Batan-ong babaye nga naglingkod sa panimalay nga nagbasa og mga kasulatan nga gilinyahan. (horiz)
Unsa ka kamasaligon sa imong abilidad sa pagpangita og kamatuoran diha sa mga kasulatan? Ang mga propeta nagtudlo sa mga kamatuoran nga nagagikan sa Langitnong Amahan alang sa atong kaayohan. Pananglitan, si Pablo nitudlo sa mga Santos sa Efeso og mga kamatuoran mahitungod sa pagbuntog sa kalibotan ug pagkahimong mas susama kang Jesukristo. Kini nga leksiyon gituyo aron tabangan ka nga makat-on unsaon pagpangita og mga kamatuoran gikan sa mga kasulatan nga makatabang kanimo sa imong kinabuhi ug magdala kanimo paduol sa Manluluwas.
Pagpangita og bili
Ang bidyo nga “Flecks of Gold” (3:15) bahin sa duka ka lalaki kinsa nangita og bulawan. Basaha ang istorya o tan-awa ang bidyo, anaa sa ChurchofJesusChrist.org, gikan sa time code 0:00 hangtod sa 2:26. Basaha ang sugilanon ug paghunahuna mahitungod sa bisan unsa nga espirituhanong mga leksiyon nga imong nakat-onan gikan niini.
Imahe
Opisyal nga hulagway ni Presidente M. Russell Ballard sa Korum sa Napulog Duha ka Apostoles, 2004.
Usahay sama kita sa batan-ong negosyante gikan sa Boston, kinsa niadtong 1849, sigon sa istorya, naagni sa pagpanguykoy og bulawan sa California. Gibaligya niya ang tanan niyang mga kabtangan aron sa pagpangita sa iyang swerte didto sa mga sapa sa California, nga giingon nga puno sa mga tibuok nga bulawan nga sa kadako ang usa ka tawo maglisod sa pag-alsa niini.
Human sa adlawng tanan, ang batan-on mituslob sa iyang ayagan diha sa sapa ug walay nakuha. Ang bugtong niya nga ganti mao ra ang nagtipun-og nga mga bato. Sa kahiubos ug kapurdoy, andam na siyang mohunong hangtod nga usa ka adlaw usa ka tigulang, hanas nga tigsuhid miingon kaniya, “Daghan na gayod nang mga batoha ang natigom nimo, dong.”
Ang batan-ong lalaki mitubag, “Wala may bulawan dinhi. Mopauli na lang ko.”
Naglakaw ibabaw sa nagtipun-og nga mga bato, ang tigulang nga tigsuhid miingon “O, tinuod gayod nga adunay bulawan dinhi. Kinahanglan lang nga makamao ka asa mangita niini.” Mipunit siya og duha ka bato ug gipakang kini. Usa sa mga bato nabuak, nagpakita og pipila ka pinong tipaka sa bulawan nga migilak sa hayag sa adlaw.
Nakamatikod sa nagbugol nga bag nga gihigot sa hawak sa tigsuhid, ang batan-on miingon, “Nangita ko og mga tibuok sama sa naa sa imong bag, dili kay pinong tipaka.”
Ang tigulang nga tigsuhid mitunol sa iyang bag ngadto sa batan-on, kinsa mitan-aw sa sulod, naglaom nga makakita og daghang tibuok nga bulawan. Natingala siya nga makita ang bag nga puno sa liboan ka pinong tipaka sa bulawan.
Ang tigulang nga tigsuhid miingon, “Dong, akong nakita nga busy kaayo ka nga nagpangita og dagkong buok nga bulawan nga wala na hinoon nimo masudli ang imong bag niining bililhon nga mga pinong tipaka sa bulawan. Ang mapailubong pagtigum niining pinong mga tipaka nagpaadunahan gayod kanako.”
Sa unsang paagiha kini nga sugilanon adunay koneksiyon sa pagpangita og mga kamatuoran sa mga kasulatan?
