Mga Taga-Efeso 2

Si Jesukristo, ang Ulohang Bato sa Pamag-ang

Ang mga Santos nga nagpuyo sa Efeso kinsa mga Hentil sa wala pa nakabig tingali mibati sama sa “ mga langyaw o mga dumuluong” (Mga Taga-Efeso 2:19) samtang sila nagsimba kauban ang mga Judio nga Kristiyanos. Gipahimangnoan ni Pablo ang mga Santos sa Efeso nga sila gihiusa pinaagi ni Jesukristo isip “mga katagilungsod … sa panimalay sa Dios” (Mga Taga-Efeso 2:19). Ang simbahan nga ilang gisakopan karon gitukod diha sa pundasyon ni Kristo ug sa Iyang apostoles ug mga propeta ug adunay gahom sa pagpanalangin kanila diha sa ilang panagtigom sa hugot nga pagtuo kang Jesukristo. Kini nga leksiyon makatabang kanimo nga maila ug magtinguha sa mga panalangin nga anaa tungod kay si Jesukristo nangulo sa Iyang Simbahan karon pinaagi sa mga propeta ug apostoles.

Usa ka pagbati nga nahisakop

• Ngano kaha nga ang usa ka tawo mobati nga siya sama og wala dawata isip miyembro sa Ang Simbahan ni Jesukristo sa Mga Santos sa Ulahing mga Adlaw?

• Kon ang usa ka tawo mibati nga siya wala nadawat sa Simbahan, unsa nga tambag ang imong ihatag kaniya?

Pamalandong unsa ang imong gibati mahitungod sa Simbahan sa Ginoo. Kanus-a ka mibati og kusog nga pagbati nga nahisakop sa Simbahan? Aduna bay mga panahon diin mibati ka nga murag wala ka mihaom? Unsa nga mga panalangin ang imong nabati nga anaa isip usa ka miyembro sa Simbahan ni Kristo? Sa imong pagtuon niini nga leksiyon, pangita og mga kamatuoran kon unsa ang gibuhat sa Ginoo alang kanato nga makahiusa kanato isip mga miyembro sa Iyang Simbahan.

Pagguba sa mga babag

Sa panahon ni Pablo nga Apostol, ang mga dili Judio nga nakabig ngadto sa Kristiyanismo (o kadtong sa una mga Hentil) tingali mibati nga sila wala nadawat sa uban sa Simbahan ug tingali mas mibati og sama sa “mga langyaw o mga dumuloong” (Mga Taga-Efeso 2:19). Pananglitan, didto sa templo sa Jerusalem, dili sila tugotan nga molapas sa “ nag-ulang nga bungbong” (Mga Taga-Efeso 2:14) ngadto sa mas sagradong mga dapit sa templo diin ang mga Judio lamang, lakip ang mga Judio nga Kristiyano, ang mahimo nga makaadto. Dugang pa niini, ang mga Hentil wala mahatagi og mga panalangin sa ebanghelyo hangtod sa pagpadayag sa Langitnong Amahan ngadto kang Pedro (tan-awa ang Mga Buhat 10).

Si Pablo nisulat ngadto sa mga Santos sa Efeso, kinsa mga bag-o lang nakabig. Basaha ang Mga Taga-Efeso 2:12–14, 18–21, nga mangita kon giunsa sa pagpanalangin sa Ginoo ang mga Taga-Efeso. Mahimong makatabang ang pagkahibalo nga kining mga bersikulo nagsugod kang Pablo nga midapit niining mga Santos sa paghinumdom sa ilang kinabuhi sa wala pa ang ilang pagkakabig. Ang “panimalay sa Dios” (bersikulo 19) nga gisulti ni Pablo nagpasabot sa Simbahan ni Jesukristo.

Ang Mga Taga-Efeso 2:19–20 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Makakat-on ka og dugang mahitungod niining tudling sa doktrinal nga kahanas sa sunod nga leksiyon.

Kon gusto ka nga motan-aw og bidyo nga nagpakita sa Mga Taga-Efeso 2:10–22, ikonsiderar ang pagtan-aw sa “Ye Are No More Strangers” (2:27), anaa sa ChurchofJesusChrist.org.

Ye Are No More Strangers

Paul teaches that the Atonement of Jesus Christ is available for all of God's children. Ephesians 2:10–22

• Giunsa sa pagpanalangin sa Ginoo ang mga Taga-Efeso?

