang?” Liahona, Nob. 2015, 22–23)

Unsa ang pipila ka mga sakripisyo nga gihimo sa mga miyembro sa Ang Simbahan ni Jesukristo sa mga Santos sa Ulahing mga Adlaw sa pagsunod sa Manluluwas?

Si Presidente Dallin H. Oaks sa Unang Kapangulohan milista og daghang mga sakripisyo nga gihimo sa mga miyembro sa gipahiuli nga Simbahan sa Ginoo. Mahimo nimong basahon ang iyang pakigpulong nga “Sakripisyo Liahona, May 2012, 19–22, o tan-awa ang “Sakripisyo” (16:30), anaa sa ChurchofJesusChrist.org.

sakripisyo

Ang atong kinabuhi sa pagserbisyo ug pagsakripisyo ang labing tukma nga pahayag sa atong pasalig sa pagserbisyo sa Manluluwas ug sa atong isigkatawo.