Usa ka batan-ong lalaki nagsul-ob og panahon sa Bag-ong Tugon nga panagang nga adunay espada ug taming.
Ania kita sa usa ka gubat alang sa mga kalag sa katawhan. Ang Langitnong Amahan nagdasig kang Pablo aron magtudlo mahitungod sa unsang paagi kita makalahutay sa mga pag-atake ni Satanas. Kini nga leksiyon gituyo aron sa pagtabang kanimo nga makasabot unsa ang gihatag sa Dios aron sa pagpanalipod kanimo gikan sa mga kadaotan sa kalibotan, pagtimbang-timbang sa imong kasamtangan nga espirituhanong pagpangandam, ug paghimo og plano aron mapalambo ang imong espirituhanong mga proteksyon.
Si Satanas agresibo diha sa iyang mga paglingla
Unsa sa imong hunahuna ang dakong kalahian tali sa unsa ang imong nasinati isip usa ka tinedyer ug unsa ang nasinati sa imong mga ginikanan kaniadtong sila anaa sa imong edad?
Basaha ang mosunod nga pamahayag ni Elder Robert D. Hales (1932–2017) sa Korum sa Napulog Duha ka Apostoles, ug pangita og usa ka kalahian nga iyang gi-highlight:
Imahe
Opisyal nga litrato ni Elder Robert D. Hales sa Korum sa Napulog Duha ka Apostoles, 2003
Ang inyong mga amahan ug apohan wala makasinati sa mga tintasyon nga inyong nasinati kanunay. Nagpuyo kamo sa kataposang adlaw. Kon ang inyong amahan ganahan og gubot, pangitaon pa niya kini. Dili na karon! Karon ang tintasyon mangita kaninyo! Palihog hinumdomi kana! Si Satanas nagtinguha sa pag-angkon ninyo, ug ang “sala naghulat diha sa pultahan.” [Moises 5:23]. Unsaon ninyo pagbatok sa iyang [agresibo nga] mga paglingla?
Unsa ang mga paagi nga ang tintasyon mangita kanato karon kaysa nga kita ang mangita niini?
Pamalandongi ang mosunod nga mga pangutana, o isulat ang imong mga tubag diha sa imong journal sa pagtuon.
Unsa ang pipila ka mga paagi nga si Satanas naningkamot sa pagtintal kanimo sa personal?
Unsa ang imong gibuhat aron mangita sa panabang sa Ginoo sa pagpakigharong sa mga tintasyon ni Satanas? Unsa may maayo nimong nahimo? Unsa kaha ang imong kinahanglang buhaton aron molambo?
Samtang nagtuon ka niini nga leksiyon, pangitaa ang giya sa Espiritu Santo aron matabangan ka nga mahibalo unsaon nimo pagpangita ug mas hingpit nga madawat ang pagpanalipod sa Manluluwas sa imong kinabuhi gikan sa mga pagpangatake ni Satanas.
Ang proteksyon sa Ginoo
Basaha ang Mga Taga-Efeso 6:10–13, og pangitaa kon unsay giingon ni Pablo nga gipakigbatokan sa mga Santos sa iyang panahon.
Unsa nga mga pagkaparehas ang inyong nakita taliwala sa unsa ang gipakigbatokan sa mga Santos sa Efeso sa ilang panahon ug sa unsa ang atong gipakigbatokan karon?
Nganong ang Langitnong Amahan ug si Jesukristo gusto nga kita mapanalipdan batok sa dautan? Unsay ikatudlo niini nga tinguha kanato mahitungod Kanila?
Unsa ang gidapit ni Pablo sa mga Taga-Efeso nga buhaton aron makaharong niini nga mga daotan?
Gikan sa Mga Taga-Efeso 6:10–13, atong nakat-onan nga kon atong isul-ob ang tibuok nga hinagiban sa Dios, kita mahimong makaharong sa daotan.