Pinaagi sa Iyang Pag-ula, gitangtang ni Jesukristo ang tanang mga babag nga nagbulag sa mga Judio gikan sa mga Hentil ug usab ang nagbulag sa mga Hentil gikan sa Dios. Ang mga Hentil dili na kinahanglang mahimong mga Judio, magpuyo sa balaod ni Moises, o mahimong magpatuli aron magpasakop sa Simbahan. Sa dihang sila miadto kang Jesukristo ug midawat sa Iyang ebanghelyo, sila anaa sa “ panimalay sa Dios” (Mga Taga-Efeso 2:19)—kabahin sa katawhan sa pakigsaad sa Dios.

• Sa unsang mga paagi ang Manluluwas nagguba sa mga babag taliwala kanato ug sa uban?

• Unsa ang imong mabati mahitungod sa tanan nga adunay “[kahigayonan nga] makaduol sa Amahan” (bersikulo 18) pinaagi sa “dugo ni Kristo” (bersikulo 13)?

• Sa unsang paagi nimo mapamubo ang mga panalangin sa bersikulo 19–21 ngadto sa usa ka tawo nga mibati nga siya wala madawat sa Simbahan sa Ginoo?

• Nganong sa imong hunahuna gitandi man ni Pablo ang Simbahan ngadto sa usa ka panimalay o pamilya?

Ang ulohang bato sa pamag-ang

Sa panahon ni Pablo, ang ulohang bato sa pamag-ang mao ang usa ka dakong bato nga gibutang sa pamag-ang sa pundasyon. Ang matag pamag-ang sa usa ka pundasyon nagsuporta og dakong gibug-aton sa istruktura ug nagsilbi aron pagkonektar sa mga bungbong. Ang anggulo ug pagkabutang sa tanang laing mga bato gisukod gikan sa ulohang bato sa pamag-ang.

Pagdrowing og usa ka representasyon kon unsa ang gihulagway sa Mga Taga-Efeso 2:19–21. Mahimo nimong nganlan ang imong gidrowing gamit ang mga termino gikan sa tudling sa kasulatan.

• Unsang mga kamatuoran ang atong makat-onan kon giunsa ni Jesukristo pagtukod ang Iyang Simbahan?

1. Tubaga ang mosunod nga mga pangutana diha sa imong journal sa pagtuon:

• Unsa ang imong nahibaloan mahitungod kang Jesukristo nga makapahimong angayan sa pagtandi Kaniya ngadto sa usa ka ulohang bato sa pamag-ang?

• Sa unsang mga pamaagi kita makatukod sa atong mga kinabuhi diha sa Manluluwas ug sa Iyang apostoles ug mga propeta?

• Sa unsang paagi nga ang pagtukod sa atong mga kinabuhi diha sa pundasyon ni Jesukristo ug sa Iyang mga propeta ug apostoles makatabang kanato nga makakita og luna ug katuyoan diha sa Simbahan?

Ang imong pundasyon

Samtang nagbuhat ka sa mosunod nga mga kalihokan, pamalandongi kining mga pangutana:

• Unsa ang akong gibuhat aron pagtukod sa akong kinabuhi diha sa pundasyon sa mga propeta ug apostoles inubanan ni Jesukristo isip ulohang bato sa pamag-ang? Unsa nga mga panalangin ang akong nasinati?

• Sa unsang mga paagi kaha ang Ginoo gusto nga ako mas makatukod niini nga pundasyon?

2. Buhata ang bisan duha lang sa mosunod nga mga kalihokan:

1. Paggahin og pipila ka higayon sa pagpamalandong unsa kaha ang imong kinabuhi kon wala ang mga propeta ug apostoles sa Ginoo sa kalibotan karon. Handurawa ang kinabuhi nga wala ang awtoridad gikan sa Ginoo, ug ilang madasigong mga pagtulun-an, giya, ug Kristohanong ehemplo. Isulat sa imong journal sa pagtuon kon sa unsang paagi malahi ang kinabuhi ug unsa ang mawala kanimo.

2. Wala madugay sa iyang epistola, si Pablo mihisgot og dugang nga mga panalangin nga moabot pinaagi sa mga propeta, apostoles, ug sa uban pang mga lider sa Simbahan. Basaha ang Mga Taga-Efeso 4:11–14 ug mahimong markahan kini nga mga panalangin. Mahimong makatabang ang pagkahibalo nga ang usa ka ebanghelista mao ang usa ka patriyarka, ug ang usa ka pastor nagpasabot sa usa ka lider sa kongregasyon, sama sa usa ka pangulo sa estaka [stake] o sa distrito, bishop o presidente sa branch . Isulat ang usa o duha ka mga paagi nga imong nasinati kini nga mga panalangin.

3. Pagpili og usa o duha sa mga hilisgotan diha sa Alang sa Kalig-on sa Kabatan-onan (booklet, 2011). Pagsulat og pihong mga paagi nga kining paggiya gikan sa apostoles ug mga propeta sa Ginoo nakatabang kanimo.