Basaha ang mosunod nga mga pamahayag, ug sukda gikan sa usa hangtod sa lima unsa ka tinuod kini sila alang kanimo (usa = dili gayod matinuod alang kanako; lima = kanunay nga tinuod alang kanako)
Ako masaligon sa akong abilidad sa pagpangita og mahangtorong mga kamatuoran sa mga kasulatan inubanan sa panabang sa Espiritu Santo.
Ang pagpangita og mga kamatuoran sa mga kasulatan usa ka panalangin sa akong kinabuhi ug nagtabang kanako nga mobati og kaduol ngadto sa Langitnong Amahan ug kang Jesukristo.
Pagpangita og mga kamatuoran diha sa mga kasulatan
Pipila ka mga kamatuoran sa mga kasulatan ang mas lisod pangitaon kaysa sa uban. Pagtinguha sa panabang sa Langitnong Amahan pinaagi sa Espiritu Santo aron tabangan ka nga maila ang mga kamatuoran sa mensahe ni Pablo ngadto sa mga Santos sa Efeso. Ang Espiritu Santo motabang kanimo pinaagi sa pagpamatuod kanimo niini nga mga kamatuoran (tan-awa ang Moroni 10:5; Juan 16:13).
Samtang si Pablo usa ka binilanggo ubos sa house arrest sa Roma, sila misulat ngadto sa mga Taga-Efeso aron pagdasig kanila ug tambagan sila mahitungod sa kon unsaon pagpadayon sa pagpahiduol kang Jesukristo ug unsaon pagbuntog sa espirituhanong mga pag-atake sa daotan. Pagbansay sa pag-ila sa mga kamatuoran gikan sa unsa ang gipakigbahin ni Pablo ngadto niining mga Santos.
Ang mosunod mao ang usa ka paagi nga imong mapangita ang mga mahangtorong mga kamatuoran diha sa imong pagtuon sa mga kasulatan. Basaha ang Mga Taga-Efeso 2:4–10, ug buhata ang mosunod nga mga lakang:
Pangita og mga pulong, mga hugpong sa mga pulong, o mga bersikulo nga daw labing importante kaayo. Ikonsiderar ang pagmarka niini diha sa imong mga kasulatan.
Ipamubo ang pinaka-unod nga ideya niining mga pulong, mga hugpong sa mga pulong, o mga bersikulo. (Pananglitan, mahimo ba nimong ipamubo ang unsa ang gisulti ni Pablo mahitungod sa grasya diha sa bersikulo 8?)
Pormaha unsa ang imong nakat-onan ngadto sa usa ka pamahayag sa kamatuoran nga imong magamit sa imong kinabuhi.
1. Tubaga ang mosunod nga mga pangutana diha sa imong journal sa pagtuon:
Unsa ang usa ka kamatuoran nga imong nakaplagan? Sa unsang paagi nimo naila kana nga gugma?
Sa unsang paagi kining kamatuoran makatabang kanimo nga mabati ang gugma sa Langitnong Amahan ug ni Jesukristo alang kanimo o matabangan ka nga mahimong mas susama Kanila?
Sa unsang paagi nimo nagamit o sa unsang paagi nimo magamit kini nga kamatuoran sa imong kinabuhi?
Pagbansay sa pag-ila sa mga kamatuoran
Gamita ang mga lakang nga nalista sa unahan. Pagpili og usa o duha sa mosunod nga mga set sa mga bersikulo, ug pangita og mahangtorong mga kamatuoran diha kanila.
Mga Taga-Efeso 4:20–32, lakip na ang Hubad ni Joseph Smith sa bersikulo 26 sa Giya ngadto sa mga Kasulatan (Mahimong makatabang ang pagkasayod nga ang “daang pagkatawo” niini nga mga bersikulo nagsimbolo sa karaang mga paagi sa pagpakasala ug nga ang “bag-ong tawo” nagsimbolo sa pagpuyo og usa ka matarong nga kinabuhi pinaagi ni Jesukristo.)