Ang hinagiban sa Dios mao ang usa ka metapora o simbolo alang sa pagpanalipod nga gitanyag kanato sa Langitnong Amahan ug ni Jesukristo. Sa gubat nga atong giatubang, ang hinagiban sa Dios mao ang espesyal nga gidisenyo alang kanimo ug sa mga peligro sa imong kinabuhi. Aron matabangan ka nga makasabot niining balaan nga pagpanalipod, mahimo nimong kopyahon ang mosunod nga hulagway sa imong journal sa pagtuon o i-print kini. Irekord sa diyagram ang imong mga tubag sa mosunod nga kalihokan:
Imahe
Usa ka panagang ug taming sa karaan nga suldalo nga nagrepresentar sa hinagiban sa Dios. Adunay teksto nga mopasabot sa nagkalain-laing mga elemento sa hinagiban. Base sa Doktrina ug mga Pakigsaad 27:15-18. “15 Busa, ipataas ang inyong mga kasingkasing ug pagmaya, ug pagbakos sa inyong mga bat-ang, ug pagsul-ob diha kaninyo sa akong tibuok nga ataming, nga kamo makasugakod sa daotan nga adlaw, human makabuhat sa tanan, nga kamo unta makahimo sa pagbarog. 16 Busa, barog, ingon nga ang inyong bat-ang gibaksan uban sa kamatuoran, nga adunay gisul-ob nga taming sa pagkamatarong, ug ang inyong mga tiil hinapinan uban sa pagpangandam sa ebanghelyo sa kalinaw, diin Ako mipadala sa akong mga anghel sa pagtugyan nganha kaninyo; 17 Magdala sa panagang sa hugot nga pagtuo diin kamo makasagubang sa tanan nga nagdilaab nga mga pana sa daotan; 18 Ug dad-a ang kalo nga puthaw sa kaluwasan, ug ang espada sa akong Espiritu, diin Ako mobu-bu diha kaninyo, ug ang akong pulong diin Ako nagpadayag nganha kaninyo, ug pagauyonan ingon kalabot sa tanan nga bisan unsa nga mga butang nga inyong pangayoon kanako, ug pagmatinud-anon hangtod nga Ako moanhi, ug kamo apagadad-on, nga hain Ako kamo atua usab. Amen.”
Basaha ang Mga Taga-Efeso 6:14–18 aron maila ang matag bahin sa hinagiban sa Dios, o tan-awa ang “The Armor of God [Ang Hinagiban sa Dios]” (2:01), anaa sa ChurchofJesusChrist.org. Isulat unsa ang girepresentar sa matag piraso sa hinagiban diha sa imong diyagram. Mahimong makatabang ang pagkahibalo nga ang “[masapinan] ang mga tiil” (Mga Taga-Efeso 6:15) nagpasabot og pagsul-ob og usa ka panalipod nga tabon sa tiil.
Palawoma ang imong pagsabot sa mga piraso sa hinagiban sa Dios pinaagi sa pagbuhat sa mosunod nga kalihokan.
1. Tubaga ang mosunod nga mga pangutana alang sa labing menos usa ka piraso sa hinagiban ni Kristo. Kon nagkinahanglan kamo og tabang, usa ka pananglit ang gihatag sa ubos alang sa “[mabaksan] ang inyong mga hawak sa kamatuoran” (Mga Taga-Efeso 6:14). Palihog pagpili og usa sa lain pang mga piraso sa hinagiban alang niini nga kalihokan.
Unsang espirituhanong konsepto ang gilambigit ni Pablo niini nga piraso sa hinagiban?
Unsa man kaha ang girepresentaran sa espirituhanong paagi sa bahin sa lawas nga napanalipdan sa hinagiban?
Sa unsang paagi kita makasul-ob niini nga piraso sa hinagiban sa Ginoo aron makadawat sa Iyang pagpanalipod batok sa daotan?
Alang sa “[baksan] ang mga hawak sa kamatuoran” (Mga Taga-Efeso 6:14), ang mosunod mahimong tubag sa mga pangutana sa ibabaw: (1) kamatuoran; (2) kini nagrepresentar sa atong kaputli o moral nga kaputli; ug (3) kita makakat-on og mga kamatuoran mahitungod sa Langitnong Amahan ug sa Iyang plano sa kaluwasan nga makapaikag kanato aron magpabilin nga putli sa moral.
2. Tubaga ang mosunod nga mga pangutana diha sa imong journal sa pagtuon:
Unsa nga mga peligro ang imong nakita sa pagsul-ob og usa lamang ka bahin sa hinagiban sa Ginoo? Ngano kaha sa imong hunahuna nga ang Langitnong Amahan ug si Jesukristo gusto nga ikaw kompleto nga mapanalipdan?
Unsa ang imong buhaton kada adlaw aron mas hingpit nga makasul-ob sa tibuok hinagiban sa Dios aron mapanalipdan batok sa mga tintasyon nga imong giatubang?