4. Paghunahuna kon sa unsang paagi nga ang mga propeta ug ang mga apostol nakatabang kanimo nga makaila sa Manluluwas ug mahimong mas mahisama Kaniya. Isulat ang imong mga hunahuna diha sa imong journal sa pagtuon. Ang mosunod nga mga bidyo (anaa sa ChurchofJesusChrist.org) mahimo tingaling makatabang kanimo sa pagpamalandong ug pagsulat.

   • “Mga kinutlo gikan sa ‘Ang Buhi nga Kristo: Ang Pagpamatuod sa mga Apostoles’”(2:45)

     Excerpts from "The Living Christ: The Testimony of the Apostles"

     As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

   • “Siya Buhi: Mga Pagpamatuod ni Jesukristo” (2:11)

     He Lives: Testimonies of Jesus Christ

     See and hear modern-day Apostles testify that Jesus Christ is the Savior and that He lives today.

Unsay imong nakat-onan?

Aron taposon kini nga leksiyon, paghunahuna kon unsa ang imong nakat-onan. Ikonsiderar sa unsang paagi nga ang pagtukod sa imong kinabuhi sa pundasyon sa mga propeta ug apostoles inubanan ni Jesukristo isip ulohang bato sa pamag-ang naghiusa kanimo kauban sa “panimalay sa Dios” (Mga Taga-Efeso 2:19). Paghunahuna mahitungod sa unsang paagi nimo mas matukod ang imong kinabuhi diha sa pundasyon sa mga propeta ug apostoles kauban ang Manluluwas isip ang ulohang bato sa pamag-ang.

Opsiyonal: Gustong Makakat-on Pa og Dugang?

Mga Taga-Efeso 2:14. Unsa ang “nag-uwang nga bungbong” nga gisulti ni Pablo?

Ang templo sa Jerusalem naglangkob og pipila ka mga hawanan o dapit, ug ang piho lamang nga mga matang sa tawo ang makasulod sa matag hawanan. Ang mga Hentil gitugotan nga mosaka sa bukid sa templo ug mosulod sa gawas nga hawanan, nga gitawag og hawanan sa mga Hentil. Ang sulod nga mga hawanan sa templo, hinoon, gialihan og usa ka espesyal nga babag o bungbong nga mga usa ka metro ang gitas-on aron dili magamit sa mga Hentil. Kon ang usa ka Hentil molapas niini nga bungbong, mahimo siyang pahamtangan og kamatayon. Ang mga archaeologist nakadiskobre og duha sa marmol nga mga bloke nga naglangkob niini nga babag, ug kini adunay mga sinulat sa Griyego ug Latin nga mabasa: “Walay langyaw nga molapas sa mga babag nga naglibot sa santuwaryo. Si bisan kinsa nga masakpan nga nagbuhat sa ingon angay nga mobasol sa kaugalingon sa iyang kamatayon nga mosunod” (Richard Neitzel Holzapfel, Eric D. Huntsman, Thomas A. Wayment, Jesus Christ and the World of the New Testament [2006], 160).

Human sa ikatulong misyonaryong panaw ni Pablo, ang pipila ka mga Judio sa Jerusalem mipasangil kang Pablo nga midala og mga Hentil lapas sa mga babag, nga misangpot sa kagubot ug sa kataposan sa pagdakop kang Pablo (tan-awa sa Numeros 1:51; Mga Buhat 21:27–29).

Mga Taga-Efeso 2:20. Nganong ang Simbahan ni Jesukristo gitukod sa apostoles ug mga propeta, inubanan ni Kristo isip ang ulohang bato sa pamag-ang?

Si Elder Jeffrey R. Holland sa Korum sa Napulog Duha ka Apostoles miingon niini mahitungod sa pundasyon sa Simbahan ni Kristo:

Sa panahon sa Bag-ong Tugon, sa mga panahon sa Basahon ni Mormon, ug sa mga moderno nga mga panahon kini nga mga opisyal mao ang pundasyon nga mga bato sa tinuod nga Simbahan, gipahiluna ug nakaangkon sa ilang kusog gikan sa bato sa pamag-ang, ‘ang bato sa atong Manunubos, kinsa mao si [Jesu] Kristo, ang Anak sa Dios’ [Helaman 5:12]. … Ang ingon nga pundasyon diha ni Kristo mao ug sa kanunay mao ang panalipod sa mga panahon “diin ang yawa mopadala sa iyang mapintas nga mga hangin, oo, ang iyang mga pana diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo.”

(Jeffrey R. Holland, “Mga Propeta, mga Manalagna, ug mga Tigpadayag,” Liahona Nob. 2004, 7)