Pagpili og usa sa mga kamatuoran nga imong nakaplagan, ug pamalandongi sa unsang paagi kini makatabang kanimo aron mabati ang gugma sa Langitnong Amahan ug ni Jesukristo alang kanimo o makatabang kanimo nga mahimong mas susama Kanila.
2. Kompletoha ang mosunod diha sa imong journal sa pagtuon:
Gamit ang mga kapanguhaan nga anaa kanimo (papel, de kolor nga mga lapis, digital nga mga tool, ug uban pa), paghimo og usa ka poster nga mahimong ilakip sa For the Strength of Youth nga magasin. Ilakip ang mosunod sa imong poster:
Ang baroganan nga imong naila ug ang bersikulo sa kasulatan o mga bersikulo diin nimo kini nakit-an
Usa ka yanong larawan o drowing nga makatabang sa mga mobasa nga makasabot sa kamatuoran o maghulagway kon unsaon sa usa ka tawo paggamit niini nga kamatuoran sa ilang kinabuhi
Ipakigbahin ang imong poster sa imong pamilya o sa usa ka higala. Pangutan-a sila unsa ang ilang nakat-onan gikan sa poster, ug ipakigbahin ang imong mga hunahuna ug mga pagbati mahitungod sa kamatuoran nga gipasabot niini.
Pagpamalandong sa pagpangita og mga kamatuoran
3. Tubaga ang mosunod nga mga pangutana diha sa imong journal sa pagtuon:
Paghunahuna mahitungod sa imong kasinatian sa pagpangita sa mahangtorong mga kamatuoran diha sa mga kasulatan.
Sa unsang mga paagi nimo nabati nga nagmalamposon ka?
Unsa ang lisod?
Sa unsang paagi nga ang pagpangita sa mga kamatuoran nakatabang kanimo aron makita ang gugma sa Langitnong Amahan alang kanimo?
Sa unsang paagi nimo magamit ang unsa ang imong nakat-onan karon sa imong pagtuon sa kasulatan sa personal o sa pamilya?
Samtang nag-alagad isip usa ka sakop sa Unang Kapangulohan, si Presidente Dieter•F.Uchtdorf naghatag og kahulogan sa grasya sa Dios isip “ang balaang panabang ug gasa sa kalig-on pinaagi diin kita nagtubo gikan sa masalaypon ug may kinutobang mga tawo nga kita karon mao ngadto sa gihimaya nga mga tawo sa ‘kamatuoran ug kahayag, hangtod [kita] pagahimayaon diha sa kamatuoran ug [masayod] sa tanan nga mga butang’ [Doktrina ug mga Pakigsaad 93:28]” (“Ang Gasa sa Grasya,” Liahona, Mayo 2015, 107). Alang sa dugang nga kasayoran mahitungod sa grasya, mahimong basahon ang kompletong pakigpulong, anaa sa ChurchofJesusChrist.org.
Si Pablo nagtudlo nga kon kita mopili sa pagdawat sa ordinansa sa pagbunyag, kita nakigsaad nga tapuson ang atong karaan nga mga paagi (o “[hukason] … ang daang pagkatawo” [Mga Taga-Efeso 4:22]) ug sugdan ang usa ka bag-ong kinabuhi isip mga sumusunod ni Jesukristo (tan-awa ang Mga Taga-Roma 6:1–6; Doktrina ug mga Pakigsaad 20:37). Kini naglakip sa pagbiya sa atong mga sala ug bisan unsa nga makabalda kanato sa pagpahiduol ngadto sa Langitnong Amahan. Dili nato mahimo kini nga proseso sa atong kaugalingon lang. Kini nahitabo lamang tungod ni Jesukristo ug sa Iyang Pag-ula ug ang makabalaan nga impluwensiya sa Espiritu Santo.