Sa unsang paagi nga ang pagdangop ngadto sa Langitnong Amahan ug kang Jesukristo alang sa tabang niining paagiha usa ka pagpakita sa imong gugma ug pagsalig Kanila?
Opsiyonal: Gustong Makakat-on Pa og Dugang?
Unsa ang kamahinungdanon sa mga parte sa lawas nga gipanalipdan pinaagi sa hinagiban sa Manlululwas?
Si Presidente Harold B. Lee (1899–1973) miingon:
Imahe
Gikan sa ulo ug kutob sa abaga nga litrato sa Presidente sa LDS nga Simbahan nga si Harold B. Lee.
Gibatonan nato ang upat ka bahin sa lawas nga giingon ni Apostol Pablo nga [mga] pinakatumong nga bahin sa mga pwersa sa kangitngit. Ang mga bat-ang [hawak], nga nagsimbolo sa mga hiyas, kaputli. Ang kasingkasing nga nagsimblo sa atong kinaiya. Ang atong mga tiil, atong mga tinguha o mga tumong sa kinabuhi ug sa kataposan ang atong ulo, atong mga hunahuna.
(Harold B. Lee, “Feet Shod with the Preparation of the Gospel of Peace,” Brigham Young University Speeches of the Year [Nov. 9, 1955], 2)
Unsay akong mahimo aron masul-ob ang tibuok hinagiban sa Dios?
Si Elder Neal A. Maxwell (1926–2004) sa Korum sa Napulog Duha ka Apostoles mitudlo:
Imahe
Kataposang opisyal nga litrato ni Elder Neal A. Maxwell, 1992.
Ang paghukas sa natural o kinaiyanhong pagkatawo maghimong posible nga masul-ob ang tibuok nga hinagiban sa Dios, nga kaniadto dili pa hingpit ang pagkahaom! (tan-awa ang Mga Taga-Efeso 6:11, 13).
(Neal A. Maxwell, “Plow in Hope,” Ensign,, Mayo 2001, 60)
Si Presidente M. Russell Ballard sa Korum sa Napulog Duha ka Apostoles mitudlo:
Imahe
Opisyal nga hulagway ni Presidente M. Russell Ballard sa Korum sa Napulog Duha ka Apostoles, 2004.
Gusto nakong hunahunaon nga kini nga espirituhanong hinagiban dili usa ka tibuok nga piraso sa metal nga gihulma aron mosakar sa lawas apan mas sama sa usa ka ginagmayng kinadena nga puthaw. Ang usa ka kinadena nga puthaw naglangkob og mga puthaw nga gitapot aron ang mogamit niini sayon rang makalihok nga dili mawad-an sa panalipod. Makaingon ko niana tungod kay kasinatian na nako kini nga wala kitay dako ug mahinungdanong butang nga mahimo aron maarmasan ang atong kaugalingon sa espirituhanong paagi. Ang tinuod nga espirituhanong gahom anaa sa daghang ginagmay nga mga buhat nga gihiusa aron mahimong espirituhanon nga kalig-on nga mopanalipod ug mosangka sa tanang dautan.
(M. Russell Ballard, “Be Strong in the Lord,” Ensign,, Hulyo 2004, 8)
Sa unsang paagi nga ang mga sapot sa templo [temple garments] nahimong may kalabotan sa hinagiban sa Dios?
Si Elder Carlos E. Asay (1926–99), sa Kapangulohan sa Seventy mipasabot:
Imahe
Litrato ni Carlos E. Asay
Adunay, bisan pa niana, laing piraso sa hinagiban nga takos sa atong konsiderasyon. Kini mao ang espesyal nga pang-ilawom nga sapot nga giila isip sapot sa templo, o sapot sa balaan nga pagkapari, gisul-ob sa mga sakop sa Simbahan ni Jesukristo sa mga Santos sa Ulahing mga Adlaw kinsa nakadawat sa ilang endowment sa templo. Kini nga sapot, gisul-ob sa adlaw ug gabii, nag-alagad sa tulo ka importante nga mga katuyoan: kini usa ka pahinumdom sa sagradong mga pakigsaad nga gihimo sa Ginoo sa Iyang balaang panimalay, usa ka pagpanalipod nga tabon sa lawas, ug usa ka simbolo sa kaligdong sa sinina ug pagpuyo nga angay magkinaiya sa mga kinabuhi sa tanang mga mapaubsanong sumusunod ni Kristo.
(Carlos E. Asay, “The Temple Garment: ‘An Outward Expression of an Inward Commitment,” Ensign, Ago. 1997, 20)
